Oyohana 17
17
Oyesu Tinarigwu
1Ishini Oyesu kela kweyi ni, oziyi iso kweyi tinarigwu mo:
<<Ada hin, ishi gye wa. Yo Oyi wo na gbigyashi, shini Oyi wo na yo sho gbigyashi. 2Koni odanoshu ikweyi kasuse kpiri shini ona dawase ni odanu ni olayi ko gbogbo-gbogbo. 3Anani olayi ko gbogbo-gbogbo yoma: aba gyo, awo Owuso ko kwokwoshi, kpo Oyesu Okristi ni otoleho ni. 4Nsayi kigyashi wo ese ikweyi koni nyyoko ni odami mo na ya ni. 5Anani, Ada dami igyashi obutu wo kpigyashi ni ngbo kpawo ome oyese ni.
Oyesu Tinarigwu Ikweyi ka Awogboso
6<<Nkwobonu yawase ni odami ipu kese ni gyo wa. Awakaka wo, awo pi dami la kweyi ageyagye dawo. 7Anani agye moza ni odami kpiri bwebe wo la. 8Koni nkela ni oka dami ni dawa kweyi akyogwu kpanu. Agye kokwokwoshi mo nbwebe wo, kweyi atotuse mo awo pi tumoleho la. 9Nyya tinarigwu dawa. Nyya tinarigwu dase kese mani lalo, nke ya tinarigwu dawase ni odami ni, ikweyi koni awakaka wo la. 10Kpiri koza ni ngbo wakaka wo, kweyi oza ni ogbo wakaka hin. Kweyi igyashi bwebe wa webe hin. 11Ami ya yese kelo, awa ke tayayo bese, kweyi ami ya webe wo. Ada Sere, gbuwa kposhu kiye wo, iye ni okwobonu dami ni, shini ana woye kponu byoni ami kpawo woye kponu ni. 12Ishini nyyo kpawa ni, ngbuwa kweyi kpuwa shagye kpiye ni odami ni. Ashishe ipu wa gebi lo, oye ipu wa pi gebi la shini oza ni okpa ka ni na gya.
13<<Anani nyya webe wo, nke kawoza mani kpiri ishini ntayayo yese ni, shini ana pyo otushosha hin ipu kotu wa. 14Nkyoleho wo dawa, kweyi ase kese tela wa, koni awase kese kelo byoni ami wase kese lo ni. 15Nyya tinarigwu mo yuwa kpo shese mani lalo, ke gbuwa shabo kase bibi oni. 16Awase kese mani lalo byoni ami welo ni. 17Yuwa na ziyiwa dawo bwebe kokwokwoshi; ikweyi koni ela wo pi wokwokwoshi la. 18Byoni otumoleho wese ni, ami ki tuwoleho ipu kese. 19Ikweyi wa nyya ziyun dawo, shini ana ziyiwa dawo kokwokwoshi.
Oyesu Tinarigwu Dawine ko Otuse
20<<Nyya tinarigwu dawa kin lalo. Nkyi ya tinarigwu dawase ni totu sun bwebe kela wa, 21shini kpiri wa na woye kponu, Ada, byoni oyipu hin kweyi ami yipu wo ni. Awa na ki yo kpaha shini ase kese na totuse mawo pi tumoleho la. 22Ami kwobonu dawo igyashi ni odami ni wa, shini ana woye byoni ami kpawo we ni: 23Ami yipu wa kweyi awo yipu hin. Ana woye kponu shini ase kese na gye mawo pi tumoleho la kweyi oya yimu wa byoni oya yimu hin ni.
24<<Ada, nyya yimu mo ase ni odami ni na bebeni nyyanu ni, kweyi ana mi igyashi hin kpi igyashi ni odami ikweyi koni oyimu hin ome oyese ni.
25<<Ada, Aseneshi, ase kese gye lo, ami ke gyo, awa gye mo awo pini tumoleho la. 26Nshawa ase ni awo we ni, nyya yipu ko shawa shini imu ni ogbo dami ni na yipu wa, shini ami abiyun na yipu wa.>>
ទើបបានជ្រើសរើសហើយ៖
Oyohana 17: ALA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
THE WORD FOR THE WORLD INTERNATIONAL, THE WORD FOR THE WORLD NIGERIA
