Balomɛ́ŋ 11
11
Uhaluá umesébíbisidie Íslayɛ́l
1Yoóguóhon gɔg áneé: Uhaluá umebíbísídíe buán buég a? Ɛ́ɛɛ́, búdibá nɔ́! Gá giagiá, yaŋuá mbánan yɔɔ́guɔ́bɔnɛn na Íslayɛ́l, nnyɛ uguá nugɔg nuá Áblahám, uguá Niguili niá Bɛŋɛsamɛ́ŋ. 2Uhaluá umesébíbisidie buán buég ubuɔ́ úmebué gueyid. Mbuen nuálinsan ubuɔ́ Ŋŋɔ́ŋɛ síɔ́yɔnɔ́ uguá yubu agaá Elí úmabídádá gá busió buá Íslayɛ́l agá eŋís ya Uhaluá: 3«Ɔgúná, bɔ́mɔɔ́n bebunebúné báhɔ obónd ebésélémendie ahɔd yɔ́b ya nsíb, mmesíen yaŋuá omoómi, báguamba guŋɔ́n.» 4Uhaluá umondinye yɔ́ gɔg áneé: «Mmabídígínɛ́n bandɔ abanúmɔndɔ duɔns dútíndádɔ nomue ebémesébédigunsiginin maná uhaluá Bál dunúnú.» 5Bilɔŋ bímomi, uguá ginɛŋ giá dabdab, binsénséne ibiɛ́ Uhaluá úmeyíd uguég guá magɔg, bínyɛ hɔ́. 6Búmabá gɔg uguá magɔg, tábɔ́ áneé búdibá uguá melélíe, gileé na gileé, búdibá andá magɔg. 7Búɔ́guɔya gɔg áneé giagɛ? Íslayɛ́l umasábia ubuɔ́ úmambá, késíe ɔbɔɔ́ Uhaluá úmeyíd bɔ́ bámabia. Mmába hana gá obólbóndeé, bɔ́mɔlɔbɛ́n na gulal guɔ́b, 8hana búnya ubúɔ́ŋɔ́n áneé: «Uhaluá umáal áneé gileénde giɔ́b gídiɔndúguɔ́bɔn, eŋís yɔ́b yadiandúguánan, idú siɔ́b sídiɔndúguɔ́bɔn guesiegén na behínen.» 9Dáfide wɔɔ́guɔya súsɔ́n áneé: «Ánaá nubáŋ nuɔ́b nuá gunyá núbá ulam, buoli, giásɛ giá gueleé báguan bónd bádáŋáab ubúnigimanaá nɔɔ́nɔb, 10ánaá eŋís yɔ́b yágua mbíne, bádianduguánan, bágíga gunsimine.» 11Yoóguóhon áneé, bayúdɛn bámaguá gá búmbúm a? Ɛ́ɛɛ́, búdibá nɔ́! Gá busió buɔ́b buá bigua, abádiabá bayúdɛn bámabia gidúgúne, gá guehidin yaág hiá Íslayɛ́l. 12Henyé gɔg áneé, mmába bigua biɔ́b bíbímeéŋin guísi bunɛ́m, mmába giáyína giɔ́b gíigímeéŋin abádiabá Bayúdɛn bunɛ́m, giagɛ igiánábídúmbanaá bánáganyɛ uguá gidúgúne bámuanyɛ gidigid? 13Yɔɔ́núɔyɔn gɔg banuá nudiabá bayúdɛn, nnyɛ medenyi ɔmɔɔ́ bámadɔ́m gá busió buá abádiabá bayúdɛn, yaábalaga hómohómue na buóli ubúnya buámɛ, 14uguá nubídágídɛ́n nuá guehidin yaág hiá ɔbɔɔ́ dínya manɔ́ŋ nɔɔ́nɔb yond ndúgúne bómodi. 15Ɛɛ́ɛ, mmába gɔg guseŋelidie bɔ́ búmabá gá busió buá nsémbie na Uhaluá na guɔ́m, guondosiond guɔ́b guánábá guólígie uguá nigué gá guond uguá nusɔ́da. 16Mmába gibéyi giá busió giá gilɛ́d gíɔ́guɔ́bɔnɛn na Uhaluá, giá gímomi igísíeneneé gíɔ́guɔ́bɔnɛn súsɔ́n neéneg. Iŋaŋ siá budɛ́ símɔ́bɔnɛn na Uhaluá, dúgasia súsɔ́n bíɔ́guɔ́bɔnɛn neéneg. 17Mmába gɔg bámasɔ́mb dúgasia bímodi, uguá bindúŋulényé, básisáyígɛn aŋuá adiabá wa bayúdɛn guɔ́, anyɛ hana núgasia nuá budɛ́ ubuɔ́ bɔ́dɔ́ŋɔnaá áneé olifié, ɔɔ́guɔ́bɔn súsɔ́n beseé na madáŋ má olifié ugányɛ. 18Buand buáguɔ́ ódiogódiónú áneé asíŋa dúgasia ibínya súmbásúmbá. Adibá wa bígide gisasɔ. Búdibá aŋuá abídúganaá uŋaŋ, gɔgaá, uŋaŋ húhúbídúganaá. 