Melélíe 8
8
1Sól súsɔ́n umaádáabán áneé bɔ́n Etiɛ́nɛ.
Nusésényi nuá Gimbi giá beédébi bá Klístus nuá busió
Gugɔns buɔ́sɛ ubugányɛ, giandá giá meyú igíáguɛn Gimbi giá beédébi bá Klístus gidigid igímabá Yelusalɛ́m. Igíásálámand, bandɔ abídan uguá bibéyi biá guísi biá Yudé naá biá samalí, pɛ́ŋ Medenyi még mɔ́ mémesíen.
2Bandɔ ɔbɔ́bɔninaá Uhaluá abánaág Etiɛ́nɛ uguá gibɛ́l, abábaŋa yɔ́ kɔ́lɔ́dɔ́dɔ́. 3Mmába hana Sól, umambá gugad Gimbi giá beédébi bá Kilistus, wɛɛ́d ubíŋen uguá biansɛ, ugimben banúmɔndɔ na bagándɔ unɔhɔn bɔ́ uguá giansɛ giá mbíne. 4Beédébi gidigid abámasálámándán, abɛ́d bódógónyé Ginɔ́g giá Nsɔ́m giá nugálɔ nuá Uhaluá hɔɔ́m gidigid.
Nugálɔ nuá Uhaluá uguá gidɔŋ giá Samalí
5Fílibe umédúnúg gá guɛ́d agá tísɔna omodi wa Samalí, gá sesenye buónyi buá Bémeyíde. 6Biíŋ uguá ugelu húmomi, bímádáabán dugálɔ duá Fílibe, gá giagiá, bímabá bíɔ́bɔn bíónd bíánan biseyi ibiɛ́ úmabá wala. 7Gá giagiá, bilɔg biá bileénde bímahámán uguá duɔ́l duá giod giá banúmanuma, bíhéhenye na magɔ́n, giod giá biŋándúnyá na bióŋi bíɔ́ndúgɔn súsɔ́n. 8Gúu giandá giá mefunde gímabá agá tísɔna ugányɛ. 9Mɔndɔ omodi ɔhɛ́n áneé Símune, umebué gubá agá tísɔna wa Samalí, umabá mbuísi, basamalitɛ́ŋ gidigid báyíka yɔ́. Umabá ugedenye áneé unyɛ giyáŋáŋá. 10Bandɔ gidigid, na bagɔ́n na biayɔ bébinen yɔ́, bɔ́ya áneé: «Mɔndɔ uyɔ unyɛ Buŋaŋa buá Uhaluá, ubuɔ́ bɔ́dɔ́ŋɔnaá áneé “Giandá giá Buŋaŋa.” » 11Bámabá bébinen yɔ́ giod, gá giagiá búmabá búganyɛ giandá giá ginɛŋ igiɛ́ bámayíká yɔ́ na biandá biég biá manyɛ. 12Gɔgaá, uguá ginɛŋ igiɛ́ bámág ɔdɛ́m uguá Ginɔ́g giá Nsɔ́m igiɛ́ Fílibe úmesesényé gá busió buá Niguili niá Uhaluá naá gá buá ɔhɛ́n huá Yésuse Klístus, na bagándɔ na banúmɔndɔ ebébíyumenye. 13Símune mbánan uwaádáab, uwebíyuminye, uwesíen agá buáyɛ buá Fílibe. Uwayíka giod haná úmaánán biandá biá biseyi na bilɛns ibímabíalá. 14Medenyi má Yésuse emémesíen Yelusalɛ́m mɔ́mɔɔ́mɔ́b áneé bandɔ bá Samalí bámágíndígɛ́n Nugálɔ nuá Uhaluá, amádúmɛ́n bɔ́ na Piéle na Sáŋa. 15Na Piéle na Sáŋa, bémeéméneg uguá Samalí, obóbísógólonye gá busió buá beédébi gidigid bá basamalitɛ́ŋ áneé bádáŋáab Gileénde giá Budányɛ. 16Ɛɛ́ɛ, Gileénde giá Budányɛ gímabá gímanyɛ gídisusɛ́n ta mɔndɔ omoómi uguɔ́b guá ɔlɔŋ, bámabá bámámánabia pɛ́ŋ giyuminye uguá ɔhɛ́n huá Ɔgúná Yésuse. 17Na Piéle na Sáŋa ɔbɔ́dɔ́bígɔ́n bɔ́ imbɔ́g, abádáŋáab Gileénde giá Budányɛ. 18Gɔgaá, Símune úmaámán áneé medenyi máhuánɛn Gileénde giá Budányɛ na dɔ́bígɔn guá imbɔ́g, uwambɛd áneé uhuá bɔ́ ŋŋúme úmuanyɛ gɔ́b áneé: 19«Mpuánánɔ súsɔ́n buŋaŋa ubugányɛ gá gueleé, bandɔ ɔbɔɔ́ ŋŋɔdɔ́bígɔnaá imbɔ́g, bádáŋáab Gileénde giá Budányɛ.» 20Gɔgaá, Piéle uwondinye yɔ́ áneé: «Ánaá naánahɔ na ŋŋúme yahɔ nuhɔ́h, haná émégedie áneé bɔ́guɔ́nda mpuán ya Uhaluá na ŋŋúme. 21Odigódi ta budáŋ, ta buónyi búmodi gá busɔ́m ubúbídúmbanaá aga, gá giagiá ɔdɛ́m huáhɔ húdibá gindényé agá busió buá Uhaluá. 22Bídún enúgie gɔg gilɔg giáhɔ giá nugedie ond obísógólonye Ɔgúná gá gueleé, mmába unyɛ wa yibinɛn gá bugilɔg buá nugedie ubuɔ́ ámabia. 23Ɛɛ́ɛ, yaáguánan áneé ɔdɛ́m huáhɔ húnyɛ uhuhílígén nsesi na gilɔga, anyɛ súsɔ́n giɔ́lɛ giá gilɔga.» 24Símune uwondinye na piéle na Sáŋa áneé: «Banuá mbánan, bísógólónyónón Ɔgúná gámɛ gá busió, gá gueleé buand ubuɔ́ núsɔ́guɔyɛd búdiŋegín.» 25Na piéle na Sáŋa, bámaámáman guɔya buónyi ubuɔ́ bényénú gá busió buá Ɔgúná na dógonye Ginɔ́g giég giá Nsɔ́m, obónd Yelusalɛ́m. Uguɔ́b guá ŋŋil, ebésesenye Ginɔ́g giá Nsɔ́m uguá giod giá bidɔŋ biá Samalí.
