Markus 14
14
Kkuperi Faiiniri Hesus
(Mateus 26.1-5; Lukas 22.1-2; Yohanes 11.45-53)
1Liyelari imowari lani sänneri Paskua ma Faraawara e Tawol Habobor, nga marahara tamorul paderei ma lei tanahori Farau la kupeti yarari me ebwe süye bwa labwe dubuli Hesus lada riiye. 2Lada dölü bwa, “Di tawai faülü mere wori lani sännekahar, bwa yalemat late buho.”
La Hapiti Hesus ma Betania
(Mateus 26.6-13; Yohanes 12.1-8)
3Hesus e mire Betania matariimweri Simon, mwaarer morowe e iram ifiri hamatahiri rühür. Ifiri na Hesus e mamwangaü nga demarü faifire eda raho iyolor nga pöüleri yalöngü ra e boutihitihi e tarapar dewa parüyen. E hädi eda bwarangi dalamina eda hadelatahe taofara uwawori simweri Hesus. 4Palüül marahara la mire burukara lada hadongael nga la dölü fängääni bwa, “Meta nifaari me dew tarapari hataworap e faülüyehi? 5E süye dewa me labwe hora parüyeri ifiri dörübühüya mwanne ra silver lada hada ra mwanne lada harile lei halofalof!” La tapa tammaüü dewa faifirewe.
6Hesus eda dölü bwa, “Hau rihiti! Meta sapir hauda tiro delayeya faifirer? Iiye e mori faülü dewa titiro maho nihataingehi. 7Maraha lei halofalof ra la mire sahü iyolomi. E tawai weri söhü lanera haü masari haüda tapangil. Nga dari ra ngaangu ra i tawai mire sahü iyolomi. 8Nga iiye faifirer ra e mori faülü mena e süya ngari; eda mori taofi podüi imowari na labwe ribwayai. 9Ibwe haü dewahami bwa e tawaweri burukara labwe kaü Titiro Maho ma uwawori farüyeri yalemat nga mere e faülü faifirer ra labwe haye fiyangowa bwa yalemat labwe mengiye.”
Yudas e Ngütahe Bwa Ebwe Fangaraho Hesus
(Mateus 26.14-16; Lukas 22.3-6)
10Yudas Iskariot we demarü marahawe deih ma liyemaru lei tabweri Hesus eda raho iyolori tamoni paderei bwa e laweri bwa ebwe hataleyasiri Hesus iyoloil. 11E maho dewa faringörüngörüül ifiri ramahara e haüül nga la hahürari ngeri bwa labwe haneya mwanne bwa parüyen. Yudas eda hapurotahe yara kkupe yarara ebwe maho ra ebwe fangangariil Hesus.
Hesus ma Marahara Lei Tabwer la Wödüri Mwangaü Ifiri Paskua
(Mateus 26.17-25; Lukas 22.7-14, 21-23; Yohanes 13.21-30)
12Matamowari lani sänneri Faraawahara e Tawol Habobor ra laani raiini siipi bwa mwangaüri Paskua, nga marahara lei tabwer lada hadiya bwa, “Iya na ho masari bwa haibwe fitehiye na yaamu mwangaüri Paskua ma irang?”
13Hesus eda haküröül liyemaru ma uworuul nga e haüül bwa: “Hau bwirango räni wotawot haubwe welifängääni ma demarü mwaare ra e lohi dewo räniye ssörü. Hauda tabweya 14hauda bwirango räni iimwara ebwe itirango irang, hauda haüya mwana iimwar mena bwa, ‘Tanaho e haddiye bwa: Iya rarosihi ra ngaangu ma lei tabwei haibwe faülü mwangaüri Paskua ma irang?’ 15Mwana ra ebwe hannaha ngarihemi dewo tarapari rarosihi räni mena haliyetani iimw ra e mori werewere, hauda hawerewereya bwa dibwe hori.”
