लुका 23
23
पिलातसवइ उबरिक येसु
मत्ति २७:११-२६; मर्कुस १५:१-१५; युहन्ना १८:२८-३८
1यहुदि अगुवाराइ घ्यो यासभालाउ स्यो सदस्यर सोकेर, हैजैद येसुलाइ रोमि हाकिम पिलातसवइ ओलेउक लोंकेर। 2हैजैद अइलेद दोस लैद, “आइ गिर्मिरलाइ ‘ङाज यहुदिराइ यार्गे ख्रिस्त’ सोनो ‘जे रोमि अर्गेलाइ स्यार्मा फुउ माकाजौ’ हैलेद अर्मिरलाइ ओवा भकैरिज्याउ गेस्दैके।”
3पिलातसवइ येसुलाइ अस्गेंकेउ, “ना यहुदिराइ याअर्गे रो?”
येसुइ नोलाइ हैदोकेउ, “नाज हैनलेज्या।”
4पिलातसवइ यहुदि मुख्ये पुजारिर सोनो नोक अस्दुसिउ अर्मिरलाइ हैयादोकेउ, “ङा आउ अर्मित निउ दोस ङामास्दैके।”
5तर नोराइ कलिद हैलेकेर, “आउ अर्मिवइ उसिछ्या गालिल् इलाकाङि सुरु दाद आक यरुसलेम सम यहुदिया इलाका भरिलाउ अर्मिरलाइ अस्पैद याभहकैरिज्या।”
अर्गे हेरोदवइ उबरिक येसु
6पिलातसवइ आउ थैद यास्गेंकेउ, “आउ अर्मि गालिल्लाउ रो?” 7येसु अर्गे हेरोद एन्तिपासवइ उइलाकालाउ अर्मि ओजासो हैलेन्या सैंद पिलातसवइ येसुलाइ हेरोदवइ ओलेउक अस्परिंकेउ। नो बेलाक हेरोद ब यरुसलेम्ल ज ले। 8अब येसुलाइ राँद हेरोद अचम्ब खुसि जास्के। नेलाइलेक नोइ येसुइ ओबारेल थैसिउ ले, हैजैद पैलाकिंज येसुलाइ राँन्या इच्छ्या दासिउ ले, सोनो येसुइ अचम्बलाउ एन् ओदोउ राँन्या आस दाज्याउ ले। 9होकारन नोइ येसुलाइ भ्या अस्पाँर अस्गेंकेउ, तर येसुइ नोलाइ निउ जबाफ मायोकेउ। 10यहुदि मुख्ये पुजारिर सोनो मोसावइ ओनियम अस्पैन्याराइ सोद येसुलाइ छन्द भाँतलाउ दोस लैकर। 11हुकिं अर्गे हेरोद सोनो उसिपाहिर मिलिद येसुलाइ निन्दा दाद अस्बोरैकेर। हुकिं येसुलाइ लाजोमर्न जैन्याको लागि अर्गेवइ कुसिन्या पहिरन क्वास्द रोमि हाकिम पिलातसवइ ओलेउक अप्सेल्द अस्परिंकेर। 12पहिला पिलातस सोनो हेरोदनिइ इंखार्ल दुस्मनि ले, तर हो छ्याम्किं नुनिइ इंमिलाप जास्के।
येसुलाइ सैसिउ
मत्ति २७:१५-२६; मर्कुस १५:६-१५; युहन्ना १८:३९; १९:१६
13हुकिं पिलातसवइ यहुदि मुख्ये पुजारि, सासकर, सोनो जनतारलाइ यास्दुकेउ। 14नोइ नोरलाइ हैयादोकेउ, “जे आउ अर्मिरवइ अर्मिरलाइ याभहकैरिज्या हैलेद आलाइ ङालेउक जेरैके। ङा जे स्योराइ जेबरिक ज आलाइ ङास्गेंके तर जे हैजेलेउ मदिउ दोस लैन्या अस्पाँ आइ ओतर्त निउ ङामास्दैके। 15हेरोदवइ ब दोस मास्दैकेउ, नेलाइलेक नोइ आलाइ गेलेउक ज अप्सेल्द अस्परिंनौ। राँच्यो, आइ सिन्या दन्द अस्दैन्या योग्यलाउ निउ एन् मादोथाउँ। 16आउकारन ङा आलाइ कोर्रा लैउ अस्परिंद ङारास्।” 17[नोलाउ याचलन अनुसार छुत्कारालाउ पर्बत पिलातसवइ तुबु कैदिलाइ रासो परिन्या ले।] 18तर स्यो अर्मिराइ अइलेद कलिद हैलेकेर, “आलाइ सौज परि, बरु गेको लागि बारब्बालाइ रास्को।” 19बारब्बा चाहिं यरुसलेम सहरलाउ रोमि सरकारवइ उबिरोध्ल उथिद अर्मिर सैसिउ आरोपल झ्यालखानाल परिउ ले।
20येसुलाइ रास्न्या युउँ दाद पिलातसवइ फिरि नोरलाइ यासम्झैकेउ। 21तर नोर अइलेद कलिकेर, “क्रुस्त ताँगिको! नोलाइ क्रुस्त ताँगिको!”
