Oko-ki-igabo 17
17
Ipu ko Otasalonika
1Ishini Obulus kpo Osila shigbo bwagye ka Amfipolis kpa Apoloniya ni, ago Otasalonika ebe ni ekpa ko Oyahuda yanu ni. 2Byoni owodu nu ni, Obulus ya gipu kekpa ebewa kobize eta ya kela kpawa bwipu kokpa ko Owuso. 3Oya gwikweyi kela bwo Okpa dawa, kweyi ya shawa mo owotiri shini Omezaya na mowe kweyi gekwu, kweyi nyiso bwi ikwu. Obulus ki ka dawa mo, <<Oyesu ni nyya kela nu dala mani, pini wo Omezaya la.>> 4Ashini wa kyogwu kpo oza ni okani kweyi agboso Obulus kpo Osila, mamani anya kpawo Ogirik ni gboshi ko Owuso ni nwashika kpa kanya ni aba muwa gyiyi ni.
5Ase ko Oyahuda ke yanya koni amase nwashika gboso Obulus kpo Osila ni, akpayi kowu bwopu kweyi awa shosha nyiso. Anyinya gole ko Ojason baga tikpo ko Obulus kpo Osila shini ana byuwa wese ebe kewa. 6Ishini ake muwa lo ni, abyo Ojason kpa ayene shishini gebe ka awigabo ko ogya kweyi aba ngmegba mo, <<Ango mani yase gbotu ka agye lo ebebenya. Anani awo ogya kaha wa, 7kweyi Ojason kpuwa shole nu. Aba yono ko ose ko Oroma yi kyigbo, ba kamo ose oye nyakwu ki yaba, miye nu wo, Oyesu.>> 8Ishini awigabo kpase ko ogya pwoshu mani ni, otuwa bya kotata. 9Ebeni awigabo yo Ojason kpa ayene shishini zi ikwiri ome ana shuwa bita naga.
Ipu ko Oberiya
10Ni otu bi ni, ayene to Obulus kpo Osila oleho go Oberiya. Ni afebe ni, age ekpa ko Oyahuda. 11Ase ko Oberiya wawine kotu mene sha ase ko Otasalonika, ikweyi koni aba yimu ko pwela ni Obulus ya ka ni, kweyi aba gyokpa ko Owuso ishi kpiri shini anama kwe oza ni ofu ni gyogye. 12Ase ko yahuda nwashika kyogwu, mamani nwashika ka anya ko Ogirik ni aba muwa gyiyi ni kyogwu kpa ango ko Ogirik nwashika kyogwu. 13Ishini Ase ko Oyahuda ni bo Otesalonika pwo mo Obulus ya tono kela ko Owuso Oberiya ni, agebe ni ga kpase tukpa shini ana gbapwo. 14Ebebeni abyo Obulus oshi go okwunu ki ishu, Osila kpo Otimoti ke bagye Oberiya. 15Awase ni byo Obulus oshi ga Atina ni ba kwikye go Oberiya ni, akwikye kpo oleho ko Obulus mo Osila kpo Otimoti mana ga tanu papa, kweyi aga.
Ipu ka Atina
16Ishini Obulus ya gbeyi ko Osila kpo Otimoti ogya ka Atina ni, otu nu bya kotata, koni omole keka ebebe nya ipu ko ogya ni. 17Mani oni Ogipu kekpa ga kela kpa awase ko Oyahuda kpa awase ni wo Oyahuda lo ni gboshi ko Owuso ni, oya gopu kurutu ga kela kpa awase ni ya akpaha tagye danu ni. 18Ikpo ka awofoza inokpa ke Epikuriya kpa awase ni aba yuwogwu mo Ostoyiki, wa tawashu kpo Obulus. Ashini wa doka mo, <<Oji ni ikyo mani ya ka ni? Ashini kamo, <<Ole byo oya tono kela kaweka ni wako okpagye kaha lo ni.>> Aka mani ikweyi koni Obulus ya tono kela ko Oyesu dawa kpo onyiso nu bwi ikwu. 19Ebeni ayo Obulus kwu Ariyopagus, kweyi byo go obutu ka Arupagu ni wonongbo ko gya ni, kweyi adoka mo, <<Aba yimu ko gyoza pepe ni oya fu mani. 20Oza ni oya fu mani kpiri woza pepe ebe kaha, aba yimu ko gyikweyi nu.>> 21Kpiri kase ka Atina kpawase ni wo ogboga ni bogya ni yimu ko zishi wa kpiri ko kela ikweyi koza fofu pepe mani ko ki zakpaha danu.
22Ebeni Obulus nyiso hagye otutehe ka awonongbo kweyi kamo, <<Ala ase ka Atina! Nmala ba yela ko owuso gogo-gogo. 23Ishini nyya gyehe kpiri ipu ko ogya ni, nma awoza ni ala ba geyagye danu ni, nmo okpe oye ko opeshi ni atenena anu mo: DO OWUSO NI ASHISHE GYO LONI. Nabani oza ni ala ba geyagye danu ni ala gyelo ni, anu pini nyya kela ikweyi nu dala ma.
24<<Owuso ni yese kpo ojoji kpiri ni bipu nu ni anu pini wa Adole ki iso kpo okpagye la, oya yole ni ase ma kpabo ni lo. 25Oya yimu kojije ebe kasuse lo, ikweyi koni anu pini dase olayi kpo olayi, kpo oza ni ase ba yimu ni. 26Bwebe kase oye oya asuse kpiri, kweyi oyuwa bagye ebe gogo-gogo ipu kese. Anu abiyinu yishi kpeji kebe ni aba bagye ni. 27Owuso ya mani shini ana tikpo nu, kwe aba ba mo. Koni Owuso ke lenu kpaha lo. 28Byoni ashe kamo,
<Aha bipu nu, ba yawu anu, kweyi agbo olayi anu.>
Byoni awo wigye kala ba kamo,
<Aha wayi nu mamani la.>
29Byoni aha wayi ko Owuso ni, ahan kama byo oyi ko Owuso lema byo ozinariya kwe azurupa kwe ikyikpo ni ase kpo bwebe koko kabo nu ni lo. 30Ishini ase gye lo ni Owuso ya kwuwe pwo koza labi wa lo. Nabani ke oka dase kpiri ebebenya mo ana shagbotu. 31Ikweyi koni oteno kowa kepwo kokwokwoshi ikweyi kananoho ipu kese bwebe kase ni oshu ko kepwo ni. Oshiya aha mo omani gbawashu lo, koni oya anu oni nyiso bwikwu ni!>>
32Ishini apwo Obulus ya kela ikweyi ko nyiso ikwu ni, ashini kase yo pya woza keye, kweyi ashini kamo, <Aba yimu ko ki pwela mani ebe wo komwepa.> 33Ebeni Obulus sho ogbayi bita. 34Ashini kase kyogwu kweyi zela ko Obulus. Ipu wa wo Odiyosiyus, oye ipu ko onongbo kpo onya oye iye nu wo Odamari kpa ashini kase.
ទើបបានជ្រើសរើសហើយ៖
Oko-ki-igabo 17: ALA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
THE WORD FOR THE WORLD INTERNATIONAL, THE WORD FOR THE WORLD NIGERIA
