लुका 13
13
येसुइ अर्मिरलाइ पापङि ओल्च्यो हैदासिउ
1होबेलाक होक लिज्याउ खो अर्मिराइ येसुलाइ हैदोकेर, “खो गालिलि अर्मिराइ परमेस्वरवइ उझिम्ल बलि याचैरैज्याक पिलातस हैयादाज्याउ रोमि अर्गेवइ नोरलाइ सौ यास्परिंकेउ हैजैद नोराइ याझि बलि चरैसिउ झिस बोस्के!” 2येसुइ नोरलाइ हैयादोकेउ, “नोराइ अम्दिउ दुख अस्दैकेर भन्दैमा, जे नाति जेसम्झिज्या, आउ गालिलिर गुँ स्यो गालिलिर भन्दा भ्या पापि लेर? 3ङा जेलाइ हैङादाच्योज्या, हमदिउ म्हा, तर जे जेपापङि जेमाओल्किंते, जेब स्यो नैजैद ज मिन्या जेले। 4अथवा जे नाति जेसम्झिज्या, सिलोआम हैयादज्याउ थाउँलाउ झ्यो धरहरा दलिद अथार जना अर्मिर सिउ लेर। नो सिउ अर्मिर यरुसलेम्ल लिज्याउ स्यो अर्मिर भन्दा भ्या पापिर लेर? 5हमदिउ म्हा, तर ङा जेलाइ हैङादाच्योज्या, जेपापङि जेमाओल्किंते, जेब स्योज नैजैद ज मिन्या जेले।”
माप्सेन्या सिंगुर्
6हैजैद येसुइ आउ आन् हैलेके, “तुबु अर्मिवइ ओबारिल तुबु बिदु रुपिसिउ ले। नो बिदु अप्सेयासिं हैलेद बेलाबेलाक ओराँरैक माप्सेउ अस्दैकेउ। 7होकारन नोइ ओबारिल एन् दाज्याउ ओबाँदालाइ हैदोकेउ, ‘ङा आउ बिदु अप्सेयासिं हैलेद ङाराँउ ब सोंरिम जास्के, तर आउ माप्सेके। आउकारन किकाम आलाइ अप्चाउ अर्गम्ल नैद? आलाइ ओरेंलि ज दलैको।’ 8तर ओबाँदावइ हैदोकेउ, ‘मालिक, आलाइ अजैब तरिंम सम चिम् गेदाते। ङा आवइ ओलेउयाल गोद अर्दु जादङायो। 9हैजैद ओप्सेकिंलेक अप्चाउ जास्के। ओमाप्सेकिंलेक द, ना हैनलेउ अनुसार नोलाइ ङादलैते’।”
नान्या छ्याम् सगराँन्या एन्
10तला नान्याछ्याम् यहुदिर अस्दुसिन्या झिम्ल येसुइ सिछ्या याज्याउ ले। 11होक तुबु मिमा ले, होलाइ अथार बर्सकिंज रोगि जैन्या दुस्तआत्मा लागिउ ले। नो कुम्ल्यासो ले, नोइ ओवाँ जामा-जामा ब सिधा माजैदुज्याउ ले। 12येसुइ नोलाइ राँकेउ, हैजैद खुल्द हैदोकेउ, “ओ नाना, ना नरोगङि नगराँके।” 13हुकिं येसुइ नो मिमाइ कुम्ल्यासो ओवाँत उकुइ छाप्दयोकेउ, हैजैद नो होपन्याज सिधा जास्के हैजैद परमेस्वरवइ ओप्रसंसा दोकेउ।
14तर नो मिमालाइ नान्याछ्याम् येसुइ ओसगराँउ राँद यहुदिर अस्दुसिन्या झिम्लाउ अगुवार यायुउँ चोके। हैजैद नोइ अर्मिरलाइ हैयादोकेउ, “हप्ताल एन् दान्या दिनर छ दिन लिज्यार। आउकारन आउ छ दिन् भितर्ल राद गराँच्यो, तर नान्याछ्याम् म्हा#प्रकास २०:९-१०; व्यबस्था ५:१३-१४।”
15हुकिं प्रभुइ जबाफ यायोकेउ, “कप्तिर! नान्या छ्याम् जेगोथोङि हार-इंर सोनो गधार पलाद रि सवैन्या ज्यामालाँरो? 16अब्राहामवइ ओघरानालाउ मिमालाइ अथार बर्सकिं दुस्त आत्माइ कोलोसिउ ले। नान्या छ्याम् जे जेहार-इंर गधार पलाद ज्यारासो मालाकज आउ मिमा ब सैतानवइ उकुइतिं छुत्कारा अस्दौपरिन्या म्हारो?” 17येसुइ आउ अस्पाँ ओस्पाँउ छिंङि येसुइ उबिरुधिर स्यो सर्मल परिकेर, तर येसुइ ओदोउ स्यो अचम्बलाउ एन्राल अर्मिर रैंकेर।
बाजिङै दुर्वइ ओआन्
मत्ति १३:३१-३३; मर्कुस ४:३०-३२
18हैजैद येसुइ हैलेके, “परमेस्वरवइ ओराज्य नाति मदिउ लिज्या? नोलाइ ङा नातिस अस्गोइन्या? 19नो बाजिङै दुर्वइ तुबु ओसे मदिउज, हो तुबु अर्मिवइ लाँद ओबारिल वास्केउ, हैजैद नो घ्योद तुबु सिंगुर मदिउज जास्के हुकिं नम्ताउ बाजाराइ नोइ ओहाँगात याप्सिप् ताकेर।”
खमिरवइ ओस्यालोको
मत्ति १३:३३
20फिरि येसुइ हैलेके, “परमेस्वरवइ ओराज्यलाइ ङा नातिस ङास्गोंइते? 21नो खमिर मदिउज, नोलाइ तुबु मिमावइ रैद बुमसिउ मुनुम्ल जामा बोउ, हैजैद नोइ नो मुनुम्लाइ भ्या जौ।”
चुजा याम्
मत्ति ७:१३-१४
22येसु यरुसलेम् उहिंज्याक सहर-सहर सोनो नाखाँ-नाखाँल पसिद सिछ्या याउयाँ हिंके। 23तुबुइ येसुलाइ अस्गेंकेउ, “प्रभु, परमेस्वरवइ जामा अर्मिरलाइ वाज नोराइ यापापङि याबचउ रो?”