22पिलातसवइ नोरलाइ फिरि यास्गेंकेउ, “नेलाइ? आउ अर्मिइ माप्चाउ एन् नाति दादनौ द? ङाते आलाइ सिन्या दन्द यान्या निउकारन ङामास्दैके। आउकारन ङा आलाइ सजाय याद रास्न्या ङाले।”
23तर नोराइ चोइसि कलिद येसुलाइ क्रुस्त ताँगिउ ज परि हैलेद ङिकेर। नोराइ यास्पाँ पुरा जास्के। 24होकारन पिलातसवइ नोराइ याङिउ अस्पाँ पुरा जैद यान्या फैसला यास्थैकेउ। 25हुकिं नोइ रोमि सरकारवइ उबिरोध्ल उथिद अर्मि सैद झ्याखानाल परिउ बारब्बा हैयादाज्याउ अर्मिलाइ रास्केउ। हुकिं येसुलाइ चाहिं जो दाउ जेस्पैंज्या होज दाच्यो हैलेद नो अर्मिराइ याकुइत यासुम्पिकेउ।
येसुलाइ क्रुस्त ताँगिसिउ
मत्ति २७:३२-४४; मर्कुस १५:२१-३२; युहन्ना १९:१७-२७
26सिपाहिराइ येसुलाइ क्रुस्त ताँगिन्या यालाँज्याक, कुरेनि हैयादाज्याउ थाउँलाउ सिमोन उर्मिलेउ तुबु अर्मि ओनाखाँङि यरुसलेम्दि ओराज्याक सिपाहिराइ होलाइ कोलोद क्रुस् अस्कस्द येसुइ उछिं-उछिं हिउँ अस्परिंकेर।
27अर्मिराइ घ्यो याहुल्मुल येसुइ उछिंत हिंकेर। होल मिमार ब लेर, नोर लावैसिउयाँ घर्ज्याउर लेर। 28नोराइ यालेउदि फर्किद येसुइ हैयादोकेउ, “यरुसलेमलाउ चेलिर, जे ङाको लागि भन्दा ब जे जेको लागि सोनो जेजाराको लागि घर्च्यो। 29नेलाइलेक थैच्यो, अमदिउ दिनर रान्यालेर सोनो अर्मिराइ अइलेन्यालेर, ‘जा मास्दैन्यार सोनो याजारलाइ नुइ मासुनुइन्या मिमार भ्या आसिस अस्दैसिउर।’ 30होबेलाक अर्मिराइ धुरिरलाइ ‘गेतर्त तेनि’ सोनो दाँदारलाइ ‘गेलाइ कप्सिको’ हैदान्या लेर#होसे १०:८। 31नेलाइलेक अर्मिराइ पिउँ सिं मदिउ ङालाइ ते अइजैङाज्यार लेक, थुउँ सिं मदिउ अर्मिरलाइ झन कैयाजैरते?”
