Balomɛ́ŋ 13
13
Ŋŋɔ́bina gá muhiligine muá gidɔŋ
1Ánaá mɔndɔ gidigid ubia ŋŋɔ́bina na muhiligine umúgódie bugaga buá guendenye muand, gá giagiá, muhiligine múóguólonin agá Uhaluá, umúnya guɔ́, úmuanyɛ údénígenyeé muɔ́. 2Gúu gɔ́g, udiábiá ŋŋɔ́bina na muhiligine, waáguala ɔduá gulal na muand umuɔ́ Uhaluá wámbanɔ́ áneé múbá. Bandɔ bá iduá gulal bɔ́nɔ́bígɔ́gɔn nusésényi uguɔ́b mbánan. 3Gúu gɔg, didigódi áneé didíne besúmbíbisan ginɛŋ igiɛ́ diálanɔ́ beseé, pɛ́ŋ uguá ginɛŋ igiɛ́ diálanɔ́ gilɔg. Ediédíne ihiligine a? Alá beseé, abia mpínényi yeg, 4gá giagiá, ihiligine hínyɛ gá buóli buá Uhaluá, híégínyiginye gá guala beseé. Ámála gɔg gilɔg, biá bugádɔ. Gá giagiá, búdibá gá gilé ugódionu nnyémél. Ihiligine hímésúdínyé bafalfál nsué, híágualan Uhaluá buóli gá díye bɔ́ ilúnd hiég. 5Gúu búnya beseé áneé dibia ŋŋɔ́bina, búdibá pɛ́ŋ na bugádɔ buá díne ilúnd, súsɔ́n gá gueleé, dilɛns gusaluna naá buá beseé naá buá gilɔg. 6Búnyɛ súsɔn gá busió buáguɔ́ núsuananaá lampɔ́. Ɔbɔ́gɔ́lɔnaá ŋŋúme ya lampɔ́, bányɛ ɔbɔɔ́ Uhaluá údúmanaá áneé, bábíágan bugaga gá buóli ubugányɛ. 7Ánaá núéŋen sig mɔndɔ ubúnya buég: Lampɔ́, bidɔ́bígina, bugádɔ na mpínényi, nuéŋen sig mɔndɔ ubúnígimanánaá neéneg.
Niɔya niá mpónyé yahɔ
8Nudibianɛ́n mɔndɔ ofín, búmábúdibá gínɔ́nɛ́n banuá na banuá, gá giagiá, uwɔyɔnɔ́ ndiméen, woóhónonye gigodi. 9Gúu bigodi gɔ́g ibínya áneé: Adianál gidáŋa, ɔdiɔ́nɔɔ́n, edienéeb, adianábísámɛ́ɛd buá sɔ́gá, na bigodi bímodi, bíábiánuna uguá nugálɔ unuɔ́ úmɔɔ́ŋ áneé, ɔnɔ́ya ndiméen wahɔ hana aŋuá mbánan. 10Gínɔ́nɛ́n gídiáguala sɔ́gá gilɔga, gíóhónonye gigodi. 11Nuálinsan ginɛŋ igiɛ́ dígódionu, ndénu, ginɛŋ giánɔ giá hunyɛg gíméeg. Hínen, gisódie gínyɛ mɔdɔg naánasɔ gudɔ́mb haná gímabá agaá dímaádáab Ginɔ́g giá Nsɔ́m. 12Budúg búganyɛ hádɛ, guɔ́m gúganyɛ gúnabál, ánaá díomb melélíe má mbíne amányá má Sátan, digɔ́l malaŋ ma bidí má gise amányá má Uhaluá. 13Ánaá díanda gindényé hana búnigimanaá áneé dianda na malaŋ má bidí má gise, dinihɛn muand muá bilɔg umúnya hana: Ɔlɔt, mbɔ́m, bidáŋa, na bilɔg biá bilɔŋ biá nsáŋ na yaág. 14Ándánánɔ gɔg hana Ɔgúná Yésuse Klístus, nudibíníhɛ́n gá muand muá nuɔ́l, nuala guɔyɛd guég.
ទើបបានជ្រើសរើសហើយ៖
Balomɛ́ŋ 13: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
