Matiós 25
25
Nsab siá mpúge na mmeŋe síad
1Niguili niá gumɔn gɔg nínyɛ mpónyé na mpúge na mmeŋe síad, isímɔgɔ́l mulámba muɔ́b gá guídanaádán na ɔnɛ́m. 2Ítánɔ uguɔ́b guá ɔlɔŋ símabianán nugedie, ítánɔ kanda meéne. 3Siá kanda meéne isíɔ́gɔ́l mulámba kanda mudódé muá kelesíne. 4Siá ítánɔ siá nugedie isíɔ́gɔ́l mulámba muɔ́b na mudódé muá kelesíne. 5Haná ɔnɛ́m úmagígá gá guól, dunɔ́ udúɔ́gɔ́l bɔ́. 6Na ɔdɛ́m huá budúg, ɔbɔ́b guhéhídinye áneé: «Ɔnɛ́m uyɔ umésieg! Hámánánɔ nuosigólíe yɔ́.» 7Ŋŋɔndɛ isigányɛ gɔg gidigid isíáhunyigan isíédímbígen mulámba muɔ́b. 8Ŋŋɔndɛ siá kanda meéne isíɔ́yidɛn siá nugedie áneé: «Díhuánánɔ kelesíne, gá giagiá mulámba muásɔ múganyɛ gá huén.» 9Siá meéne isíóndinye áneé: «Ɛ́ɛɛ́, udigeégueg naánasɔ naánanɔ. Idánánɔ agá beduísi nuɔnɔɔ́nd wanɔ.» 10Uguá gisigɛl igiɛ́ bámiídan gá guɔ́nd kelesíne, ɔnɛ́m uwesieg, abámabá mɔdɔg ebébíŋín neéneg uguá giansɛ giá nuɔ́ndɔ́n, ebébug giansɛ na nubune. 11Egélém, ŋŋɔndɛ siá kanda meneé isíésieg, isíɛ́d gá héhenye áneé: «Ɔgúnɔ́gɔ́n, ɔgúnɔ́gɔ́n díbúnín!» 12Gɔgaá, uwondinye áneé: «Uguá meliŋ yɔɔ́núɔyɔn buɔ́, ndinuényi.» 13Gulénénu gɔg, gá giagiá nudiényi ta buɔ́sɛ ta gisigɛl.
Nsab ya bedúmébi bádádɔ
(Lúk 19.12-27)
14«Ɛɛ́ɛ, búánábá súsɔ́n hana mɔndɔ úmiídán gá uŋand, uwɔdɔ́ŋɛ́ɛn belibuóli bég uweéŋin bɔ́ bunɛ́m buég. 15Uweéŋin omoómi bikɔ́ŋ bítánɔ, omódi bikɔ́ŋ bíandɛ, odódi gikɔ́ŋ gímomi, sig mɔndɔ uguég guá bíɔ́d, uwɛɛ́d gɔg gá uŋand. 16Umaábiá bikɔ́ŋ bítánɔ uwedúnúmin gá buóli, uwandabɔ́d bikɔ́ŋ bítánɔ. 17Buand búmomi naá umaábiá bikɔ́ŋ bíandɛ, uwandabɔ́d bikɔ́ŋ bíandɛ. 18Gɔgaá, umaábiá gikɔ́ŋ gímomi, uwɛɛ́d uwedíme guísi, uwanamb ŋŋúme ya ɔgúnɔ́gɔ́n weg. 19Giandá giá ginɛŋ gímaámadɔ́mb, ɔgúnɔ́gɔ́n wa belibuóli abagányɛ uwosiond, uwɛɛ́d gá hana bunɛ́m buég nɔɔ́nɔb. 20Umaábiá bikɔ́ŋ bítánɔ, uwakilɛn yɔ́, uwendehémie bikɔ́ŋ bítánɔ, uwɔyɛd áneé: “Ɔgúnɔ́gɔ́n, amampuá bikɔ́ŋ bítánɔ, ndé bítánɔ bímodi ibiɛ́ yaándábɔ́d.” 21Ɔgúnɔ́gɔ́n weg uwɔyidɛn yɔ́ áneé: “Búnyɛ beseé, anyɛ ginɔ́g giá edúmébi, anyɛ gilád giá edúmébi, aábá gilád gá baán bá muand, ŋŋedéníginye gá muá giod, ógún gásíbalaga na ɔgúnɔ́gɔ́n wahɔ.” 22Umaábiá bikɔ́ŋ bíandɛ uwakilɛn yɔ́ súsɔ́n, uwɔyɛd áneé: “Ɔgúnɔ́gɔ́n, amampuá bikɔ́ŋ bíandɛ, ndé bíandɛ bímodi ibiɛ́ yaándábɔ́d.” 23Ɔgúnɔ́gɔ́n weg uganyɛ gég áneé: “Búnyɛ beseé, anyɛ ginɔ́g giá edúmébi, anyɛ gilád giá edúmébi, aábá gilád gá baán bá muand, ŋŋedéníginye gá muá giod, ógún gásíbalaga na ɔgúnɔ́gɔ́n wahɔ.” 24Umaábiá gikɔ́ŋ pɛ́ŋ gímomi uwakilɛn yɔ́ súsɔ́n, uwɔyidɛn yɔ́ áneé: “Ɔgúnɔ́gɔ́n, mmalinsán áneé anyɛ gulal guá mɔndɔ, oóguoge hɔɔ́m ɔhɔɔ́ ásádigúna, aábáda hɔɔ́m ɔhɔɔ́ ésédibuhe, 25uguá bugádɔ, mmanánamb ŋŋúme yahɔ uguísi, ndé bunɛ́m buáhɔ búbúényé.” 26Ɔgúnɔgɔ́n uwondinye yɔ́ áneé: “Gilɔg giá edúmébi, esebísébi! Amalinsán áneé, yoóguoge hɔɔ́m ɔhɔɔ́ nsádinɛm, yaágúgan hɔɔ́m ɔhɔɔ́ nséndibuhé. 27Búmanigímán gɔg áneé aág ŋŋúme yamɛ agá níbídígina, gá guólósiond ŋŋégie áneé imémbíénin. 28Gɔ́lɔ́nɔ́n ŋŋúme yeg igányɛ nuéŋin ugódionu ŋŋúme síad. 29Gá giagiá, ugódionu bɔ́nɔ́híginɛn yɔ́, agányɛ wandabia gudɔ́mb gɔgaá, mɔndɔ udiógódionu, ta ubuɔ́ ugódionu, bɔ́nɔ́gɔ́l. 30Mmába hana gá gilɔg giá edúmébi igigányɛ, nɔhɔ́nɔ́n giɛ uguá mbíne ya nígadá, hɔ́ na mbíbaŋ na bíbanda bigelédu múánábanɔ.”»