32नोराइ जोर्बलै अपराधिनिलाइ ब येसुस सिप् सैन्या लाँज्याउर लेर। 33जब नोर खप्परे हैयादाज्याउ थाउँक कलेस्रैकेर, हुकिं नोक नोराइ येसुलाइ क्रुस्त ताँगिकेर, सोनो नो जोर्बलै अपराधिनिलाइ ब तुबुलाइ ओर्फत सोनो तुबुलाइ दाप्र्याफत क्रुस्त याताँगिकेर। 34होबेलाक येसुइ हैलेके, “हे बाबु, आरलाइ छेमा यायोको, नेलाइलेक आराइ नाति दाज्यार आराइ मासैंर#भजनसंग्रह २२:१८।” सिपाहिराइ येसुइ ओक्वालाइ गोला जाद भाकेर।
35अर्मिर च्याँद राँज्याउर लेर। यहुदि अगुवाराइ येसुलाइ गिल्दै द हैलेकेर, “राँच्यो, आइ गुँ अर्मिरलाइ ते याबचैकेउ, यदि आउ परमेस्वरवइ ओछानिउ मुक्ति यान्या अर्गे ख्रिस्तकिंलेक, आइ ओल्लाइ ज ओबचौक#भजनसंग्रह २२:७।”
36सिपाहिराइ ब येसुलाइ स्युरो अंगुरवइ ओरस् याद अइदाद गिल्दैकेर, 37“ना यहुदिराइ यार्गेकिंलेक ना नालाइ बचैको।”
38“आउ यहुदिराइ यार्गे” हैलेद फल्यात अप्सर्सिउ दोस-पत्र येसुइ ओर्ङैफ झुन्दैद यासिउ ले।
39येसुस क्रुस्त झुन्दैसिउ अपराधिनि मध्ये तुबु अपराधिवइ येसुलाइ गिल्दैद हैदोकेउ, “ना ख्रिस्त म्हा रो? ना नालाइ ज सोनो गिंलाइ ब बचैसिको।”
40तर नोलाइ हप्कैद गुँवइ जबाफ योकेउ, “ना परमेस्वरलाइ राँद नमाछे रो? नाबते नोइ ओदन्द मदिउल ज परिद नले। 41गिं जोर्निइ ते माप्चाउ एन् गिंदाउ कारन दन्द अस्दैद गिंनै तर आइते निउ माप्चाउ एन् दासिउ माले।” 42हुकिं नोइ हैलेके, “हे येसु ना नराज्यल नराक ङालाइ ब सम्झिङाको।”
43येसुइ नोलाइ हैदोकेउ, “दसाज ङा नालाइ हैङादिनिज्या, आछिम्किंज ना ङास स्वर्गलोकत जास्न्या नले।”
येसु सिउ
मत्ति २७:४५-५६; मर्कुस १५:३३-४१; युहन्ना १९:२८-३०
44अब चाहिं लाकाउ बाह्र बजिउ ले। होबेलाकिं तिन् बजे सम स्यो देसभरि नम् ज्याके। 45नेलाइलेक घाम् ब नुप्नाउ मदिउ जास्के, सोनो परमेस्वरवइ उझिम्लाउ पर्दा रुतिं नेखाँदा जास्द अप्चिस्के#प्रस्थान २६:३१-३३। 46घ्यो अर्गास कलिद येसुइ हैलेके, “हे परमेस्वर बाबु, ङा ङाआत्मा नकुइत ङासुम्पिज्या।” आकाना हैलेद येसुइ ओप्रान त्यागिकेउ#भजनसंग्रह ३१:५।
47अमदिउ ओजासो राँद रोमि सिपाहिराइ याकप्तानवइ, “दसाज आउ परमेस्वरवइ उयुउँ मदिउ जास्द चलिन्या अर्मि ओजासो।” हैलेद परमेस्वरवइ ओप्रसंसा दोकेउ।
