Melélíe 24
24
Bayúdɛn béméfudie Póle
1Egélém gá mɔɔ́sɛ mátánɔ, edúmbinusámb wa ɔgúnɔ́gɔ́n Ananías uweneg Sesalé, umabá na bɔgɔ́ga bómodi na mɔndɔ uháŋaninaá agá nugélényi ɔhɛ́n áneé Tɛltulús. Bámiídan gá fudie Póle agá ŋŋɔ́mɔna Felígse. 2Ɔbɔ́dɔ́ŋɛ́ɛn Póle, Tɛltulús uwagɔns gɔg guɔyɔn Felígse gá busió buá Póle áneé: «Ndága ya ŋŋɔ́mɔna Felígse, diálinsan áneé uguá bumbénu ubuɔ́ dísɔ́dɔnaá ubuɔ, búóguólonin uguáhɔ, na núgenye uguɔ́ énúgenyeé muand gá beseé wa gidɔŋ giásɔ. 3Ndága ya ŋŋɔ́mɔna Felígse, gá busió buá muand gidigid umuɔ́ álanɔ́ umugányɛ, diágíndígan muɔ́ binɛŋ gidigid na hɔɔ́m gidigid, diáhuán giod giá mbíyigie. 4Gɔgaá, ndiáguamba gunímie ginɛŋ, buand buáguɔ́ ŋŋubísógólonyeé áneé, uguáhɔ guá ginɔ́g giá ɔdɛ́m, ɔdíbídɔ́lígɛn bugidigid. 5Dián áneé mɔndɔ uyɔ unyɛ ibad, weébuŋulenye meéne má bayúdɛn abánya uguísi gidigid. Muɛ́d, unyɛ ɔgúnɔ́gɔ́n wa bebíseŋelenye ɔbɔɔ́ bɔ́dɔ́ŋɔnaá áneé banasolenyɛ́ŋ. 6Waámágan guala muand múmodi umúdíyenyeé áneé udiédíne gidányɛdányɛ giásɔ giá idúl, gúu diégímbín yɔ́. [ Diábá áneé digélenye yɔ́ haná gigodi giásɔ gíɔ́yɔnɔ́, 7gɔgaá, Lisiás, ɔgúnɔ́gɔ́n wa ndíd ya nsénsi nuɔns weésímb ambanɔ gá hɔg yɔ́ uguásɔ guá imbɔ́g. 8Egélém, uwodóŋínye bugaga gá gueleé befudi bég bésibídíye agáhɔ gá eŋís.] Óhón yɔ́ agaábádalɛns áneé muand umuɔ́ díɔyɔnɔ́ gég gá busió múnyɛ meliŋ.» 9Bayúdɛn ebéliminye áneé búnyɛ nɔ́.
Gubíhɔgɔnhɔgɔn guá Póle
10Ŋŋɔ́mɔna uweéŋin gɔg Póle nugálɔ, uganyɛ áneé: «Yaálinsan áneé búganyɛ giod giá nnyɔ́m ányá esúmbibisan wa gidɔŋ giásɔ gidigid. Búnyɛ gɔg kanda bugádɔ ŋŋeébulenú gubíhɔgɔnhɔgɔn agáhɔ gá busió. 11Anyɛ wa bide buɔ́ aŋuá mbánan, búganyɛ buá bá mɔɔ́sɛ máad na máandɛ umɔɔ́ mmabúlɛ́ɛg Yelusalɛ́m gá búlúgenye Uhaluá. 12Ta uguá idúl, ta uguá bigúl, ta uguá tísɔna, mɔndɔ umanyɛ udiŋégíe nségenye muand na sɔ́gá, ugúnya ana ndídígen giíŋ áneé gíala idú. 13Bandɔ abagányɛ bádibá bá díye buand ubuɔ́ bémfudenyeé gá buɔ́ dabdab. 14Ubuɔ́ nlinsanaá, búbúényé: yeébínídín Ŋŋil iŋɔ́sɛ ya Uhaluá iyɛɛ́ bámuanyɛ bɔ́dɔ́ŋɔnaá áneé ebíseŋelenye. Gɔgaá, yaádúmába Uhaluá wa ndíndíl siásɔ yond yaádáaban muand gidigid umúnya uguá yubu hiá bigodi naá hiá bebunebúné. 15Ŋŋódi nubídágídɛ́n uguá Uhaluá, nubídágídɛ́n unuɔ́ ta bámuanyɛ bógódiónu, ta bandɔ bá gindényé, ta abánya mbágía, bánáháman uguá bibɛ́l. 16Buand buáguɔ́ mbíáganaá bugaga buá gueleé ɔdɛ́m huámɛ húbá uguá buhélélé agá busió buá Uhaluá naá buá bandɔ.
