मती 9
9
यीसु लकवे रै रोगी नै सावळ करयौ
(मरकुस 2:1–12; लूका 5:17–26)
1पछै यीसु नाव ऊपर चढ़न झील रै पार कफरनहूंम नगर मे आयौ, जठै वो रैतौ। 2उण वैळा, कीं लोग लकवा रै एक रोगी नै खाट माथै उठानै उणरै खनै लाया। यीसु नै उणरौ विसवास देखन, उण लकवे रै रोगी ऊं कयौ, “हे बेटा, हीमत राख थारा पाप माफ होया।”
3इण ऊपर कईक सास्तरी कयौ, “ओ तो परमेसर रौ अपमांन करै है।”
4यीसु नै उणौरै मन री बातां जांण नै कयौ, “थै लोग थौरे मन मे बुरौ विचार क्यूं कर रिया हो? 5आसान कांई है ओ कैवणौ, ‘थारा पाप माफ होया,’ या ओ कैवणौ, ‘उठ अर चाल फिर’? 6पण इण वास्तै की थै जांण लौ की म्हैं, मिनख रै बेटे नै धरती ऊपर पाप माफ करणै रौ अधिकार है।” तो उणै लकवे रै रोगी ऊं कयौ, “उठ, थारी खाट उठा, अर थारै घर जातौ रैह।” 7वो उठनै आपरै घरै जातौ रियौ। 8मिनख ओ देखन डर गिया अर परमेसर री महिमा करणै लागा, जिकौ मिनखौ नै ऐड़ौ अधिकार दियौ है।
मती रौ बुलायौ जावणौ
(मरकुस 2:13–17; लूका 5:27–32)
9उठै ऊं आगै बढ़न यीसु नै मती नाम रै एक मिनख नै चुंगी चौकी माथै बैठौ देख्यौ, अर उण ऊं कयौ, “म्हारै लारै हो जा।” वो उठनै उणरै लारै हो लियौ।
10 #
लूक 15:1,2 जद यीसु मती रै घर मे खाणौ खाणै रै लिए बैठा तो घणा चुंगी लेवणवाळा अर पापी आयनै यीसु अर उणरै चेलौ रै साथै खाणै बैठा। 11ओ देखन फरीसियों नै उणरै चेलौ ऊं कयौ, “थौरो गुरु चुंगी लेणवाळा अर पापियो रै साथै क्यूं खावै है?”
12ओ सुणन यीसु उणौनै कयौ, “वैद भलै चंगो रै लिए कोनीं पण बिमारों रै लिए जरुरी है। 13#मत 12:7इण वास्तै थै जान सास्तर रै इण वचन रौ अरथ सीख लौ ‘म्हैं बलिदान कोनीं पण दया चावूं।’ क्यूंकै म्हैं धरमियो नै कोनीं, पण पापियो नै बुलाणै आयौ हूं।”
उपवास रा सवाल
(मरकुस 2:18–22; लूका 5:33–39)
14जद बतिस्मो देवणवाळा यूहन्ना रा चेला यीसु खनै आन कयौ, “कांई कारण है की म्हौ अर फरीसी इता उपवास करौ, पण थारा चेला उपवास कोनीं करै?”