Fílibe na giyáŋáŋá giá mɔndɔ giá gidɔŋ giá Etiopí
26Giluna giá Ɔgúná igíɔ́yidɛn Fílibe áneé: «Agaáguɛ́d uguá adág, uguá gibala igíólonineé Yelusalɛ́m gíídanɛn Gasá, gibala giaguɔ́ gínyɛ gudɔɔ́.» 27Fílibe uwedúmbie guɛ́d. Uguég guá ŋŋil, giyáŋáŋá giá mɔndɔ giá gidɔŋ giá Etiopí igímabá musámán umusásúnánɔ, ebídígínyi wa bunɛ́m buá Kandás, aŋúndága wa gidɔŋ giá Etiopí, umoól Yelusalɛ́m gá búlúgenye Uhaluá, 28dugumine uguadá guég guá gikálɛ́d wanuna yubu hiá ebunebúné Esayí, ugúgen egég gá nihiá. 29Gileénde giá Budányɛ igíɔ́yidɛn Fílibe áneé: «Idá enegégié gikálɛ́d igíné.» 30Fílibe uwɛɛ́d na ɔdɛ́d uwɔɔ́b mɔndɔ umaábá musámán umusásúnánɔ ugányɛ wanuna yubu hiá ebunebúné Esayí. Uwoóhún yɔ́ áneé: «Ɔɔ́guɔ́bɔn ubuɔ́ ánunanɔ́ a?» 31Mɔndɔ uwondinye yɔ́ áneé: «Naánanyá nnya wa guɔ́b mɔndɔ úmédiŋendényé?» Uwedúmbie guɔyidɛn Fílibe áneé ubúlɛ́ɛg uguá gikálɛ́d gá dugumin egég gá buáyɛ. 32Giseli giá Ŋŋɔ́ŋɛ igiɛ́ úmabá wanuna gímɔyá áneé:
«Umabá hana gidúmbúa igiɛ́ béndenyeé gá guɛ́d na giɛ́ agá niɔ́nɛ́n bidúg,
hana Muɔ́n wa gidúmbúa udiábaŋa agá eŋís ya mɔndɔ usúmbanɔ́ yɔ́ biɔyá.
Umɔsúguɔyɛd ta buand.
33Uguég guá bísusie umasábia mɔndɔ wa guágɛ́n yɔ́.
Ányá uwɔnɔ́yɔnɔ́ nunam nuég?
Gá giagiá bámasɔ́mb medúg még eguísi agá.»
34Mɔndɔ umaábá musámán umusásúnán uwoóhún Fílibe áneé: «Yoóbísógólonye, ebunebúné waágálgal gá busió buanyɛ? Gég mbánan lí ugúnya ana gá busió buá mɔndɔ odoódi?» 35Fílibe uwɔgɔl gɔg nugálɔ, uguélém guá ŋŋɔ́ŋɛ igányɛ uwɛɛ́d gá dógonyinye yɔ́ Ginɔ́g giá Nsɔ́m giá Yésuse. 36Haná bámɛ́d bánda, ebéneg agá hɔɔ́m ɔhɔɔ́ mimbi mámabá. Mɔndɔ ugányɛ uwɔ́yɛd áneé: «Ndé, mimbi ɔmɔ. Giagɛ igíényenyeé áneé ndáŋáab giyuminye? » [37Fílibe uwɔyidɛn yɔ́ áneé: «Mmába aáguádáaban na ɔdɛ́m huáhɔ gidigid, anyɛ wa bíyuminye.» Mɔndɔ gég áneé: «Yaáguádáaban áneé Yésuse Klístus unyɛ Muɔ́n wa Uhaluá.»]#8.37 Mubu múmodi múdigódi ɔlɔŋ uhuɔ. 38Mɔndɔ uwodóŋinye bugaga buá délíminye gikálɛ́d, bámuanyɛ bem báandɛ abásɔs, abɛ́d agá mimbi, Fílibe uweyuminye yɔ́. 39Bámaámáyɔg uguá mimbi, Gileénde giá Ɔgúná igíéségíninye Fílibe. Mɔndɔ ta guandaguán Fílibe. Gɔgaá, uwedúmbenye na ŋŋil yeg uguá ibal. 40Fílibe uwanabíán uganyɛ Asót, wɛɛ́d udógonye Ginɔ́g giá Nsɔ́m uguá bɔtísɔna gidigid ɔbɔɔ́ úmadúmbánɛ́n gueneg agá Sesalé.
ទើបបានជ្រើសរើសហើយ៖
Melélíe 8: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
