Oko-ki-igabo 19
19
Obulus Gogya ke Efesu
1Ishini Apolos tayayo yo Okorentus ni, Obulus yawu okpagye gbishini oge Efesu. Ebeni oga gbayi kpa awogboso. 2Oduwoka mo, <<Omaku ko Owuso sadala ishini ala kyogwu ni?>>
Ebeni aka danu mo, <<Ayi, apwoje kponu ikweyi ko Omaku ko Owuso lo.>>
3Ebeni Obulus duwoka mo, <<Edo ko obatisma wonya ni ayala?>>
Akamo, <<Obatisma ko Oyohana.>>
4Obulus kamo, <<Kokwokwoshi Oyohana yo obatisma kawase ni shagbotu shozalabi wa ni; Oya kadase Izrayila mo, ana kyogwu kpase ni yawa itikpi nu ni wo Oyesu.>>
5Ishini apwo mani ni, ebe ni ayuwo obatisma ipu kiye ka Adole Oyesu. 6Ishini Obulus suwabo ikweyi ni, Omaku ko Owuso sa ikweyi wa, kweyi ako ose gogo-gogo kweyi atono kela ko Owuso. 7Kpiri wa wase igwepa.
8Ebeni Obulus gipu kekpa kweyi oga yagye ya kela kpawa gboshi lo koya eta, oyagye kpawa kela kpawa ikweyi ko Obula ko Owuso. 9Ashini wa ke zakpaha kweyi atawa ko kyogwu, aba kela labi da awogboso iyi kase. Ebeni Obulus shuwa bita kweyi oya awogboso ogwu ga kpanu kweyi oya fuwoza kweneno oda ko foza ko Otiranus. 10Obulus yawoza mani kishayi epa, gbishini ase ko Oyahuda kpawo Ogirik kpiri ni bokpagye ka Asiya pwela ka Adole.
Ayi ko Osiba
11Owuso do Obulus oshu ko yawoza kigbashi nyakwu ni gbodagye ebyibye wa lo ni, 12akpo oshosha kayiki ko wehe nu kpo oshiye nu gebe kawino gbere, apyo ogege kweyi omaku bibi bose shikpiye wa. 13Ashini kase ko Oyahuda ba gyehe ba ngmo omaku bibi ikpiye kawine kere aba yoko kpiye ka Adole Oyesu ko yo mani. Aba kado omaku bibi mo, <<Nnala enya ipu kiye ko Oyesu ni Obulus ya tono kela nu ni mala bose.>> 14Ayi ko Osiba ni wo Oteyi kawosapa ko Oyahuda ase ahapa pini bose baya mani la.
15Enoye omaku bibi ke kadawa mo, <<Ngyo Oyesu, ngyo Obulus, ala ke wanoho?>>
16Ongo ni gbo Omaku bibi ni nonu kpawa, kweyi oshu nu sha kakawa kpiri. Anyinya bose ipu kole nu, kpofo ni oyuwa ni kpo oshiye shosha. 17Ebeni kpiri ko Oyahuda kpawase ni wo Oyahuda lo ni be Efesu ni apwoshu mani; kweyi oshi yuwa kwu kotata, kweyi adiye ka Adole Oyesu abokpa nyakwu. 18Nwashika wa ni kyogwu ni, kweyi wa shagbotu koza ni. 19Nwashika kawase ni ba yabodiyi ni kpawo okpa wa tukpa ese kweyi ayi yola iyi ka ananoho. Ishini ayarisawu kawo kpa mani owa azurupa okpakwu aweho. 20Mani oni Oshu mani yela ko Owuso ge ebebenya kweyi ki loshu.
Akpefu Efesu
21Ni awoza mani kweyi ni, Obulus gbo otu nu kogo Omasedoniya kpo, Akaya kweyi ki shigbo go Ojerusele. Okamo owotiri ni nyya ga mo oroma ni. 22Ebeni oto Otimoti kpo Erastu asepa niba yoko kpanu ni oleho go Omasedoniya, anu abiyinu yagye gboji agbabo ka Asiya.
