लुका 21
21
राँदिवइ ओदान
मर्कुस १२:४१-४४
1येसु परमेस्वरवइ उझिम् छ्योउक उचुँलेक धनि अर्मिराइ याभेति परमेस्वरवइ उझिम्लाउ दान दान्या बाकसल याझाज्याउ राँकेउ। 2येसुइ तुबु गरिब राँदिवइ ब नोक निस रुप्यालाउ सिक्का ओचरैज्याउ राँकेउ। 3आउ राँद येसुइ ओचेलारलाइ हैयादोकेउ, “दसाज ङा जेलाइ हैङादाच्योज्या, आउ गरिब राँदिइ गुँर भन्दा भ्या चरैनौ। 4नेलाइलेक गुँराइ ते एलो याधन सम्पत्तितिं भेति चरैनैर, तर आइते गरिब जास्द ब ओल्लाइ चाहिन्या ओल्सलेउ स्यो रुप्या याद नौ।”
येसुइ परमेस्वरवइ उझिम् भोन्या बारेले अस्पाँसिउ
मत्ति २४:१-२; मर्कुस १३:१-२
5हैजैद येसुइ ओचेलार परमेस्वरवइ उझिम्वइ ओबारेल अइलेद अस्पाँज्याउर लेर, “अप्चाउ-अप्चाउ लुँराइ जैसिउ सोनो परमेस्वरलाइ चरैसिउ दानराइ सिङ्गारिसिउ आउ परमेस्वरवइ उझिम् ख्वा अप्चाउ लिज्या।” तर येसुइ नोरलाइ अइयादोकेउ, 6“तला अमदिउ दिन रान्या ले, आर्क जे आक जेराँउ स्यो थोकर सतुर्राइ समिन्या लेर। तुबु लुँतर्त तुबु लुँ ब रहिन्या माले, नोर स्यो भत्किन्या लेर।”
दुख-कस्तर
मत्ति २४:३-२४; मर्कुस १३:३-१३
7नोराइ येसुलाइ अस्गेंकेर, “गुरु ज्यु, आउ स्यो खर्क जास्न्यालेर? सोनो आउ अस्पाँ ओजास्नाक कैजैद सैन्या?”
8येसुइ नोरलाइ हैयादोकेउ, “हुस्यार लेच्यो, जेलाइ सुराइ ताबकैच्योरक। नेलाइलेक ङा ङार्मित भ्या अर्मिराइ, ‘ङाज ख्रिस्त’ हैलेद रान्या लेर। सोनो ‘मादमि खेमन्या समय नजिक रादले।’ हैलेद हैलेन्यालेर। नोराइ याछिंत जे तालागिच्यो। 9जे जब युद्धर सोनो खैलाबैलालाउ अस्पाँर थैन्या जेले हैजैद ताआतिच्यो सोनो ताछेच्यो, नेलाइलेक बरिदि आउ घतनार जासो ज परि, तर मादमिवइ ओअन्त्य चाहिं होपन्याज जास्न्या माले।”
10येसुइ फिरि हैयादोकेउ, “जाति-जातिराइ याखार्ल लदाइ चलिन्या ले। तुबु राज्य, गुँ राज्य ओबिरोध्ल जास्न्या ले। 11जाँखाँ घ्यो-घ्यो भुइंचालोर हिंन्यालेर। अनिकाल सोनो महामारि जास्न्याले। नम्त छेछेङम्सिउ अस्पाँर जास्न्यालेर सोनो घ्यो-घ्यो चिनोर रैंन्यालेर। 12तर आउ स्यो अस्पाँ जास्न्या भन्दा बरिदि, अर्मिराइ जेलाइ ङाचेला जेजासो कारन कोलोन्यालेर, सोनो नोराइ जेलाइ दुखयाद यहुदिर अस्दुसिन्या झिम्याल तुल्द लाँद दोस लैन्या लेर सोनो झ्यालखानाल जान्यालेर। हुकिं अर्गेर सोनो हाकिमराइ याबरिक लान्यालेर। 13होबेला ङाबारेल जेलाइ साछि यान्या मौका जास्न्याले। 14आउकारन जे जेबचाउको लागि नाति हैग्यादाते हैलेद निउ चिन्ता तादाच्यो#लुका १२:११-१२ । 15नेलाइलेक होबेलाक ङा जेलाइ अमदिउ बुद्धि याद अस्पाँन्या जैन्या ङाले। होबेलाक जे जेबिरोध्ल अस्पाँन्या अर्मिराइ जेस्पाँवइ ओजबाफ यादुन्या मालेर सोनो नोर जेबिरोध्ल अस्पाँदुन्या मालेर। 16आकसम्कि जेबाबु-ज्यामा सोनो जेदाज्युभाइर, जिदिदि-भइनिर, जेनातेदार सोनो जिरिजाराइ समेत जेलाइ कोलोउ अस्परिंन्यालेर सोनो जे मध्ये खो-खोरलाइ सासकराइ सैन्या लेर। 17ङाचेला जेजासो कारन स्यो अर्मिराइ जेलाइ अप्सोन्या लेर। 18तर जेर्ङैताउ तगेदा जेचेम् ब तेन्या माले। 19अमदिउ स्यो किसिमलाउ दुखराल ब जे ङात भरोसा नैद जेनैकि जे सदा लेन्या जुनि अस्दैन्या जेले।”
येसुइ यरुसलेम सहर भोन्या बारेल अस्पाँसिउ
मत्ति २४:१५-२१; मर्कुस १३:१४-१९
