Sáŋa 10
10
Nsab ya egígbidúg
1Yésuse uwɔyɛd áneé: «Uguá hómohómue, uguá hómohómue, yɔɔ́núɔyɔn buɔ́, áneé mɔndɔ udiébíŋénín agá niíd niá nubág nuá bidúmbúa gɔgaá, ubúlígɛn uguá nimás, ugányɛ mɔndɔ unyɛ uŋébi, úmuanyɛ súsɔ́n ginsiliŋaŋ. 2Gɔgaá, mɔndɔ ubíŋenineé agá niíd, ugányɛ unyɛ egígbidúg. 3Egígnubág weébunenin yɔ́ niíd niá nubág, bidúmbúa biég bíɔ́guɔ́bɔn ugelu huég, wɔɔ́dɔ́ŋɔn, sig gidúmbúa uguég guá ɔhɛ́n uhám na biɛ́. 4Úmémenehémie biɛ́ wɔ́s, wanda uguá busió bíbinen yɔ́ gá giagiá, bíényi ugelu huég. 5Bídibá biá binidin uŋenyi wa mɔndɔ, bíánábá gubínɔhɔnɛn yɔ́ áneé gubínɔhɔnɛn yɔ́, gá giagiá bídiényi ugelu huég.» 6Yésuse uwɔyidɛn bɔ́ nsab igányɛ gɔgaá, bɔ́mɔsúguɔ́b yɛ́ beseé na beseé. 7Yésuse uwɔnduguɔyɛd áneé: «Uguá hómohómue, uguá hómohómue, yɔɔ́núɔyɔn buɔ́, yaŋuá nnyaá niíd niá nubág nuá bidúmbúa. 8Bandɔ gidigid ebémebue gámɛ, bámabá beébi na binsiliŋaŋ gɔgaá, bidúmbúa bímɔsɔ́bídɔ́lígɛn bɔ́, 9yaŋuá nnyaá niíd niá nubág, mɔndɔ úmébíŋínin agámɛ, wanábia gisódie, wanábá ubíŋín uhám hana wɔ́yɔnɔ́, wanámba buand buá nyá. 10Uŋébi úmuanyɛ woóguólon pɛ́ŋ gá guéb, gá guɔ́n ugúnya ana gá húhie. Yaŋuá gɔg mmoól gá gueleé bandɔ bábia nusɔ́da, bábia nuɔ́ giod nsesi.»
11«Nnyɛ ginɔ́g giá egígbidúg. Ginɔ́g giá egíg bidúg gíódóŋonye nusɔ́da nuég gá bidúg biég. 12Mɔndɔ uwalanɔ́ buóli pɛ́ŋ gá ŋŋúme, udibá hómohómue egígbidúg, bidúg bídibá biég. Umánaán gimónd ubínɔh uyiy bidúg, gíbadiminɛn bidúmbúa gísésidie biɛ́. 13Mɔndɔ ugányɛ waáguala anagányɛ gá giagiá, waáguala buóli pɛ́ŋ gá ŋŋúme, udiɔ́gɔ́lɔn gisigɛl na bidúg. 14Yaŋuá nnyaá ginɔ́g giá egígbidúg, yaálinsan bidúmbúa biámɛ, bímuanyɛ súsɔ́n bíŋényi. 15Hana Baba unlinsanaá, yaŋuá súsɔ́n yaálinsan yɔ́, yoódóŋonye nusɔ́da nuámɛ gámɛ gá bidúmbúa. 16Nnyɛ andá na bidúmbúa biámɛ bímodi ibídiabá uguá nubág unuɔ, búánigimanan áneé yoól na biɛ́ súsɔ́n, bíɔ́nɔ́bɔn ugelu huámɛ bíond ɔlɔŋ húmomi na egígbidúg omoómi. 17Baba wɔ́ŋɔya gá giagiá yoódóŋonye nusɔ́da nuámɛ, gá guandabia nuɔ́ egélém. 18Ta mɔndɔ udibá wa gɔ́l nusɔ́da nuámɛ, gɔgaá, yódóŋonye nuɔ́ yaŋuá mbánan. Ŋŋódi buŋaŋa buá dóŋinye nuɔ́ na buŋaŋa buá guɔndɔgɔ́l nuɔ́, búnyɛ gibídína igiɛ́ mmabia guonoólín agá Baba. 19Dugálɔ udugányɛ udúánduguág masalasala uguá ɔlɔŋ huá ihiligine hiá bayúdɛn.» 20Giod uguɔ́b guá ɔlɔŋ gíɔya áneé: «Ugódi gilɔg giá gileénde, unyɛ ɔduɔ́duá, gá giagɛ núbídɔ́ligɔnɔnaá yɔ́?» 21Gɔgaá, bómodi bɔ́ya áneé: «Búdibá dugálɔ duá mɔndɔ ugódionu gilɔg giá gileénde. Abɛlɛ́bɛl unyɛ wa bun mɔndɔ wa mehegu eŋís a?»
