Markus 8
8
Hesus e Haneil Harael Faangaladi Yalemat
(Mateus 15.32-39)
1E tai miriyarai ma werimwilir nga yalemat lada para ttou fängääni. Nga ifiri mena eda tawol na labwe mwangaü nga Hesus eda fadöngü fängäniil marahara lei tabwer eda dölü bwa, 2“I fahoil yalemat har bwa eda mori dörülari yael pülüyei nga meihira e tai wol harael. 3Nga sahü nga la ddung ida hatalilaraho matariimwael, nga palüül iile la mara malosoraho, bwa e wol palüül iil ra la bwitoho ma nitaawa.”
4Marahara lei tabwer lada haüye bwa, “Ebwe feita dida weli mwangaü ra dibwe haneil ttouul yalemat har ma buruka e tawol faülümire irang?”
5Hesus eda hadiyael bwa, “Fitefadu faraawa na hau hädi?” Lada dölü bwa, “Fidifödü.”
6Hesus eda haüül yalemat bwa labwe maatotiwo uwawori masalo. Iiye eda hädi marahara fidifödü faraawa eda haparüye Dios eda tipini eda hariil marahara lei tabwer bwa labwe iretingeriil yalemat. Marahara lei tabwer lada faülü mena e dölü. 7Nga eda para wola fitemaru happari iihe. Hesus eda para haparüye Dios hataingehir eda haüül marahara lei tabwer bwa labwe iretingeriil yalemat. 8Urutael yalemat nga la mwangaü lada parahi, nga e wol ruttehir ra la lühü fängäniye eda uulo fuduw haraisi. 9Wolaela yalematahara la mwangaü ra la mara faangaladi. Ifiri mena e bwängi yael mwangaü Hesus eda habwongil. 10Iiye ma marahara lei tabwer lada tahe mena wael lada raho uwawori farüyara Dalmanuta.
Marahara Farisi la Tingalo Kamarari Yarüdü
(Mateus 16.1-4)
11Palüül Farisi la bwitoho iyolori Hesus lada hapurotahe yael haparüyetiro fängääni ma Hesus. La masari söhü bwa labwe tafisiye lada haüye bwa ebwe faülü kamarari yarüdü bwa ebwe hannaha ppour e bwito ma ifiri Dios. 12Hesus e ngüdü eda dölü bwa, “Meta sapir nga sawori lahireiya lada tingalo kamarari yarüdü? Ibwe hau dewahami bwa e tawol kamarari yarüdü na ebwe faülüyehi hataingehiil yalemat har!”
13Eda rihitil eda para taütahe usuri uwa eda raho layera delaye ma ifiri sarüra.
Habobori Faraawa ra Yael Farisi ma Herodes
(Mateus 16.5-12)
14Marahara lei tabweri Hesus la marüyehi labwe ekka harael faraawa, nga hara dewo sahü mena la hädi usuri uwa. 15Hesus eda hatabotabo ngariil bwa, “Haubwe halihihemi nga haubwe hakalehihemi ma ifiri habobori faraawa ra yael Farisi ma Herodes.”
16Lada dölü fängääni bwa: “E dölü mere bwana mena e tawol faraawa ra di hedi.”
17Hesus e hüra marahara la dölü eda hadiyael bwa, “Meta sapir hauda titiro fängääni hauda tapa titiini yami tei ikka faraawa? Hau tösüra hüra-mo nifaari mere? Hau dawo dewa? 18E wol yami tatalof; e tasüye bwa haubwe käkäne? E wol taringemi; e tasüye bwa haubwe hadutering? Hauda tai mangiye, 19Ifiri-mo i tipini rimefadu faraawa bwa harael rimangaladi yalemat, fitou haraisi-mo hau haulongari ruttehiri faraawahawe?”
Lada parüyeri ramar lada dölü bwa, “Deih ma luwou haraisi.”
20Eda hadiyael bwa, “Nga ifiri-mo i tipiye fidifödü faraawa ida haneil faangaladi yalemat, fitou haraisi-mo hau haulongari ruttehiri faraawahawe?”
Lada parüyeri ramar lada dölü bwa, “Fuduw haraisi.”