Nugélényi nuá nsúgie
31«Muɔ́n wa mɔndɔ wonómónoól uguég guá nigúmi ɔlɔŋ na bilúna biég gidigid, wenédugumin egég gá igɔ́y hiá nigúmi. 32Maán gidigid mánábá amagúsígán egég gá busió, wanádándúna bandɔ hana egíg bidúg údándúnanɔ́ bidúmbúa na mbuínyi. 33Wanág bidúmbúa ɔmbɔ́g huég uhunɛ́m, mbuínyi ɔmbɔ́g huég uhudádɛ. 34Ofuŋ gɔg húɔ́nɔ́yidɛn abánábánɔ ɔmbɔ́g huég uhunɛ́m áneé: “Ógúnónónu, banuá ɔbɔɔ́ Síe úmasayɛ, nuasidáŋáab niguili iniɛ́ úmanúáŋánɛ́n agá gɔns guá guísi. 35Gá giagiá, nsan imanúma unuampuá gunyá, niída nímanúma unuampuá buand buá bíhuá, mmabá uŋenyi unuaŋíndígɛn. 36Mmabá nnúh gudɔɔ́ unuaŋág gisɔn, mmanúma unuasiŋán, mmabá uguá giansɛ giá mbíne unuasiŋán.” 37Bandɔ bá gindényé bónóndinye yɔ́ áneé: “Ɔgúná, nig dímoguoyé agaá ámanúma nsan, idiahuá buand buá bíhuá agaá niída nímanúma? 38Nig uyɔɔ́ ámabá uŋenyi idiagíndígɛn, nnúh gudɔɔ́ idiaguág bisɔn? 39Nig uyɔɔ́ ámanúma ugúnya ana ámabá uguá giansɛ giá mbíne idiasiguán?” 40Ofuŋ húónóndinye bɔ́ gɔg áneé: “Uguá meliŋ, yɔɔ́núɔyɔn buɔ́, ginɛŋ gidigid igiɛ́ númal buɔ́ ta gá maná muúŋayɔ omodi uguɔ́b guá ɔlɔŋ, bámuanyɛ abánya beliméen bámɛ, búnyɛ yaŋuá númala buɔ́.” 41Wɔnɔ́yidɛn abánábánɔ ɔmbɔ́g huég uhudádɛ áneé: “Banuá nunyaá ɔbɔlɔmɔ́n, idánánɔ hádɛ naánamɛ, agá yoógi hiá ságásagá ihiɛ́ Síe wamɛ úmaŋánán gá busió buá abɛlɛ́bɛl na bilúna biég. 42Gá giagiá, nsan imanúmá numasáŋafɛn, niída nímanúmá numasámpuá buand buá bíhuá. 43Mmabá uŋenyi numasáŋíndígɛn, nnúh gudɔɔ́ numasáŋág gisɔn, mmanúmá iyond iyabá uguá giansɛ giá mbíne numasásiŋán.” 44Bámuanyɛ súsɔ́n bónóndinye áneé: “Ɔgúná, nig uyɔɔ́ nsan ímanúma ugúnya ana niída iniánúma, nig uyɔɔ́ ámabá uŋenyi ugúnya ana nnúh gudɔɔ́, nig uyɔɔ́ ámanúma ugúnya ana ámabá uguá giansɛ giá mbíne kandabá áneé dimásiguán?” 45Gúu wonóndinye bɔ́ áneé: “Uguá meliŋ, yɔɔ́núɔyɔn buɔ́, ginɛŋ gidigid igiɛ́ númasúgual ta gá muúŋayɔ omoómi uguɔ́b guá ɔlɔŋ, tábɔ́ áneé ta yaŋuá, numasáŋal buand.” 46Abagányɛ, bánɛ́d uguá nusésényi nuá ságásagá, bandɔ bá gindényé bánɛ́d agá nusɔ́da nuá ságásagá.»
ទើបបានជ្រើសរើសហើយ៖
Matiós 25: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