16Marahara lei tabwer lada süye lada bwirango räni wotawot lada weli uruteri faülümire nga e weya sahü mo Hesus e haüül, lada hawerewereya harael mwangaüri Paskua.
17Eda bwongitoho nga Hesus eda wödütoho ma marahara deih ma liyemaru lei tabwer. 18Ifiri mena la maatori hafahaafi nga Hesus eda dölü bwa, “Ibwe hau dewahami bwa demarühami ra ebwe fangayairaho—yalematara ra e pülüyei mwangaü.”
19Marahara lei tabwer e tammaü dewa faringörüngörüül lada hademaru yael hadiya Hesus bwa, “Tei ngaangu?”
20Hesus eda parüyeri eda dölü bwa, “Demarü maraharahami deih ma liyemaru, iiye mena e sili han faraawa räni tahahu ra i hori. 21Rauri Yalematara ebwe made eda weya-mo e dölü Farüförü Liya; nga erau weya meta hamatahütöhü ra ebwe bungutu mwana e fangaraho Rauri Yalemat! E fäli maho we e tawai fad!”
Yaari Tamoru Hafahaafi
(Mateus 26.26-30; Lukas 22.14-20; 1 Corinthians 11.23-25)
22Ifiri yaela mamwangaü nga Hesus eda hädi faraawa eda haparüye Dios eda tipiye eda hariil marahara lei tabwer nga e haüül bwa, “Hau hädi mere, mere podi.”
23Eda hädi we pöül eda haparüye Dios eda hariil lada uru urutael. 24Hesus eda haüül bwa, “Mere ssai, ebwe dele hataingehiil pipiyeri yalemat bwa ebwe happou hatödü#14.24 hatödü: nifaari ramaer covenant nipatari Dios ma yalemat. 25Ibwe hau dewahami bwa i tawai para urumi binoer eda tohongari lanera ibwe urumi bino ra e taifou ma uwawori farüyeri Dios.”
26Ifiri mena lada singini yatahe lada süya lada bwitahe uwawori duhura Olibet.
Hesus e Uhori Tapa bwa Petrus ebwe Dölü bwa e Tahüra Re Iiye
(Mateus 26.31-35; Lukas 22.31-34; Yohanes 13.36-38)
27Hesus e haüül bwa, “Hami ma urutemi nga haubwe peitiyeiraho eda weya-mo e dölü Farüförü Liya bwa, ‘Dios ebwe riiye yalematara lei hafaniri siipi, nga siipi hara ra larau mahar fataangi.’ 28Nga werimwiliri mena ibwe simwatahe ma ifiri made nga ibwe uhoraho Kalilea ma imowami.”
29Petrus eda dölü bwa, “Ira-mo me urutael yalemat labwe peitihoraho, nga ngaangu i tawai peitihoraho!”
30Hesus eda haüye Petrus bwa, “Bwongireiye, imowari na ebwe ddölü hayang faluwou, nga ebwe fadörüwe yaamu dölü bwa ho tahürayai.”
31Nga Petrus e tai dauraho eda dölü bwa, “Ira-mo me ibwe ra pülüho maade, nga i tawai ra dölü-mo bwa i tohüraho!”
Urutael marahara lei tabwer nga e dari hafeiye dewa marahara ramael.
Hesus e Sipesipe ma Ketsemane
(Mateus 26.36-46; Lukas 22.39-46)
32Lada bwitoho burukara iitar Ketsemane, nga Hesus eda haüül marahara lei tabwer bwa, “Hau maato ihar bwa ngaangu ibwe sipesipe.” 33Eda hädi Petrus ma James ma Yohanes lada wödürü süye. Hesus e tammaü dewa faringörüngön nga e ssauyehiri dewa hamatahiri tipar 34eda haüül bwa, “E rap dewa tammaüri faringörüngöri e weya me ebwe rii madeyai. Hau mire iha nga haubwe haneraho sahü.”
