Málkus 13
13
Yésuse umódógínyé bandɔ gugad guá idúl
(Mat 24.1-3; Lúk 21.5-7)
1Hana Yésuse úmahámán uguá idúl, ebinene weg omodi uwɔyidɛn yɔ́ áneé: «Ehuínyihuínyi! Ndé binɔ́g biá adányɛ, binɔ́g biá duhág!» 2Yésuse uwondinye yɔ́ áneé: «Aábíyigan biandá biá duhág ibigányɛ a? Ta nidányɛ nímomi nídianándabá aga dɔbigina ugumɔn guá sɔ́gá, buand ubugányɛ búénébugig.»
3Haná Yésuse úmenédúgúmín agá ɔŋuɛnyɛ huá madɛ́ ɔmɔɔ́ bɔ́dɔ́ŋɔnaá áneé olifié mánya, nsíndisindia na idúl, Piéle, Sák, Sáŋa na Andlé, obóhún yɔ́ agá buáyɛ áneé: 4«Díɔ́yídɛ́n buginɛŋ ubuɔ́ búánábídúmbanaá na bunulinsa ubúénédíyenú ginɛŋ igiɛ́ muand umugányɛ múánámanaá.»
Magunsa má meyú
5Agányɛ gɔg hɔ́ Yésuse úmasɛɛ́d gá guɔyɔn bɔ́ áneé: «Nubídédínye áneé mɔndɔ udinúfúmíe. 6Giod giá bandɔ igíónóloneé na ɔhɛ́n huámɛ gíɔ́ya áneé: “Nnyɛ Bémeyíde!” Nɔ́ bénéfumenyeé giod giá bandɔ anagányɛ. 7Uguá ginɛŋ igiɛ́ núɔ́nɔ́bɔnaá gindɔmdɔm giá bidí mɔdɔg na ndán siá nsɔ́m siá bidí guonoólónín hádɛ, nudibiá bumbíla, búáguamba áneé ubugányɛ búésieg, búdibá gɔg búbúánábánɔ́ guman guá guísi. 8Buán búsogidie sɔ́gá buán gá bidí, bidɔŋ bíánánuanan bímuanyɛ na bímuanyɛ guísi gúénéyiŋkime uguá bidɔŋ bímodi, gúu nsan yánábánɔ́. Búánábá magunsa má giɔ́bíga giá bíén.»
9«Banuá gɔg nubídédínye, bénénúfudenye uguá biansɛ biá bisan naá uguá bigúl, bénúnúbe na bifáfína. Bénúfudenye agá eŋís ya ŋŋɔ́mɔna naá ya ifuŋ gámɛ gá busió, agányɛ núánábánɔ́ bamaáná bámɛ ɔgɔ́b gá busió, 10gá giagiá búáguamba áneé Ginɔ́g giá Nsɔ́m gíbue gíbíŋín uguá idú siá maán mem. 11Uguá ginɛŋ igiɛ́ bénénúgimbeneé gá guɛ́d naánanɔ uguá giansɛ giá bisan, nudibísésényé gá guamba dugálɔ duá gálɛ́ɛd gɔgaá, dugálɔ udúónónúólíne uguá ginɛŋ giáguɔ́ igigányɛ, nuhémie duɔ́ gá giagiá búdibá banuá nuanágálgalaá, búnyɛ Gileénde giá Budányɛ. 12Beliméen bánásílíganɛn gá meyú ma nigué, ta besíe bánála bilɔŋ bímomi na baán bɔ́b, baán bénébíségélidinye besíe bɔ́b gá guágan bɔ́ uguá nusésényi nuá nigué. 13Bandɔ bem bánánúbina gámɛ gá busió, gɔgaá mɔndɔ uwenésímbénú ambanɔ áneé weneg agá nsúgúdinye ya muand umugányɛ, ugányɛ wanábá aháŋánɔ.»
Manyanyɛ má kanda niáníná
(Mat 24.15-28; Lúk 21.20-24; 17.23; 21.8)
14Ánaá mɔndɔ uwanunanɔ́ wɔɔ́b buand ubuɔ́ yaŋuá Málkus yɔ́ŋɔnɔ́. Yésuse uwedúmbenye na guɔya áneé: «Nuanámáan Manyanyɛ má kanda niáníná dugumine agá hɔɔ́m ɔhɔɔ́ mádiabá mábá, abánunanɔ́ ánaá bɔ́b. Gúu, búánábánɔ́ áneé abánábánɔ́ agá Yudé, ánaá bɔ́bínɔhɔn bíídan uguá iŋuɛnyɛ, 15uwanábánɔ́ uguég guá ɔdɔ́nd huá giansɛ udisɔs gá bíŋín uguadá, gá gɔ́l muand gá guɛ́d na muɔ, 16uwanábánɔ́ uguá mesíge, udiond agá nihiá gá gɔ́l gihuya giég. 17Bagándɔ behum naá ebénéhúŋenyeé bánábá uguá bulɔ́b uguá mɔɔ́sɛ amagányɛ. 18Ánaá núbísógólonye gá gueleé muand umugányɛ múdibíal uguá ginɛŋ giá meségeyembé! 19Uguá mɔɔ́sɛ máguɔ́ bandɔ bɔ́nɔ́bígɔn giod, meyú mánábá giandá hómohómue gudɔ́mb ɔmɔɔ́ dímanyaá didilɛns diond dián guanagɔns haná Uhaluá úmáŋánán guísi guesieg dabdab. Bádianánduguán giɔ́bíga gímodi anagányɛ uguá mɔɔ́sɛ omóloneé. 20Búámábúdibá áneé Ɔgúná umenuŋ mɔɔ́sɛ ma giɔ́bíga máguɔ́, késíe ta mɔndɔ omoómi údiabá wa sɔ́d. Gúu úménuŋ mɔ́ gɔg gá busió buá bandɔ ɔbɔɔ́ úmeyíd áneé bábá bég.
