Oko-ki-igabo 10
10
Obitrus Kpo Okoneliyo
1Ongo oye yo Okesariya iye nu wo Okoneliyo, owoteyi kikpo kawadakare ko Oroma ni aba yuwogu mi <<Ikpo ki Itali ni>>. 2Ogboshi ko Owuso, kanu kipwoma nu ba geyagye do Owuso. Oya yawoleha ko Oyahuda eshi kweyi ya tinarigwu do Owuso ishi kpiri. 3Eno oye abo kogye eta kisheno Owuso gwaniyi, omoyoleho ko Owuso neneshi webe nu wa kamo, <<Okoneliyo!>>
4Oyiyi kwoyoleho kposhi kweyi doka mo, <<Olela, Adole?>>
Oyoleho ko Owuso ka danu mo, <<Otu ko Owuso sha kpawo ikweyi kinarigwu tota wo kpoko ko tasabo noya ya ni, kweyi opwoboba wo. 5Nabani, tase oleho go Ojopa ebe kongo oye niye nu wo Osimo Obitrus ni. 6Owogboga ole ko Osimo ino gokpa, ni ole nu yokwunu ki ishu ni.>>
7Ebeni oyoleho ko Owuso ganu, Okoneliyo yayole nu epa kpadakare oye niya yoko danu kweyi wino ko Owuso ni ogu. 8Okojoji kpiri ni gbodagye ni dawa kweyi otuwoleho go Ojopa.
9Eno ko omwepa, ni abowe kweyi wa pee kpo Ojopa ni, abo kisheno Obitrus toshi goda kiso ko ga tinarigwu. 10Emye ya ngmo kweyi oya yimu ko roza; ake yozarore kweyi wa lo, Owuso gwaniyi. 11Omiso gwa kweyi oje bya ayikyi ya sa wa kokpagye bwagbabo ene ni ogbo ni. 12Ogbedo kawobize wonyonya ipunu, kpawoza ni ba pyipu agye bya apwa, kpawigbano kpiri. 13Ebeni oko kela kpanu mo, <<Obitrus, nyiso; ngmo sho ha.>>
14Obitrus ke kamo, <<Aayi, Adole! Nyya hoza fofu lo.>>
15Oko oni ki kela kpanu komwepa mo, <<Ka yojije ni Owuso mo wo sere ni ogu moza fofu lo.>>
16Oza mani gbodagye igbeta, kweyi akwikye oza ni giso.
17Obitrus byotu kotata kweyi ya kamo oji wase koza ni Owuso gwamiyi ma mani, awase ni Okoneliyo tuwoleho ni kwobonu pyowe kole ko Osimo, kweyi awa hagye ofunu kole. 18Azoko iso ba doka mo, <<Ogboga oye yebe ni wine kiye ko Osimo Obitrus?>>
19Obitrus ke tayayo ya takirikwu ko gyikweyi koza ni agwaniyi ma ni, Omaku ko Owuso ka danu mo, <<Pwo! Ango ase eta ba tikpo wo oma. 20Nyiso shini osa gokpagye, ka yoshi ko ga kpawa lo, ami pini tuwo oleho la.>>
21Mani oni Obitrus sa ga kadawa mo, <<Ami pini wase ni ala ba tikpo ni la. Oji byala wa?
22Ebeni akyogwu mo, <<Oteyi ka adakare Okoneliyo pini taholeho la, Owase neshi la kweyi okiya yoshi ko Owuso, kpiri ka Ase ko Oyahuda bamo gyiyi. Oyoleho sere ka danu mona yogu wole nu, shini ona pwoza ni ogbo koka ni.>> 23Ebeni Obitrus yuwogu gipu kole kweyi yuwa kya gbokyi.
