Sáŋa 2
2
Giseyi giá Yésuse giá busió
1Henyé, uguá buɔ́sɛ buá gádádɔ, budɔ́mb buá nuɔ́ndɔ́n búmabá uguá gidɔŋ igiɛ́ bɔ́dɔ́ŋɔnaá áneé Kána, uguá gibéyi giá guísi giá Galilé, noódíe wa Yésuse umabá hɔ́. 2Bɔ́mɔdɔ́ŋɛ́ɛn Yésuse súsɔ́n gá budɔ́mb buá nuɔ́ndɔ́n ubugányɛ na bebinene bég. 3Haná magɛ́b mámaman, noódíe Yésuse uwɔyɛd áneé: «Bádibánd na magɛ́b.» 4Gɔgaá, Yésuse uwondinye yɔ́ áneé: «Iyaá, giagɛ igiɛ́ áŋambanɔ́ na giɛ́? Gisigɛl giámɛ gímanyɛ gídiesieg.» 5Noódíe weg uwɔyidɛn bedúmébi áneé: «Ánaá núal buand gidigid ubuɔ́ úgɔɔ́núɔyidinaá.» 6Biandá biá biláma biá adányɛ bímabá hɔ́ bítíndádɔ, uguɔ́ bayúdɛn bámabá bádágan mimbi gá sulie bigua biɔ́b hana melélíe mɔ́b mɔ́yɔnɔ́, sig giláma gímabá gíábia balíta étín átánɔ. 7Yésuse uwɔyidɛn bɔ́ áneé: «Hónónyónónu biláma ibigányɛ na mimbi.» Obóhónye biɛ́. 8Uwɔnduguɔyidɛn bɔ́ áneé: «Dabdab, ánaá núbɔ́ŋ nuéneéŋin ɔgúnɔ́gɔ́n wa budɔ́mb.» Ebéneéŋin yɔ́. 9Uwɔɔ́bídɛn mimbi ɔmɔɔ́ Yésuse úméye magɛ́b. Umasámúnyan buhɔɔ́m ubuɔ́ amagányɛ magɛ́b mómonoólín, gɔgaá bedúmébi abámadág mɔ́ bámamúnyan, uwɔdɔ́ŋɛ́ɛn mɔndɔ umɔɔ́ndɔ́nɔ́ndɔ́n. 10Úmuanyɛ gég áneé: «Sig mɔndɔ agá budɔ́mb weébuen uhémie ginɔ́g giá magɛ́b, bandɔ bámámanabúmán ubédesihémie amányá maná beseé, aŋuá gɔg esegíŋe nnumpe guesieg uguá gisigɛl igiɛ!» 11Ndénu, giseyi giá busió giá Yésuse igiɛ́ úmal Kána uguá gibéyi giá guísi giá Galilé, uwedíye nigúmi niég, bebinene bég abádáab yɔ́. 12Egélém agányɛ, Yésuse uwedúnúg Kafalnawúm na noódíe na beliméen na bebinene bég gɔgaá, bémedúmbie pɛ́ŋ baán bá mɔɔ́sɛ hɔ́.
Yésuse waágúŋa beduísi muand uguá idúl
(Mat 21.12-17; Mál 11.15-17; Lúk 19.45-46)
13Páska wa bayúdɛn umasɛ́d mɔdɔg, Yésuse uwabúlɛɛ́g Yelusalɛ́m. 14Uwegégie beduísi mélúke, bidúmbúa na mbɛŋ siá nsɔŋ mbúlúa na benúgiŋúme básamanadágɛ́ɛg nionyi uguá idúl. 15Yésuse uwanɔg gɔg gifáfína na duoli, uwagúŋa beduísi mélúke na beduísi bidúmbúa uguá idúl. Uwetúlúne dubáŋ duá benúgiŋúme, ŋŋúme siɔ́b isíágasgas eguísi. 16Uwɔyidɛn beduísi mbɛŋ áneé: «Ólíonón siɛ́ gidigid, nudiesiéye giansɛ giá Baba giansɛ giá biɔŋɔ́n.» 17Bebinene ebébídúmudenye nugálɔ unúɔyɔnɔ́ áneé: «Ginɔ́nɛ́n igiɛ́ ŋŋódionu gáhɔ gá giansɛ gínyɛ giandá gíémbegesenye hana yoógi.» 18Bandɔ bá ihiligine hiá bayúdɛn ɔbɔ́gɔ́l gɔg nugálɔ gá guóhún Yésuse áneé: «Egeédídíye gilɛns gílúmúe igídídíyenyeé áneé ogódi buŋaŋa buá guala nɔ́?» 19Yésuse uwondinye bɔ́ áneé: «Gádánánɔ idúl ihiɛ, uguá mɔɔ́sɛ mádádɔ yond gá guediginye hiɛ́.» 20Bayúdɛn abagányɛ obóndinye gɔg áneé: «Idúl ihímɔdígɔ́l nnyɔ́m edín áhandɛ na ítíndádɔ gá hág, aŋuá asigálɛ́ɛd áneé ond gá guediginye hiɛ́ gá mɔɔ́sɛ mádádɔ a?» 21Gɔgaá, idúl ihiɛ́ Yésuse úmɔyá búmabá nuɔ́l nuég. 22Yésuse umaámáhám uguá gibɛ́l, bebinene bég ebébídúmudenye áneé umɔyá buɔ́ anagányɛ, abádáab Ŋŋɔ́ŋɛ na nugálɔ unuɔ́ Yésuse úmɔya súsɔ́n.
Yésuse weényi ɔdɛ́m huá mɔndɔ
23Haná Yésuse úmabá umanyɛ Yelusalɛ́m, uguá ginɛŋ giá budɔ́mb buá Páska wa bayúdɛn, giod giá bandɔ igíádáaban yɔ́ hana bámaánan biseyi ibiɛ́ úmala. 24Gɔgaá Yésuse umasábíágan ubugányɛ agá ɔdɛ́m, gá giagiá umalinsan bɔ́ gidigid. 25Umasábaŋa áneé bɔ́yidɛn yɔ́ buónyi gá busió buá mɔndɔ, umalinsan ubúnya agá ɔdɛ́m huá mɔndɔ.
ទើបបានជ្រើសរើសហើយ៖
Sáŋa 2: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
