Markus 4
4
Haweweri Lei Fato
(Mateus 13.1-9; Lukas 8.4-8)
1Hesus eda para kaüül yalemat ma wori ngaseri sarüra Kalilea. La pipiya dewa yalemat la bwitoho Hesus eda taütahe eda maato usuri uwa, nga iyahara ttouul yalemat la mire uwawori farüya uwawori ngaseri sarüra. 2Nga Hesus eda hoho hawewe ifiri yaar kaüül matamatari faülümire eda dölü bwa,
3“Hau hadutering! Demarü mwaare e raho e ra fato grain. 4Nga ifiri mena e peipeiwou faduri fatohohara, nga palüül faduri fatohohara e püngütiwo niyar, eda bwitoho märü yeyeri eda hangini. 5Nga palüül la püngütiwo uwoni yarang ra e marifi masalor. E tai miriyarai lada tahasetahe bwa e tai tto masalor. 6Nga eda tahase yaaro lada kalaraho ifiri bwesiri yaaro lada made bwa e tai tto walahayel, hara eda matangari tahase bwana mena e tai tto masalor. 7Palüül faduri fatohohara e püngütiwo uwawori kangisir, nga kangisir eda döngütahe eda fitifitiye fatohohara eda tawol uwaar. 8Nga palüül faduri fatohohara e püngütiwo uwawori masalo maho eda döngütahe eda uwa: palüül deriih uwaar, nga palüül woroih, nga para palüül döbühüya uwaar.”
9Hesus e habwangi yaar kaüül eda dölü bwa, “Hau hadutering ifiri na ebwe wol taringemi!”
Nifaari Hawewe Ha
(Mateus 13.10-17; Lukas 8.9-10)
10Ifiri mena Hesus eda iiye sahü nga palüül marahara la hadutering yaar fiyango la pülül marahara deih ma liyemaru lei tabwer lada raho iyolor lada tingalowa bwa ebwe haüül nifaari hawewehar. 11Hesus eda haüül bwa, “Hami eda mori faülüyehi bwa haubwe hüra faülüri Farüyeri Dios we tühümiyehi ma ifil yalemat. Nga dari na iyahara palüül ra la mire maürühür ra labwe hadutering uruteri faülümire räni hawewe, 12bwa iil ra, ‘labwe habauha mahowa nga la tawai ra hakane-mo, labwe haduteringa maho nga la tawai ra hüra-mo nifaar. Bwa ebwe tai haitina nga iil ra labwe wehingeri Dios nga Dios ebwe taratil ma ifiri tammaüül.’ ”
Hesus e Hanifariye Nifaari Haweweri Lei Fato
(Mateus 13.18-23; Lukas 8.11-15)
13Hesus eda hadiyael bwa, “Hami hau tahüra nifaari fiyangor? Nga bwe feita hauda hüra nifaari iyahara palüül fiyango? 14Mwana lei fato e hasaworaparaho ramari Dios. 15Palüül yalematara la weya faduri fatohohawe e püngütiwo räni yaar, bwa mena la longolongo ramari Dios, nga ifiri mena sahü nga satan eda bwitoho eda häditengiil. 16Nga palüül yalematara la weya faduri fatoho hawe e püngütiwo uwawori masalo rae torafadu. Ifiri mena la longolongo sahü ramari Dios, nga e matangatang dewa yael kkeleyahiri. 17Nga dari na e tai mire dewa faringörüngörüül; eda tai miriyarai nga e tawolaraho. Ke mena ebwe wola hamatahütöhü hale hairam hataingehiri ramari Dios nga iile ra ebwe matangatanga sahü yael peitaraho yael hatödü. 18Nga iyahara palüül ra la weya faduri fatoho hawe e püngütiwo uwoni kangisir. Marahar la longolongo ramari Dios 19nga yael fangiyengi hataingehiri fadael, ma yael masani taitei, ma masani pipiyeri mahori uwawori farüyeri yalemat eda bwito pahuye ramari Dios eda tawol uwaar. 20Nga palüül yalematara la weya faduri fatohohara e püngütiwo uwawori masalo maho. La longolongo ramari Dios lada hädi lada itenango faringörüngörüül, lada weya fatohohara lada uwa: palüül deriih uwaar, nga palüül woroih, nga para palüül döbühüya uwaar.”
