Yohana 12
12
Malia akumuhaka Yesu mavuta ya bei nk'hulu uko Besania
Matayo 26:6-13; Maliko 14:3-9
1Siku sita haguhi na sikunk'hulu ya Pasaka, Yesu akafika Besania uko akalile akukala Lazalo ila Yesu akalile kambweleza muugima. 2Uko wakamsasalila ndia ya dihungile, nae Mata kakala akuwasank'hanila. Lazalo kakala imwe hagati ya wala wakalile hamwenga na Yesu haukudya. 3Kamala Malia akasola nusu lita ya mavuta ya nalido yadamane ya hela nyingi, akamuhaka Yesu mmigulu na kuihangusa na nyele zake. Kaya yose ikamema mp'hovya idamane ya mavuta. 4Niho Yuda Isikaliote, imwe wa wala wanahina wake kumi na waidi ila ezile kumbiduka Yesu, akalonga, 5“Hangi mavuta ayo hayauzigwe kwa maliho ya siku mia wa kibaluwa cha uzenzi na hela izo wakenk'higwa wachiwa?” 6Yuda kalonga ivo, sio kwa vila akuwaonela ubazi wachiwa, mbali kwa vila kakala akutoza mfuko wa kuikila hela na mbavi, na ulo kwa ulo kakala akubawa kulawa mumfuko. 7Mbali Yesu akalonga, “Msekumgaza Mama ino, kwa vila kayagula mavuta yano ya bei nk'hulu ili kuusasala mtufi wangu kwa ajili ya kuzikigwa kwangu. 8Kwa vila wachiwa namuwe nao siku zose, mbali sekemue na nie siku zose.”
Wayahudi wakulonda nzila ya kumkoma Lazalo
9Wayahudi wengi wahulika kuwa Yesu kakala Besania. Ivo elo wakaita uko sio tu kwaajili ya kumuona Yesu mbali vila vila na kumuona Lazalo ila ambwelezigwe muugima na Yesu.
10Wakulu wa walava nt'hambiko wakalonda nzila ya kumkoma na Lazalo. 11Kwa ajili ya Lazalo, Wayahudi wengi wakaitump'ha na vilongozi wawe, wakamtogola Yesu.
Yesu akwingila Yelusalemu kwa nk'helegele.
Matayo 21:1-11; Maliko 11:1-11; Luka 19:28-40
12Igolo yake, pelela kulu dya want'hu wezile kui sikunk'hulu, wahulika kuwa Yesu kakala muinzila akwiza Yelusalemu. 13Ivo elo, wakasola masant'hi ya mtende, wakalawa kwita kumuhokela, wakalonga kwa sauti nk'hulu, “Chimtunye Mndewa, abalikiigwe ila akwiza kwa zina dya Mndewa. Kabalikiigwa Mwene wa Izilaeli.”
14Yesu akampata Mwanamp'hunda imwe, akakala mchanya yake gesa maandiko ya Mulungu ivo yakulonga, 15“Msekuogoha mweye want'hu wa Yelusalemu. Lola Mwene wako akwiza, kapapigwa na mwanamp'hunda.” 16Mda uo wanahina wake hawamanyile mbuli izo, mbali Yesu ivo amalile kutunywa, ndo wakakumbukila kuwa ayo yaandikwa kwaajili yake, na want'hu wamtendela ayo. 17Want'hu wengi wakalile hamwenga na Yesu mda ula amtangile Lazalo kulawa mdikabuli na kumbweleza muugima, wagendelela kusimulila mbuli wazionile. 18Want'hu wengi waita kumuhokela kwa vila wakala wahulika katenda vilagiso ivo. 19Ivo elo Mafalisayo wakalongelana, “Mkuona? Hachikudaha kutenda chochote, loleni want'hu wose wakumkola yeye.”
Yesu akulotela kudanganika na kubwela muugima kwake
20Kukala na Wagiliki wamwenga mwa want'hu wakalile wafika Yelusalemu kufumgamalila Mulungu mui Sikunk'hulu iyo. 21Wagiliki ao wamwitila Filipu, mkaya wa bululu dya Betisaida ya Galilaya, wakamulongela, “Mkulu chikulomba kumuona Yesu.” 22Filipu akaita kumulongela Andelea, nao wose waidi wakaita kumulongela Yesu. 23Yesu akawalongela, “Mda wa kutunyigwa Mwana wa Mnt'hu ufika. 24Kweli huwalongeleni, mbeyu ya ngano ikawa hainalagala mui isi na kudanganika na kuhota, ikuwa ivoivo, mbali ikadanganika ikulava mbeyu nyingi. 25Want'hu wakuubweda ugima wawe, nawauwaze na want'hu wakuuonela maya ugima wa muna isi ino, nawauwike kwa ajili ya ugima ubule nk'homelezo. 26Mnt'hu yoyote akanisank'hanila akulondigwa anikole, na aho hulonda kuwa nie na msank'hani wangu naawe aho. Na mnt'hu yoyote akanisank'hanila Tati yangu namtunye.”