24तर येसुइ हैदोकेउ, “चुजा याम्लि पसिन्या कोसिस दाच्यो, नेलाइलेक, ङा जेलाइ हैङादाच्योज्या, भ्या अर्मिर चुजा याम्ङि पसिउ अस्पैन्यालेर, तर पसिदुन्या मालेर। 25चुजा याम्ङि झिम्ल पसिन्या बेला झिम्वइ ओर्गेवइ सोद याम् उरुपो छिंङि, जे लाँक च्याँद अइलेद याम् दोवाक-दोवाक जैन्या जेले, ‘प्रभु, गेको लागि याम् फैदयासिको’, सोनो होइ जबाफ याद हैदान्याले, ‘जे काँङि जेराउ ङा ङामासरेस्च्यो।’ 26हुकिं जे हैलेन्या जेले, ‘गे नास ज सिप् चुँद गेज्याके गेओके। हैजैद ना गेनाखाँल सिछ्या नायो।’ 27तर होइ फिरि हैदान्याले, ‘ङा जेलाइ हैङादाच्योज्या, जे काँङि जेराउ ङा ङामासैं। ए दुस्त एन् दान्यार, ङालेउकिं तादा हिंच्यो#भजनसंग्रह ६:८।’
28“जब जे अब्राहाम, इसाक, याकुब सोनो परमेस्वरवइ ओस्पाँ हैदान्या स्योरलाइ परमेस्वरवइ ओराज्य भितर्ल राँन्या जेले, तर जे चाहिं परमेस्वरवइ भितर्ल पसिउ ओमायाच्योउवइ जे गरोयाँ दुख कस्तवइ चिर्किउयाँ जेप्स्या हेन्या जेले#मत्ति २२:१३; २५:३०। 29हुकिं मादमिलाउ स्यो थाउँङि अर्मिर राद परमेस्वरवइ ओराज्यलाउ भोज ज्यान्या चुँन्यालेर। 30राँच्यो, आर्क काम लागिन्या जासो अर्मिर छिंङि काममालागिन्या जास्न्यालेर हुकिं आर्क काममालागिन्या जासो अर्मिर छिंङि काम लागिन्या अर्मिर जास्न्या लेर#मत्ति १९:३०; २०:१६; मर्कुस १०:३१।”
यरुसलेम् सहरलाउ अर्मिराको लागि येसुइ उचिन्ता
मत्ति २३:३७-३९
31होबेला खो-खो फरिसि हैयादाज्याउ यहुदिर राद येसुलाइ हैदोकेर, “ना आलिं हर्पत पुलुस्द हिंनि, नेलाइलेक अर्गे हेरोद एन्तिपासवइ नालाइ सउ अस्पैंज्या।” 32येसुइ नोरलाइ हैयादोकेउ, “हिंद नो राँसलालाइ हैदाच्यो, ‘आछिम् सोनो पराति ङा भुत्र ङादपै सोनो सगराँन्या एन् ङादो, हैजैद हर्पतज ङा ङाएन् पुरा जैन्या ङाले।’ 33ङा ङाएन् दाउयाँ यरुसलेम हिउँजपरि नेलाइलेक यरुसलेम्किं गुँ थाउँल परमेस्वरङि अस्पाँन्यारलाइ अर्मिराइ मासैर।
34“यरुसलेम, ए यरुसलेमलाउ अर्मिर! जे परमेस्वरवइ जेलेउक अस्परिंसिउ परमेस्वरङि अस्पाँन्यारलाइ लुँवइ होर्द जैलेदिब ज्यासैके बामाइ बाफुँजारलाइ ओकर दुँल ओवापुमो मालाक, ख्वाफेरा ङा नजारलाइ अस्दुन्या युउँ ङादोके, तर ना नमाबैंके। 35आउकारन थैच्यो, जे यरुसलेम सहरलाउ अर्मिरलाइ परमेस्वरवइ रास्न्या ले। अब ङा जेलाइ हैङादाच्योज्या, जबसम ‘परमप्रभुइ उर्मित रान्या आसिस अस्दैसिउ हैलेद हैजेमाले होसम ङालाइ जे राँन्या जेमाले’#भजनसंग्रह ११८:२६।”
ទើបបានជ្រើសរើសហើយ៖
लुका 13: MAIK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024 (Active), Mother Tongue Translators Society and Wycliffe Bible Translators, Inc. All rights reserved.
