लुका 2
2
येसु जर्मिउ
मत्ति १:१८-२५
1हो दिनल रोमि महाअर्गे अगस्तसवइ ओराज्य भरिल स्यो अर्मि भरिराइ याजनगनना दाउपरि लेद हुकुम दोकेउ। 2कुरेनियस सिरिया इलाकालाउ बदा हाकिम उलिज्याक अर्मि दर्ता दाउपरि हैलेद हुकुम जासो आउ पहिलो पल्तलाउ जनगनना ले। 3महाअर्गेवइ उहुकुम अनुसार स्योज यामि-यामि पुर्ख्याउलि नाखाँ सोनो सहरल यार्मि दर्ता दान्या हिंकेर। 4होबेलाक योसेफचाहिं गालिल छेत्रलाउ नासरत सहरल ले। तर ओल् ओसहर चाहिं उपुर्खा अर्गे दाउदवइ ओसहर बेथलेहेमल ओजासो कारनवइ, ओल्ब उर्मि अप्सर्न्या बेथलेहेम हिंके, नेलाइलेक ओल् दाउद कुल्लाउ सन्तान ले। 5योसेफस मरियमवइ बेहा दान्या अस्पाँ पक्का ओजासोवइ योसेफवइ मरियमलाइ ब ओल्स लोंकेउ। हो बेलाक मरियम जा अस्दैन्या ले। 6योसेफ सोनो मरियमनि बेथलेहेमल इंलिज्याक ज मरियमवइ जा अस्दैन्या बेला जास्के। 7मरियमवइ जेथा ओजा अस्दैकेउ हैजैद क्वाइ अप्दाल्द दोंथोल सुरुकेउ, नेलाइलेक पौवाल मरियम सोनो योसेफनि बासिन्या पो मास्दैकिनि।
लु ग्वालार सोनो परमेस्वरवइ ओस्पाँ हैदान्यार
8नो इलाकाल लु ग्वालार लेर। नोराइ बाँल लेद रिइल यालु बोगाल्र यार्गुज्याक। 9प्रभुइ ओस्पाँ हैदान्या तुबु ग्वालाराइ यालेउक रैंके। प्रभु परमेस्वरवइ ओज्योति नोराइ यालेउयाक चम्किके। आउ राँद नो ग्वालार याछेउराइ कर्-कर् लेकेर। 10तर परमेस्वरवइ ओस्पाँ हैदान्यावइ नोरलाइ हैयादोकेउ, “ताछेच्यो, नेलाइलेक, ङा जेलाइ बदो आनन्द यान्या अप्चाउ खबर ङासथैच्यो, जो स्यो अर्मिराको लागि जास्न्या ले। 11आछिम् दाउदवइ ओसहरल जेको लागि तुबु मुक्ति यान्यावइ ओजन्म जास्दले, ओल्ज मुक्ति यान्या अर्गे ख्रिस्त प्रभु। 12जे बा जर्मिउ लुजालाइ क्वावइ अप्दाल्द दोंथोल सुरुसिउ अस्दैन्या जेले हुङि ज जे नोलाइ सरेस्न्या जेले।”
13नोक एक्कासि भ्या परमेस्वरवइ ओस्पाँ हैदान्यार रैंकेर हैजैद परमेस्वरवइ ओप्रसंसा दाउयाँ नोराइ हैलेकेर,
14“स्योर भन्दा रोत स्वर्गत लिज्याउ परमेस्वरवइ उमि जयजयकार ओजास्क, हुकिं मादमिल जो अर्मिरास परमेस्वर खुसि लिज्या होरलाइ सान्ति ओजास्क।”
15परमेस्वरवइ ओस्पाँ हैदान्याराइ ग्वालारलाइ रास्द स्वर्गत याहिंउ छिंङि, ग्वालाराइ या-या हैलेकेर, “गराच्यो, सिधै बेथलेहेमदि गिहिंते, हुकिं प्रभुइ गेलाइ हैओदासिउ जो घतना घतिदले आउ गेराँते।”
16नोर गल्नाकेर। होक नोराइ मरियम, योसेफ, हुकिं बा जासो बालो लुजालाइ चाहिं दोंथोल सुरुसिउ अस्दैनाकेर। 17आउ याराँउ छिंङि ग्वालाराइ बा जर्मिउ बालो लुजाइ ओबारेल परमेस्वरवइ ओस्पाँ हैदान्यावइ नोरलाइ हैओवादोउ अस्पाँ स्योर्लाइ हैयादोकेर। 18आउ अस्पाँ थैन्या स्योज छक् परिकेर। 19तर मरियमवइ आउ स्यो अस्पाँ सोंचिद उयुउँल ज नैकेउ। 20जो मदिउ नोरलाइ हैदासिउले हमदिउज स्यो अस्पाँ याथउ सोनो याराँउवइ, परमेस्वरवइ ओमहिमा सोनो ओप्रसंसा दाउयाँ ग्वालार ओल्केर।