35Iiye eda fatare eda hatawaraho töt eda tolosapatiu wori masalo eda sipesipe nga e dölü bwa, nga sahü nga e süye eda tawai bungutu tarapari hairam. 36E sipesipe nga e dölü bwa, “Abba, Tamai! Uruteri faülümire nga e süya ngariho. Häditengiyei pöüleri iram. Nga dari na ho tawai faaülü ra ngaangu i masariye bwa hobwe faaülü ra heer ho masariye.”
37Ifiri mena Hesus e wehitafaari eda weliil marahara lei tabwer bwa la madül, eda haüye Petrus bwa, “Simon, ho madül? E tasüye dewa bwa hobwe haneraho ifiri dewo sikang?” 38Eda haüül bwa, “Hau haneraho hauda sipesipe bwa hau tawai püngütiwo ifiri hapaan. Tipemi ra e masari faülü titiro maho nga dari na podümi ra e mangüs.”
39Hesus eda para wehitafaari eda sipe tafariya-mo yaar tingalo. 40Nga eda para wehitafaari iyoloil marahara lei tabwer eda para weliil bwa la madül. E tai ra süya ngarila-mo bwa labwe haneraho sahü, nga la tahüra dewa hale meta na labwe haüye.
41Hadörüweri yaari Hesus wehitafaari iyoloil marahara lei tabwer eda haüül bwa, “Hau süyeri madülü söhü nga hau hadodohami? Morira! E mori bwito yator! Hau habaühü meihira nga larau fangaraho Rauri Yalemat lada itenango räni paüül lei tammaü. 42Hau düütahe bwa dirou süye! Habaühü bwa iyer yalematara e fangayairaho.”
La dubuli Hesus
(Mateus 26.47-56; Lukas 22.47-53; Yohanes 18.3-12)
43Hesus e süyeri titiro nga Yudas we demarü marahara deih ma liyemaru lei tabwer eda bwitoho iyolor. E wödütoho ma palüül saradau ra la akkatoho uwadeitap ma yael wawu. Marahara la bwitahe ra yael marahara tamoni paderei ma lei tanahori Farau ma tamoni farüye ma hatalitahe. 44Yudas e mori faduri tabongariil bwa, “Mwana ibwe faidangowa iiye na hau kupeti. Hau dubuli hauda hädi hauda matarahi mahowa.”
45Ifiri mena e bwitoho Yudas nga e hawere sahü eda raho iyolori Hesus nga eda dölü bwa, “Tanaho!” eda faidangowa. 46Mwaare hara lada dubuli Hesus lada hamasupata. 47Demarü ma uworuul mwaarehara la ddü burukara eda urutawau yaar uwadeitap eda fararaho taringeri mwana lei haküröü ra yaari Tamoni paderei. 48Hesus eda haüül bwa, “Ngaangu lei tammaü na hau bwitahe bwa haubwe dubuliyei nga hau hädini yami uwadeitap ma wawu? 49Fada ma laari nga i mire iyolomi nga i kaühemi räni Templo nga hau tai ra dubuliyei-mo. Nga dari na ebwe faülüyehi bwa tödü-mo e dölü Farüförü Liya.”
50Ifiri mere nga urutael marahara lei tabwer lada hilimwaraho lada heitengi.
51Nga demarü riweisi mwaare ra e tattala e tabweyaraho Hesus. La dölü bwa labwe dubuli mwana 52nga eda hapeyaraho eda rihitatiwo we talar eda heiraho nga e tai üffoüf.
Hesus e Mire Ifiri Haddiye
(Mateus 26.57-58; Lukas 22.54-55, 63-71; Yohanes 18.13-14, 19-24)
53Lada hadaraho Hesus iyolori mena tamoni paderei. Lada bwitoho urutael tamoni paderei ma marahara tamoni farüye ma lei tanahori Farau lada ttouu fängääni. 54Nga Petrus e mire sahü ni taawa eda tabweya Hesus eda ra bwirango räni hosawosari iimweri mena tarapari paderei eda maatotiwo iyoloil marahara lei matarahi eda harimebwesiye idelaye purori yaafi. 55Marahara tarapari paderei ma urutael sawori council nga ladari kkupe dewa tammaü ra labwe paari ngeri Hesus bwa ebwe süye bwa labwe riiye madeye, nga e tawol na la hüra bwa tammaür. 56La pipiya yalemat hara la kosowa titiini Hesus, nga dari na e tei hafeiye marahara la dölü.