Eno ko omwepa, Owiyinushu kweyi ga kpawa; kweyi awogboso Oyesu ashini ni bo Ojopa ni byoshi. 24Eno ni gboso ni afo Okesariya, ebe ni Okoneliyo ya gbishi nu ni, kanu kawoya nu kpayinanu no pawa ni. 25Obitrus ya gipu ole, Okoneliyo gbayi kpanu, okwagye obutu nu, ya ge yagye danu. 26Obitrus ke ka danu mo, <<Nyiso iso, ami abiyun wasuse kin la.>>
27Ni obyela ya ka kpo Okoneliyo ni, ogipu kole ga mewa kasuse ni tukpa ni. 28Oka dawa mo, <<Ala abiyikala gye kamo ono ka Ase ko Oyahuda wahobi ko rema kawase ni wase ko Yahuda lo ni, kwako gole wa. Owuso ke shiyami mo naka febi kashishe lo. 29Ikweyi koni ishini otoleho mona wani, nwwa otu oye kponu. Nabani nyya doka, ojiya ni oyumogwu?>>
30Okoneliyo kamo, <<Ishi ma eneta ni shigbo ni nyya tinarigwu, abo kogyeta kisheno. Ebeni ongo oye wa hagye obutu hin kposhiye yoyu 31kweyi kamo, <Okoneliyo, Owuso pwi inarigwu wo kweyi rela keshi wo ni oya dawoleha ni. 32Tase oleho go Ojopa shini ana ga yongo oye niye nu wo Osimo Obitrus ni ogwu. Owogboga ole ko Osimo ino gokpa niyo okwunu ki ishu ni.> 33Ozani yani ntoleho ebebeni gebewo ni oma, kweyi oyoza neshi ni owa ni. Anani kpiri kaha bobutu ko Owuso ebe ni, ba gbeyi ko pwoza kpiri ni Owuso ka dawo mo ka daha ni.>>
Obitrus Kela
34Ebeni Obitrus kwotu ko kela dawa mo, <<Anani nggye mowokwokwoshi, Owuso yimu kashe shashe lo. 35Oya kyogwu kpase kpiri bwose wonyonya ni gboshi nu kweyi ba yoza ni wo gyogye ni. 36Ala gyoleho ni otu gebe kase ki Izrayila ni, ko Oshu Neshi ko otumene bwebe ko Oyesu Okristi, ni wa Adole kananoho ni. 37Ala gyoza nyakwu ni gbodagye okpagye ki Izrayila ni, kwotu bwo Ogalili itikpi ko ono totu ko obatisma ni Oyohana tu ni. 38Ala gyela ko Oyesu ko Onazaret kposhu ko Omaku ni Owuso shikweyi ni. Oge ebebenya, ya yoza neshi kweyi ya da awase ni babo ki Ibiri ni ogege, koni Owuso yo kpanu ni.
39<<Aha wolobene kojoji kpiri noya okpagye ki Izrayila kpo Ojerusele ni. Ebeni ayo ngmo bwebe ko yo poshi. 40Owuso ke yo nyiso bwikwu eno komweta, kweyi oyase mo, 41ase kpiri pini mo lalo, awolobene ni Owuso kwobonu shu ni la, aha ni re ki gwa kpanu ishini onyiso ikwu ni. 42Oka daha mo ahan tono koshu neshi dase kweyi an yolobene manu pini wase ni Owuso shu wino kepwo kawinolayi kpalekwu ni la. 43Kpiri kawobane kela ikweyi nu, mase ni kyogwu kpanu aba yozalabi nu yi gbo bwebe koshu kiye nu.>>
Awase ni Wase ko Oyahuda lo ni Nyo Omaku ko Owuso
44Obitrus yipu ko kela, Omaku ko Owuso sa ikweyi kase kpiri ni ba pwela nu ni. 45Igbashi ya Ase ko Oyahuda ni kyogwu kpo Oyesu ni kwu ikweyi koni Owuso yeshi ko Omaku nu sa ikweyi kawase ni wa Ase ko Oyahuda lo ni, awa ni wa kpo Obitrus bwo Ojopa ni. 46Apwuwa ba kela okwunu kose gogo-gogo, kweyi ba sho Owuso iye.
Ebeni, Obitrus kamo, 47<<Awase mani nyeshi ko Omaku byoni aha nye ni. Ashe ya gege ya wuwobi ko yobatisma kinyo?>> 48Ebeni ozoko mana yuwobatisma ipu kiye ko Oyesu Okristi. Ebeni abo Obitrus mona yagye kpawa kishi gbayayi.
ទើបបានជ្រើសរើសហើយ៖
Oko-ki-igabo 10: ALA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
THE WORD FOR THE WORLD INTERNATIONAL, THE WORD FOR THE WORLD NIGERIA
