Lúkas 20
20
Ŋŋóhúnín ya bayúdɛn gá ihiligine hiá Yésuse
(Mat 21.23-37; Mál 11.27-33)
1Henyé, buɔ́sɛ búmodi, hana Yésuse úmabá uhuínyihuinye uguá idúl wond udógónye Ginɔ́g giá Nsɔ́m, na bagɔ́n bá bedúmbinusámb na belinsibigodi na bɔgɔ́ga ebésieg. 2Obóhún Yésuse áneé: «Díɔ́yídɛ́n uguá buhiligine ubuɔ́ álanɔ́ muand umugányɛ, Ányá uwaáhuá buhuligine buáguɔ́?» 3Yésuse uwondinye bɔ́ áneé: «Yaŋuá súsɔ́n ŋŋoónúóhún ŋŋóhúnín. Ánaá núŋɔyidɛn, 4giyuminye giá Sáŋa gíóguólonin ugumɔn lí uguá bandɔ?» 5Abɛ́d gá guamba uguɔ́b guá meéne bámuanyɛ na bámuanyɛ áneé: «Dímɔ́yɛd áneé “ugumɔn” Yésuse ugɔɔ́guɔyɛd áneé: “Gá giagɛ númánudiág ɔdɛ́m egég?” 6Dímóndinye gɔg áneé: “Uguá bandɔ, buán gidigid búgɔɔ́diɔ́n na dídúdan adányɛ, Gá giagiá buán búáguádáaban áneé Sáŋa umabá ebunebúné.”» 7Gúu bómondinye Yésuse áneé bédiényi hɔɔ́m ɔhɔɔ́ gíólonineé. 8Yésuse uwondinye bɔ́ áneé: «Ahá! Ta yaŋuá súsɔ́n ndigɔɔ́núɔyídɛn buhiligine ubúndúmanaá gá guala muand umugányɛ.»
Nsab ya boónónyi bá bemi
(Mat 21.33-46; Mál 12.1-12)
9Yésuse uwɔnduguɔyidɛn buán nsab iyɛ: «Mɔndɔ umagúná fínyi, uweéŋin bemi gá línda, uwɛɛ́d gá uŋand uhuɔ́ úmagígá guɔ́. 10Ginɛŋ giá guog gímeémég, uwadúmɛ́n bemi edúmébi gá guéleé báhuá yɔ́ buég budaŋ buá biogoge biá fínyi, gɔgaá bemi ebégimbin edúmébi ebénúbe yɔ́, ebégúgie yɔ́ imbɔ́g gudɔɔ́. 11Mɔndɔ wa mesíge uwandadɔ́m edúmébi odódi, bemi ebénúbé yɔ́, abásiga yɔ́ obónd ebégúgie yɔ́ imbɔ́g gudɔɔ́. 12Mɔndɔ wa mesíge uwadɔ́m edúmébi wa gádádɔ, bemi ebégimbin yɔ́ súsɔ́n abádában yɔ́ obónd abágúŋɛ́ɛd yɔ́. 13Ɔgúnɔ́gɔ́n wa mesíge uwabígálídɛn gɔg áneé: “Yal naánanyá? Ŋŋaádɔm muɔ́n wámɛ wa ɔdɛ́m. Úmuanyɛ, bɔ́gɔɔ́gɔ́l yɔ́ uguá udényi.” 14Gɔgaá bemi bámaámáan yɔ́ abɛ́d gá guɔya bámuanyɛ na bámuanyɛ áneé: “ Búnyɛ egíndigind. Ánaá diɔ́n yɔ́ diɔ́bɛ́n na bigínd.” 15Ebéhémie yɔ́ uguá mesíge má fínyi obónd ɔbɔ́n yɔ́. Ɔgúnɔ́gɔ́n wa mesíge wanáal gɔg giágɛ nɔɔ́nɔb? 16Wonól, wɔɔ́n abagányɛ bemi, wond weéŋin bodódi mesíge má fínyi.» 17Yésuse uwosólimin bɔ́ uwɔyidɛn bɔ́ áneé: «Giagɛ igiɛ́ Ŋŋɔ́ŋɛ isiɛ síɔ́yɔnɔ́: Nidányɛ iniɛ́ behégi bómomb nínímaáyɛ nidányɛ niá mbímba a? 18Mɔndɔ uwanáguinaá uguá nidányɛ inigányɛ níanáganda yɔ́, súsɔ́n uyɔɔ́ níánáguinaá níanáganda yɔ́.» 19Boóŋi na bagɔ́n bá bedúmbinusámb abámba gugimbin yɔ́ hɔ́nɔhɔ́, gɔgaá ebédine buán. Bɔ́mɔɔ́b beseé na beseé áneé gɔ́b gá busió Yésuse úmɔyɛ́d nsab igányɛ.
Buónyi buá lampɔ́ gá busió buá Sesál
20Abɛ́d gá bídíbenye Yésuse, abádúmɛ́n yɔ́ bandɔ ɔbɔ́bíɔyɔnɔ́ áneé bányɛ gindényé, gá dɔ́lígɔn yɔ́ na gimbinin yɔ́ uguég guá dugálɔ, gá gueleé bénédue yɔ́ agá ŋŋɔ́mɔna unyaá na ihiligine na buŋaŋa. 21Obóhún yɔ́ ŋŋóhúnín áneé: «Ehuínyihuínyi, diálinsan áneé aágálgal ond ehuínyihuinye beseé, odigódi nsala guond eéhuínyihuinye bandɔ ŋŋil ya Uhaluá uguá hómohómue. 22Diánigimanan na suanɛn Sesál lampɔ́ lí didianigimanan?» 23Haná Yésuse úmalɛns mamb mɔ́b, uwɔyidɛn bɔ́ áneé: 24«Ndíyénénu ŋŋúme imoómi. Gineéŋun igiɛ na ŋŋɔ́ŋɛ isiɛ múnyɛ muányɛ?» Obóndinye áneé: «Muá Sesál.» 25Uwɔyidɛn bɔ́ áneé: «Ahá gɔg, ondónyínyónú Sesál ubúnya buá Sesál, súsɔ́n Uhaluá ubúnya buá Uhaluá.» 26Ebédie gugimbin yɔ́ gá giédie giá nugálɔ agá eŋís ya buán. Gɔgaá, biondínyi ibigányɛ ibíádɔ́mb bɔ́ bugaga abáhádan.