57Palüül mwaare lada düütahe lada kosowa titiini Hesus nga la dölü bwa, 58“Hai longolongo ramar yara dölü bwa, ‘Ibwe hamaharatiwo Templo er e yalemat la haddüyatahe, nga werimwiliri dörübwongi nga ida haddüyatahe para dewo ra tai yalemat la haddüye.’ ” 59Para marahar nga e tai hafeiye marahara ramael.
60Nga mena tamoni paderei eda düütahe eda ddü imowael urutael yalemat hara eda hadiya Hesus bwa, “Heer e tawol na hobwe dölü hataingehiri tammaü ha la paari ngeriho?”
61Nga Hesus e paado sahü yaar tai mangudungudu. Nga mena tamoni paderei eda para hadiya bwa, “Heer na Mesias, ra Rauri Dios ra e taitei dewa?”
62Hesus eda dölü bwa, “Ngaangu mena. Hami hau rou käkäne Rauri Yalemat bwa erau maato hurumalari Dios ra e hädi pipiyeri ppou, nga erau bwito ma wori manirengi!”
63Tamoni paderei eda feingi üffar nga e dölü bwa, “E tawol nifaari na dibwe par kkup re ebwe hauhis tammaü ra e faaülü! 64Hau mori longolongo bwa e tirobiteliye Dios! Meta yami mangimengi?”
Lada ppari dölü bwa hataingehir maade.
65Palüül yalemat lada sanihutufa Hesus. Lada boruborüya yaar tatalof, lada wautu nga la dölü bwa, “Tapa hale itöü mo e wautuho!” Marahara lei matarahi lada bwitoho lada hädi Hesus lada pilihi.
Petrus e Dölü bwa e Tahüra re Iiye Hesus
(Mateus 26.69-75; Lukas 22.56-62; Yohanes 18.15-18, 25-27)
66Petrus e süyeri mire räni hosawosari iimwara, nga demarü faifire lei yaari tamoni paderei haküröü e bwitoho 67eda käkäne bwa e harimebwesiye idelaye yaafi eda dölü bwa, “Heer demarü-mo ho pülüya Hesus eri Nasaret.”
68Nga Petrus eda dölü bwa, “I tahüra dewa nifaari marahara ho dölü.” Eda tauwou ma räni hosawosari iimwara, nga e ddölü hayang.
69Nga faifina lei haküröü e käkäne Petrus ma burukara eda para haüül yalemat hara la ddü burukara bwa, “Mwaarer iiye demarü iile!” 70Nga Petrus e para dölü bwa naweri.
Nga e tai miriyarai nga palüül yalemat hara lada haüye Petrus bwa, “Hatödü dewa bwa heer demarü iile, bwa heer sawori Kalilea.”
71Petrus eda dölü bwa, “I tapa hatödü bwa e tawol raam doutongi na i tapa! Dios ebwe hafaiyebwiteliyei ifiri na ibwe kosowa! I tei ra hüra-mo mwana hau ta tapa titiin!”
72Ifiri mena sahü nga hayang e ddölü haluwouwar. Petrus eda mangitafariya-mo Hesus e haüye bwa, “Imowari na ebwe ddölü hayang faluwouw nga ebwe fadörüw yaamu dölü bwa ho tahürayai.” Petrus e tarapar dewa tammaüri faringörüngön eda hangüsüngüsü ttengi.
ទើបបានជ្រើសរើសហើយ៖
Markus 14: SOV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
(Active) © Wycliffe Bible Translators, Inc. All rights reserved.
