Matiós 18
18
Unyaá giyáŋáŋá uguá Niguili niá gumɔn
(Mál 9.33-37; Lúk 9.46-48)
1Uguá gisigɛl igigányɛ, bebinene abákilɛn Yésuse bámuanyɛ gég áneé: «Ányá gɔg unyaá giyáŋáŋá uguá Niguili niá gumɔn?» 2Uwɔdɔ́ŋɛ́ɛn muúŋayɔ, uwedélíminye yɔ́ ɔgɔ́b gá ɔdɛ́m na ɔdɛ́m, 3úmuanyɛ áneé: «Meliŋ mbánan, yɔɔ́núɔyɔn núménudinúgíe súsɔ́n nuond hana biayɔ, ɛ́ɛɛ́, nudienébíŋín uguá Niguili niá gumɔn. 4Uwonóbíondienú bugídígíd hana muúŋayɔ uyɔ, únyaá giyáŋáŋá uguá Niguili niá gumɔn. 5Ugíndíganaá muúŋayɔ hana ugányɛ uguámɛ guá ɔhɛ́n, wáŋíndígan yaŋuá mbánan.»
Gisilidine
(Mál 9.42-48; Lúk 17.1-2)
6«Gɔgaá, mɔndɔ unyaá wa gusinye ta muúŋayɔ omoómi uguá ɔlɔŋ huá ibíŋádábanaá hana uyɔ uguá gifal, búnyɛ beseé gég áneé bágɔ́d yɔ́ giandá giá nidányɛ uguá ugelu bónombín yɔ́ agá oŋímb huá máŋ. 7Meyú na bandɔ abálanɔ́ áneé bɔsɔ́gá báguan! Ɛɛ́ɛ, búánigimanan áneé bábá, gɔgaá meyú gá busió buá mɔndɔ uyɔɔ́ gídúmbaninaá! 8Mmába búnyɛ ɔmbɔ́g huáhɔ ugúnya ana nugɔ́nd nuáhɔ múmúdúmanaá gá gigua, sɔ́mb muɔ́ ond omb muɔ́ hádɛ naánahɔ. Búnyɛ beseé gáhɔ áneé ebíŋín uguá nusɔ́da na ɔmbɔ́g húmomi ugúnya ana na nugɔ́nd númomi, gudɔ́mb áneé bɔ́nɔh na imbɔ́g siáhɔ íhandɛ ugúnya ana na dugɔ́nd duáhɔ dúandɛ agá yoógi hiá ságásagá! 9Mmába niís niáhɔ nínígusenyeé, sɔ́gɔ́n niɛ́ omb niɛ́ hádɛ naánahɔ. Búnyɛ beseé gáhɔ áneé ebíŋín uguá nusɔ́da na niís nímomi gudɔ́mb áneé bɔ́nɔh agá yoógi hiá ságásagá na eŋís yahɔ áhandɛ!»
Gidúmbuá igímafɔm
(Lúk 15.1-7)
10Bídédínyénénu gá síŋa ta muúŋayɔ omoómi uguá ɔlɔŋ huá biayɔ ibigányɛ, gá giagiá, yɔɔ́núɔyɔn, bilúna biɔ́b bíédélímen kanda nidɔgíná agá eŋís ya Síe wamɛ unyaá ugumɔn. [11Gá giagiá, Muɔ́n wa mɔndɔ umoól gá sódie abámafɔm.] 12Banuá nuégedenye áneé giagɛ? Mɔndɔ úmabianan bidúmbúa edín átánɔ gímomi gíónd gífɔm, udigaánihɛn biá edín éníhi na bunyo na bíníhi agá ɔŋuɛnyɛ gá guɛ́d guamba igísafɔm a? 13Umaán giɛ́ gɔg, yɔɔ́núɔyɔn uguá meliŋ, waábalaga gá giɛ́ gudɔ́mb gá biá edín éníhi na bunyo na bíníhi ibímasábídifɔm. 14Gúu, Síe wanɔ unyaá ugumɔn údiɔya áneé ta muúŋayɔ omoómi ufɔm.
Guendie ndiméen wahɔ
15«Ndiméen wahɔ úmal gilɔga, idɛ́n yɔ́, agánɔ gá báandɛ endie yɔ́. Úmɔ́guɔ́bɛ́n, tábɔ́ áneé eméhigin yɔ́. 16Úméen guguɔ́bɛ́n, dɔ́ŋɛ́ɛn mɔndɔ omoómi ugúnya ana báandɛ, gá gueleé buónyi búbígɔ́d uguá ugelu huá bamaáná báandɛ ugúnya ana bádádɔ. 17Úméen guɔ́bɛ́n bɔ́, ɔyídɛ́n Gimbi giá beédébi bá Klístus, úméen guɔ́bɛ́n ta Gimbi giá beédébi bá Klístus, gɔ́l yɔ́ hana gindiádába, súsɔ́n hana eduísilampɔ́. 18Yɔɔ́núɔyɔn, búnyɛ meliŋ: buá gidigid ubuɔ́ núánágúdánɔ́ eguísi búánábígɔ́d ugumɔn. Guond ubuɔ́ núénéhulunenú uguísi búénébíhulun ugumɔn.»