21Mɔndɔ úmɔ́núɔyidɛn gɔg áneé: “Bíyɛ́g Bémeyíde uyɔ aga, ugúnya ana unó egéné nudiádáab guɔyɛd guég.” 22Babánbán bónólon bɔ́bídɔ́ŋɔn áneé bémeyíde na bilɔg biá bebunebúné bánádigan, bála biseyi na melélíe, gá gueleé alaála béfumie ta bebémeyíde. 23Banuá gɔg ánaá núbídédínye! Yoónúdógínyé buá gidigid.»
Guól guá Muɔ́n wa Mɔndɔ
(Mat 24.29-31; Lúk 21.25-28)
24«Uguá mɔɔ́sɛ máguɔ́ amagányɛ gɔg, egélém gá ginɛŋ giá giɔ́bíga, ɔhɛ́nyɛ húénéhué, ohóli húdianándabunya, 25Muódódi múénétúlúgen ugumɔn múguan eguísi, gúu súsɔ́n maŋaŋa amányá ugumɔn ménélígímineé. 26Agányɛ gɔg hɔ́ bánánánɔ́ Muɔ́n wa Mɔndɔ guesieg uguá gilɔ́nd na giod giá buŋaŋa na nigúmi.
27Wanádɔ́m gɔg bilúna uguá egéndu ya guísi eŋim éníhi na ɔduá na adág gá guɛ́d gudidé ɔbɔɔ́ Uhaluá úmeyíd.»
Nuhɔ́nhɔ́n nuá budɛ́ ubuɔ́ bɔ́dɔ́ŋɔnaá áneé figié
(Mat 24.32-36; Lúk 21.29-33)
28«Ánaá núɔ́b bunulinsa ubuɔ́ figié únúhuánaá: Númásián bígásia biég bítosimin, bínɔhɔn mpányɛ, numuɛ́nyɛ áneé ginɔ́g giá ginɛŋ gígányɛ mɔdɔg. 29Buand buáguɔ́ búmomi, banuá súsɔ́n nuánágánán muand umuɔ guesiegén numuɛ́nyɛ áneé guól guá Muɔ́n wa mɔndɔ gúganyɛ mɔdɔg, ugányɛ uguá eŋíd yanɔ ya biansɛ. 30Mmɔ́núɔyídɛ́n buɔ́, búnyɛ meliŋ nunam nuá dabdab núdienégué wɔ́s kandabá áneé muand umugányɛ mum múmésieg. 31Guísi na gumɔn múánádɔ́mb, gɔgaá dugálɔ duámɛ dúdianádɔ́mb.»
Ánaá núgíga mpunyá
(Mat 24.42; 25.13-15; Lúk 12.36-38; 19.12-13)
32«Ta mɔndɔ udiényi gɔg buɔ́sɛ, ta ginɛŋ, ta bilúna ibínya ugumɔn, ta muɔ́n pɛ́ŋ Baba. 33Ánaá núgúle, nudiɛ́d gá dunɔ́ gá giagiá nudiényi bugisigɛl buáguɔ́. 34Búánábá haná mɔndɔ uwiídanaá gá uŋand huá hádɛ, unihinɛn belibuóli bég nihiá weéŋin, sig mɔndɔ buóli buá síen guala, wɔyidɛn egíg buyal áneé ugíga mpunyá. 35Ánaá núgíga mpunyá gá gueleé nudiálinsan ginɛŋ igiɛ́ mɔndɔ wa nihiá únya wa guólósiond: Búnyɛ búábá na ginɛŋ lí? Na ɔdɛ́m huá budúg lí? Uguá dádɛ́d guá gidédi giá busió lí? Ugúnya ana na giámádá? 36Búdibá beseé áneé uménúsuluŋenye, unugégie gá dunɔ́. 37Buand ubuɔ́ yɔ́yɔnɔ́ ubuɔ yɔɔ́guɔya buɔ́ gánɔ banuá gidigid: Ánaá núgíga mpunyá!»
ទើបបានជ្រើសរើសហើយ៖
Málkus 13: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល