Oyohana 10
10
Elase Ikweyi ki Inogbeho ko Obize
1<<Nyya ka dala okwokwoshi, ase ni gipu koko kotukpo bwofunu lo, ke bwebye hoha, owowi kponyoza-oshu la. 2Ase ni gipu bwowe kofunu anu pini winogbeho ko otukpo la. 3Inogbeho ya gwofunu danu, kweyi otukpo ba gyoko nu. Oya yotukpo nu ogwu kpiye wa kweyi ya gwuwa gese. 4Ishini obyakakanu kpiri wese, oya gohobu wa, kweyi otukpo nu ba gboso ikweyi koni agyoko nu ni. 5Awa ke ba gbosogboga lo; nyya ka dala, aba nyinya wa sho ikweyi koni agyoko kogboga lo ni.>> 6Oyesu kelase mani dawa, awa ke gyikweyi nu lo.
Oyesu wi Ino Gbeho ko Obize Neshi
7Oyesu ki kamo, <<Nyya ka dala okwokwoshi, ami wofunu dawotukpo la. 8Kpiri kase ni wa kwobonu dami ni awi kpawo nyoza-oshu la, otukpo ke pwela wa lo. 9Ami wofunu; ase ni gipu bwebe hin aba ngmanu. Oya gipu ya gese, kweyi oya pyikyashi ko ha. 10Owi yawa kowa wi, ki ngmase kweyi yoza yishi kin la, ami ke wa shini ana pyo olayi, kweyi ana pye sheyi gagye.
11<<Ami wino gbeho ko obize neshi. Ino gbeho ko obize neshi ya zo olayi nu ikweyi ko otukpo nu. 12Ase ni aro ko gbeho ko obize ni wine ko obize la lo. Ishini omi iwo-apashi ya wa, oya shotukpo bita kweyi ya nyinya nu. Ebeni iwo-apashi yawa kwo otukpo mani kweyi ya yuwa kya. 13Anu oni ya nyinya nu ikweyi koni aro rora la, oya byotu kojije ikweyi ko otukpo mani lo.
14<<Ami pini winogbeho neshi la; ngyo otukpo hin kweyi otukpo hin gyun mamani. 15Byoni Ada gyun kweyi ami gya Ada mamani kweyi nyya zo olayi hin ikweyi ko otukpo hin. 16Ngbo otukpo shishini ni bipu kikpo mani lo ni. Owotiri dami ko byuwa wa. Awa ba pwoko hin mamani, kweyi aba wikpo ko obize oye kponu, inogbeho oye kponu. 17<<Ozani ya Ada hin ya yimu hin ni wo, nkyogwu ko gekwu shini na ki pyo olayi hin. 18Ashishe ya yo olayi hin bize shun lo, ami ke yayi dawa kpotu hin oyekponu. Ngboshu ko ze nkyi gboshu ko kyanu nye. Omani wo ono ni Ada hin dami ni la.>>
19Ikweyi kela ni Oyesu ka ni okwunu ka Ase ko Oyahuda ke epa. 20Nwashika wa ba kamo, <<Ogbo omaku bibi, kweyi nyoza. Ojiyala ba pwela nu?>>
21Ashini ke kamo, <<Ela mani wela kase ni gbo omaku bibi ni lalo. Omaku bibi ya gege ya yofiyi ya mebe?>>
Ase ko Oyahuda tela ko Oyesu
22Aba ri Imya ko gwo Ole ko Owuso Ojerusele, owishi ko oshu, 23kweyi Oyesu yipu ko Ole ko Owuso ya yawu ebe koyagye ko Osolomo. 24Ashini ka Ase ko Oyahuda shogba to, ba kamo, <<Gbishi wonya ni oya shaha bita ipu kebe dibu? Owoni awo wo Okristi la ka daha okwokwoshi kin.>>
25Oyesu kyogwu mo, <<Nka dala, ala ke kyogwu lo. Oko ni nyya ipu kiye ka Ada hin ni yolobene ikweyi hin, 26ala ke ba kyogwu lo, ikweyi koni ala wo otukpo hin lo byoni nka dala ni. 27Otukpo hin ba pwoko hin; ngyuwa, kweyi awa ba gbosun. 28Ndawa olayi ko gbogbo-gbogbo, aba gekwu lo. Ashishe ya gege ya yuwa bize shun lo. 29Oza ni Ada hin dami ni shojoji, kweyi ashishe ya gege ya yuwa bize shabo ka Ada hin lo. 30Ami kpa Ada hin woye kponu la.>>
31Ebeni Ase ko Oyahuda kyi kpakyo ko takyo, 32Oyesu ke kadawa mo, <<Nyyoza kigbashi nwashika bwebe ka Ada dala. Onya ipu kawoko mani ni ala ba yimu ko tumakyo ikweyi nu?>>
33Awoyahuda kyogwu mo, <<Aha ba takyo ikweyi kawoza ni la lo, pa wikweyi karigbetu, ikweyi koni owasuse shishi, ya ziyo mowo Owuso.>>
34Oyesu kadawa mo, <<Ela mani ayitota ipu ko Ono kala mo, <Nkamo ala wa awowuso la> lo?>> 35Owoni oyuwogwu ma wa <<awowuso,>> awa ni ela ko Owuso yebe wa ni, Okpa ko Owuso ke ya kokame lo ko gbogbo-gbogbo, 36ase ni Ada sho mowa akaka nu kweyi otoleho wese ni lemoji? Ojiya ni ala ba kwumepwo karigbetu ikweyi koni nkamo, <<Nwwo Oyi ko Owuso ni? 37Owoni nyyo oko ni Ada hin tumoleho ni lo, ala ka kyogwu kpami lo. 38Owoni nke ya, kala kyogwu kpami kala kyogwu kpami lo, ala kyogwu kpo oza kigbashi, shini ala gyo okwokwoshi ma Ada yipu hin, kweyi ami yipu ka Ada.>> 39Aki takirikwu ko yo kwu, oke pa shabo wa.
40Ebeni Oyesu kwikye sheyi ki ishu ko Ojoda gebe ni Oyohana ya yo Obatisma bwikyikyo ni ga yagye ebe ni. 41Ase lewa webe nu. Akamo, <<Oyohana yoza kigbashi ebyibye lo, oza ni oke ka ikweyi ko ongo mani kpiri ni wo kwokwoshi.>> 42Kweyi ebe ni ase nwashika kyogwu kpo Oyesu.
ទើបបានជ្រើសរើសហើយ៖
Oyohana 10: ALA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
THE WORD FOR THE WORLD INTERNATIONAL, THE WORD FOR THE WORLD NIGERIA