Markus 14
14
Kkuperi Faiiniri Hesus
(Mateus 26.1-5; Lukas 22.1-2; Yohanes 11.45-53)
1Liyelari imowari lani sänneri Paskua ma Faraawara e Tawol Habobor, nga marahara tamorul paderei ma lei tanahori Farau la kupeti yarari me ebwe süye bwa labwe dubuli Hesus lada riiye. 2Lada dölü bwa, “Di tawai faülü mere wori lani sännekahar, bwa yalemat late buho.”
La Hapiti Hesus ma Betania
(Mateus 26.6-13; Yohanes 12.1-8)
3Hesus e mire Betania matariimweri Simon, mwaarer morowe e iram ifiri hamatahiri rühür. Ifiri na Hesus e mamwangaü nga demarü faifire eda raho iyolor nga pöüleri yalöngü ra e boutihitihi e tarapar dewa parüyen. E hädi eda bwarangi dalamina eda hadelatahe taofara uwawori simweri Hesus. 4Palüül marahara la mire burukara lada hadongael nga la dölü fängääni bwa, “Meta nifaari me dew tarapari hataworap e faülüyehi? 5E süye dewa me labwe hora parüyeri ifiri dörübühüya mwanne ra silver lada hada ra mwanne lada harile lei halofalof!” La tapa tammaüü dewa faifirewe.
6Hesus eda dölü bwa, “Hau rihiti! Meta sapir hauda tiro delayeya faifirer? Iiye e mori faülü dewa titiro maho nihataingehi. 7Maraha lei halofalof ra la mire sahü iyolomi. E tawai weri söhü lanera haü masari haüda tapangil. Nga dari ra ngaangu ra i tawai mire sahü iyolomi. 8Nga iiye faifirer ra e mori faülü mena e süya ngari; eda mori taofi podüi imowari na labwe ribwayai. 9Ibwe haü dewahami bwa e tawaweri burukara labwe kaü Titiro Maho ma uwawori farüyeri yalemat nga mere e faülü faifirer ra labwe haye fiyangowa bwa yalemat labwe mengiye.”
Yudas e Ngütahe Bwa Ebwe Fangaraho Hesus
(Mateus 26.14-16; Lukas 22.3-6)
10Yudas Iskariot we demarü marahawe deih ma liyemaru lei tabweri Hesus eda raho iyolori tamoni paderei bwa e laweri bwa ebwe hataleyasiri Hesus iyoloil. 11E maho dewa faringörüngörüül ifiri ramahara e haüül nga la hahürari ngeri bwa labwe haneya mwanne bwa parüyen. Yudas eda hapurotahe yara kkupe yarara ebwe maho ra ebwe fangangariil Hesus.
Hesus ma Marahara Lei Tabwer la Wödüri Mwangaü Ifiri Paskua
(Mateus 26.17-25; Lukas 22.7-14, 21-23; Yohanes 13.21-30)
12Matamowari lani sänneri Faraawahara e Tawol Habobor ra laani raiini siipi bwa mwangaüri Paskua, nga marahara lei tabwer lada hadiya bwa, “Iya na ho masari bwa haibwe fitehiye na yaamu mwangaüri Paskua ma irang?”
13Hesus eda haküröül liyemaru ma uworuul nga e haüül bwa: “Hau bwirango räni wotawot haubwe welifängääni ma demarü mwaare ra e lohi dewo räniye ssörü. Hauda tabweya 14hauda bwirango räni iimwara ebwe itirango irang, hauda haüya mwana iimwar mena bwa, ‘Tanaho e haddiye bwa: Iya rarosihi ra ngaangu ma lei tabwei haibwe faülü mwangaüri Paskua ma irang?’ 15Mwana ra ebwe hannaha ngarihemi dewo tarapari rarosihi räni mena haliyetani iimw ra e mori werewere, hauda hawerewereya bwa dibwe hori.”