48आउ राँन्या अस्दुसिलेउ स्यो अर्मिराइ आउ अस्पाँर राँद, याछाति पितिइ पितिइ घर्द याझिम्दि ओल्केर। 49तर गालिल्ङि राउ येसुलाइ सरेसज्याउर सोनो येसुइ उछिं-उछिं राज्याउ मिमार तादात च्याँद आउ घतनार राँद नैकेर#लुका ८:२-३।
येसुलाइ गादिसिउ
मत्ति २७:५७-६१; मर्कुस १५:४२-४७; युहन्ना १९:३८-४२
50-51थैच्यो, यहुदियालाउ अरिमाथिया हैयादाज्याउ सहरल योसेफ उर्मिलेउ तुबु अर्मि ले। नो आदरनिय अर्मि ले। नोइ परमेस्वरवइ ओराज्य रा हैलेद घ्वा राँज्याउ ले। नो यहुदि अगुवाराइ घ्यो यासभालाउ सदस्य ओलेदिब येसुलाइ सैन्या दन्द यान्या अस्पाँत नो माबैंसिउ ले। 52योसेफवइ पिलातसवइ ओलेउक हिंद येसुइ ओलास गादिन्या याँङाको हैलेद ङिकेउ। 53अनुमति ओस्दौ छिंङि येसुइ ओलासलाइ क्रुस्तिंमेल सलास्द सुति क्वाइ लोम्थैकेउ, हैजैद पहरत खुपिद जैसिउ तुबु सागरल जाकेर। हो सागरल सुराइ ब यामोरो माजासिउ ले। 54हो छ्याम् चाहिं यहुदिराइ यानान्या दिनको लागि तयारि जास्न्या दिन् ले। हुकिं नान्या दिन् सुरु जास्नाउ ले।
55गालिल्ङि येसुस राउ मिमार उछिं-उछिं हिंकेर, हुकिं नो सागर सोनो होक येसुइ ओलास कैजैद जाकेर राँकेर। 56हुकिं नोर नुकिं हिंद येसुइ ओलासत थिन्याको लागि अप्चाउ उसरिफ लेउ मास् सोनो मसला तयार जैकेर। तर मोसावइ ओव्यबस्थावइ हैओलेउ अनुसार यहुदिर नान्या छ्याम् नोर नाकेर#प्रस्थान २०:१०; व्यबस्था ५:१४।
ទើបបានជ្រើសរើសហើយ៖
लुका 23: MAIK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024 (Active), Mother Tongue Translators Society and Wycliffe Bible Translators, Inc. All rights reserved.
लुका 23
23
पिलातसवइ उबरिक येसु
मत्ति २७:११-२६; मर्कुस १५:१-१५; युहन्ना १८:२८-३८
1यहुदि अगुवाराइ घ्यो यासभालाउ स्यो सदस्यर सोकेर, हैजैद येसुलाइ रोमि हाकिम पिलातसवइ ओलेउक लोंकेर। 2हैजैद अइलेद दोस लैद, “आइ गिर्मिरलाइ ‘ङाज यहुदिराइ यार्गे ख्रिस्त’ सोनो ‘जे रोमि अर्गेलाइ स्यार्मा फुउ माकाजौ’ हैलेद अर्मिरलाइ ओवा भकैरिज्याउ गेस्दैके।”
3पिलातसवइ येसुलाइ अस्गेंकेउ, “ना यहुदिराइ याअर्गे रो?”
