Mateus 12
12
Haddiye Nihataingehiri Lani Sabbat
(Markus 2.23-28; Lukas 6.1-5)
1E tai miriyarai ma werimwiliri mena nga Hesus eda parango räni maatari wheat nga lani Sabbat. Marahara lei tabwer la ddung lada hiridini palüül diyobori wheat lada mwangaü. 2Ifiri na marahara Farisi lada käkäne na la faaülü lada haüye Hesus bwa, “Habaühü bwa marahara lei tabwemu la faülü na e tabu lani Sabbat!”
3Hesus eda haüül bwa, “Hau tösü hüra-mo-mo Dabid e faülü ifiri-mo iiy ma marahawe uwar la ddung? 4Iiye ma marahawe uwar la bwirango niimweri Dios lada hangi faraawa hawe ffahiri Dios, nga e tai maho ma ifiri Farau na labwe hangi. Har marahara paderei na e süya bwa labwe hangi faraawara. 5Nga hau tei habaühü-mo e farüüyehi räni yaari Moses Farau bwa fada ma lani Sabbat nga paderei hara la mire räni Templo la hatawadiya farauri lani Sabbat nga la tai tammaü irang? 6Ibwe hauhemi bwa e wol yalemat ihar ra e taitei ma imowari Templo. 7Farüförü Liya e dölü bwa, ‘Mahori yarol na i masariya, e tai maaru hara la hori ffahi.’ E weya me haubwe hüra nifaari merer nga hau tawai hatawadiya titiroil marahara e tawol tammaü na la faülü, 8bwa Rauri Yalemat na e Tamoni lani Sabbat.”
Mwana e Made Paür
(Markus 3.1-6; Lukas 6.6-11)
9Hesus eda süya meihira eda bwirango räni iimweri uwolongolong. 10Burukara na e mire irang demarü mwaare ra e made delaye humusur. Palüül yalematara la mire ihira la laweri hatawadiya titiini Hesus bwa e faaülü na e tammaü, lada hadiya bwa, “E feita, e tai tammaü ma ifiri yas Farau na dibwe hasüya hamatahiri yalemat lani Sabbat?”
11Hesus eda haüül bwa, “Meta na haubwe faülü ifiri na demarü maraha hami ebwe wol raur siipi nga eda mourango na raur siipi räni kkeri lani Sabbat? E tawai hamasü eda yafidatahe? 12Yalemat e taitei ma imowari siipi! Nga sahü nga e haitina ira nga yas Farau e ngütaheye bwa dibwe tapangiil yalemat lani Sabbat.” 13Eda haüya mwana e made humusur bwa, “Hawerawau na paumu.”
Eda haweraraho na humusur nga eda mahoraho eda hafeiya ma liyepou. 14Marahara Farisi lada süya lada kupeti yarari na labwe riiya Hesus.
Dios e Tiwereye Lei Yaar Haküröü
15Ifiri mena Hesus eda longolongo bwa la laweri na labwe riiya, eda süya ma burukara nga e pipiya yalemat na la tabweya. Eda hasüya hamatahiil, 16nga e haüye dewael bwa la tawai haüül para palüül yalemat hale iiye itöü. 17E faülüyehi merer bwa ebwe nnah bwa hatödü-mo Dios e faülü profeta Isaias bwa ebwe tapa bwa:
18“Iyer na lei yai haküröü ra i faduri tiwereya.
Iiye na i wahawahahiri nga i kkeleyahiri.
Ibwe hatalatiwo Ngöri uwawor,
bwa ebwe hannaha hatödü iyoloil sawori weidarop.
19E tawai haparüyetiro nga e tawai kabwat,
nga e tawol yalemat labwe longolongo ramar ma niyar.
20E tawai hodofi fatiri ra e hapapalow,
nga e tawai huruw lamara e takadi puror,
eda tohongari na ebwe faülüyehi titiro hatödü.
21Nga iiye na urutael sawori weidarop la faruhuruhu iyolor.”
Hesus ma Beelsebul
(Markus 3.20-30; Lukas 11.14-23)
22Palüül yalemat lada hädiraho iyolori Hesus demarü mwaare ra e tabu matar nga e tasüya bwa ebwe titiro, bwa e wol yarüdü tammaü faringörüngön. Hesus eda hasüya hamatahiri mwana eda süya bwa ebwe titiro nga e käkäne faülümire. 23La ppari lüdü marahara la towu ihira ifiri na Hesus e faaülü. Lada ppari hadiya bwa, “E süya bwa ebwe mwaarer na Rauri Dabid?”
24Ifiri mena nga marahara Farisi lada longolongo na e faülüyehi lada dölü bwa, “E harewarewawau yarüdü tammaü bwanasahü na Beelsebul ra tamorüül yarüdü tammaü e haneya ppou bwa ebwe faaülü mena.”
25Hesus e hüra na yael mangimengi eda haüül bwa, “Dew farüya ra iila sahü re labwe buhofängääni nga e tawadi. Nga dew wotawot hale sawori dew iimw ra labwe halaelae fängääni nga labwe buhofängääni nga lada mahar fataangi. 26Nga sahü nga Satan eda harewawau Satan, ira nga iiye sahü re e hatawadi demarüye, ebwe feita eda ddü farüyar? 27Hau dölü bwa i harewawau yarüdü tammaü bwanasahü na Beelsebul e haneyai ppou bwa ibwe faülü. Ira nga itöü e haneil marahara lei tabwemi ppou bwa labwe harewarewawau yarüdü tammaü? Mena lei tabwemi la faaülü ra e hannaha bwa e taweli na yami mangimengi! 28Naweri, e tai Beelsebul bwa Ngöni Dios re e haneyai ppou bwa ibwe harewarewawau yarüdü tammaü, bwa ebwe nnah bwa Farüyeri Dios eda mori bwitoho iyolomi.
