Markus 2
2
Hesus E Hasüya Hamatahir Demarü Lei Mangüs
(Mateus 9.1-8; Lukas 5.17-26)
1Fitebwongi werimwilir, nga Hesus eda wehitafaari Kapernaum, nga eda saworaparaho titin bwa iiye eda mori wehitafaari matariimwar. 2La pipiya dewa yalemat la bwitoho lada hatiyetiye fängääni reni iimwe eda buwou matari hatam. Hesus eda kaüül. 3Nga famaru mwaare la hadatoho demarü lei mangüs iyolori Hesus. 4Nga e ngütüngütü dewa e tasüye labwe halepa Hesus. Lada haramarama ungeri iimwe ra hataingehiri burukara Hesus e mire irang, lada hädilatiwo mwana e mangüs räni hiyar. 5Nga ifiri mena Hesus eda käkäne ppouri yael hatödü eda haüya mwana e mangüs bwa, “Rai, eda mori tara tammaümu.”
6Palüül tanahori Farau ra la maato burukara lada mangiye ma faringörüngörüül bwa, 7“Meta sapir eda titiro haiter? Mere e tironühüye Dios! Hara demarü Dios na e süye bwa ebwe tatar tammaü.”
8Ifiri mena sahü nga Hesus e hüra marahara yael mangimengi eda haüül bwa, “Meta sapir hauda mangimengi haitina? 9Iyefa ra e fäli süye, ra ibwe haüye mwaare e mangüs bwa, ‘Eda mori tara tammaümu,’ hale ibwe dölü, ‘Düütahe, hädi mena hiyomu, hoda fatare’? 10Ibwe hanangarihemi bwa Rauri Yalemat e wol ppour uwori farüyeri yalemat bwa ebwe tatar tammaü.” Eda haüye mwana e mangüs bwa, 11“I hauho, düütahe, hoda hädi hiyomu, hoda raho matariimwomu!”
12Ifiri mena urutael yalemat la süyeri hakabaühü, nga mwana eda düütahe, eda hädi mena hiyar, eda süye. Urutael dewa nga la lüdü dewa lada yataheya Dios, lada dölü bwa, “Di tösü ra wela-mo me dibwe hawengari mere!”
Hesus e fadöngü Levi
(Mateus 9.9-13; Lukas 5.27-32)
13Hesus e wehitafaari wori ngase sarüra Kalilea. Nga ttouul yalemat lada bwitoho iyolor, eda kaüül. 14Ifiri mena yaar fatareraho, nga e käkäne demarü lei ikkeri tax ra iitar Levi ra rauri Alfeus, e maato räni yaar ofisi. Hesus eda haüye bwa, “Bwito pülüyei.” Levi eda düütahe eda pülüye.
15Werimwilir nga Hesus eda raho mwangaü matariimweri Levi. La pipiye lei ikkeri tax ma lei tammaü ra la haye pülüyato Hesus, nga la wödürü mwangaü ma Hesus ma lei tabwer. 16Palüül tanahori Farau, marahara Farisi, la käkäne Hesus bwa e pülül marahara lei tammaü ma marahara lei ikkeri tax mwangaü, lada hadiyael marahara lei tabweri Hesus bwa, “Meta na Hesus e pülül yalemata-hara mwangaü?”
17Hesus e longolong ramael eda parüyeri eda dölü bwa, “E tawol nifaari tahota iyoloil yalemat hara la tai hamatahi, hara marahara la hamatahi na e nifa iyoloil. I tei bwitoho bwa ibwe fadöngüül lei maho, bwa i bwitoho fadöngüül lei tammaü.”
Haddiye Hataingehiri Hasih
(Mateus 9.14-17; Lukas 5.33-39)
18E wol dobwongi marahara lei tabwer Yohanes ra lei Hatütü ma Farisi la hasihael. Nga palüül yalemat lada bwitoho iyolori Hesus lada hadiya bwa, “Meta e faülü ra lei tabwer Yohanes ra lei Hatütü ma marahara lei tabweil Farisi la hasihael, nga lei tabwemu la tai hasihael?”
19Hesus eda parüyeri eda dölü bwa, “Hau mangiye bwa marahara la mire ifiri sänneri liili labwe hasihael na la puluya mwana e liili? E tawai ra süya-mo! Ifiri yarairi mena mwana e liili e mire iyoloil, nga e tawai süya bwa labwe hasihael. 20Nga dari niyatora labwe häditengiil mwana e liili, nga ira na larau hasihael.
21“E tawol yalemat re ebwe hori üffe taifou eda türüngü ngeri üffa bwede, bwa ira e taifou erau yafidi fängäniye ira e bwede, eda feingi eda tarapara raho feingehir. 22Nga e tawol yalemat re ebwe ekka bino ra e taifou eda hadelarango räni pöüla ra hini möru ra e bwede, bwa bino ra e taifou erau feingi ira pöüla, nga eda tawol nifaari bino ma mena pöülar. Ira bino ra e taifou ebwe hadelarango räni ra pöüleri bino ra e taifou.”
Haddiye Hataingehiri Lani Sabbat
(Mateus 12.1-8; Lukas 6.1-5)
23Delari lani Sabbat, nga Hesus e fatarerango räni maatari wheat, nga marahara lei tabwer nga la pülüye, lada hiridini palüül diyobori wheat. 24Nga marahara Farisi lada haüye Hesus bwa, “Meta marahara lei tabwemu la faülü na e tabu lani Sabbat?”
25Hesus e parüyeri eda dölü bwa, “Hau tösü hüra-mo-mo Dabid e faülü ifiri-mo e halofalof? Iiye ma marahawe uwar la ddung, 26eda bwirango räni iimweri Dios eda hangi faraawa hawe ffahiri Dios. Merer e faülüyehi ifiri-mo Abiathar iiye tamoni paderei. E dölü farau bwa hara paderei na e süya bwa labwe hangi faraawa ra, nga Dabid e hangi nga e haneil mwaare hara la pülüye.”
27Hesus e habwangi yara ulongolong nga e dolu bwa, “Lani Sabbat e faülüyehi bwa nifael yalemat; tai yalemat na nifaari lani Sabbat. 28Nga Rauri Yalemat na e Tamoni lani Sabbat.”
ទើបបានជ្រើសរើសហើយ៖
Markus 2: SOV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
(Active) © Wycliffe Bible Translators, Inc. All rights reserved.