Lúkas 10
10
Gudɔ́m guá bebinene edín ádádɔ na báad na báandɛ
(Mat 9.37-38; 10.7-16; Mál 6.8-11; Lúk 9.3-5)
1Egélém agányɛ, Yésuse uwendugueyid bandɔ edín ádádɔ na báad na báandɛ, uwebue gudɔ́m bɔ́ báandɛ báandɛ uguá bidɔŋ naá uguá bɔtísɔna ɔbɔɔ́ úmuanyɛ mbánan úmabá áneé waáguídan. 2Uwɔyídɛn bɔ́ áneé: «Guoge gúnyɛ giod, gúu belibuóli bánya bugédégédi. Ánaá núbísógólonye gɔg mɔndɔ wa buóli áneé udɔ́m belibuóli gég gá guoge. 3Ídánánɔ gɔg, banuá abagányɛ mmánúdɔ́m, nunyɛ hana baán bá bídúmbúa agá gimbi giá mbuá siá mpɔ́m. 4Nudiyugɛ́n ta buand, ta ŋŋúme, ta gibadá, ta bibɔ́gɔ́d, nudiélílén uguá ŋŋil gá mbígélíd.»
5«Uguá giansɛ igiɛ́ núnya nuá bíŋín, núɔyidɛn bandɔ abánya guɔ́ áneé bumbénu búbá náananɔ.» 6Mɔndɔ umabá hɔ́ unyaá na bumbénu, bumbénu buánɔ búdugumin uguég, mɔndɔ wa bumbénu úmádibá hɔ́, bumbénu buánɔ búósinúóndín. 7Nudugumin uguá giansɛ igigányɛ, nunyánan, nubíhuán ubuɔ́ bágánúhuánɔ, gá giagiá eŋelibuóli waánigimanan na bisuɛ́n biég. Nudibíŋén uguá sig giansɛ.
8Agá tísɔna uyɔɔ́ núságuɛ́d, bámánúgíndígɛn, nunyánan ubuɔ́ básánúhuá. 9Nuóndúgonye banúmanuma abánya hɔ́, nuɔyɔn bɔ́ áneé: «Niguili niá gumɔn nímésinuégin.» 10Gɔgaá, agá tísɔna uyɔɔ́ núságuɛ́d, béen gunúgíndígɛn, nuhám agá biɔ́mb nuɔyɛd áneé: 11«Ta gibudu giá tísɔna wanɔ igímádíládimɛ́n uguásɔ guá dugɔ́nd gigányɛ díméyiŋkidin gá núondinye. Nulɛns gɔg buɔ́ beseé na beseé áneé Niguili niá Uhaluá níésíeg.»
Bɔtísɔna ebéneneé guágɔdɛ́m
(Mat 11.21-23, 24)
12«Yɔɔ́núɔyɔn buɔ́ áneé, buɔ́sɛ ubuɔ́ Uhaluá wánásɔ́mbanɔ́ bisan, ilúnd hiég hídianábá giandá gá busió buá Sɔdɔ́m na Gɔmɔ́l haná híánábánɔ gá busió buá bandɔ bá tísɔna ugányɛ.»
(Mat 1.21-24)
13Kasɛ́ bubulɔ́b unyaá náanahɔ ana Kolasɛ́ŋ, naánahɔ súsɔ́n Bɛtsayída, búámábá áneé biseyi ibímábíalá agánɔ, bímabíalá nɔ́ súsɔ́n agá Tíl naá agá Sidɔ́ŋ, késíe bémebíŋín gá mbaŋana feké, bédugumen agá mɔdɔ́ gá núgie bilɔŋ. 14Ɛɛ́ɛ! Buɔ́sɛ búásúmba bisan, banuá súsɔ́n nuanábá uguá meyú gudɔ́mb má Tíl na Sidɔ́ŋ. 15Aŋuá gɔg, Kafalnawúm aábídága áneé bénébúlígie hádɛ ugumɔn a? Bibán bénésusie eguísi gueneg uguadá guá bunyɛ nnyɔlɛ. 16Yésuse uwɔnduguɔyidɛn bebinene bég áneé: «Mɔndɔ umɔ́núɔ́bɔnɛn, tábɔ́ áneé umɔ́ŋɔ́bɛn, mɔndɔ uménúen, tábɔ́ áneé uméŋen, uméen súsɔ́n mɔndɔ umaándɔ́m.»