15यीसु उणौनै कयौ, “कांई बराती, जद तांई बींद उणौरै साथै है, सौग कर सकै है? पण वो दिन आवैला जद बींद उणौ ऊं न्यारौ कियो जावैला, उण वगत वे उपवास करैला। 16नवा कपड़े री कारी पुराणै कपड़े ऊपर कोई नीं लगावै। क्यूंकै वो नवी कारी भेळी होयनै, उण कपड़े नै घणौ फाड़ दैवै है। 17अर मिनख नयो अंगूर रस पुराणी मसको मे कोनीं भरे है। क्यूंकै एड़ौ करणै ऊं नयो अंगूर रस फूलनै मसकें फाड़ दैवै है, अर अंगूर रस बह जावै है अर मसकें बरबाद हो जावै है। पण नयो अंगूर रस नई मसको मे भरे है जिकौ वे दोनो बची रैवै है।”
मरयोड़ी छोरी अर बीमार लुगाई
(मरकुस 5:21–43; लूका 8:40–56)
18वो उण ऊं ऐ बातां कैह ही रिया हा, की देखौ, पराथना घर रौ एक अधिकारी नै आयनै उणनै परणाम कियो अर कयौ, “म्हारी बेटी अबार ही मरी है, पण चालनै अपणौ हाथ उण ऊपर राखै, तो वो जीवती हो जावैला।” 19यीसु उठनै अपणै चेलौ रै साथै मिळन उणरै साथै चालया।
20एक लुगाई नै जिकौ बारैह साल ऊं लोई पड़नै रौ रोग हो, पाछळ ऊं आयनै यीसु रै गाभे रै हाथ लगायो। 21क्यूंकै वो अपणै मन मे कैवती ही, “जे म्हैं उणरै गाभे रै हाथ लगा लेऊं तो सावळ हो जाऊं।”
22यीसु मुड़ नै उणनै देखी अर कयौ, “बेटी हीमत बांध थांरै विसवास नै थनै सावळ किनी है।” अर वां लुगाई उणी वगत सावळ होगी ही। 23जद यीसु उण अधिकारी रै घर मे पुगियो अर बांसली बजाण वाळौ नै अर भीड़ नै हुलड़ मचाते देखिया, 24तो कयौ, “हट जाओ, छोरी मरी कोनीं, पण सोह री है।” इण ऊपर वे यीसु री मजाक उडानै लाग्या। 25पण जद भीड़ नै निकाळ दी, तो वो मांय जायनै छोरी रै हाथ दियौ, अर वां जी उठी। 26अर इण बात री चरचा उण पूरै परदेस में फैलगी।
यीसु दो आंधौ नै सावळ करया
27जद यीसु उठै ऊं आगै बढ़या, तो दो आंधा उणरै लारै ओ कैवता होया जावै, “हे दाऊद री औळाद, म्हौरै ऊपर दया कर!”
28जद वो घर मे पूगिया, तो वे आंधा उणरै खनै आया, अर यीसु नै उणौनै कयौ, “कांई थांनै विसवास है की म्हैं ओ कर सकूं हूं?”
उणौनै वीण ऊं कयौ, “हां परभु!”
29तो यीसु उणौ री आंख्यां रै हाथ लगान कयौ, “थोरै विसवास रै ज्यूं ही थोरै वास्तै होवै।” 30अर उणौ री आंख्यां खुलगी। यीसु उणौनै चेताणी देन कयौ, “सावचेत, कोई इण बात नै नीं जांणै।” 31पण वे निकळनै पूरै परदेस में उणरी खबर फैला दी।
यीसु एक गूंगे नै सावळ करयौ
32जद वे बाहर जा रिया हा, तो देख्यौ, कीं लोग एक गूंगे नै जिणमे दुस्ट आतमा ही, यीसु खनै लाया। 33अर जद दुस्ट आतमा निकाळ दी, तो गूंगो बोलणै लागौ। इण भीड़ अचूम्बो करनै कयौ, “इजरायल मे ऐड़ौ कदैई कोनीं देख्यौ हो।”
34 #
मत 10:25; 12:24; मरकु 3:22; लूक 11:15 पण फरीसियों कयौ, “ओ तो दुस्टआतमाओ रै सरदार री मदद ऊं दुस्टआतमाओ नै निकाळै है।”
मजूर थोड़ा है
35 #
मत 4:23; मरकु 1:39; लूक 4:44 यीसु सगळा नगरो अर गांवों मे फिरता रिया अर उणौरै पराथना घरो मे उपदेस करता, अर राज्य रा सुभ संदेस परचार करता, अर लोगां री हरैक परकार री बीमारी अर तकलीफो नै दूर करता रिया। 36#मरकु 6:34जद उण भीड़ नै देखी तो उणनै मिनखौ ऊपर तरस आयौ। क्यूंकै वे उण लरड़ियां रै ज्यूं जिणरौ कोई रखवाळौ नीं हो, उदास अर भटकयोड़ी ही। 37#लूक 10:2तो उणरै आपरै चेलौ ऊं कयौ, “पाका खेत तो घणी है पण मजूर थोड़ा है। 38इण वास्तै खेत रै मालिक ऊं विणती करौ की वो आपरै खेत काटणे रै लिए मजूर भेज दे।”
ទើបបានជ្រើសរើសហើយ៖
मती 9: RWR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© NLCI CC BY-NC-ND 4.0