16Marahara lei tabwer lada süye lada bwirango räni wotawot lada weli uruteri faülümire nga e weya sahü mo Hesus e haüül, lada hawerewereya harael mwangaüri Paskua.
17Eda bwongitoho nga Hesus eda wödütoho ma marahara deih ma liyemaru lei tabwer. 18Ifiri mena la maatori hafahaafi nga Hesus eda dölü bwa, “Ibwe hau dewahami bwa demarühami ra ebwe fangayairaho—yalematara ra e pülüyei mwangaü.”
19Marahara lei tabwer e tammaü dewa faringörüngörüül lada hademaru yael hadiya Hesus bwa, “Tei ngaangu?”
20Hesus eda parüyeri eda dölü bwa, “Demarü maraharahami deih ma liyemaru, iiye mena e sili han faraawa räni tahahu ra i hori. 21Rauri Yalematara ebwe made eda weya-mo e dölü Farüförü Liya; nga erau weya meta hamatahütöhü ra ebwe bungutu mwana e fangaraho Rauri Yalemat! E fäli maho we e tawai fad!”
Yaari Tamoru Hafahaafi
(Mateus 26.26-30; Lukas 22.14-20; 1 Corinthians 11.23-25)
22Ifiri yaela mamwangaü nga Hesus eda hädi faraawa eda haparüye Dios eda tipiye eda hariil marahara lei tabwer nga e haüül bwa, “Hau hädi mere, mere podi.”
23Eda hädi we pöül eda haparüye Dios eda hariil lada uru urutael. 24Hesus eda haüül bwa, “Mere ssai, ebwe dele hataingehiil pipiyeri yalemat bwa ebwe happou hatödü#14.24 hatödü: nifaari ramaer covenant nipatari Dios ma yalemat. 25Ibwe hau dewahami bwa i tawai para urumi binoer eda tohongari lanera ibwe urumi bino ra e taifou ma uwawori farüyeri Dios.”
26Ifiri mena lada singini yatahe lada süya lada bwitahe uwawori duhura Olibet.
Hesus e Uhori Tapa bwa Petrus ebwe Dölü bwa e Tahüra Re Iiye
(Mateus 26.31-35; Lukas 22.31-34; Yohanes 13.36-38)
27Hesus e haüül bwa, “Hami ma urutemi nga haubwe peitiyeiraho eda weya-mo e dölü Farüförü Liya bwa, ‘Dios ebwe riiye yalematara lei hafaniri siipi, nga siipi hara ra larau mahar fataangi.’ 28Nga werimwiliri mena ibwe simwatahe ma ifiri made nga ibwe uhoraho Kalilea ma imowami.”
29Petrus eda dölü bwa, “Ira-mo me urutael yalemat labwe peitihoraho, nga ngaangu i tawai peitihoraho!”
30Hesus eda haüye Petrus bwa, “Bwongireiye, imowari na ebwe ddölü hayang faluwou, nga ebwe fadörüwe yaamu dölü bwa ho tahürayai.”
31Nga Petrus e tai dauraho eda dölü bwa, “Ira-mo me ibwe ra pülüho maade, nga i tawai ra dölü-mo bwa i tohüraho!”
Urutael marahara lei tabwer nga e dari hafeiye dewa marahara ramael.
Hesus e Sipesipe ma Ketsemane
(Mateus 26.36-46; Lukas 22.39-46)
32Lada bwitoho burukara iitar Ketsemane, nga Hesus eda haüül marahara lei tabwer bwa, “Hau maato ihar bwa ngaangu ibwe sipesipe.” 33Eda hädi Petrus ma James ma Yohanes lada wödürü süye. Hesus e tammaü dewa faringörüngön nga e ssauyehiri dewa hamatahiri tipar 34eda haüül bwa, “E rap dewa tammaüri faringörüngöri e weya me ebwe rii madeyai. Hau mire iha nga haubwe haneraho sahü.”