Guosiond guá bébinene edín ádádɔ na báad na báandɛ
17Bebinene edín ádádɔ na báad na báandɛ obósiond na mefunde, bɔ́ya áneé: «Ɔgúná, dimóndóloŋimonye bilɔg biá bileénde na Ɔhɛ́n huáhɔ.» 18Yésuse uwondinye bɔ́ áneé: «Ɛɛ́ɛ, yaánán Sátan guenetúlúgén ugumɔn ugúnó hana balányá. 19Ndénu, mmanúhuá buŋaŋa buámánígán nnyɔ́g na ŋŋɛŋɛ, na buŋaŋa buá higenin abɛlɛ́bɛl, ta buand búmodi búdibá búénúsésídinye. 20Ta anagányɛ nudiɔ́bɔ́n beseé áneé nuéhigenin bilɔg biá bileénde, gɔgaá ɔ́bɔ́nɔ́n beseé áneé ihɛ́n siánɔ síganyɛ isiɔ́ŋɔ́n ugumɔn.»
Gudambunɛn baán bá biáyɔ: Na Síe na muɔ́n
(Mat 11.25-27)
21Uguá ginɛŋ giáguɔ́, buŋaŋa buá Gileénde giá Budányɛ ubúéŋin Yésuse ibal, uwebísenidinye na hiɛ́ gá guɔyɛd áneé: «Yébúlúgenye Baba, Ɔgúná wa gumɔn na guísi, gá giagiá amanambɛ́n begedigédi na belins buɔ́, agadambunɛn baán bá biayɔ, Baba anagányɛ ɔ́mɔyá áneé búbíál gáhɔ gá guɔyɛd. 22Baba umampuá buand gidigid, gúu ta mɔndɔ udiálinsan ányá unyaá Muɔ́n, búmábúdibá Síe, ta gulɛns ányá unyaá Síe búmábúdibá Muɔ́n na mɔndɔ uyɔɔ́ Muɔ́n únya wa guɔya gudambunɛn.»
Beseé wa bebinene
(Mat 13.16-17)
23Egélém gá dugálɔ udugányɛ, uwabígagalɛd bebinene bég gá guɔyidɛn pɛ́ŋ bámuanyɛ áneé: «Beseé na eŋís ayanánaá ubuɔ́ banuá nuánanaá! 24Yɔɔ́núɔyɔn buɔ́ gɔg áneé giod giá bebunebúné na giod giá ifuŋ bámambá guán buand ubuɔ́ banuá nuánanaá bámasúguán, abámba guɔ́b ubuɔ́ banuá núɔ́bɔnaá bɔ́mɔsúguɔ́b.»
Giandá giá Gigodi
(Mat 22.34-40; Mál 12.28-31)
25Elinsibigodi uwɔdɔ́lɛ́ɛg Yésuse gá gusinye yɔ́ na ŋŋóhúnín iyɛ áneé: «Ehuínyihuínyi, giagɛ igiɛ́ nnya wa gual mbádadáŋáab nusɔ́da nuá ságásagá?» 26Yésuse uwondinye yɔ́ áneé: «Giagɛ igínya igíɔ́ŋɔ́n uguá yubu hiá bigodi? Aáguanuna giagɛ guɔ́?» 27Uwondinye yɔ́ áneé: «Ɔyá Ɔgúná Uhaluá wahɔ na ɔdɛ́m huáhɔ gidigid, na bɔndɔ buáhɔ gidigid, na bugaga buáhɔ gidigid, na nugedie nuáhɔ gidigid, ond ɔya sɔ́gá wahɔ hana aŋuá mbánan.» 28Yésuse uwondinye yɔ́ áneé: «Omóndinye beseé. Alá anagányɛ anábádabia nusɔ́da nuá ságásagá.»
