Yohana 14
14
Yesu ni nzila ya kwita kwa Tata
1Yesu akawalongela wanahina wake, “Msekugazika mmioyo yenu. Mtogoleni Mulungu, nitogoleni na nie vila vila. 2Ukaya kwa Tati yangu kuna hant'hu hengi hakukala. Ingi iwile sio ivo, ingi niwalongeleni kale. Hwita kuwasasalila hant'hu hakukala. 3Na nikaita kuwasasalila hant'hu ha kukala, nanibwele na kuwasoleni mkale hamwe nanie, ili namweye muwe hala nili. 4Mweye mumanya nzila ya kwita uko hwita.”
5Tomasi akamuuza Yesu, “Mndewa cheye hachikumanyile uko ukwita, nachimanyeze nzila ya kwitila?” 6Yesu akawalongela, “Nie mwenyewe ndo nzila huwalongela want'hu ukweli wa Mulungu na huwenk'ha ugima wa siku zose. Mnt'hu hakwiza kwa Tata bila kufosela kumwangu. 7Ikawa mkunimanya nie, namummanye Tata ivila. Kwandusila haluse, mkummanya Tati yangu na mmuona kale.” 8Filipu akamulongela Yesu, “Mndewa chilagise Tata, iyo naichifaye.” 9Yesu akamulongela, “Filipu nikala na mweye chipindi chose, Filipu, vino na weye hunanimanya nie? Mnt'hu yoyote anionile nie kamwona Tata. Ukudahaze kulonga, ‘Chilagise Tata?’ ” 10Vino, hukutogola kuwa nie ni mgati mwa Tata, nae Tata amgati mmwangu? Mbuli huwalongeleni sikuyalonga kwa ukulu wangu. Tata akukala mgati mmwangu, akutenda sank'hano zake. 11Mkulondigwa mnitogole nikalonga kuwa nie nimgati mwa Tata na Tata amgati mmwangu, ikawa hamkunitogola nie, togoleni kwa sank'hano izo hutenda. 12Kweli huwalongeleni, yoyote akunitogola nie, naazitende sank'hano izo hutenda, na naatende sank'hano nk'hulu kuhuma izo, kwa vila nie hwita kwa Tata. 13Na dyodyote mkulonda kudilomba kwa gesa ivohulonda, nie nanikitende, ili Tata atunyigwe mgati ya Mwana. 14Mkanilomba dyodyote, gesa ivo hulonda, nanitende.
Yesu akulonga naamgale Muhe wa Mulungu
15Mkanibweda, namuyatende malagilizo yangu. 16Nie nanimulombe Tata, nae naawenk'heni Mtazi imwenga, ila akulonda kukala na mweye siku zose bila nk'homelezo. 17Iyo ndo Muhe wa kweli, want'hu wa isi hawakudaha kumuhokela, kwa vila hawakudaha kumuona na kummanya. Mbali mweye mkummanya kwa vila akukala na mweye na amgati mmwenu. 18“Sekeniwalekeni mdumwe gesa want'hu wabule welesi, nanize kaidi kukala na mweye. 19Unk'hali mda mdodo want'hu wa isi sekewanione kaidi, mbali mweye namnione, kwa vila naniwe mgima kaidi, na mweye namuwe ugima wa kweli. 20Siku iyo ikafika, nammanye ya kuwa nie ni mgati ya Tata na mweye mumgati yangu na nie ni mgati mmwenu. 21Mnt'hu yoyote akahokela malagilizo yangu na kuyatenda iyo ndo akunibweda. Na ila akunibweda nie naabwedigwe na Tata, na nie nanimbwede na kuilagisa kumwake.” 22Kamala Yuda imwenga sio Yuda Isikaliote, akamuuza, “Mndewa naidahikeze weye kuilagisa kumwetu na sio kwa want'hu wa isi?” 23Yesu akamulongela, “Want'hu wala wakunibweda nawatende icho hukilonga, na Tati yangu naawabwede, na cheye nachize kumwawe na kukala hamwenga nao. 24Mnthu yoyote hakunibweda hakutenda icho hulonga. Na nt'hume muhulike sio yangu, mbali ni ya Tata anitumile. 25Niwafunza mbuli zino nikawa nink'hali hamwenga na mweye. 26Mbali Mtazi ila Muhe wa Mulungu ila Tata naamtume kumwenu badili yangu naawafunze mbuli zose na kuwakumbuseni yose niwalongele.” 27Huwalekeleni utindiwazi, ena! Huwenk'heni utindiwazi wangu. Utindiwazi huwenk'hani sio gesa want'hu wa isi ivowakuwenk'ha. Msekugazika mumoyo na wala msekuogoha. 28Mnihulika halonga, hwita zangu, mbali nanibwele kaidi kumwenu. Ingi mnibwedile kweli, ingi mbwedile kuhulika hwita kwa Tata, kwa vila yeye ni mkulu kufosa nie. 29Niwalongela mbuli zino zikawa hazinalawila, ili yakalawila mdahe kutogola. 30Sekenilonge na mweye nk'hani, kwa vila ila mkulu wa isi ino akwiza, mbali abule udahi kumwangu, 31mbali want'hu wa isi wakulondigwa wamanye kuwa humbweda Tata, na ndo mana hutenda kila chint'hu gesa Tata ivo anilagilize.
Kamala akakomelezela kulonga, “Haya timalaleni chilawe hano.”
ទើបបានជ្រើសរើសហើយ៖
Yohana 14: DBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Dowe @The Word for The World International and Dowe Language translation. All rights reserved.