20हुकिं येसुइ नोरलाइ हैयादोकेउ, “जब यरुसलेम्लाइ सेनाराइ घिरिसिउ जेराँ, हैजैद नो सहर नास् जास्न्या बेला रादले हैलेन्या जे सैंच्यो। 21होबेलाक यहुदिया इलाकाल लेन्यार दाँदादि ओभागिरक। सहरभितर्ल लिज्याउर सहर रास्द भागिद उहिंरक, सोनो सहर बाहारदि नाखाँल लेन्यार सहर भितर्ल तापसिरक। 22नेलाइलेक आउ समयल परमेस्वरवइ यरुसलेम सहरलाउ अर्मिरलाइ दन्द यान्या समय। अइजैद परमेस्वरवइ ओबचनल अप्सर्सिउ अस्पाँर स्यो पुरा जास्न्या ले#होसे ९:७। 23हो दिनल याकोखोल सोनो नुइनुइन्या आलुजा लुजा लेउ मिमारलाइ झन गारो जास्न्या ले! नेलाइकिं देसबरिल छेछेङम्सिउ दुख रान्याले। परमेस्वरवइ ओदन्द आउ जातिलाउ अर्मिरात रान्याले। 24सतुरराइ खो-खोरलाइ तरवालिवइ सैन्यालेर, सोनो भ्यारलाइ गुँ देसराल कैदि जैद लाँन्यालेर। हुकिं गुँ जातिराइ यादिन पुरा ओमाजास्वा नोराइ यरुसलेम्लाइ याखुँ धुँल सिदनैन्या लेर।
परमेस्वरवइ उस्परिंउ अर्मिइ ओजा फिरि रान्या बारेलाउ अस्पाँ
मत्ति २४:१९-३१; मर्कुस १३:२४-२७
25“घाम्, स्यावै सोनो सोरोरात चिनोर रैंन्या लेर, समुद्रवइ ओगर्जन सोनो छेछेङम्सिउ ओछालराइ याकारनवइ मादमि भरिलाउ स्यो जातिलाउ अर्मिर छेन्या लेर#यसैया १३:१०; इजकिएल ३२:७; योएल २:३१; प्रकास ६:१२-१३। 26मादमिल जास्रैन्या छेछेङम्सिउ घतनार सम्झिद अर्मिर याछेउराइ बिहोस जास्न्यालेर, नेलाइलेक नम्ताउ लिज्याउ सक्तिर हल्लिन्यालेर। 27हुकिं परमेस्वरवइ उस्परिंङाउ ङा अर्मिवइ ओजा बादल्ल घ्यो सक्ति सोनो महिमास ङाराज्याउ नोराइ राँन्यालेर#दानिएल ७:१३; प्रकास १:७। 28होकारन जब आउ अस्पाँर जासरैर जेयुउँ घ्यो जैच्यो हैजैद माछेद लेच्यो, नेलाइलेक परमेस्वरवइ हर्पतज जेलाइ दुखङि बचैन्या ले।”
बिधुइ उसिंगुरतिं सिछ्या
मत्ति २४:३२-३५; मर्कुस १३:२८-३१
29येसुइ नोरलाइ तुबु आन् ब हैयादोकेउ, “अन्जिरवइ उसिंगुर सोनो स्यो सिंगुर्रलाइ याराँच्यो, 30नोरात पलाउ राँद जेज जेसैंज्या, सिं उभ्यालि ओलागिउ हैलेद। 31हैजैदज जेब आउ अस्पाँर याजास्रैज्याउ जेराँ, हुकिं परमेस्वरवइ ओराज्य नजिक ज लिज्या हैलेद जे सैंन्या जेले।
32“दसाज, ङा जेलाइ हैङादाच्योज्या, आउ घतनार पुरा यामाजास्वा सम आउ पुस्ता खेम्द हिन्या माले। 33नम् सोनो मादमि ज ङोइद हिंन्याले, तर ङा ङास्पाँउ ङाबचन ङोइद हिंन्या माले।”
बाथो जास्द लेच्यो
34“जे हुस्यार लेच्यो, भ्या भोज भत्यार ताखिम्च्यो, लिस् दाखमद्यवइ तामुँच्यो सोनो जिबनवइ उचिन्ता तादाच्यो, म्हाकिंते जेयुउँ बलेस्न्या ले हैजैद जेमासम्झिउ बेलाक एक्कासि नो दिन् राते। 35नेलाइलेक अइजैद ज मादमिल लिज्याउ स्यो रात आउ रान्या ले। 36होकारन हुस्यार्स लेच्यो, ‘नो स्यो छेछेङम्सिउ अस्पाँराङि बचिन्याको लागि सोनो परमेस्वरवइ उस्परिंङाउ ङा अर्मिइ ओजाइ ङाबरिक च्याँदुन्या सक्ति गेलाइ यासिको’ हैलेद ओगोरे परमेस्वरस प्राथना दाच्यो।”
37येसुवइ लाक ओगोरे परमेस्वरवइ उझिम्ल सिछ्या यायोउ, सोनो रिइल चाहिं पुलुस्द जैतुन हैयादाज्याउ दाँदात बासिना#लुका १९:४७। 38येसुइ ओबचन थैन्याको लागि छकल्या ज स्यो अर्मिर परमेस्वरवइ उझिम्ल रार।
ទើបបានជ្រើសរើសហើយ៖
लुका 21: MAIK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024 (Active), Mother Tongue Translators Society and Wycliffe Bible Translators, Inc. All rights reserved.
