Walumi 9
9
Mulungu na want'hu wake wa Izilaeli
1Hulonga kweli, nie ni mnt'hu wa Kilisito, na sikuhuna mbwi. Na Moyo wangu ukalongozwa na Muhe wa Mulungu ukulagisa mbuli ino. 2Nilonge kweli kuwa nina chiholo na mahenyeko makulu hayakumala mmoyo mmwangu, 3kwavila nilonda hata nie nibanangikilwe na kutengigwa na Kilisito kwaajili ya kuwataza want'hu wa kabila dyangu. 4Want'hu ao nio Waizilaeli wala Mulungu awasagule wawe wanake, kawagubulila ukulu wake, wakatenda malagano na akawenk'ha Malagilizo yake, na utogozi wa kweli na mbuli alongile nazitende. 5Ao Waizilaile nio wazukulu wa Ibulahimu, Isaka na Yakobo, nae Kilisito muna unt'hu wake, kalawa muulukolo wawe. Mulungu nio akulongoza vint'hu vose na atunyigwe siku zose bila nk'himelezo! Tawile.
6Sikulonga kuwa Mulungu kapotigwa kutenda yala alongile naatende. Kwavila ni Waizilaeli wadodo nio wana wa Mulungu. 7Hawakuwa weleko wa Ibulahimu kwavila waelekigwa nae, mbali gesa Mandiko ivoyakulonga kuwa, “Weleko wako naulawane na Isaka.” 8Ino ni kulonga kuwa, sio want'hu wose waelekigwe gesa wamwenga ivo wakwelekigwa ao nio wana wa Mulungu, mbali ni wala waelekwe kwa kukola kila alongile Mulungu ao nio wakuwazigwa kuwa wana wa Ibulahimu. 9Kwavila mbuli ailongile Mulungu ni ino, “Mwaka ukwiza chipindi gesa chino nanibwele, na iyo mkako Sala naeleke mwana wa chilume.”
10Vilavila sio ayo muhala, mbali vilavila Lebeka nae kwa beleko dimwe akaeleka wana waidi wachilume wa tata imwe, yaani Isaka, wasaho wetu. 11Mbali, ili Mulungu aoneke kuwa hakukikizigwa kusagula, hata wala wamwenga hawanaelekigwa na hata hawanamanya didamane na dihile, 12Lebeka kalongeligwa kuwa ila mwana andusile kwelekwa namsank'hanile ila akomeleze kwelekwa. Ivo ikulagisa kuwa Mulungu akuwasagula want'hu kulawana nayeye ivoakulonda, na sio kukola vila want'hu ivowakulonda. 13Gesa Maandiko ya Mulungu ivoyakulonga, “Yakobo nimbweda, mbali Esau simbwedile.” 14Ivo, chilongeki? Vino, Mulungu akutenda yehile? Bule! 15Kwavila kamulongela Musa, “Nanimuonele ubazi mnt'hu yoyote hulonda nimuonele ubazi na nanimuone ubazi mnt'hu yoyote hulonda kumuonela ubazi.” 16Ivo, yose yakusigamila ubazi wa Mulungu na si kwa kukola vila akulonda mnt'hu. 17Kwavila Maandiko ya Mulungu yakulonga vino kwa mbuli ya Falao, “Nikutenda mwene ili kufosela weye nilagise ukulu wangu, na zina dyangu dilongigwe muna isi zose.” 18Ivoelo, Mulungu akumuonela ubazi mnt'hu yoyote ila akulonda kumuonela ubazi, na akalonda kumtenda mnt'hu awe na moyo mdala akudaha kutenda ivo.
Maya ya Mulungu na ubazi wa Mulungu
19Ivoelo nauniuze, “Ikawa mbuli izo ziivo, hangi Mulungu akulonga cheye chihasanya? Vino, niani akulonda kulema yala akuyalonda Mulungu?” 20Mbali weye mnt'hu ukuiyona niani hata ukugeza kumuuza Mulungu? Vino, nongo ikudaha kumuuza ila aiumbile, “Hangi kuniumba vino?” 21Kwa ulongo ulaula, ila mnt'hu akuumba nongo akudaha kuumba ulongo vila akulonda? Ena, akudaha kuumba vinongo vidi chimwenga chikutunywa nk'hani na chimwenga hanyikutunyigwa nk'hani.
22Ivo nivo vili kwa Mulungu. Kalonda kulagisa maya yake na kuchitenda chimanye nguvu zake, ivo kakala akuwagozela na kuwafinyiliza want'hu wala waikigwe kufikana na maya ya Mulungu, want'hu ao ni wala wakalile wakulondigwa kukomigwa. 23Vilavila Mulungu kalonda kulagisa wingi wa ukulu wake, ula achigidilile cheye chikalile chikulondigwa kuonelwa ubazi nae, cheye achisasalile kuhokela ukulu wake. 24Kwavila cheye nio ao achitangile, si kulawa kwa Wayahudi muhala, mbali vilavila kulawa kwa want'hu sio Wayahudi. 25Kwavila nivo iyandikigwe mchitabu cha Hosea mulotezi wa Mulungu, Mulungu kalonga,
“Wala wakalile Sio want'hu wangu.
Naniwatange, want'hu wangu.”
“Nao want'hu wakalile
sikuwabweda, haluse huwabweda.”
26Ivo, na hant'hu hala walongigwe,
“Mweye sio want'hu wangu aho nawatangwe.
‘Wana wa Mulungu eli na ugima.’”
27Nae Isaya mulotezi wa Mulungu kwa mbuli ya Izilaeli akalonga kwa sauti nk'hulu, akalonga,
“Hata ikawa want'hu waizilaeli ni wengi gesa msenga wa mpwani, mbali niwadodo nawahonyigwe, 28kwavila Mndewa naatende hima ulamuzi wake kwa isi yose.”
29Gesavila Isaya mulotezi wa Mulungu ivo alongile aho umwaka, “Mndewa eli na nguvu ingi halondile kuchilekela wamwenga wa weleko wa wana wa Izilaeli, ingi chidanganike gesa want'hu wa Sodoma na Gomola.”
Waizilaeli wakulema kumtogola Mulungu
30Vino, chilongeki? Want'hu sio Wayahudi wakalile hawalondile kutogoligwa halongozi ha Mulungu, haluse wakutogoligwa halongozi ha Mulungu kwa kutogola. 31Mbali want'hu wa Izilaeli wakalile wakuhunganika kulonda kutogoligwa halongozi ha Mulungu kwa nzila ya Lagilizo, ao hawapatile. 32Hangi hawatogoligwe halongozi ha Mulungu? Hawatogoligwe Kwavila wakala hawakulonda kwa nzila ya kutogola mbali wakala wakuilonda kwa nzila ya mbuli wakalile wakuzitenda. Ivo wakaikwala “mdiibwe kulu wakagwa.” 33Gesavila Maandiko ya Mulungu ivo yakulonga,
“Lola, hudiika muna Sayuni,
ibwe da kuikwala na talawe da kuwatenda want'hu wagwe,
mbali mnt'hu yoyote akulonda kumtogola Mulungu seke agumwe chinyala mbwi.”
ទើបបានជ្រើសរើសហើយ៖
Walumi 9: DBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Dowe @The Word for The World International and Dowe Language translation. All rights reserved.