35Iiye eda fatare eda hatawaraho töt eda tolosapatiu wori masalo eda sipesipe nga e dölü bwa, nga sahü nga e süye eda tawai bungutu tarapari hairam. 36E sipesipe nga e dölü bwa, “Abba, Tamai! Uruteri faülümire nga e süya ngariho. Häditengiyei pöüleri iram. Nga dari na ho tawai faaülü ra ngaangu i masariye bwa hobwe faaülü ra heer ho masariye.”
37Ifiri mena Hesus e wehitafaari eda weliil marahara lei tabwer bwa la madül, eda haüye Petrus bwa, “Simon, ho madül? E tasüye dewa bwa hobwe haneraho ifiri dewo sikang?” 38Eda haüül bwa, “Hau haneraho hauda sipesipe bwa hau tawai püngütiwo ifiri hapaan. Tipemi ra e masari faülü titiro maho nga dari na podümi ra e mangüs.”
39Hesus eda para wehitafaari eda sipe tafariya-mo yaar tingalo. 40Nga eda para wehitafaari iyoloil marahara lei tabwer eda para weliil bwa la madül. E tai ra süya ngarila-mo bwa labwe haneraho sahü, nga la tahüra dewa hale meta na labwe haüye.
41Hadörüweri yaari Hesus wehitafaari iyoloil marahara lei tabwer eda haüül bwa, “Hau süyeri madülü söhü nga hau hadodohami? Morira! E mori bwito yator! Hau habaühü meihira nga larau fangaraho Rauri Yalemat lada itenango räni paüül lei tammaü. 42Hau düütahe bwa dirou süye! Habaühü bwa iyer yalematara e fangayairaho.”
La dubuli Hesus
(Mateus 26.47-56; Lukas 22.47-53; Yohanes 18.3-12)
43Hesus e süyeri titiro nga Yudas we demarü marahara deih ma liyemaru lei tabwer eda bwitoho iyolor. E wödütoho ma palüül saradau ra la akkatoho uwadeitap ma yael wawu. Marahara la bwitahe ra yael marahara tamoni paderei ma lei tanahori Farau ma tamoni farüye ma hatalitahe. 44Yudas e mori faduri tabongariil bwa, “Mwana ibwe faidangowa iiye na hau kupeti. Hau dubuli hauda hädi hauda matarahi mahowa.”
45Ifiri mena e bwitoho Yudas nga e hawere sahü eda raho iyolori Hesus nga eda dölü bwa, “Tanaho!” eda faidangowa. 46Mwaare hara lada dubuli Hesus lada hamasupata. 47Demarü ma uworuul mwaarehara la ddü burukara eda urutawau yaar uwadeitap eda fararaho taringeri mwana lei haküröü ra yaari Tamoni paderei. 48Hesus eda haüül bwa, “Ngaangu lei tammaü na hau bwitahe bwa haubwe dubuliyei nga hau hädini yami uwadeitap ma wawu? 49Fada ma laari nga i mire iyolomi nga i kaühemi räni Templo nga hau tai ra dubuliyei-mo. Nga dari na ebwe faülüyehi bwa tödü-mo e dölü Farüförü Liya.”
50Ifiri mere nga urutael marahara lei tabwer lada hilimwaraho lada heitengi.
51Nga demarü riweisi mwaare ra e tattala e tabweyaraho Hesus. La dölü bwa labwe dubuli mwana 52nga eda hapeyaraho eda rihitatiwo we talar eda heiraho nga e tai üffoüf.
