Sáŋa 20
20
Gibɛ́l gudɔɔ́
(Mat 28.1-10; Mál 16.1-8; Lúk 24.1-12)
1Buɔ́sɛ buá busió buá gɛnyɛ, túlúb na nulia mbíne, Malía wa gidɔŋ giá Magdala uwahám agá gibɛ́l, uwaán áneé bósoólie nidányɛ agá niíd niá gibɛ́l. 2Uwond na ɔdɛ́d gá guɛ́d guenegégíe Símune Piéle na ebinene ɔyɔɔ́ Yésuse úmɔyá giod, uwɔyidɛn bɔ́ áneé: «Bósoólie gilɔ́ŋ giá Ɔgúná uguá gibɛ́l didiényi buhɔɔ́m ubuɔ́ báságuág giɛ́.» 3Piéle na ebinene wa omoómi abáhám na ɔdɛ́d gá guɛ́d agá gibɛ́l. 4Bémedíne bámuanyɛ bem ɔlɔŋ gɔgaá, ebinene wa omoómi umedíne gunsáns gudɔ́mb Piéle uwebue gueneg agá gibɛ́l. 5Uwɔbíyɔŋimɛn uwaán biása ibiɛ́ bémemíŋe gilɔ́ŋ dɔbigina eguísi gɔgaá, umesébíŋín. 6Símune Piéle umeébinen yɔ́ umeémésieg, uwebíŋín uwaán biása dɔbigina, 7guond súsɔ́n gisɔn igiɛ́ bémemíŋé yɔ́ uguá ɔduá. Gisɔn igigányɛ gímasábá dɔbigina hɔɔ́m hómomi na biása gɔgaá, míŋémíŋé saáŋala, agá hɔɔ́m hódodi. 8Hɔ́ gɔg ebinene wa omómi, umeébue gueneg úmesibíŋín súsɔ́n uguá gibɛ́l, uwaán, uwaádáab. 9Ɛɛ́ɛ, uguá ginɛŋ igigányɛ bámasábá bɔ́mɔ́b Ŋŋɔ́ŋɛ imɔɔ́ya áneé Yésuse wanáhunyɛg uguá ebeguén. 10Egélém agányɛ, bebinene bá báandɛ abagányɛ ebégúg.
Malía wa gidɔŋ giá Magdala umaán Ɔgúná
(Mál 16.9-11)
11Malía umɔlɔb agá nígadá mɔdɔg na gibɛ́l usiana, umaágásiana uwɔbíyɔŋimɛn gibɛ́l, 12uwaán bilúna bíandɛ na bisɔn biá fuúm dugumine agá hɔɔ́m ɔhɔɔ́ bémebídíginye gilɔ́ŋ giá Yésuse, uyɔ gibéyi giá ɔduá, unó gibéyi giá dugɔ́nd. 13Obóhún yɔ́ áneé: «Iyaá, gá giagɛ ábaŋanɔ́?» Uwondinye áneé: «Bósoólie gilɔ́ŋ giá Ɔgúná wamɛ ndiálinsan buhɔɔ́m ubuɔ́ báságuág giɛ́.» 14Umaágágálgál anagányɛ uwabígagalɛd, uwaán Yésuse agányɛ delimine gɔgaá, umasálinsan áneé búmabá úmuanyɛ. 15Yésuse uwoóhún yɔ́ áneé: «Iyaá, gá giagɛ ábaŋanɔ́? Ányá uyɔɔ́ ámbanɔ́?» Úmuanyɛ ugedenye gilé áneé búmabá egíg wa mesíge, uwɔyidɛn yɔ́ áneé: «Ɔgúná, mmába aŋuá osóguólie gilɔ́ŋ ŋŋɔyidɛn hɔɔ́m ɔhɔɔ́ áságuág giɛ́ yɔnɔgɔ́l.» 16Yésuse uwɔyidɛn yɔ́ áneé: «Malía!» Uwabígagalɛd yɔ́, uwondinye na nubelé áneé: «Labuni» Anagányɛ gúnya áneé ehuínyihuínyi. 17Yésuse uwɔyidɛn yɔ́ áneé: «Edindúmbényé ginɛŋ! Gá giagiá mmanyɛ ndibúlɛ́ɛg ɔmbɔ́g huá Baba. Mmába hana gáhɔ, idá ɔnɔyidɛn beliméen bámɛ áneé: Yaábúlígan agá Síe wámɛ unyaá súsɔ́n Síe wánɔ, yaáguídan agá Uhaluá wamɛ unyaá súsɔ́n Uhaluá wánɔ. 18Malía wa gidɔŋ giá Magdala uwɔnɔyidɛn bebinene áneé: “Mmán Ɔgúná!” Uwɔyɔn bɔ́ ubuɔ́ úmɔyídɛ́n yɔ́.»