21Eda haüül bwa, “Nga hau tösüra hüra-mo?”
Hesus e Hamahowa Demarü Mwaare ra E tabu Matar ma Betsaida
22Ifiri mena la bwitoho Betsaida nga palüül yalemat lada häditoho demarü mwaare ra e tabu matar, lada tingalowa Hesus bwa ebwe hatangowa. 23Hesus eda hamasü pauri mwana eda hafatarawau maürühüri wotawotara, eda sanihutufa yaari mwana tatalof nga e itetahe paür uwawor eda hadiya bwa, “E wol faülümire na ho käkäne?”
24Mwana eda taraetahe wenengi eda dölü bwa, “Üngö, i käkäneiil yalemat nga ira la weya siriheti ra la papafatare.”
25Hesus eda para hatangowa yaari mwana tatalof. Ifiri mena nga mwana eda haluwaraho nga e mori maho yaar hapaühü, nga e hakane uruteri faülümire. 26Hesus eda haüye bwa ebwe raho matariimwar nga e haüye bwa, “Ho tawai wehitafaari räni wotawot.”
Petrus e Dölü bwa Hesus iiye Mesias
(Mateus 16.13-20; Lukas 9.18-21)
27Hesus ma marahara lei tabwer lada süye lada raho räni wotawot hara e mire nihalepari Sisarea Filipi. Ifiri mena la süyeri fafatare nga Hesus eda hadiyael bwa, “Hau haüyei-mo, yalemat la dölü bwa ngaangu itöü?”
28Lada parüyeri ramar lada dölü bwa, “Palüül la dölü bwa heer Yohanes ra Lei Hatütü, nga palüül la dölü bwa Elias, nga para palüül la dölü bwa heer demarü profeta hawe.”
29Eda hadiyael bwa, “Nga hami, hau dölü bwa ngaangu itöü?”
Petrus eda parüyeri ramar eda dölü bwa, “Heer Mesias.”
30Hesus eda hatabotabo ngari dewael bwa, “Hau tawai haüül yalemat bwa ngaangu itöü.”
Hesus e Tapa Hairamar ma Mader
(Mateus 16.21-28; Lukas 9.22-27)
31Hesus e hapurotahe yaar kaüül lei tabwer nga e dölü bwa, “Rauri Yalemat hataingehir na ebwe iram dewa, nga iiye ra marahara tamoni farüye ma marahar tamoni paderei ma lei tanahori Farau labwe usuuwe. Iiye ra labwe riiye eda made, nga dörübwongi werimwilir nga eda fadatafaari.” 32E haffat ngari dewael mere. Nga Petrus eda hädi Hesus eda hädi delaye eda yasingeri. 33Hesus e wehitafaari eda habaühüül marahara lei tabwer nga e yasingeri Petrus eda dölü bwa, “Hasüyaho ma iyoloi heer satan! Marahara yaamu mangimengi e tai bwitoho ma ifiri Dios bwa e bwitoho ma ifiri yalemat.”
34Hesus eda fadöngü fängäniil marahara la ttou ma marahara lei tabwer eda haüül bwa, “Nga sahü nga e wol ma uworumi re e masari pülüyei, ebwe marüyehi demarüye podür eda yafala yaar kurus eda tabweyai. 35Bwa nga sahü nga ho laweri haruwe fadamu heer ra hobwe hawahiri fadamu; nga dari na nga sahü nga ho hawahiri fadamu bwanasahü ngaangu ma Titiro Maho, heer ra ebwe rru fadamu. 36E wol nifaari mena yalemat ebwe hädi uruteri farüyeri yalemat, nga e fangaraho fadar? E tawol! 37E tawol dewa na yalemat e süye bwa ebwe faülü bwa ebwe häditafariya fadar. 38Yalematara e maahiriyei ma marahara yai kaü retiperi lahirei ra e ulori tammaü nga e tawol yael hatödü, Rauri Yalemat ebwe maahiri lanera ebwe wehitafaari ifiri fisirahori Papar uworuul yaar anghel ra la liya.”
ទើបបានជ្រើសរើសហើយ៖
Markus 8: SOV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
(Active) © Wycliffe Bible Translators, Inc. All rights reserved.