1 Kɔlɛŋɛtiɛ́ŋ 10
10
Nulinsa nuá Íslayɛ́l agá uhambɛ
1Beliméen, ndiáguamba áneé nnúnihɛn uguá mebúbe: igil híméhúgígén ndíndíl siásɔ gidigid, abáyugan máŋ bámuanyɛ gidigid. 2Bem wɔb ebéyumenye bɔ́ uguá ŋŋil ya Mɔ́sɛsa na uguá igil na uguá máŋ, 3bem wɔb abányánan gunyá gúmomi guá gileénde, 4bem wɔb abábíhuán mimbi mómomi má gileénde, gá gueleé bámabíhuán mimbi má nidányɛ niá gileénde inímabá níbinen bɔ́, nidányɛ inigányɛ nínímabá Klístus. 5Henyé gɔg áneé Uhaluá umɔsúguɔ́bɔ́nɛn bómodi abámabá uguɔ́b guá ɔlɔŋ beseé gɔ́b gá melélíe. Buand buáguɔ́ bilɔ́ŋ biɔ́b bímabá saáŋsululɔ agá uhambɛ. 6Muand umugányɛ múmabíala gá díhuá nulinsa áneé didibiá niída niá guala bifal haná ndíndíl siásɔ símalá. 7Nudibúlúgényé biaŋana haná bómodi bémebúlúgényé uguɔ́b guá ɔlɔŋ, Biŋɔ́nsa biá Ŋŋɔ́ŋɛ bíɔ́guɔya áneé: «Buán búmedúgúmín gá nyánan, búbíhuán egélém ubúádigɛn gá balaga.» 8Didibánán súsɔ́n biendéndi hana bɔsɔ́gá bómodi bámabá uguɔ́b guá ɔlɔŋ, uguá buɔ́sɛ búmomi ebégué duɔ́ns nítín na dúdádɛ. 9Dididɔ́lígɔ́n súsɔ́n Ɔgúná hana bómodi bámalá uguɔ́b guá ɔlɔŋ, nnyɔ́g isíadánan bɔ́, ebéguén. 10Gá súgie gɔg, nudioŋuínyóŋuínyi hana bómodi bámabá bóŋuinyoŋuinyi uguɔ́b guá ɔlɔŋ, mɔndɔ wa gihúhie uwehúhie bɔ́ wɔ́s. 11Muand umugányɛ múmegénín ndíndíl siásɔ gá díhuá nulinsa. Bɔ́mɔ́ŋa muɔ́ áneé múdíhuínyihuinye, basuá diganyaá mɔdɔg na mɔɔ́sɛ má nsúgie. 12Buand buáguɔ́ mɔndɔ ubíánanaá áneé unyɛ gindényé, ubídédínye áneé udiguá. 13Muɔ́bídɛ́n gidigid umuɔ́ núádánadánaá na muɔ́ múnyɛ uguá gindényé gá busió buá mɔndɔ. Uhaluá unyɛ gilád udibá wa guádáab áneé nubia yɔɔ́bídɛ́n ihiɛ́ núdiábá nua guɔ́d. Uguánɔ guá yɔɔ́bídɛ́n uguɔ́g, wánánúdándína ŋŋil ya hám wond unúhuá bugaga buá guɔ́d hiɛ́.