Bebinene bámán Ɔgúná
(Mat 28.16-20; Mál 16.14-18; Lúk 24.36-49)
19Uguá ginɛ́ŋ giáguɔ́ giá buɔ́sɛ buá busió buá gɛnyɛ, henyé bebinene bémedíne bandɔ bá ihiligine hiá bayúdɛn ebébíbugin uguá giansɛ, Yésuse uwoól uwasansalɛd ɔgɔ́b gá ɔdɛ́m na ɔdɛ́m, uwɔyidɛn bɔ́ áneé: «Ánaá bumbénu búbá naánanɔ!» 20Umaágágálgál anagányɛ uwedíye bɔ́ imbɔ́g siég na nundaánd, bámaámáan Ɔgúná obóhón na ibal. 21Uwɔnduguɔyidɛn bɔ́ áneé: «Ánaá bumbénu búbá naánanɔ! Hana Baba umaándɔ́m, yaŋuá súsɔ́n mmanúdɔ́m.» 22Uguá dugálɔ udugányɛ uwehúníd bɔ́ gihínyi giég, uwɔyidɛn bɔ́ áneé: «Ánaá núdáŋáab Gileénde giá Budányɛ! 23Mɔndɔ gidigid uyɔɔ́ núánáyibininaá bilɔga biég, Uhaluá wanáyibinɛn yɔ́, mɔndɔ gidigid uyɔɔ́ núénenú guyibinɛn bilɔga biég, Uhaluá súsɔ́n udianáyibinɛn yɔ́.»
Na Yésuse na Túmasia
24Túmasia, ebinene wa omoómi uguá ɔlɔŋ huá báad na báandɛ uyɔɔ́ bɔ́dɔ́ŋɔnaá áneé nibásia, umasábá nɔɔ́nɔb uguá ginɛŋ igiɛ́ Yésuse úmoól, 25Umeémésieg, bebinene bómodi ɔbɔ́yidɛn yɔ́ áneé: «Disaán Ɔgúná.» Gɔgaá, Túmasia uwɔyidɛn bɔ́ áneé: «Mmádián biési biá mpúŋa uguég guá imbɔ́g, mmádinɔdigɛn inaána hiámɛ uguá biési biá mpúŋa, mmádiág ɔmbɔ́g huámɛ uguég guá nundaánd ndibá wa guádáab.» 26Aga mɔɔ́sɛ mánímanyɛ, bebinene bámandábígúsɛ́ɛd uguá giansɛ, Túmasia umabá hɔ́, bibugín bímabá ibíbugén gɔgaá, Yésuse uwoól uwasansalɛd ɔgɔ́b gá ɔdɛ́m na ɔdɛ́m uwɔyɛd áneé: «Ánaá bumbénu búbá naánanɔ!» 27Uwɔyidɛn gɔg Tumásiá áneé: «Kilié inaána hiáhɔ, bíyɛ́g imbɔ́g siámɛ, kilié ɔmbɔ́g huáhɔ, nɔdígɛ́n huɔ́ agámɛ gá nundaánd, nihɛ́n guágan mpálɔ gɔgaá, ádáabán.» 28Túmasia uwondinye yɔ́ áneé: «Ɔgúná wámɛ! Uhaluá wámɛ!» 29Yésuse uwɔyidɛn yɔ́ áneé: «Búnyɛ hana amáŋán ámádáab a? Beseé naá abádáabanaá kanduguán.»
Onsib huá mbɔba ihiɛ
30Yésuse umandúgual giod giá biseyi agá eŋís ya bebinene bég ibídiábá ibíɔ́ŋɔ́n uguá mbɔba iyɛ. 31Gɔgaá, ibiɛ bímɔbíɔŋa gá gueleé núádáab áneé Yésuse unyɛ Klístus, Muɔ́n wa Uhaluá, númádáaban yɔ́, uguég guá ɔhɛ́n nubia nusɔ́da nuá ságásagá.
ទើបបានជ្រើសរើសហើយ៖
Sáŋa 20: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