लुजावइ उर्मि येसु नैसिउ
21यहुदिराइ याव्यबस्था अनुसार आथ दिन छ्याम् बालो लुजाइ ओखतना#2:21 खतना: यहुदि जातिराइ याब्यबस्था अनुसार कुलकुँ बाहार्ताउ ओलोकता क्यालद अर्बिन्या एन्लाइ खतना हैदोर।जास्के। उर्मि येसु नैद योकेर। ओल् गर्भल रान्या भन्दा बरिदि ज परमेस्वरवइ ओस्पाँ हैदान्यावइ आउ उर्मि नैद याच्यो हैदासिउ ले#लेवि १२:३; लुका १:३१।
परमेस्वरवइ उझिम्ल येसुलाइ अर्पन
22मोसावइ यासिउ व्यबस्था अनुसार नोराइ खतना दान्या यासमय ओेयोउ छिंङि ओबाबु-ओवामानिइ येसुलाइ यरुसलेमल लेउ परमेस्वरवइ उझिम्ल परमेस्वरवइ ओलेउक अर्पन दान्या रैकिनि#लेवि १२:६-८ । 23नेलाइलेक परमप्रभुवइ ओव्यबस्थाल अप्सर्सिउ लिज्या, “स्योर भन्दा बरिदि जर्मिज्याउ जा परमेस्वरवइ उनिम्ति अर्पन दाउपरि#प्रस्थान १३:२,१२।” 24हैजैद “तजोर कुइतम् कित परेवाइ जोर्बलै ओजानि” हैलेद परमप्रभुवइ ओव्यबस्थाल हैलेसिउ मदिउज नुनि बलि चरैन्या राकिनि#लेवि १२:८।
25होबेलाक यरुसलेमल सिमियोन उर्मिलेउ तुबु अर्मि ले। नो धर्मि सोनो परमेस्वरवइ ओसेवा दान्या अर्मि ले। नोइ इस्राएलिरलाइ बचैन्या अर्मिलाइ कलेंज्याउ ले। नोस पबित्र आत्मा ले। 26“परमप्रभुवइ अस्परिंन्या मुक्ति यान्या ख्रिस्तलाइ नमाराँउवा ना सिन्या नमाले” हैलेन्या अस्पाँ पबित्र आत्मावइ बरिदि ज हैदासिउ ले। 27पबित्र आत्मावइ सिमियोनलाइ परमेस्वरवइ उझिम्ल हिंन्या युउँ ओयोउवइ नो परमेस्वरवइ उझिम्ल राके। ब्यबस्थात अप्सर्सिउ अस्पाँ पुरा जैन्याको लागि होबेलाक ज मरियम सोनो योसेफनि ब येसुलाइ दाद परमेस्वरवइ उझिम्ल राकिनि, 28सिमियोनवइ येसुलाइ कोलोद परमेस्वरलाइ धन्यवाद याद हैलेके,
29“हे प्रभु, ना नप्रतिग्या पुरा दाद ननै, अब ना नबाँदालाइ सान्तिस सिउ याँङाको।
30नेलाइलेक ना नस्परिंउ मुक्ति यान्यालाइ ङामिखि राँउ ङास्दैके।
31ना स्यो जातिलाउ अर्मिराइ नोलाइ गराँरक लेद अस्परिंद ननै,
32ओल्ज गुँ जातिलाउ अर्मिरलाइ ना नघ्वा अस्तैंन्या ज्योति सोनो ओल्ज ना नइस्राएलि जातिराइ यासमान दान्या#यसैया ४२:६; ४९:६; ५२:१०।”
33सिमियोनवइ आउ बालो लुजाइ ओबारेल ओस्पाँउ थैद ओबाबु-ओवामानि छक् परिकिंनि। 34सिमियोनवइ नुनिलाइ आसिर्बाद याद येसुइ ओवामा मरियमलाइ हैदोकेउ, “थैको, इस्राएलल भ्या अर्मिरलाइ नास जैन्या सोनो बचैन्या आउ बालो लुजालाइ परमेस्वरवइ छानिनौ परमेस्वरवइ अस्तैंन्या चिनो ओल्ज, जोलाइ भ्याराइ बिरोध दाद यायुउँलाउ बिचार अस्तैंन्यालेर। 35अइजैद नयुउँ तरवालिवइ घोचेसिउ मदिउ भ्या बलान्या ले।”