Lam ra e Mire Ifari Tapiye
(Lukas 8.16-18)
21Hesus eda dölü bwa, “E wol yalemat e ekkarango lam eda itenango fari tapiye hale fari räniyeri yaar madülü? E fäli hedi eda itetahe räni räniyeri lam. 22Uruteri mara hamwaromwaro ra ebwe nnahawau nga marahara e boruborüyehi ra ebwe duhehi borubon. 23Hau hadutering ifiri na ebwe wol taringemi!”
24Eda para haüül bwa, “Haubwe hamahowa yami hadutering, bwa Dios ebwe ssau dewa yaar hori ngerihemi farauhara hau hori hatihoul yalemat.
25“Yalemat hara e wol faülümire iyoloil ra ebwe para pipiya marahara labwe para hädini, nga iyahara e tawol faülümire iyoloil ra mena töt ra e mire iyoloil ra labwe para häditengiil.”
Haweweri Tahaseri Fatoh
26Hesus eda para haüül bwa, “Farüyeri Dios ra e weya mena demarü mwaare e raho eda fato faduri fatoh räni mena maatar. 27Fada ma nifahafi nga mwana e madülü eda simwatahe mena nimariyeri, nga iyahara fatoh la tahase lada döngütahe lada tarapara raho. Nga iiye e tahüra hale e feita yaar fahor eda döngü marahara yaar fatoh eda weya mena. 28Bwa masalo mena e faülü fatoh eda tahase eda döngütahe eda uwa; matamowa nga e tahase ma räni pöür, eda wola diyobor eda tawor bungur, nga hauhur nga eda buwou uwaar. 29Nga eda mmas uwaar nga mwana maatar mena erau raho eda hori yaar kama eda dopini uwaar bwa eda mori yator.”
Haweweri Faduri Parane
(Mateus 13.31-32, 34; Lukas 13.18-19)
30Hesus eda hadiyael bwa, “Farüyeri Dios e weya meta? Fiyango meta me mahori mena dibwe hori hawewer? 31E weya mere. Demarü mwaare e hädi faduri mustard ra e happar dewa ma retiperi farüyeri yalemat, eda fatohi räni mena maatar. 32Werimwilir fatohohara eda döngütahe eda tarapar dewa ma uwoni marahara yaar fatoh. Eda döngüwou laar, nga märü yeyeri lada bwito mire usur nga la faülü haffatael usur.”
33Hesus e hori kaü matamatari hawewe ra e weya marahar ra e süya bwa labwe hüra nifaar. 34E hoho sahü fiyango ifiri yaar kaüül. Nga mena ebwe iiye sahü ma marahara lei tabwer nga erau nifaringeriil uruteri faülümire.
Hesus e Hamarüyörüya Marümörü
(Mateus 8.23-27; Lukas 8.22-25)
35Nifahafitiwori lanera nga Hesus eda haüül marahara lei tabwer bwa, “Hau bwitoho bwa dibwe raho layera delaye ma ifiri sarüye.” 36Marahara lei tabweri Hesus lada rihitil ttouul yalemat lada taütahe usuri uwa nga Hesus e faduri maato usur, lada wödü lada süye. Nga e wol para palüül uwa ra e mire burukara. 37Fadewa sahü nga eda bungutul tarapari marumoru, eda nnurango rawo räni mena wael, e tai taawa nga e tuburango. 38Nga ifiri mena nga Hesus e ürürüng eda madülü imwiliri mena wael. Marahara lei tabwer lada fanguru nga lada hauye bwa, “Tanaho, ho tai hafaniye me di rou made?”
39Hesus eda bwitahe ddü eda dölü bwa, “Yangi, dauraho! Rawo, hadodoho!” Eda tawolaraho paladeri yengi nga e ruyaraho tati. 40Hesus eda haüül marahara lei tabwer bwa, “Meta hau matahü? E tösü wol yami hatödü?”
41Nga iile eyari dewa ngörül lada haddiye fängääni hale, “Itöü ho mwaarer me yangi ma rawo nga lada hadutering ramar!”
ទើបបានជ្រើសរើសហើយ៖
Markus 4: SOV
គំនូសចំណាំ
ចែករំលែក
ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
(Active) © Wycliffe Bible Translators, Inc. All rights reserved.