Nudiala búlada na bilɔg biá bileénde
14Buand buáguɔ́ nnúɔyɔnaá begúl bámɛ bá ginɔ́nɛ́n, bínɔ́hɔ́nínɔ́n biaŋana. 15Yaánúgálgalɛn hana bandɔ obógódionu nugedie, bíánánínánɔ banuá mbánan ubuɔ́ nnúɔyɔnaá, 16giboleé giá gisayɛ igiɛ́ díbíyigenyeé Uhaluá na giɛ́, gídibá giá búlada uguá manɔ́ŋ má Klístus a? Gilɛ́d igiɛ́ díbáyanɔ́, gídibá giá búlada uguá mmegu ya Klístus a? 17Haná gilɛ́d gínya pɛ́ŋ gímomi, basuá gidigid gɔg dinyɛ pɛ́ŋ nuɔ́l númomi gá giagiá, diányánan bem wasɔ gilɛ́d giáguɔ́ gímomi. 18Ánánánɔ baán bá Íslayɛ́l: Abányánanaá manyam ɔmɔɔ́ bósódóŋinye gá nusámb agá ahɔd ya nsíb, bádibá uguá búlada uguá ahɔd ya nsíb ayagánye a? 19Giagɛ igiɛ́ yámbanɔ́ guɔyɛd? Nuégedenye áneé bunyam ubuɔ́ bósódóŋinye gá nusámb gá súmbɛ́n biaŋana búnyɛ buand a? Ugúnya ana biaŋana bínyɛ buand a? 20Ɛ́ɛɛ́, hana béŋéneé balɛmb dusámb duɔ́b kenduguéŋen Uhaluá, ndiáguamba áneé nubílada na balɛmb. 21Nudibá nua bíhuán uŋand huáguɔ́ húmomi uguá gibóleé giá Ɔgúná naá uguá gibóleé giá balɛmb, nudibá nua nyánan uŋand huáguɔ́ húmomi agá nubáŋ nuá Ɔgúná naá nuá balɛmb. 22Ugúnya ana diáguamba guhúnígen yaág hiá Ɔgúná? Dinyɛ bugaga gudɔ́mb yɔ́ a?
Buá gidigid gá nigúmi niá Uhaluá
23«Buá gidigid búnyɛ beseé.» Gɔgaá buá gidigid búdiánígimanan. «Buá gidigid búnyɛ beseé.» Gɔgaá buá gidigid búdiáhaga. 24Ta mɔndɔ udiambá ɔmbɔ́d huég, gɔgaá huá bɔsɔ́gá. 25Núnyɛ nua nyánan muand gidigid umuɔ́ béduéneneé agá nionyi, ta guóhun gá busió buá gilɔg giá nugedie naá nuá beseé. 26Gá giagiá guísi na muand gidigid umúnya guɔ́ múɔ́guɔ́bɔnɛn na Ɔgúná. 27Mmába gindiádába gísɔnúdɔ́ŋɛ́ɛn, gúu núságuádáab guɛ́d hɔ́, nyánánánɔ buá gidigid ubuɔ́ básánúhuá konduguóhún gá busió buá gilɔg giá nugedie naá nuá beseé. 28Gɔgaá mɔndɔ úmɔ́núɔyidɛn áneé: «Búnyɛ bulɔ́g ubuɔ́ básásilɛ́ɛg gá nusámb.» Nudinyá buɔ́ gá busió buá mɔndɔ usánúasigɛn naá gá gilɔg giá nugedie naá nuá beseé, 29yaágálgal aga, búdibá gánɔ gá nugedie gɔgaá gá nuég. Gá giagɛ gɔg nugedie nuá saluna naá buá beseé naá buá gilɔg núnya nuá sɔ́mb gisan giá ibembi hiámɛ a? 30Mméŋin Uhaluá mbíyigie gá gunyá uguɔ́ nnyánanaá, gá giagɛ gɔg bánya bémfudenye gá ubuɔ́ nsáhuá Uhaluá mbíyigie? 31Ta búbá gɔg áneé nuányánan, ta búbá áneé nuábíhuán, ta búbá áneé nuá guala giagɛ, alánánɔ buá gidigid gá nigúmi niá Uhaluá. 32Nudigódi áneé nubá mɔndɔ unyaá wa gusie sɔ́gá, ta gá bayúdɛn, ta gá baglɛ́k, ta agá Gimbi giá beédébi bá Klístus bá Uhaluá. 33Anagányɛ gɔg yaŋuá muɛ́d mbíáganaá bugaga gá sɔ́dɔn beseé agánɔ gá eŋís gá muand gidigid, ndiáguamba pɛ́ŋ beseé wamɛ, gɔgaá beseé wa giod giá bandɔ gá gueleé bábá obósódiónu.
ទើបបានជ្រើសរើសហើយ៖
1 Kɔlɛŋɛtiɛ́ŋ 10: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល