Mateus 4
4
Hapanari Hesus
(Markus 1.12-13; Lukas 4.1-13)
1Ifiri mere nga Ngörü eda häditahe Hesus niworu bwa Diabolo ebwe hapana. 2Werimwiliri faih bwongi ma faih laari yaar tai mwangaü eda ddung. 3Diabolo eda raho iyolor eda haüya bwa, “Nga sahü nga heer Rauri Dios hoda faaülü faduhar bwa ebwe raho bwa faraawa.”
4Hesus eda parüyeri bwa, “E dölü Farüförü Liya bwa, ‘E tai mwangaü söhü na yalemat la fadahiri bwa ira e tarapar nifaar iyoloil ra uruteri raam hara Dios e tapani.’ ”
5Diabolo eda häditahe Yerusalem, we wotawot liya, eda häditahe uwawori mena e tahiyet dewa ma wori ungeri Templo, 6eda haüya bwa, “Nga sahü nga heer Rauri Dios, rutiwo ma ihar, bwa e dölü Farüförü Liya bwa, ‘Dios ebwe haüül yaar anghel bwa labwe habauhuho, lada hamasüho räni paüül, bwa e tawai pwali hubwomu uwawori födü.’ ”
7Hesus eda haüya bwa, “Eda par dölü Farüförü Liya bwa, ‘Ho tawai hahira Tamoru yaamu Dios.’ ”
8Diabolo eda häditahe uwawori duhura e tahiyet dewa eda hanangari uruteri farüya ma uruteri mahori farüya hara. 9Diabolo eda haüya bwa, “Ibwe hariho uruteri marahar ifiri na hobwe hadobuhuyetiwo hoda haparüyei.”
10Hesus eda haüya bwa, “Satan, süya ma ihar! Farüförü Liya e dölü bwa, ‘Hobwe haparüya Tamoru yaamu Dios nga har iiya sahü na hobwe faülü yaar fitehi!’ ”
11Diabolo eda rihiti, nga lei anghel lada bwito tapangi.
E mwetahe yaari Hesus Fitehi ma Kalilea
(Markus 1.14-15; Lukas 4.14-15)
12Ifiri na Hesus eda longolongo bwa lada mori itenango Yohanes räni karabuse eda süya eda raho Kalilea. 13E tai mire Nasaret bwa e süya eda raho mire räni wotawotara iitar Kapernaum ra e mire idelaye sarüra Kalilea, uwawori farüyeri Zebulun ma Naftali. 14E faülüyehi mere bwa ebwe nnah bwa tödü-mo profeta Isaias e dölü bwa: 15“Farüyeri Zebulun ma farüyeri Naftali, räni yarara e buwou reteti, maürühüri Jordan ma layera delaye, Kalilea we farüyael marahara la tai hatödüye Dios! 16Yalematahawe la mire fari losopödü labwe käkäne tarapari weledahi. Nga iyahara la mire uwawori farüyeri made ra e losopödü, ebwe tire weledahi uwawoil.”
17Ifiri mena nga Hesus eda hapurotahe yaar kaü eda dölü bwa, “Hau wehitengini tammaümi bwa Farüyeri Weirengi ra eda mori halep!”
Hesus E Fadöngüül Famaru Lei Dairaho
(Markus 1.16-20; Lukas 5.1-11)
18Ifiri na Hesus e fatare wori piyeri sarura Kalilea eda käkäneiil liyemaru bwidibwidi ra iil lei dairaho, Simon (ra lada fadöngüngeri bwa Petrus) ma mwana bwidir Andres ra la uharai iih räni sörü. 19Hesus eda haüül bwa, “Hau bwitoho pülüyei bwa ibwe kaühemi bwa haubwe uharaiil yalemat.” 20Ifiri mena sahü nga lada rihitini yael uharai lada pülüya.
21Eda par paraho nga eda par käkäneiil liyemaru bwidibwidi, ra iiteri demarü James nga iiteri demarü Yohanes ra wonouri Sebedi, ra la maato usuri wael iyolori papael Sebedi bwa la hawerewereni yael uharai. Hesus eda fadöngüül 22nga ifiri mena sahü nga lada rihiti na wael ma mwana tamael lada pülüya.
Hesus E Fatani Kaü Nga E Hasüya Hamatahiil Yalemat
(Lukas 6.17-19)
23Hesus e raho uwawori uruteri Kalilea eda kaüül yalemat ma räni iimweri uwolongolong nga e haüül Titiro Maho ra hataingehiri Farüyeri Dios nga e hasüyani uruteri matamatari hamatahiil. 24Eda saworaparaho titiin uwawori uruteri Siria, nga yalemat lada hädilaraho marahara la hamatahi ma marahara e wol na e tai maho ifiri podüül, ma marahara e wol yarüdü tammaü faringörüngörüül, ma marahara la haye lemadowaraho, ma marahara la tameyafi podüül iyolor, eda hasüyani hamatahiil ma urutael. 25E pipiya yalematara lada pülüya ma Kalilea ma Deih Wotawot ma Yerusalem ma Yudea ma farüya hara la tahuniye Jordan ma layera delaye.
ទើបបានជ្រើសរើសហើយ៖
Mateus 4: SOV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
(Active) © Wycliffe Bible Translators, Inc. All rights reserved.
