Melélíe 6
6
Gieyide giá bandɔ bátíndádɔ nomue gá gígin medenyi ɔmbɔ́g
1Uguá ginɛŋ giáguɔ́, gimbi giá bebinene gímabá gíguman, bayúdɛn abámagálgál nuglɛ́k abɛ́d gá gálgalɛn bayúdɛn abámagálgál nubelé, gá giagiá, uguɔ́b guá ɔlɔŋ, uguá ginɛŋ giá guaba gunyá, bámabá béhúgúlenye bisí. 2Gúu, medenyi má máad na máandɛ mɔ́mɔdɔ́ŋɛ́ɛn gigɔ́s giá bebinene gidigid ɔmɔ́yidɛn bɔ́ áneé: «Búdibá beseé áneé dinihɛn gusesenye nugálɔ nuá Uhaluá gá busió buá guaba gunyá. 3Beliméen, ambánánɔ uguánɔ guá ɔlɔŋ, banúmɔndɔ bátíndádɔ nomue abánya na nugedie na binɔ́g biá bilɔŋ, obóhónón na Giléende giá Budányɛ, didélíminye bɔ́ gá buóli ubugányɛ. 4Mmabá hana gásɔ, disíen pɛ́ŋ gá bísógólonye na sesenye Nugálɔ nuá Uhaluá.» 5Gimbi giá bebinene gidigid igíéliminye nugedie unugányɛ. Ebéyid gɔg Etiɛ́nɛ, Mɔndɔ umaábá ohónón na guágɔdɛ́m ohónón súsɔ́n na Gileénde giá Budányɛ, Fílibe, Polkɔ́l, Nikanɔ́l, Timɔ́n, Palmenás na Nikolá maná bá Antiós, umeébíŋín uguá giádáabɛ́n giá bayúdɛn. 6Oból nɔɔ́nɔb gɔg agá medenyi. Medenyi omóbísógólonye gɔ́b gá busió ɔmɔ́dɔ́bígɔn bɔ́ imbɔ́g.
7Nugálɔ nuá Uhaluá nuídan na bísesenye, gimbi giá bebinene gíguman nsesi Yelusalɛ́m. Giod giá bedúmbinusámb nuá Uhaluá igíéliminye guágɔdɛ́m uguá Yésuse.
Gigimbine giá Etiɛ́nɛ
8Etiɛ́nɛ, ohónón na magɔg na buŋaŋa, umabá wala bimué biá muand na biandá biá biseyi agá ɔdɛ́m na ɔdɛ́m huá buán. 9Gɔgaá, uguá masɔ́m amagányɛ, bandɔ bómodi bá gigúl, bɔ́bídɔ́ŋɔn áneé «Biɔ́lɛ ibiháŋánɔ. » Bámabá giseli giá bayúdɛn bá gidɔŋ giá Silɛ́n naá giá Alɛgsaŋdlí, giseli giá gímomi bayúdɛn bá gidɔŋ giá Silisí naá bá gibéyi giá guísi giá Así. Abɛ́d gá ségenye na Etiɛ́nɛ. 10Gɔgaá, bámasábá bá guɔ́d Etiɛ́nɛ gá giagiá, umabá ugálgal na nugedie unuɔ́ Gileénde giá Budányɛ gímeéŋen yɔ́. 11Ɔbɔ́bíɔ́nd gɔg bandɔ gá gueleé bɔ́yɛd áneé: «Disɔɔ́bɔn yɔ́ ufénínfenin na Mɔ́sɛsa na Uhaluá.» 12Ebédiginye bifɔgɔ́fɔg biá buán, bɔgɔ́ga na belinsibigodi ebégimbin Etiɛ́nɛ kanda ndán, abɛ́d neéneg agá idɔg ihigɔ́n. 13Ɔbɔ́ndɔbíɔ́nd bandɔ gá guɛ́d guanasúŋánɛ́n Etiɛ́nɛ áneé: «Mɔndɔ uyɔ udiésúgen gugálgalɛn gidányɛdányɛ giásɔ giá idúl na gibídína giá Mɔ́sɛsa!#6.13 Búnyɛ idúl hiá bayúdɛn ihínya Yelusalɛ́m, án súsɔ́n Sáŋ 11.43, Yél 26.11. 14Dimɔ́b yɔ́ súsɔ́n wɔya áneé Yésuse, maná banasalonyɛ́ŋ, wanágad idúl wond unúgie melélíe ɔmɔɔ́ Mɔ́sɛsa úmedísín.» 15Bandɔ gidigid abámabá dugúmudúgúm agá idɔg ihigɔ́n obódin Etiɛ́nɛ eŋís, abán busió buég mpónyé naá buá Gilúna.
ទើបបានជ្រើសរើសហើយ៖
Melélíe 6: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