29“E tawol demarü yalematara ebwe süya bwa ebwe bwirango niimweri demarü pise eda hädi hapitehir; ebwe uhori falohi mwana pise eda süya bwa ebwe hädini hapitehiri niimwar.
30“Yalematara e tai tabweyai ra iiye lei ranaroi, nga yalematara e tai pülüyei hatoiye ra e hamahara. 31Iyer sapir ida hauhemi bwa: e süya bwa ebwe tar uruteri tammaü hara yalemat la tapa ma tammaü hara la faaülü, nga dari na yalematara e tirobiteliye Ngörü Liya ra e tawai tar tammaür. 32Yalematara e tirobiteliye Rauri Yalematara e süya bwa ebwe tar tammaür; nga yalematara e tirobiteliye Ngörü Liya ra e tawau süya bwa ebwe tar tammaür, meihira eda ra watarangir.
Siriheti Ma Uwaar
(Lukas 6.43-45)
33“Siriheti hangiyengi ra e maho uwaar; nga siriheti halofalof ra uwaar nga e halofalof. Uwari siriheti e hanangarihis faülüri sirihetira. 34Hami ra rabuto, ebwe feita hauda tapa titiro maho na hau mire ifiri tammaü? Yawa na e tapa na e mire faringörüngöni yalemat. 35Yalemat maho e tapawau titiro maho hara e mire faringörüngön, nga yalemat tammaü e tapawau titiro tammaü hara e mire faringörüngön.
36“Haubwe hüra dewa bwa lanera Lani Haühühüri Hadiya nga yalemat erau tapaniwou nifaari raam hawe e tapaniwou we e tawol nifaar. 37Marahawe hau tapani na ebwe hannaha hale hau maho hale hau tammaü.”
La Hapoupou bwa Labwe Käkäne Kamarari Yarüdü
(Markus 8.11-12; Lukas 11.29-32)
38Palüül tanahori Farau ma lei Farisi lada dölü bwa, “Tanaho, hai masari na haibwe habaühü yaamu faülü kamarari yarüdü.”
39Hesus eda dölü bwa, “Hamatahütöhüri tammaüül ma tawolari yael hatödü maraha sawori lahireiya! Hau haüyei bwa ibwe hannaha kamarari yarüdü? Naweri! Hara kamarari yarüdüra ibwe harihemi ra kamarari yarüdüwe yaari profeta Jona eda menasahü. 40Ebwe weya sahü faülüri Jona e mire dörübwongi ma dörülari räni buhori tarapari iih, eda Rauri Yalemat ebwe mire retiperi masalo ifiri dörübwongi ma dörülari. 41Lanera Lani Haühühüri Hadiya nga sawori Nineve larau düütahe hataleyasimi, bwa iil la wehitengini tammaüül ifiri-mo la longolongo yaari Jona kaü; nga ibwe hau hami bwa e wol yalematara e mire ihara e taitei ma imowari Jona! 42Ibwe par hau hami bwa lanera Lani Haühühüri Hadiya nga Queen ari Seba erau düütahe eda hataleyasimi, bwanasahü na iiye ra e süya dewa ma uwawori farüyar ra e taaw bwa ebwe raho hadutering talama tiperi King Solomon ifiri marahara e tapani; nga ibwe hau hami bwa e wol yalematara e mire ihara e taitei ma imowari King Solomon!
Wehitafariri Yarüdü Tammaü
(Lukas 11.24-26)
43“Ifiri na yarüdü tammaü ebwe itiwou ma faringörüngöni yalemat nga erau raho uwawori farüya bwatabwat bwa e kkup burukara ebwe hadodoya irang. Nga sahü nga e taweli, 44nga erau dölü ma faringörüngön bwa, ‘Ibwe wehitafaari niimwei.’ Eda wehitafaari nga e weli-mo iimwar bwa pöür nga e faheya nga uruteri faülümire e tolotiyehi. 45Eda süya eda raho eda hädilatoho fidimoru yarüdü ra la hamatahütöhü ma imowar, lada bwitoho lada mire ihira. Imwiliri na e faülüyehi uruteri marahara nga yalematra erau para tawerewere dewa ma imowari we e faduri faülü. Iyer na labwe faülü marahara lei tammaüri lahireiya.”
Neirari Hesus Ma Marahara Bwidir
(Markus 3.31-35; Lukas 8.19-21)
46Hesus e süyeri titiro ngariil yalemat ifiri na neirar ma marahara bwidir la raho lada ddü ihitam lada tingalo bwa labwe titiro ngari. 47Demarü yalemat hara la mire ihira eda haüya bwa, “Neiramu ma marahawe bwidimu ra la mire ihitam nga la masari habauhuho.”
48Hesus eda haüül bwa, “Itöü na neirai? Nga itöü marahara bwidi?” 49Eda hatiyara paür eda toungeriil marahara lei tabwer eda dölü bwa, “Hau habaühü! Iyahar na direi ma bwidi. 50Yalematara e faaülü na yaari Papai ra e mire weirengi lawe, iiye na bwidi ma mweyangai ma direi.”
ទើបបានជ្រើសរើសហើយ៖
Mateus 12: SOV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
(Active) © Wycliffe Bible Translators, Inc. All rights reserved.