येसुइ नोलाइ हैदोकेउ, “नाज हैनलेज्या।”
4पिलातसवइ यहुदि मुख्ये पुजारिर सोनो नोक अस्दुसिउ अर्मिरलाइ हैयादोकेउ, “ङा आउ अर्मित निउ दोस ङामास्दैके।”
5तर नोराइ कलिद हैलेकेर, “आउ अर्मिवइ उसिछ्या गालिल् इलाकाङि सुरु दाद आक यरुसलेम सम यहुदिया इलाका भरिलाउ अर्मिरलाइ अस्पैद याभहकैरिज्या।”
अर्गे हेरोदवइ उबरिक येसु
6पिलातसवइ आउ थैद यास्गेंकेउ, “आउ अर्मि गालिल्लाउ रो?” 7येसु अर्गे हेरोद एन्तिपासवइ उइलाकालाउ अर्मि ओजासो हैलेन्या सैंद पिलातसवइ येसुलाइ हेरोदवइ ओलेउक अस्परिंकेउ। नो बेलाक हेरोद ब यरुसलेम्ल ज ले। 8अब येसुलाइ राँद हेरोद अचम्ब खुसि जास्के। नेलाइलेक नोइ येसुइ ओबारेल थैसिउ ले, हैजैद पैलाकिंज येसुलाइ राँन्या इच्छ्या दासिउ ले, सोनो येसुइ अचम्बलाउ एन् ओदोउ राँन्या आस दाज्याउ ले। 9होकारन नोइ येसुलाइ भ्या अस्पाँर अस्गेंकेउ, तर येसुइ नोलाइ निउ जबाफ मायोकेउ। 10यहुदि मुख्ये पुजारिर सोनो मोसावइ ओनियम अस्पैन्याराइ सोद येसुलाइ छन्द भाँतलाउ दोस लैकर। 11हुकिं अर्गे हेरोद सोनो उसिपाहिर मिलिद येसुलाइ निन्दा दाद अस्बोरैकेर। हुकिं येसुलाइ लाजोमर्न जैन्याको लागि अर्गेवइ कुसिन्या पहिरन क्वास्द रोमि हाकिम पिलातसवइ ओलेउक अप्सेल्द अस्परिंकेर। 12पहिला पिलातस सोनो हेरोदनिइ इंखार्ल दुस्मनि ले, तर हो छ्याम्किं नुनिइ इंमिलाप जास्के।
येसुलाइ सैसिउ
मत्ति २७:१५-२६; मर्कुस १५:६-१५; युहन्ना १८:३९; १९:१६
13हुकिं पिलातसवइ यहुदि मुख्ये पुजारि, सासकर, सोनो जनतारलाइ यास्दुकेउ। 14नोइ नोरलाइ हैयादोकेउ, “जे आउ अर्मिरवइ अर्मिरलाइ याभहकैरिज्या हैलेद आलाइ ङालेउक जेरैके। ङा जे स्योराइ जेबरिक ज आलाइ ङास्गेंके तर जे हैजेलेउ मदिउ दोस लैन्या अस्पाँ आइ ओतर्त निउ ङामास्दैके। 15हेरोदवइ ब दोस मास्दैकेउ, नेलाइलेक नोइ आलाइ गेलेउक ज अप्सेल्द अस्परिंनौ। राँच्यो, आइ सिन्या दन्द अस्दैन्या योग्यलाउ निउ एन् मादोथाउँ। 16आउकारन ङा आलाइ कोर्रा लैउ अस्परिंद ङारास्।” 17[नोलाउ याचलन अनुसार छुत्कारालाउ पर्बत पिलातसवइ तुबु कैदिलाइ रासो परिन्या ले।] 18तर स्यो अर्मिराइ अइलेद कलिद हैलेकेर, “आलाइ सौज परि, बरु गेको लागि बारब्बालाइ रास्को।” 19बारब्बा चाहिं यरुसलेम सहरलाउ रोमि सरकारवइ उबिरोध्ल उथिद अर्मिर सैसिउ आरोपल झ्यालखानाल परिउ ले।
20येसुलाइ रास्न्या युउँ दाद पिलातसवइ फिरि नोरलाइ यासम्झैकेउ। 21तर नोर अइलेद कलिकेर, “क्रुस्त ताँगिको! नोलाइ क्रुस्त ताँगिको!”