Hesus e Mire Ifiri Haddiye
(Mateus 26.57-58; Lukas 22.54-55, 63-71; Yohanes 18.13-14, 19-24)
53Lada hadaraho Hesus iyolori mena tamoni paderei. Lada bwitoho urutael tamoni paderei ma marahara tamoni farüye ma lei tanahori Farau lada ttouu fängääni. 54Nga Petrus e mire sahü ni taawa eda tabweya Hesus eda ra bwirango räni hosawosari iimweri mena tarapari paderei eda maatotiwo iyoloil marahara lei matarahi eda harimebwesiye idelaye purori yaafi. 55Marahara tarapari paderei ma urutael sawori council nga ladari kkupe dewa tammaü ra labwe paari ngeri Hesus bwa ebwe süye bwa labwe riiye madeye, nga e tawol na la hüra bwa tammaür. 56La pipiya yalemat hara la kosowa titiini Hesus, nga dari na e tei hafeiye marahara la dölü.
57Palüül mwaare lada düütahe lada kosowa titiini Hesus nga la dölü bwa, 58“Hai longolongo ramar yara dölü bwa, ‘Ibwe hamaharatiwo Templo er e yalemat la haddüyatahe, nga werimwiliri dörübwongi nga ida haddüyatahe para dewo ra tai yalemat la haddüye.’ ” 59Para marahar nga e tai hafeiye marahara ramael.
60Nga mena tamoni paderei eda düütahe eda ddü imowael urutael yalemat hara eda hadiya Hesus bwa, “Heer e tawol na hobwe dölü hataingehiri tammaü ha la paari ngeriho?”
61Nga Hesus e paado sahü yaar tai mangudungudu. Nga mena tamoni paderei eda para hadiya bwa, “Heer na Mesias, ra Rauri Dios ra e taitei dewa?”
62Hesus eda dölü bwa, “Ngaangu mena. Hami hau rou käkäne Rauri Yalemat bwa erau maato hurumalari Dios ra e hädi pipiyeri ppou, nga erau bwito ma wori manirengi!”
63Tamoni paderei eda feingi üffar nga e dölü bwa, “E tawol nifaari na dibwe par kkup re ebwe hauhis tammaü ra e faaülü! 64Hau mori longolongo bwa e tirobiteliye Dios! Meta yami mangimengi?”
Lada ppari dölü bwa hataingehir maade.
65Palüül yalemat lada sanihutufa Hesus. Lada boruborüya yaar tatalof, lada wautu nga la dölü bwa, “Tapa hale itöü mo e wautuho!” Marahara lei matarahi lada bwitoho lada hädi Hesus lada pilihi.
Petrus e Dölü bwa e Tahüra re Iiye Hesus
(Mateus 26.69-75; Lukas 22.56-62; Yohanes 18.15-18, 25-27)
66Petrus e süyeri mire räni hosawosari iimwara, nga demarü faifire lei yaari tamoni paderei haküröü e bwitoho 67eda käkäne bwa e harimebwesiye idelaye yaafi eda dölü bwa, “Heer demarü-mo ho pülüya Hesus eri Nasaret.”
68Nga Petrus eda dölü bwa, “I tahüra dewa nifaari marahara ho dölü.” Eda tauwou ma räni hosawosari iimwara, nga e ddölü hayang.
69Nga faifina lei haküröü e käkäne Petrus ma burukara eda para haüül yalemat hara la ddü burukara bwa, “Mwaarer iiye demarü iile!” 70Nga Petrus e para dölü bwa naweri.
Nga e tai miriyarai nga palüül yalemat hara lada haüye Petrus bwa, “Hatödü dewa bwa heer demarü iile, bwa heer sawori Kalilea.”
71Petrus eda dölü bwa, “I tapa hatödü bwa e tawol raam doutongi na i tapa! Dios ebwe hafaiyebwiteliyei ifiri na ibwe kosowa! I tei ra hüra-mo mwana hau ta tapa titiin!”
72Ifiri mena sahü nga hayang e ddölü haluwouwar. Petrus eda mangitafariya-mo Hesus e haüye bwa, “Imowari na ebwe ddölü hayang faluwouw nga ebwe fadörüw yaamu dölü bwa ho tahürayai.” Petrus e tarapar dewa tammaüri faringörüngön eda hangüsüngüsü ttengi.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
(Active) © Wycliffe Bible Translators, Inc. All rights reserved.