36हन्ना उर्मिलेउ तुबु जुजासो अगमबादिनि ले। नो आसेर कुल्लाउ फनुएल हैयादाज्याउ अर्मिवइ मिमा ओजा ले। बेहा ओदोउ सात बर्स छिंङि राँदि जासो ले। 37अब नो चौरासि बर्स जासो ले। नोइ परमेस्वरवइ उझिम् मारास्ज्याउ ले तर नो जुजावइ उपबास लेद लाकन रिइल प्राथना दाद परमेस्वरवइ ओआराधना दाज्याउ ले। 38नोइ मरियम सोनो योसेफनि इंलेउक राद परमेस्वरलाइ धन्यवाद योकेउ, छुत्कारालाउ घ्वा राँन्या स्यो इस्राएललाउ अर्मिरलाइ बालो लुजा येसुइ ओबारेल हैयादोकेउ।
39परमप्रभुवइ ओव्यबस्था अनुसार नुनिइ दाउपरिन्या स्यो एन् दाद अस्प्याकिनि, हुकिं बालो लुजा येसुलाइ दाद गालिल् इलाकालाउ इंसहर नासरतल ओल्किनि#मत्ति २:२३। 40बालो लुजा येसु अर्सात, बुद्धित सोनो ग्यानवइ भरिपुर्न जास्द घ्योनाके सोनो परमेस्वरवइ ओआसिर्बाद ओल्स ले।
येसु परमेस्वरवइ उझिम्ल
41येसुइ ओबाबु-ओवामानि बर्सैपति यरुसलेमल छुत्कारालाउ पर्ब मानिन्या हिंन्या दोनि#प्रस्थान १२:१-२७; व्यबस्था १६:१-८। 42येसु बाह्र बर्सकाउ उलिज्याक, नुनिइ येसुलाइ इंस लाँद पर्ब मानिन्या यरुसलेम हिंकिनि। 43पर्ब मानिद ओखेमो छिंङि नुनि झिम्दि ओल्किनि। येसु यरुसलेमल ज लेके। तर आउ अस्पाँ येसुवइ ओबाबु सोनो ओवामानि मासैंकिनि। 44येसु गुँ उरिजारास उलिज्याउ क्या हैलेद नुनि तलापुरु अस्बाकिनि। रिम्दि बासिन्या पोक नाता परिन्या सोनो उरिजार सोनो सरेस्सिउराइ यालेउयाक खिम्किनि। 45तर येसुलाइ मास्दैद नुनि खिमै-खिमै फिरि यरुसलेमदि ओल्किनि। 46सोंला छिंङि नुनिइ येसुलाइ परमेस्वरवइ उझिम्ल अस्दैकिनि। नो मोसाइ ओनियम अस्पैन्या यहुदिरास चुँद नोराइ यास्पाँ थैद नोरलाइ अस्गेंज्याउ ले। 47येसुइ उबुद्धि सोनो ओजबाफ थैद स्यो अर्मिर छक् परिकेर। 48येसुलाइ राँद ओबाबु-ओवामानि अचम्ब मानिकिनि। ओवामावइ हैदोकेउ, “ङाजा, ना गिंलाइ आउ नाति नजैसिके? गराँसिद नबाबुस गिं नालाइ खिम्द-खिम्द हैरान गिंजास्के।”
49येसुइ नुनिलाइ हैयानिदोकेउ, “जिं ङालाइ निकाम जिंखिम्ङाउ? ङा-ङाबाबुवइ उझिम्ल लेउपरि हैलेन्या जिंमासैंज्याउ रो?” 50येसुवइ हैअ्वानिदोउ अस्पाँ मरियम सोनो योसेफनि माबुजैकिनि।
51हैजैद येसु नुनिस नासरत हिंके। नुनिइ हैइंदाउ अस्पाँ स्यो भैंद लेके। ओवामाइ आउ स्यो अस्पाँ उयुउँल ज नैकेउ 52येसु बुद्धि सोनो सरिर्ल घ्योनाके। परमेस्वर सोनो अर्मिर ओल्स खुसि जास्केर#१समुएल २:२६; हितोपदेस ३:४।
ទើបបានជ្រើសរើសហើយ៖
लुका 2: MAIK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024 (Active), Mother Tongue Translators Society and Wycliffe Bible Translators, Inc. All rights reserved.