22पिलातसवइ नोरलाइ फिरि यास्गेंकेउ, “नेलाइ? आउ अर्मिइ माप्चाउ एन् नाति दादनौ द? ङाते आलाइ सिन्या दन्द यान्या निउकारन ङामास्दैके। आउकारन ङा आलाइ सजाय याद रास्न्या ङाले।”
23तर नोराइ चोइसि कलिद येसुलाइ क्रुस्त ताँगिउ ज परि हैलेद ङिकेर। नोराइ यास्पाँ पुरा जास्के। 24होकारन पिलातसवइ नोराइ याङिउ अस्पाँ पुरा जैद यान्या फैसला यास्थैकेउ। 25हुकिं नोइ रोमि सरकारवइ उबिरोध्ल उथिद अर्मि सैद झ्याखानाल परिउ बारब्बा हैयादाज्याउ अर्मिलाइ रास्केउ। हुकिं येसुलाइ चाहिं जो दाउ जेस्पैंज्या होज दाच्यो हैलेद नो अर्मिराइ याकुइत यासुम्पिकेउ।
येसुलाइ क्रुस्त ताँगिसिउ
मत्ति २७:३२-४४; मर्कुस १५:२१-३२; युहन्ना १९:१७-२७
26सिपाहिराइ येसुलाइ क्रुस्त ताँगिन्या यालाँज्याक, कुरेनि हैयादाज्याउ थाउँलाउ सिमोन उर्मिलेउ तुबु अर्मि ओनाखाँङि यरुसलेम्दि ओराज्याक सिपाहिराइ होलाइ कोलोद क्रुस् अस्कस्द येसुइ उछिं-उछिं हिउँ अस्परिंकेर।
27अर्मिराइ घ्यो याहुल्मुल येसुइ उछिंत हिंकेर। होल मिमार ब लेर, नोर लावैसिउयाँ घर्ज्याउर लेर। 28नोराइ यालेउदि फर्किद येसुइ हैयादोकेउ, “यरुसलेमलाउ चेलिर, जे ङाको लागि भन्दा ब जे जेको लागि सोनो जेजाराको लागि घर्च्यो। 29नेलाइलेक थैच्यो, अमदिउ दिनर रान्यालेर सोनो अर्मिराइ अइलेन्यालेर, ‘जा मास्दैन्यार सोनो याजारलाइ नुइ मासुनुइन्या मिमार भ्या आसिस अस्दैसिउर।’ 30होबेलाक अर्मिराइ धुरिरलाइ ‘गेतर्त तेनि’ सोनो दाँदारलाइ ‘गेलाइ कप्सिको’ हैदान्या लेर#होसे १०:८। 31नेलाइलेक अर्मिराइ पिउँ सिं मदिउ ङालाइ ते अइजैङाज्यार लेक, थुउँ सिं मदिउ अर्मिरलाइ झन कैयाजैरते?”
32नोराइ जोर्बलै अपराधिनिलाइ ब येसुस सिप् सैन्या लाँज्याउर लेर। 33जब नोर खप्परे हैयादाज्याउ थाउँक कलेस्रैकेर, हुकिं नोक नोराइ येसुलाइ क्रुस्त ताँगिकेर, सोनो नो जोर्बलै अपराधिनिलाइ ब तुबुलाइ ओर्फत सोनो तुबुलाइ दाप्र्याफत क्रुस्त याताँगिकेर। 34होबेलाक येसुइ हैलेके, “हे बाबु, आरलाइ छेमा यायोको, नेलाइलेक आराइ नाति दाज्यार आराइ मासैंर#भजनसंग्रह २२:१८।” सिपाहिराइ येसुइ ओक्वालाइ गोला जाद भाकेर।
35अर्मिर च्याँद राँज्याउर लेर। यहुदि अगुवाराइ येसुलाइ गिल्दै द हैलेकेर, “राँच्यो, आइ गुँ अर्मिरलाइ ते याबचैकेउ, यदि आउ परमेस्वरवइ ओछानिउ मुक्ति यान्या अर्गे ख्रिस्तकिंलेक, आइ ओल्लाइ ज ओबचौक#भजनसंग्रह २२:७।”
36सिपाहिराइ ब येसुलाइ स्युरो अंगुरवइ ओरस् याद अइदाद गिल्दैकेर, 37“ना यहुदिराइ यार्गेकिंलेक ना नालाइ बचैको।”
38“आउ यहुदिराइ यार्गे” हैलेद फल्यात अप्सर्सिउ दोस-पत्र येसुइ ओर्ङैफ झुन्दैद यासिउ ले।
39येसुस क्रुस्त झुन्दैसिउ अपराधिनि मध्ये तुबु अपराधिवइ येसुलाइ गिल्दैद हैदोकेउ, “ना ख्रिस्त म्हा रो? ना नालाइ ज सोनो गिंलाइ ब बचैसिको।”