Gubísógólonye ɔlɔŋ
19«Anagányɛ, yɔ́ndɔnúɔyɔn, uguísi, bandɔ báandɛ uguánɔ guá ɔlɔŋ, bámahám ugelu gá guɔŋɛn ta giagɛ, Síe wamɛ unyaá ugumɔn wanádáabɛ́n bɔ́. 20Gá giagiá, agá hɔɔ́m ɔhɔɔ́ bandɔ báandɛ ugúnya ana bádádɔ básabígúsígan uguámɛ guá ɔhɛ́n, nnyɛ ɔgɔ́b gá ɔdɛ́m na ɔdɛ́m.»
Giyibinina beliméen na beliméen
(Lúk 17.4)
21Piéle gɔg uwakilɛn Yésuse úmuanyɛ gég áneé: «Ɔgúná, ndiméen wamɛ úmáŋal giédie, nyibinɛn yɔ́ iŋand ínig? Gueg iŋand ítíndádɔ nomue a?» 22Yésuse uwɔyidɛn yɔ́ áneé: «Ndiɔ́guɔyɔn áneé iŋand ítíndádɔ nomue, gɔgaá, gueg iŋand edín ádádɔ na síad gá iŋand nɔ́ ítíndádɔ nomue. 23Nɔ́ búnya gá Niguili niá gumɔn, mpónyé hana ofuŋ uhúmamba áneé húhana bunɛ́m buég na belibuóli bég. 24Gá gɔns, obólín yɔ́ na mɔndɔ umaábianɛ́n yɔ́ giod giá ŋŋúme. 25Hana úmasábia buá guondie, ɔgúnɔ́gɔ́n uwodóŋínye bugaga buá gueleé bédué yɔ́ na ugányɛ weg na baán bég na muand gidigid umúmabá muég gá sua ofín huég. 26Edúmébi weg uwaguɛn yɔ́ agá dugɔ́nd, uwɔbɔmbiginɛn yɔ́ nudúg úmuanyɛ gég áneé: “Mbídémbídínyé, ŋŋasuɛn gidigid.” 27Ɔgúnɔ́gɔ́n weg uwán yɔ́ bulɔ́b, uwanihinɛn yɔ́ ofín huég uhugányɛ. 28Edúmébi ugányɛ umaágáhámán, uwaádán na ogúl weg umaábianɛ́n yɔ́ bikɔ́ŋ biá ŋŋúme edín átánɔ, uwegimbin yɔ́ agá ugelu, wɔɔ́da yɔ́ na bugaga wɔyɔn yɔ́ áneé: “Suá ubuɔ́ ámbianinaá!” 29Ogúl weg uwaguɛn yɔ́ gɔg agá dugɔ́nd, uwɛɛ́d gá bísógólonye yɔ́ wɔya áneé: “Mbídémbídínyé, ŋŋasuɛn.” 30Gɔgaá, sɔ́gá ugányɛ uwɔbiɔ́bɛn yɔ́, uwɔnɔnɔh yɔ́ uguá giansɛ giá mbíne, gueneg haná wánásuinaá yɔ́ ofín huég. 31Begúl bég bɔ́mɔɔ́mɔ́b ubúmabídúmban abábia giod giá mesígíl, abɛ́d ɔbɔ́nɔyídɛ́n ɔgúnɔ́gɔ́n wɔb buand gidigid ubúmabídúmban. 32Ɔgúnɔ́gɔ́n weg gɔg uwɔdɔ́ŋɛ́ɛn yɔ́, úmuanyɛ gég áneé: “ Gilɔg giá edúmébi, mmanihínɛ́n ofín huáhɔ gá giagiá omombísógólónyé. 33Aŋuá súsɔ́n aásábá wa guán ogúl wahɔ bulɔ́b bilɔŋ bímomi haná yaŋuá mbánan mmaguán bulɔ́b a?” 34Ɔgúnɔ́gɔ́n uwɔɔ́b gusugɛn hómohómue, uwadɔ́m yɔ́ uguá giansɛ giá giɔ́bíga, gueneg haná wánásuanɔ́ ofín huég gidigid. 35Sig mɔndɔ umádiyibínɛ́n ndiméen na ɔdɛ́m huég gidigid, nɔ́ Síe wamɛ unyaá ugumɔn wánánúalanɔ́.»
ទើបបានជ្រើសរើសហើយ៖
Matiós 18: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
