Oko-ki-igabo 8
8
1Kweyi Oshawulu dawabokpa koni ayo Ostivi ngmo ni.
Oshawulu Da Awogboso Oyesu Egye
Eneno oni ada awogboso Oyesu owe kotata Ojerusele. Ase kpiri ni kyogwu kpo Oyesu ni kya ge ebebenya agbabo ko Oyahudiya kpo Osamariya, ayikoko ko Oyesu fufuwa pini nyinya lo la. 2Ebeni awogeyagye do Owuso wa yo Ostivi nyi, akyegba kotata ikweyi nu.
3Oshawulu ke kwotu ko dawogboso Oyesu egye; oya bwole bwole ya pyawase ni kyogwu kpo Oyesu ni wese, kango kanya, abyuwa go oruduru.
Ofilibus Tono Ogya ko Osamariya
4Ni awase ni kyogwu kpo Oyesu kya ni, age ebebenya, ba tono koshu nu. 5Ofilibus gogya nyakwu ko Osamariya, kweyi ya tono ko Omezaya dawa ebe ni. 6Ewa kasuse zakpaha neneshi doza ni Ofilibus ya ka ni kpoza kigbashi noya ya ni. 7Omaku bibi bose bwikpiye kase nwashika ba sheha, kweyi awase ni ngmonyodu ni kpawo pyepu agye nwashika pyogege. 8Ikweyi koni ase shotunehe kotata ogya ni.
9Ongo ko Osamariya oye iyenu wo Osimo yebe ni, ozishi nu ya dase igbashi kpa abodiyi nu. Oya ziyinu manu washe nyakwu, 10kweyi kpiri kase ko ogya, bwikpo wonyonya, ba zakpaha danu. Kweyi ba kamo, <<Owoshu ko Owuso ni agyo mowo Oshu Nyakwu ni.>> 11Aba zakpaha danu ikweyi koni ogbeji noya yoza kigbashi kposhu kabodiyi nu ni. 12Ni ake pwela ko Ofilibus noya tono ikweyi koshu neshi ko Obula ko Owuso kposhu ko Oyesu Omezaya ni, ayuwo obatisma, kanya kango. 13Osimo abiyinu kyogwu kpo Oyesu kweyi ayo obatisma. Oyo kpo Ofilibus kweyi igbashi yokwu ikweyi kawoza kigbashi ni Ofilibus yaya ni.
14Ishini ayikoko ko Oyesu ni bo Ojerusele ni pwo mo ase ko Osamariya zela ko Owuso ni, ato Obitrus kpo Oyohana oleho gebe wa. 15Ishini afu ni, atinarigwu dawa shini ana nyo Omaku ko Owuso. 16Koni Omaku ko Owuso sa dashishe wa wa lo; obatisma kin pini ayuwa ipu kiye ka Adole Oyesu la. 17Ebeni Obitrus kpo Oyohana yabo wa suwa, kweyi anyo Omaku ko Owuso. 18Osimo ma ni adawo Omaku bwebe kabo ni ayikoko ko Oyesu suwa ni, odo Obitrus kpo Oyohana ikwiri 19kweyi kamo, <<Ala damoshu mani mamani, shini kpiri kase ni nyyabo so ona nyo Omaku ko Owuso.>>
20Obitrus ke ka danu mo, <<Igbe na to kawo kikwiri wo, oya ma byo oya gege ya reshi ko Owuso kpi ikwiri? 21Ogbabo ipu koko kaha lo, ikweyi koni otuwo woye kponu kpo Owuso lo. 22Shagbotu ko ozalabi nogbo otu wo mani, kweyi tinarigwu shini Adole na yi gbo koza ni ogbo ipu kotu wo mani. 23Koni nma motu wo nwonwu kpanya kase kweyi ozalabi shotu.>>
24Ebeni Osimo kamo, <<Ala tinarigwu da Adole ikweyi hin, shini awoza ni ala ka mani naka gbodagye kpami lo.>>
25Ishini ayolobene ki tono kela ka Adole kweyi ni, Obitrus kpo Oyohana kwikye go Ojerusele, ni abowe ni atono ko Oshu Neshi awogya leke nwashika okpagye ko Osamariya.
Ofilibus Kpongo ki Itopiya
26Ebeni oyoleho ka Adole ka do Ofilibus mo, <<Wiyoshu shini oga agbabo ke ekye, zowe ni bwo Ojerusele go Ogaza ni, owe nekye.>> 27Mani oni Ofilibus wiyinushu kweyi nyiso ya ga. Anani ongo ki Itopiya ni ayo bwu ni, anu ni wino byolashiko ko onyose ki Itopiya ni yowe ya ga kole. Obwo Ojerusele no ga geyagye do Owuso ni, 28kweyi oyikweyi kozo byiyo konya ya gole. Ni ose ya ga ni, oya mokpa kinobane Ishaya. 29Omaku ko Owuso ka do Ofilibus mo, <<Gebe koza obyiyo ko onya ni yo ni ga hagye kwo.>>
30Ebeni Ofilibus nyinya gebe ni kweyi opwo ya kokpa kinobane Ishaya. Ofilibus doka mo, <<Ogyikweyi koza ni oya ma mani?>>
31Odoka mo, <<Nyya yamoji ya gye, owoni ashe gwikweyi nu dami lo?>> Kweyi omo Ofilibus nawa yagye kpanu ipu koza obyiyo konya nu.
32Ebeni oya ma ipu kokpa ni yoma:
<<Ole byo otukpo ni abyo ya ga ko ga yo shoko ni,
byoni oyi kotukpo ya yokwunu gwu ishini aba woya ni.
Ogwokwunu kojije lo.
33Agbowuru kweyi ayokwokwoshi lo.
Ashishe ya gege ya gbigwu kipwoma nu lo,
ikweyi koni oyagye nu kese kwobonu kweyi wa.>>
34Ebeni ongo ni ayo bwu mani do Ofilibus oka mo, <<Ka dami, anoho ni inobane mani ya kela ikweyi nu? Oya ka ikweyi kiyinu la kwe ikweyi kashe hoha la?>> 35Ebeni Ofilibus kwotu ko kela; okwotu kpagbabo kokpa noka mani, kweyi otono ko Oshu Neshi ko Oyesu danu.
36Ni abipu kiyawu ba ga ni, awa febye ninyo yaba ni, ongo ni ayo bwu mani kamo, <<Inyo yoma. Oji ya wumobi ko yo obatisma?>> 37Ebeni Ofilibus ka danu mo, <<Owoni okyogwu kpotu wo oye kponu nyya yo.>> Ongo ni ayo bwu oni kamo, <<Nkyogwu mo Oyesu Okristi wo Oyi ko Owuso la.>> 38Kweyi ozoko mana kwoza obyiyo konya na hagye. Ebeni Ofilibus kpongo ni ayo bwu oni sa gipu kinyo, kweyi Ofilibus yo obatisma. 39Ishini abose bwipu kinyo ni, Omaku ka Adole yo Ofilibus yi bize. Ongo ni ayo bwu oni mo kelo, anu ke gohobu kpiyawu nu, nwonwu kpotushosha. 40Kweyi Ofilibus tiyinu Azotus; ogohobu kpiyawu ya go Okesariya, ya tono ko Oshu Neshi ogya wonyonya.
ទើបបានជ្រើសរើសហើយ៖
Oko-ki-igabo 8: ALA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
THE WORD FOR THE WORLD INTERNATIONAL, THE WORD FOR THE WORLD NIGERIA