40तर नोलाइ हप्कैद गुँवइ जबाफ योकेउ, “ना परमेस्वरलाइ राँद नमाछे रो? नाबते नोइ ओदन्द मदिउल ज परिद नले। 41गिं जोर्निइ ते माप्चाउ एन् गिंदाउ कारन दन्द अस्दैद गिंनै तर आइते निउ माप्चाउ एन् दासिउ माले।” 42हुकिं नोइ हैलेके, “हे येसु ना नराज्यल नराक ङालाइ ब सम्झिङाको।”
43येसुइ नोलाइ हैदोकेउ, “दसाज ङा नालाइ हैङादिनिज्या, आछिम्किंज ना ङास स्वर्गलोकत जास्न्या नले।”
येसु सिउ
मत्ति २७:४५-५६; मर्कुस १५:३३-४१; युहन्ना १९:२८-३०
44अब चाहिं लाकाउ बाह्र बजिउ ले। होबेलाकिं तिन् बजे सम स्यो देसभरि नम् ज्याके। 45नेलाइलेक घाम् ब नुप्नाउ मदिउ जास्के, सोनो परमेस्वरवइ उझिम्लाउ पर्दा रुतिं नेखाँदा जास्द अप्चिस्के#प्रस्थान २६:३१-३३। 46घ्यो अर्गास कलिद येसुइ हैलेके, “हे परमेस्वर बाबु, ङा ङाआत्मा नकुइत ङासुम्पिज्या।” आकाना हैलेद येसुइ ओप्रान त्यागिकेउ#भजनसंग्रह ३१:५।
47अमदिउ ओजासो राँद रोमि सिपाहिराइ याकप्तानवइ, “दसाज आउ परमेस्वरवइ उयुउँ मदिउ जास्द चलिन्या अर्मि ओजासो।” हैलेद परमेस्वरवइ ओप्रसंसा दोकेउ।
48आउ राँन्या अस्दुसिलेउ स्यो अर्मिराइ आउ अस्पाँर राँद, याछाति पितिइ पितिइ घर्द याझिम्दि ओल्केर। 49तर गालिल्ङि राउ येसुलाइ सरेसज्याउर सोनो येसुइ उछिं-उछिं राज्याउ मिमार तादात च्याँद आउ घतनार राँद नैकेर#लुका ८:२-३।
येसुलाइ गादिसिउ
मत्ति २७:५७-६१; मर्कुस १५:४२-४७; युहन्ना १९:३८-४२
50-51थैच्यो, यहुदियालाउ अरिमाथिया हैयादाज्याउ सहरल योसेफ उर्मिलेउ तुबु अर्मि ले। नो आदरनिय अर्मि ले। नोइ परमेस्वरवइ ओराज्य रा हैलेद घ्वा राँज्याउ ले। नो यहुदि अगुवाराइ घ्यो यासभालाउ सदस्य ओलेदिब येसुलाइ सैन्या दन्द यान्या अस्पाँत नो माबैंसिउ ले। 52योसेफवइ पिलातसवइ ओलेउक हिंद येसुइ ओलास गादिन्या याँङाको हैलेद ङिकेउ। 53अनुमति ओस्दौ छिंङि येसुइ ओलासलाइ क्रुस्तिंमेल सलास्द सुति क्वाइ लोम्थैकेउ, हैजैद पहरत खुपिद जैसिउ तुबु सागरल जाकेर। हो सागरल सुराइ ब यामोरो माजासिउ ले। 54हो छ्याम् चाहिं यहुदिराइ यानान्या दिनको लागि तयारि जास्न्या दिन् ले। हुकिं नान्या दिन् सुरु जास्नाउ ले।
55गालिल्ङि येसुस राउ मिमार उछिं-उछिं हिंकेर, हुकिं नो सागर सोनो होक येसुइ ओलास कैजैद जाकेर राँकेर। 56हुकिं नोर नुकिं हिंद येसुइ ओलासत थिन्याको लागि अप्चाउ उसरिफ लेउ मास् सोनो मसला तयार जैकेर। तर मोसावइ ओव्यबस्थावइ हैओलेउ अनुसार यहुदिर नान्या छ्याम् नोर नाकेर#प्रस्थान २०:१०; व्यबस्था ५:१४।
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024 (Active), Mother Tongue Translators Society and Wycliffe Bible Translators, Inc. All rights reserved.