Nsab ya Ginɔ́g giá ɔdɛ́m giá maná basamalitɛ́ŋ
29Haná elinsibigodi úmambá gɔg gudíye bugindényé buég, uwoóhún gɔg Yésuse áneé: «Ányá gɔg unyaá sɔ́gá wamɛ?» 30Yésuse uwediginye nugálɔ, úmuanyɛ áneé: «Mɔndɔ omodi umonólín Yelusalɛ́m, wiídan Yelikó, uwaguɛn uguá imbɔ́g siá bahánd, ebégimbin yɔ́ ɔbɔ́hɔg muand muég gidigid, ebénúbe yɔ́ abánihɛn yɔ́ agányɛ mɔdɔg na nigué. 31Ubúábíal áneé edúmbinusámb wa Uhaluá uwonoólín uguá ŋŋil igányɛ, uwagíŋílɛd mɔndɔ ta gugɔ́l gisigɛl neéneg. 32Maná balefít uwonoól uwesieg agaá mɔndɔ úmabá, uwaán mɔndɔ, uwagíŋílɛd yɔ́, uwanandán hádɛ enéné, ta gugɔ́l gisigɛl neéneg. 33Maná basamalitɛ́ŋ, umiídan gá huég uŋand, uwadúmbɛ́n hɔ́ uwaán mɔndɔ, uwasɔs uguég guá abaŋabinúhá, 34uwakilɛn yɔ́, uwagɔns gulɔnda yɔ́, uwesugunen yɔ́ magɛ́b na megúd uguég guá mege, uwagúda yɔ́ mɔ́, uwedediminye yɔ́ uguég guá abaŋabinúhá, uwɛɛ́d neéneg uguá giansɛ giá benyi, uwɔndɔgɔ́l ginɛŋ neéneg. 35Umaágádɔ́mb na giamádá, uwɔsɔ́gɔ́ɔn bikɔ́ŋ biá ŋŋúme bíandɛ, uweéŋin mɔndɔ wa giansɛ úmuanyɛ gég áneé: kɔ́ ŋŋúme igányɛ esíen ɔ́lɔ́ndá mɔndɔ ugányɛ na yɛ, ɔ́mɔ́hígɛn ŋŋúme, yonógósiond yandansúa.» 36Gá guáhɔ guán gɔg uguá bandɔ abagányɛ bádádɔ, ulúm unyaá sɔ́gá wa mɔndɔ umaáguɛ́n uguá imbɔ́g siá bahánd? 37Elinsibigodi uwondinye áneé: «Búnyɛ mɔndɔ umɔɔ́gɔ́l gisigɛl giá lɔnda yɔ́.» Yésuse uwondinye yɔ́ áneé: «Ída ala súsɔ́n bilɔŋ biáguɔ́.»
Na Malía na Máta
38Bámaábanda uguá ŋŋil, ebéneg uguá gidɔŋ gímodi, gúu ugándɔ omodi ɔhɛ́n áneé Máta úmagíndígɛ́n bɔ́ egég gá nihiá. 39Umabianán gisɔ́nd giég ɔhɛ́n áneé Malía, umabínáŋásɛ́d agá dugɔ́nd duá Yésuse, ubídɔ́lígɔnɔn dugálɔ duég. 40Máta wala masɔ́m amámabá méfedifedie yɔ́. Uwonoól úmuanyɛ gég áneé: «Ɔgúná, búdíésésenye hana gisɔ́nd giámɛ gísánihinɛn masɔ́m yaŋuá omoómi a? Ɔyídɛ́n yɔ́ gɔg wesiŋígín ɔmbɔ́g.» 41Ɔgúná uwondinye yɔ́ áneé: «Máta, Máta, eébísésenye na giod giá muand igífedifedié gá gilé. 42Buand búmomi búnyɛ hɔ́ ubúnya beseé, buɔ́ Malía úségueyid, ta mɔndɔ udibá wa hɔgɛn yɔ́ buɔ́.»
ទើបបានជ្រើសរើសហើយ៖
Lúkas 10: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