19Ala anyɛ wa guɔyɛd áneé: «Bámasɔ́mb dúgasia gá nséyíginye.» 20Búnyɛ meliŋ. Bámasɔ́mba biɛ́ gá giagiá, bímasábianan guágɔdɛ́m, gá busió buáhɔ buá guágɔdɛ́m égimbenú. Edibígídé gɔg gisasɔ. Bídédínyé pɛ́ŋ. 21Gá giagiá, mmába Uhaluá umasádándɔ́n dúgasia biá beseé, udianádándɔ́n aŋuá súsɔ́n. 22Bíyɛ́g haná Uhaluá údíyenyeé beseé weg na ilúnd hiég: Weéliŋenin abámaguá wond uguɔ́bɔnɛn aŋuá beseé. Ogódi áneé edúmbenye na guáganɛn ɔduá uguég guá beseé, eéndegú, bánásɔ́mb súsɔ́n hana núgasia. 23Bayúdɛn bómond gá guágan ɔdɛ́m, bénéséyíginye bɔ́ hɔɔ́m ɔhɔɔ́ bámabá nsuá. Gá giagiá, Uhaluá ugódi buŋaŋa buá guendeséyíginye bɔ́. 24Aŋuá, anyɛ núgasia nuá beseé nuá olifié wa mpɔ́m unuɔ́ Uhaluá úmasɔ́mb uwond gá séyíginye uguá olifié wa beseé umɔɔ́sɔ́diguɔ́bɔnɛn. Bayúdɛn gɔg, bányɛ dúgasia duá beseé duá olifié unyaá agúnánɔ: Ánaá núlɛns áneé Uhaluá wonónd gá séyíginye bɔ́ uguá budɛ́ ubúnya buɔ́b.
Gidúgúne giá Íslayɛ́l
25Beliméen, yaáguamba áneé nulɛns muand umuɔ́ Uhaluá úmanamb, gá gueleé nudibígɔ́l hana belins: Gidám giá buán giá Íslayɛ́l gíɔ́nɔ́lɔb kɔnduguɔ́b gueneg hana abádiabá bayúdɛn bánábianɔ́ gidúgúne. 26Ana nɔ́ Íslayɛ́l gidigid wanábianɔ́ gidúgúne hana Ŋŋɔ́ŋɛ síɔ́yɔnɔ: «Osódie wonoólín Siyɔ́ŋ, woólie buán buá Yɔ́kɔba muand muá biíle. 27Búbúnya ŋŋil ya bugúl iyɛɛ́ yanálanɔ́ nɔɔ́nɔb yónómólie bɔ́ bilɔga biɔ́b.» 28Gá busió buá Ginɔ́g giá Nsɔ́m, bányɛ babɛlɛ́bɛl, búédíyenye áneé, nuéŋimbe uguá ŋŋɔ́d, dimábíyigan uguá gueyid guá Uhaluá, weédúmbenye na guɔya bɔ́ gá busió buá mbíényi siɔ́b. 29Gá giagiá, mpuán ya magɔg na ndɔ́ŋínɛn umuɔ́ númadáŋáab agá Uhaluá, udiónduguondon na muɔ́. 30Nsuá, numɔsúguɔ́bɔnɛn Uhaluá, dabdab uyɔ, Uhaluá waánúán bulɔ́b, gá giagiá bayúdɛn bɔ́súguɔ́bɛ́n yɔ́. 31Bilɔŋ biáguɔ́, bámuanyɛ súsɔ́n bámal idú, dabdab Uhaluá, waán bɔ́ bulɔ́b, Uhaluá weédúmbenye na diánaán bulɔ́b uguá ginɛŋ igiɛ. 32Gá giagiá, Uhaluá umegimbé bandɔ gidigid uguá ɔduá gulal gá gueleé udíye bɔ́ bulɔ́b buég bámuanyɛ gidigid. 33Ndénu hana bunɛ́m buá Uhaluá búnya giod! Ndénu hana na nulinsa nuég na nugedie nuég múnya giandá! Ányá unyaá wa hulun ubuɔ́ Uhaluá úsámanagɔ́d? Ányá unyaá wa guɔ́b umuɔ́ úsámanagisa? 34Haná búnya ubúɔ́ŋɔ́n: «Ányá ulinsanaá nugedie nuá Ɔgúná? Ányá unyaá wa huá yɔ́ isɔ́ma? 35Ányá umeébué gubolie yɔ́ buand, gá gígan guosiondínyé yɔ́ buɔ́ egélém?» 36Gá giagiá, buá gidigid búóguólonin egég, búóguólonin uguég, búnyɛ buég. Ánaá nigúmi níbá na Uhaluá gá ságásagá. Anagányɛ.
ទើបបានជ្រើសរើសហើយ៖
Balomɛ́ŋ 11: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