Yesu akulomba Mulungu kwaajili ya kudanganika kwake
27Yesu akagendelela kulonga, “Moyo wangu ukugazika nk'hani, vino nilongeze? Nilonge Tata unihonye kulawa muna mahenyeko yano? Bule, kwa vila niza nidanganike kwaajili ya want'hu wamwenga. 28Tata uditunye zina dyako.” Aho sauti ikalonga kulawa kuulanga, “Niditunya na naniditunye kaidi.” 29Want'hu wengi wakalile watimalala aho wahulika sauti iyo, na want'hu wamwenga hagati yao wakalonga, “Ni mdudumo wa ladu.” Mbali wamwenga wakalonga “Msank'hani wa kuulanga kwa Mulungu kalonga nae.” 30Mbali Yesu akawalongela, “Sauti iyo hailawile kwa ajili yangu nie, ila kwa ajili yenu. 31Haluse ndo chipindi cha want'hu wa isi ino kulamulwa, elo mwene wa isi ino naahokigwe ukulu wake. 32Na nie nikeza kutumbikigwa mchanya ya mti kulawila hasi, naniwatende want'hu wose weze kumwangu.” 33Yesu kalonga ayo kwa kulagisa naadanganike vilihi. 34Ula uyama wa want'hu ukamulongela, “Cheye chihulika kulawa muna Malagilizo yetu kuwa Kilisito asgauligwe na Mulungu sekeadanganeke mbwi. Weye ukudahaze kulonga Mwana wa Mnt'hu akulondigwa atumbikigwe mumti? Vino, ino Mwana wa Mnt'hu niani?” 35Kamala Yesu akawalongela, “Lumuli unk'hali hamwenga kwa chipindi chidodo tu. Gendeni mulumuli kwa vila Lumuli mnk'hali nao ili ziza disekuwafika, kwa vila want'hu akugenda mdiziza hawakumanya uko wakwita. 36Kwa vila lumuli mnao ivo utogoleni lumuli uo ili muwe wana wa Lumuli. Ivo akomeleze kulonga mbuli izo.”
Wayahudi wakulema kumtogola Yesu
Yesu akahalawa akaita kuifisa. 37Ingawa Yesu katenda vilagiso vino vose halongozi yao, mbali ao hawamtogole. 38Ivo, mbuli alongile Mulotezi Isaya yalawila.
“Mndewa niani aitogolile nt'hume yetu?
Na udahi wa Mndewa wa kuhonya ugubuligwa kwa niani?”
39Ivo hawalondile kutogola, kwa vila Isaya kalonga kaidi. 40“Mulungu kayapofula meso yawe, na kaitenda mioyo yawe iwa midala kukombaganya ili wasekudaha kuona kwa meso yawe na kukombaganya kwa mioyo yawe wasekwiza kunitogola na nie nikawahonya.” 41Isaya kalonga mbuli zino kwa vila kakala kauona ukulu wa Yesu na akalonga mbuli zake. 42Hamwenga na ayo, Vilongozi wengi wa Wayahudi wamtogola Yesu. Mbali kaajili ya Mafalisayo, hawalongile halongozi ha wanthu kuwa wakumtogola, kwa vila waogoha kuingigwa mui kaya ya kufikanila Wayahudi. 43Ao wakala wakubweda kutunyigwa na Want'hu kuhuma utunyo ukulawa kwa Mulungu.
Yesu keza kuwahonya want'hu wa isi.
44Kamala Yesu akalonga kwa sauti nk'hulu, “Mnt'hu akanitogola hakunitogola nie muhala, mbali akumtogola na ila anitumile. 45Ila akuniona nie, akumona ila anitumile. 46Nie niza niwe lumuli wa want'hu mui isi, ili want'hu wose wakunitogola wasekukala mdiziza kwa kuswela kuumanya ukweli wa Mulungu. 47Mnt'hu akuhulika mbuli zangu na hakuzitoza, nie sekenimulamule kwa vila sizile kuwalamula want'hu wa mui isi mbali niza kuwahonya. 48Mnt'hu yoyote akunilema nie na hakuzitoza mbuli zangu, auko akulonda kumulamula, na mbuli yangu nilongile ndo naimulamule siku ya nk'homelezo. 49Kwa vila mbuli nizilongile sizilongile kwa ukulu wangu, mbali Tata anitumile ndo anilongele nilonge mbwani na nanilongeze. 50Na nie humanya kuwa lagilizo dyake ni ugima ubule nk'homelezo. Ivo elo, nie hulonga tu yala Tata anitumile niyalonge.”
ទើបបានជ្រើសរើសហើយ៖
Yohana 12: DBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Dowe @The Word for The World International and Dowe Language translation. All rights reserved.