Bémeén Yésuse
22Búmabá ginɛŋ giá meségeyembé, bandɔ bámalá budɔ́mb buá gisumie giá gihunya giá giansɛ giá Uhaluá Yelusalɛ́m. 23Yésuse umabá woól wond agá hɔɔ́m ɔhɔɔ́ bɔ́dɔ́ŋɔnaá áneé umbámbál huá bilál na mugɔn muá adányɛ muá Salomɔ́ŋ. 24Bandɔ bá ihiligine hiá bayúdɛn ebégéŋélidie yɔ́, ɔbɔ́yidɛn yɔ́ áneé: «Gueneg nig egégimbineé gubúlúgenye idɛ́m siásɔ? Mmába aŋuá anyaá Bémeyíde, díɔ́yidɛn agá budányɛ.» 25Yésuse uwondinye bɔ́ áneé: «Yɔɔ́mɔ́nɔ́núɔyidɛn gɔgaá, núdiáŋádáaban. Moóli ɔmɔɔ́ yálanɔ́ uguá ɔhɛ́n huá Síe wamɛ mɔ́guɔya buónyi buámɛ. 26Gɔgaá, núdiáguádaában gá giagiá, nudibá bidúmbúa biámɛ. 27Bidúmbúa biámɛ bíɔ́guɔ́bɔn ugelu huámɛ, yaálinsan biɛ́, bíémbinen, 28yaáhuán biɛ́ nusɔ́da nuá ságásagá. Bídianáhɔ́h, ta mɔndɔ súsɔ́n udiɔnɔ́mpɔgɛn biɛ́ uguámɛ guá ɔmbɔ́g. 29Síe wamɛ úmaámpuá biɛ́ unyɛ giandá gudɔ́mb buand gidigid, ta mɔndɔ udigódi buŋaŋa buá hɔg buand uguá ɔmbɔ́g huá Baba. 30Naánamɛ na Baba dinyɛ omoómi.»
31Bayúdɛn abándabáda adányɛ áneé bádúdan yɔ́ gá guɔ́n yɔ́. 32Gɔgaá, Yésuse uwɔyidɛn bɔ́ áneé: «Yeénúdíyenye binɔ́g biá melélíe guónoólín agá Baba, gá melélíe melúm gɔg núámbanɔ́ áneé núŋɔ́n gá mɔ́ na adányɛ?» 33Bayúdɛn obóndinye yɔ́ áneé: «Búdibá gá binɔ́g biá melélíe diámbanɔ́ áneé díguɔ́n na adányɛ, búnyɛ gá giagiá eféninifenin Uhaluá. Aŋuá anyaá mɔndɔ ɔbígɔ́lɔn hana Uhaluá.» 34Yésuse uwondinye bɔ́ áneé: «Mbuen búnyɛ ubúɔ́ŋɔ́n uguánɔ guá gigodi áneé Uhaluá wɔɔ́guɔya áneé nunyɛ bá uhaluá? 35Díálinsan áneé ta mɔndɔ udibá wa guólíe ubuɔ́ Ŋŋɔ́ŋɛ síɔ́yɔnɔ́. Henyé, Uhaluá umɔdɔ́ŋɔn bandɔ ɔbɔɔ́ úmagálgál gɔ́b áneé bá uhaluá. 36Yaŋuá, Baba umeŋeyíd uwandɔ́m eguísi, banuá nugálɛd áneé “weéféninifenin Uhaluá” gá giagiá, mmɔ́yɛd áneé nnyɛ Muɔ́n wa Uhaluá. 37Mmándiala melélíe má Síe wamɛ nudiŋádaáb. 38Gɔgaá, mmába yaáguala mɔ́, ta búbá áneé nudiáŋádáaban, ánaá nuádáab binɔ́g biá melélíe ibigányɛ gá gueleé nulɛns beseé na beseé áneé naánamɛ na Baba dinyɛ omoómi.» 39Bayúdɛn abánduguɛ́d gá guamba áneé bégimbin yɔ́ gɔgaá, uwɔsɔ́dúgɛn bɔ́. 40Yésuse uwandayɔg usaá huá Yuldɛ́ŋ agá hɔɔ́m ɔhɔɔ́ Sáŋa Eyumínyibandɔ umágɔns guyumenye uwagíga hɔ́. 41Giod giá bandɔ igíákilanɛn yɔ́ gíɔya áneé: «Sáŋa umasúgual giseyi gɔgaá, buá gidigid ubuɔ́ úmɔyá gá busió buá mɔndɔ uyɔ, búmabá hómohómue.» 42Agá hɔɔ́m ahagányɛ, giod giá bandɔ igíádáab yɔ́.
ទើបបានជ្រើសរើសហើយ៖
Sáŋa 10: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