Ŋŋóhúnín ya basadusiɛ́ŋ gá hám uguá gibɛ́l
(Mat 22.23-33; Mál 12.18-27)
27Agányɛ gɔg, nsánsáŋúlía siá basadusiɛ́ŋ isíákilɛn Yésuse. Basadusiɛ́ŋ bádiáguádáaban áneé bilɔ́ŋ bíánáháman uguá bibɛ́l. Obóhún yɔ́ áneé: 28«Ehuínyihuínyi, Mɔ́sɛsa umɔdíɔ́ŋɛ́ɛn áneé: “Mɔndɔ úmábia gisɔ́nd giég igísɔ́dɔ́ga ugándɔ, ugué ta gubíén muɔ́n, búgódi áneé gisɔ́nd gísíen gíɔ́ndɔ́nɔ́ndɔ́n na gisí giég gá bíénin yɔ́ baán.” 29Baán bá mɔndɔ bámabá gɔg bátíndádɔ nomue. Wa busió umɔɔ́dɔ́ga ugándɔ uwegué ta gubíén muɔ́n. 30Wa gáandɛ súsɔ́n uwɔdɔ́ga ugándɔ waáguɔ́, 31wa gádádɔ uwɔndɔdɔ́ga ugándɔ waáguɔ́. Ubúábial nɔ́ gá baán bem bátíndádɔ nomue, ebégué ta gubíén muɔ́n. 32Egélém ugándɔ súsɔ́n uwegué. 33Ahá gɔg, uguá buɔ́sɛ buá hám uguá gibɛ́l wanábá ugándɔ waányɛ? Gá giagiá bem bátíndádɔ nomue bɔ́mɔdɔ́gá yɔ́?»
34Yésuse uwondinye bɔ́ áneé: «Bandɔ ɔbɔ́bɔninaá na guísi uguɔ bɔ́guɔ́ndɔ́nɔndɔn. 35Gɔgaá, bandɔ abánigimanaá na hám uguá gibɛ́l bónd bábia nusɔ́da unuóloneé, bɔ́diɔ́guɔ́ndɔ́nɔndɔn. 36Búnyɛ áneé bádibánd ba gué, gá giagiá bányɛ hana bilúna. Bányɛ baán bá Uhaluá, gá giagiá bólígie uguá nigué báganyɛ uguá nusɔ́da. 37Mɔ́sɛsa mbánan umɔyɛ́d áneé ebeguén bónónd uguá nusɔ́da, uguá giána giá gidɔd igímabigá. Umɔyá buɔ́ uguá ginɛŋ igiɛ́ úmɔdɔ́ŋɔɔn Ɔgúná áneé: “Uhaluá wa Áblahám, Uhaluá wa Isák, Uhaluá wa Yɔ́kɔba.” 38Uhaluá udibá Uhaluá waá ebeguén, gɔgaá unyɛ Uhaluá waá ɔbɔgɔ́sɛ, gá giagiá, uguég bámuanyɛ gidigid bányɛ ɔbɔgɔ́sɛ.» 39Nsánsáŋúlía siá boóŋi isímabá hɔ́ isíɔ́gɔ́l nugálɔ gá guɔyɛd áneé: «Ehuínyihuínyi, amágálɛ́ɛd beseé.» 40Gá giagiá bámasándabianan buónyi buá guóhún yɔ́.
Na Bémeyíde na Dáfide
(Mat 22.41-45; Mál 12.35-37)
41Yésuse ɔwɔyidɛn bɔ́ gɔg áneé: «Naánanyá bánya bá guɔyɛd áneé Bémeyíde unyɛ muɔ́n wa Dáfide, 42henyé Dáfide mbánan wɔɔ́guɔya uguég guá yubu hiá bilɛ́l áneé: “Ɔgúná Uhaluá umɔyídɛ́n Ɔgúná wamɛ áneé: Dúgúmín ɔmbɔ́g uhunɛ́m huámɛ, 43gueneg haná yénéyenú babɛlɛ́bɛl báhɔ nidɔ́bígínɛ́n niáhɔ niá dugɔ́nd?” 44Dáfide gɔg wɔɔ́dɔ́ŋɔn yɔ́ áneé “Ɔgúná.” Naánanyá únya gɔg muɔ́n weg?»
Yésuse umásánsídɛn bandɔ gá busió buá belinsibigodi
(Mál 12.37-40)
45Yésuse uwɔyidɛn bebinene bég agá eŋís ya bandɔ gidigid ɔbɔ́mɔbídɔ́lígɔnɔn yɔ́ áneé: 46«Nubídédínye na belinsibigodi abándandaá na bidɔ́dɔ́lɔg biá bisɔn, abámbanɔ́ áneé bébígélígelie bɔ́ uguá biɔ́mbɛ, bédugumen uguá indig siá busió uguá bigúl naá uguá mɔdɔ́mb. 47Bɔ́ básaganɔ́ bisí bónd bébídíyenye áneé bóbísógólonye giod, gifudie giɔ́b gíánábá gulal nsesi.»
ទើបបានជ្រើសរើសហើយ៖
Lúkas 20: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