17Búganyɛ giod giá nnyɔ́m igiɛ́ ndiábá Yelusalɛ́m, gúu yósiond hɔ́ gá guéŋin buán buámɛ ŋŋúme, yond yeéŋin Uhaluá nusámb. 18Ndénu buand ubuɔ́ bémeŋégíe yala uguá idúl búbugányɛ. Yoónd iyabá gá giség giá gisuguna, giíŋ gímasábá, ta ombuŋíbuŋíe húmasábá. 19Gɔgaá, bayúdɛn bómodi guonoólín uguá gibéyi giá guísi giá Así bámabá hɔ́, bɔ́ bámabá bóguól agáhɔ gá busió, mmába muɛ́d bámabianán buand buá mfudie. 20Ugúnya ana, ánaá bandɔ ɔbɔ bɔ́guɔyidɛn buand buá gilɔg ubuɔ́ bámaán gámɛ gá busió agaá bámɛɛ́d naánamɛ agá idɔg ihigɔ́n. 21Mmedélímín agá ɔdɛ́m na ɔdɛ́m huá bɔdɔgdɔ́g iyɔyɛd ugelu ugumɔn áneé: “Búnyɛ gá busió buá gueleé yaáguádáaban guhám guá bilɔŋ uguá gibɛ́l nnya delimine gá nugélényi agánɔ gá busió?”» 22Haná Felígse úmalinsán buónyi buá Klístus beseé na beseé, uwondie gusɔ́mb guá gisan na gélém na guɔyɔn bandɔ ebémefudíe Póle áneé: «Lisiás, unyaá ɔgúnɔ́gɔ́n wa ndíd ya nsénsi nuɔns, ugoómól ŋŋebédenúgélenye.» 23Uweéŋin ɔgúnɔ́gɔ́n wa nsénsi edín átánɔ bugaga buá guondie Póle uguá giansɛ giá mbíne kanda magúda, unihinanɛn yɔ́ giásɛ gá gueleé begúl bég bádúmába yɔ́.
Mayɔ má Póle, na Felígse na ugányɛ weg Dlusíle
24Egélém gá baán bá mɔɔ́sɛ, Felígse uwoól na ugányɛ weg Dlusíle umaábá, ŋŋɔndɛ ya bayúdɛn. Uwadɔ́m bandɔ áneé bɔ́nɔdɔ́ŋɛ́ɛn Póle gá gueleé ubídɔ́lígɔnɔn dugálɔ udúbíyiganaá guágɔdɛ́m uguá Yésuse Klístus. 25Gɔgaá, haná mayɔ má Póle mámiídan uguá ŋŋil ya gindényé, na lɛns gumán ɔdɛ́m guá mɔndɔ, na guɔya súsɔ́n buónyi buá nugélényi nuá Uhaluá unuóloneé, Felígse uwɔɔ́b bugádɔ, úmuanyɛ gá Póle áneé: «Oógoguond, ŋŋelimb gudɔ́ŋɛ́ɛn uŋand húdodi.» 26Umabá ugedenye áneé Póle ugeéguéŋin yɔ́ ŋŋúme, buand buáguɔ́ úmabá udɔ́ŋɔn yɔ́ gá mayɔ binɛŋ gidigid. 27Duɔŋ dúandɛ dúmaámádɔ́mb, ebénúgie Felígse na Pɔlsiyús Festús. Haná Felígse úmamba gubá beseé agá eŋís ya bayúdɛn, uwanihɛn Póle uguá giansɛ giá mbíne.
ទើបបានជ្រើសរើសហើយ៖
Melélíe 24: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