23Ipu kishi mani apwo nyakwu nyiso ogya ke Efesu ikweyi ko owe ni Adole shu. 24Ashe iyenu wo Odemetriyus, oyoyi keka nonya ni yo ofonu ka Atemis kpa azurupa kweyi otoyu nu byikwiri wa dawo yoko kpanu kotata. 25Ni oyuwo gwu kpiri, kpawase ni ba yedo koko wa ni kweyi okadawa mo, <<Ango, alagye mo, odu kaha wa bwebe koko mani. 26Nabani, alama ki pwo abiyikala oza ni Obulus yaya ni. Okamo eka ni aya kpabo ni wo Owuso lalo, oya gbishi ni oyotu kase kpiri yikwu, kipu ke Efesu kpe ebebenya okpagye ka Asiya. 27Ni olemani oni, ebi yaba, ikweyi koni otoyu kaha ya yishi. Omani kin lalo, ebi yawa ba ikweyi koni ole ke eka nyakwu ka Atemis ya wojije kelo. Oshu nyakwu no gbo mani ya wojije lo, kweyi ashishe ipu kokpagye ka asiya kpese kpiri ya geyagye danu kelo.
28Ni ewa pwela mani ni, otuwa bya, kweyi asheha mo olayi wo nayo gbogbo eka nyakwu Atemis ke Efesu. 29Ebeni ogya kpiri gyoza ni aba yani kelo: kweyi apa yo Ogayos kpo Aristakus kwu, ase ko Omasedoniya, awoya, kiyawu ko Obulus apyuwa gebe ni ase kogya tukpa ni. 30Ebeni Obulus yimu ko gipu kewa kweyi awogboso kyogwu lo. 31Mani oni, awigabo ko okpagye, awoya ko Obulus, atoleho baba mo, naka sayi nu ebeni ewa tukpa ni lo,
32Ogbayi kya, ase shini ba ngmegba ba koje, ashini ba koje oye hoha: kweyi nwashika kase gyoza ni kpuwa wa gbayi nilo. 33Ebeni ase ko oyahuda sa Alekzanda abo wohobu kewa, ashini kamo ogbabo ela mani. Kweyi Alekzanda yase abo mo ana sha, shini ona nyepwo kiyi nu. 34Ni ke agye mo, owo Ase ko Oyahuda la ni, kpiri wa ngmegba oko oye kponu, ba kamo olayi wo nayo gbogbo eka onyakwu ko Atemis, eka ko Efesu.
35Ogwejeji ino tenena ko ogya yase sha. Okamo, ayene hin ke Efesu, ananoho gye mo, ogya ke Efesu webe ni ole keka nyakwu ka Atemis yanu ni, mamani ikyikpo ni gbo bwi iso ni ase ba geyagye danu ni ye Efesu. 36Ashishe ya gege ya tawashu kawoza mani lo. Mani oni ala byowu kala weye, ka yoje ni ya byela wa ni lo. 37Ala byawa ango mani webeni, koni ayojije nu shole keka kaha lo, ake yeka ka ojije lo. 38Ni olemani oni, owoni Odemetriyus kpawo ya koko nu gbepwo kpashe, oda ko kepwo, kpa awo teyi baba; ana ga kepwo wa ebeni. 39Owoni ala ke gboje ni shomani, owo tiri shini ala ko owe neshi ogbayi ko okpagye. 40Itikpi koza ni gbodagye ikyeni, byoni olemani aha bipu kela nyakwu. Aha gbepwo oyoye koshu ikweyi kapwo mani lo, aha ba gege ko ngmiyika shela mani lo.>> 41Ni okela mani kweyi ni, oya ananoho ganu.
ទើបបានជ្រើសរើសហើយ៖
Oko-ki-igabo 19: ALA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
THE WORD FOR THE WORLD INTERNATIONAL, THE WORD FOR THE WORLD NIGERIA
