oLuka 16
16
Elase Ikweyi ko Oyole ni gbo Okwokwoshi lo ni
1Oyesu ka da awogboso mo: <<Ongo oye gbo odu, kweyi ashe ga ka da anu mo oyole nu ya tiga kpo odu nu. 2Ebeni oyogwu kweyi do oka mo, <Oji ni nyya pwo ikweyi wo ni? Za arisawu ko oko ni ndawo ni, ikweyi koni oya yiyi kwo odu hin kelo.> 3Ebeni oyole ni ya yi iyi kwo odu nu ni ka ipu ko otu nu mo, <Oji ni nyya ya byo onabani? Adole hin ya yo oko ya bize shun? Ami ke loshu ko sheho lo, nke ya yi iweyi ko boza. 4Nggyoza ni nyya ya ni, ishini onumenya sho oko, ase ba zun ole wa.>
5Ebeni oyawase ni myore ka adole nu ogwu oyoye. Oda kikyikyo oka mo, <Omyore ka adole hin ke emaa?>
6Okyogwu mo, <<<Ogya ka ano ogbogbo ahata,>
<<Oyole mani ka da anu mo, <Zo okpa shini okyanu ta nawo ogbogbo ene.>
7<<Oki do omwepa oka mo, <Omyore ka adole hin ke emaa?>
Okyogwu mo, <<<Owatu ke ewo okpakwu oye,>
<<Oka da amu mo, <Zo okpa shini oyi ta na wo ogbogbo ahata.>
8<<Adole nu da anu abokpa ikweyi koni oziyi ni. Koni ase kese mani ziyi ko yo oza da ase kishi wa sha ase ke ebe yoyu. 9Nyya kadala, ala yo oko kpo odu kese mani shini ala kwo oya, ishini odu kweyi, aba ya ala omaba ole wa ko gbogbo-gbogbo.
10<<Ase ni yo okwokwoshi ikweyi ko oza gbayayi, aba yo oza nwashika da anu abo, kweyi ase ni yo okwokwoshi ikweyi ko oza gbayayi lo, oki ya yo okwokwoshi ikweyi ko oza nwashika lo. 11Owoni oyo okwokwoshi ikweyi ko odu kese mani lo, anoho ya yo otuso ikweyi ko odu ki iso? 12Kweyi owoni ogbo okwokwoshi kpi iyo ka ashe lo, anoho ya da awo iyo wo ki iyo?
13<<Ashishe ya gege ya wo oshe da adole epa ishi oye kponu lo. Oya tela ko oye kweyi yimu ko oye, oya gboso oye kweyi ya tela ko oye. Byoni olemani oni, oya gege ya wo oshe ko Owuso ki wo oshe ki ikwiri lo.
Ozafofu ko Oyesu
(oMatiyu 11.12-13; 5.31-32; oMak 10.11-12)
14Ashishini ka Awofarisi ni gbi imu ki ikwiri ni pwo oza ni Oyesu ya ka ni kweyi ashakyo. 15Oyesu ka da awa mo, <<Ala pini ba yo oza shini ase na ma mo ala wa ase neneshi la, Owuso ke gyo otu kala. Owuso ya tela ko oza ni asuse mo oshoshi ni.
16<<Ome ishi ko Oyohana, ase foza ko ono kpa awobane. Bwi ishi oni, aba tono ko oshu neshi ko obula ko Owuso, kweyi ananoho ya nonu ko gipu nu. 17Oya lono shini oti kwe ofofa ipu ko ozafofu ko ono na gebi, shi iso kpe ese ko kweyi.
18Kpiri kase ni kabo kpo onya nu kweyi gbo onya oye hoha, oya beba kpa anu pi yoma, kweyi ongo ni doka ko onya ni kabo kpo oba, oya beba kpa anu pi yoma.
Ongo ni Gbo Odu ni kpo Olazarus
19<<Olodu oye ni ya sho oshiye neshi kweyi ki yo ole neshi ki ya roza neshi ishi kpiri. 20Ongo oye iye nu wo Olazarus ya yagye owo ofunu kole nu, ikpiye nu kpiri wi ipi, 21kweyi oya labo ko ro ozarore ni shonu okpagye obutu ko olodu mani. Iwo ki ba wa pi ipi ki ikpiye nu.
22Ishini inoboza mani gekwu ni ayoleho wa zo gebe ni Ibirayi yanu ni. Olodu mani ki gekwu kweyi ayo nyi. 23Oyo ole ko ola ya mowe, oziyi iso kweyi omi Ibirayi ebe lenu kpo Olazarus ashikwu nu. 24Ebeni osho gwu yo mo, <Ada Ibirayi, miyinyinyi hin kweyi oto Olazarus oleho shini na yo oyi ka abo nu linyo na tumi igbenu shi na sha, ikweyi koni nyya mowe ipu ko ola.>
25<<Ibirayi ke kyogwu mo, <Oyi, rela ki ishini oya gbo olayi ese ni, ogbo oza neshi kpiri ni oya yimu ni, Olazarus ke ya mebi ishi oni, ishi mani ke oya minyo ebeni kweyi awo ya mowe. 26Itikpi ko oni ke, otutehe ka aha kpa awo gbo ogo nyakwu shini ase ni ye ebe ni naka gege ge ebe wo lo, kweyi ase ni ye ebe wo naka gege we ebe ka lo.>
27<<Oka da anu mo, <Ni olemani, nyya bo ada, to Olazarus oleho na go ole ka ada hin, 28ngba ayene nongo eho ona ga pyuwa akpaha, shini ana ka wi ipu ko owe mani lo.>
29<<Ibirayi kyogwu mo, <Agbo okpa ko Omusa kpa akawo bane, ana ya akpaha tagye shini ana pwo.>
30Okamo, <<<Aayi, ada Ibirayi, owoni ashe ke nyiso amiri ge ebe wa, aba shagbotu.>
31<<Oka da anu mo, <Owoni aya akpaha tagye do okpa ko Omusa kpa akawo bane lalo, kwa ashe nyiso amiri, aba kyogwu kpa anu lo.>>
ទើបបានជ្រើសរើសហើយ៖
oLuka 16: ALA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
THE WORD FOR THE WORLD INTERNATIONAL, THE WORD FOR THE WORLD NIGERIA
