1 Kɔlɛŋɛtiɛ́ŋ 16
16
Nusámb gá busió buá bɔsɔ́gá
1Gá busió buá nusámb unuɔ́ núgálanɔ́ gá busió buá beédébi abánya Yelusalɛ́m, ánaá núbínen ŋŋil iyɛɛ́ mmádánɛ́n Bimbi biá beédébi biá Klístus Galasí. 2Buɔ́sɛ buá busió buá sig gɛnyɛ, mɔndɔ ugíŋígɛn ubuɔ́ úmábídígɛ́n gá gueleé bádigígan pɛ́ŋ buɔ́sɛ ubuɔ́ yónólonú gá gusá nusámb unugányɛ. 3Yonómól, yanádɔ́m ɔbɔɔ́ númeyíd na mbɔba gá guɛ́d gudóŋónyé nusámb nuánɔ Yelusalɛ́m, 4ta búóhon áneé yɛɛ́d yaŋuá mbánan, bánɛ́d naánamɛ.
Uŋand huá Póle
5Yanádúmbɛ́n uguá tísɔna wa Maseduán gá guól uguɔ́g, gá gueleé yenedúmbíe maná ginɛŋ guɔ́. 6Yenedúmbíe maná ginɛŋ, aláala ndúmbie meségeyembé naánanɔ, gá gueleé nuŋígin ɔmbɔ́g gá dúmbenye na uŋand huámɛ ta búbá áneé yaáguídanɛn hanyɛ. 7Búdibá pɛ́ŋ áneé yosinúondie eŋís gɔgaá, ŋŋígɛ́d maná ginɛŋ naánanɔ, mmába Ɔgúná wɔɔ́guɔya. 8Yanágíga Efɛ́s gueneg buɔ́sɛ buá Paŋtekót, 9gá giagiá yaábiá ginɔ́g giá ginɛŋ giá gual buóli ubúgehúmenú giod giá bibɔg, ta hana babɛlɛ́bɛl bánya giod. 10Mmába Timoté wonól, nubídédínye áneé usulugugie imbɔ́g gá gueleé waáguala buóli buá Ɔgúná hana yaŋuá. 11Ta mɔndɔ udisɛ́ŋ yɔ́, ánaá núgígenin yɔ́ ɔmbɔ́g áneé udúmbenye na uŋand huég uguá bumbénu gá gueleé wosiŋódín uguá mɔyɛ, yaágígan yɔ́ aga na beliméen básɔ. 12Gá busió buá ndiméen wasɔ Apolós yeédídígén yɔ́ giod áneé woól gibéyi giánɔ uguɔ́g na beliméen básɔ bómodi, udiáguamba guól dabdab, wonól wanámábia ginɛŋ.
Gusilidin guá nsúgie
13Ánaá núbá bandɔ, núbá bugaga núgíga mpunyá, núbá gilád uguá guágɔdɛ́m uguɔ́ númaág. 14Ánaá núala buá gidigid uguá ginɔ́nɛ́n. 15Beliméen, andá gusilidin gúmodi uguɔ: Nuálinsan áneé Stefanás na giansɛ giég giá bandɔ bábá biogoge biá busió uguá gibéyi giá guísi giá Akáyɛ, gúu bóbídóŋínye gá dúmába bɔsɔ́gá beédébi. 16Ánaá núɔ́bɔ́nɛn ninamɛ niá bubandɔ inigányɛ iníámbanɔ́ buóli buɔ́b na meyú mɔ́b. 17Yɔɔ́guɔ́bɔn ibal gá guólasiŋán uguɔ́ na Stefanás na Foltunatús na Akayús ból gá ŋŋaán, báŋal buand ubuɔ́ banuá gidigid nuasádibá nua gual gá hádɛ udidándúnánɔ́. 18Béŋediginye binam haná bénúédigenyeé banuá, ánaá núlɛns gugínyiginye ninamɛ niá bubandɔ inigányɛ.
Mbígélíd
19Bimbi biá beédébi bá Klístus bá gibéyi giá Así bénúbígélígelie, súsɔ́n na Akilás na Plisíl bémenúbígélídie na Gimbi giá beédébi bá Klístus gidigid igínya uguɔ́b guá giansɛ, bénúbígélígelie uguá ɔhɛ́n huá Ɔgúná. 20Beliméen básɔ gidigid abánya aga béménúbígélídíe, ánaá núbígélígelinye, nugɔ́lɔnɛn ŋŋuindi na bumbénu. 21Yaŋuá Pole yeénúbígélígelie na ɔmbɔ́g gá giagiá yaŋuá mbánan yɔɔ́ŋɔnɔ́. 22Mmába mɔndɔ udiɔ́guɔya Ɔgúná ánaá ubá ɔlɔmɔ́n! Malanáta Ɔgúná wasɔ woóguólon. 23Ánaá magɔg má Ɔgúná Yésuse mábá naánanɔ. 24Yɔɔ́núɔya banuá gidigid uguá búlada buá Yésuse Klístus.
ទើបបានជ្រើសរើសហើយ៖
1 Kɔlɛŋɛtiɛ́ŋ 16: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល