Lukas 16
16
Chenal tentang sènꞌòy rik tok kènmën, tapik chèrdìk
1Yèsus naꞌoglèkh chenal doh ma hèhoh-hèhoh Eh: “Mok néy sènꞌòy rik kaye. Dak mok néy sènꞌòy rik bekèrjak untok sènꞌòy kaye nak, nabeꞌuros duid ròb harte eh nak. Tapik sènꞌòy kaye nak nakeyòkh gah sènꞌòy rik beꞌuros duid nak nabeꞌidéh duid eh. 2Jadik, sènꞌòy kaye nak nakòw ma sènꞌòy rik beꞌuros duid eh dak nachal, ‘Yék hòj ikeyòkh gah tok méj tentang hãk! Puꞌdoh og lah renipod nòm kèrjak hãk — rèk lok haꞌuros duid ròb harte yék. Hãk hòj tok boléh hakèrjak wèl untok yék!’ 3Dak rik beꞌuros nak nabebèdlod èn kelòj hup eh, ‘Ilok yék imteꞌèl?! Bòs yék hòj namòg behentik ma yék nòm kèrjak yéh! Yék hòj tok boléh imbesèylay, sebab imbèy-bay pon hòj tok beyog yéh. Bok kalòw imbetadok, dak isengẽny. 4Nak, yék ilèkh ilok imteꞌèl, supaye bil yék hòj nabehentik nòm kèrjak yék mok jajéh kéy-kéy yéh rik umterime igel èn dékh umnak!’
5Dak nanak pon nakòw pinéy-pinéy ma kenèmbek sènꞌòy rik umbeꞌutang ma bòs eh nak. Dak nachal ma sènꞌòy rik mulak nak, ‘Maròp lah utang hãk ma bòs yék?’ 6Sènꞌòy rik beꞌutang nak nasaꞌod, ‘Seratos tòng binyak sayton.’ Dak rik beꞌuros duid nak nachal ma sènꞌòy nak, ‘Doh lah surad utang hãh. Gel lah, dak lulòw tukar ma limak puloh tòng.’
7Pas nak nanak nachal ma sènꞌòy rik mòy, ‘Maròp utang hãk nak?’ Sènꞌòy nak nasaꞌod, ‘Seribuk uchang mad gandum.’ Dak rik beꞌuros nak nachal ma sènꞌòy rik beꞌutang nak, ‘Doh lah surad utang hãk, tukar lah ma lapan ratos hék.’
8Rik beꞌuros duid nak tok kènmën. Tapik pastik rik nak chèrdìk naberanchang nèsgos rik ma sòy bilok. Dak bil bòs eh nakeyòkh ilok nateꞌèl nak, nanak naꞌèhmah ma rik nak.”
Yèsus nachal wèl, “Mémang sènꞌòy rik tok umhèh-hoh ma Allah chèrdìk umꞌuros hal umnak èn duniak doh samak sènꞌòy mòy gerèk rik umnak. Hek, umnak lebéh chèrdìk tentang hal duniak doh nòm sènꞌòy rik umgès-gos èn kelòj chènlakh Allah. 9Jadik Yék imchal ma nyob: gunak lah kenaye rik mok èn duniak doh untok betulong ma sènꞌòy, supaye nyob nyomdapad kéy-kéy. Dak bil nyob kebes bok kenaye èn duniak doh hòj tok mèk-mok wèl, akal Tuhan naterime nyob ma dékh rik jalꞌéng èn sorga.
10Kalòw boléh pechaye sènꞌòy namteꞌèl hal-hal rik ajok, hal-hal rik rayak pon boléh pechaye ma rik nak. Tapik kalòw sènꞌòy tok kènmën namteꞌèl hal-hal rik ajok pon, pastik lah tok kènmën keꞌjèk ma hal-hal rik rayak. 11Jadik, kalòw hãk tok kènmën haꞌuros harte èn duniak doh, pastik lah Allah akal tok napechaye harte èn sorga ma hãk. 12Dak kalòw hãk tok kènmën hamꞌuros harte sènꞌòy mòy, pastik Allah tok naꞌèg-og ma hãk harte rik hãh.
13 #
Mat 6:24. Tok mok néy sènꞌòy pon rik dapad namkèrjak untok nar tuwan eh mase rik chachod. Sebab nanak akal lebéh nasayèkh ma néy tuwan eh, dak nacheꞌẽs ma tuwan rik gèhnih. Dak nanak akal lebéh nasetiye ma néy tuwan eh nòm rik gèhnih. Gerèk nak lah keꞌjèk ma nyob: nyob tok dapad nyomkèrjak untok Allah ròb untok kenaye keꞌjèk.”
Yèsus nachèl-chal ma sènꞌòy Parisi
(Mat 11:12-13; 5:3-32; Mrk 10:11-12)
14Mèn guruk agama nòm pitak Parisi umkeyòkh ma nèlchal Yèsus nak, dak umcherèk ma Rik Nak, sebab umnak umchèn duid. 15Tapik Yèsus nachal ma umnak, “Nyob begèw-gòw gerèk sènꞌòy kènmën èn mad sènꞌòy. Tapik Allah nalèkh hup nyob jèdhad. Dak ilok rik paléng penting èn mad sènꞌòy, tok behèrgak èn mad Allah — bok Allah nacheꞌẽs ma hal nak.
16 Hukom Tuhan ròb kitab mèn nabi umterèylòy Gah Allah sampéy Yohanès Pembaptis nalãj. Dak nòm kerek nak sejèkh, Yék ròb hèhoh Yék kiꞌèg-oglèkh Gah Méj tentang Kerajaꞌan Allah. Dak kenèmbek sènꞌòy umberabod untok mumòj ma Kerajaꞌan nak. #Mat 11:12,13. 17Tapik Hukom Tuhan nak tik bekuwase keꞌjèk! Lebéh mudah kalòw langid ròb bumi nahõy, bok nòm néy titik pon namhõy nòm Hukom Tuhan. #Mat 5:18. 18#Mat 5:32; 1 Kor 7:10,11.Chòntoh eh, hukom doh: kalòw sènꞌòy naperak ma léh eh dak naselòg ma babok mòy, sènꞌòy nak nabebènjhéj. Dak kalòw sènꞌòy naselòg ma babok rik tòw eh hòj naperak, nanak nabebènjhéj keꞌjèk.”
Chenal tentang sènꞌòy kaye ròb Lasarus
19Dak Yèsus naꞌoglèkh chenal doh ma umnak: “Mok néy sènꞌòy kaye. Nèglòg eh méj bok mehal, dak tiyab-tiyab arik nabeꞌadés bok nagos méwah geb. 20-21Dak mok wèl néy sènꞌòy hèl-hal rik bekenëh Lasarus. Esik eh seꞌẽg bebakad dak belènybony. Dak chuwòk pon umlãj umbelèg ma bakad eh nak. Lasarus nacherok geb. Dak mok sènꞌòy umsuwèd Lasarus nak ma tèk èn sòy rèngkak gerbang èn dékh sènꞌòy kaye nak. Dak èn anak Lasarus naꞌas namgéy chègnèg nèygéy sènꞌòy bekaye nak nabes. 22Bil néy arik, Lasarus nakebes, dak mèn melaykat umꞌéd ruway eh namgel samak Abraham èn sorga. Dak sènꞌòy kaye nak pon nakebes dak umkep eh. 23Dak ruway eh nawèk ma tempad sènꞌòy kèsbes, dak èn anak nasikse ibuk geb. Èn anak nanéh nòm jerok ma sorga. Dak nanéh Abraham nachèb-chab ma Lasarus, dak Lasarus nabeꞌadés nagèl-gel èn anak. 24Dak sènꞌòy kaye nak naꞌèh-éh, ‘Apak Abraham, kalõn lah che yék! Yék hòj isikse ibuk èn kelòj os doh! Or lah Lasarus namchelok sòy tikh eh ma kelòj òng, dak namꞌèn namkèrteg ma lèntag yék.’ 25Tapik Abraham nasaꞌod, ‘Kuwòt yék, beleng lah: hãk hòj hadapad kenèmbek rik méj-méj, dak hãk hasèngnang èn nèsgos hãh. Tapik Lasarus mase nak had nadapad èn nèsgos eh hal rik tok méj. Jadik nanak puꞌdoh nabeꞌadés èn anuh, dak hãk hòj sikse èn tuy. 26Tabeh wèl, mok jehòl rik tèmtejèp èn gagid hãk ròb kandék. Sènꞌòy èn anuh tok boléh umwèk ma tuy, dak sènꞌòy nòm tuy tok boléh umwèk ma doh!’ 27Dak sènꞌòy kaye nak nachal, ‘Apak Abraham, kalòw gerèk nak, yék iseꞌëd ma hãk: or lah Lasarus namwèk ma dékh apak yék. 28Sebab yék mok limak mèrpek yéh. Or lah Lasarus namhuwok ma umnak, supaye umnak agok ummòj ma kelòj tempad senikse doh!’ 29Tapik Abraham nasaꞌod, ‘Kewarge hãk hòj mok Hukom Tuhan rik Musa natèrlòy, ròb kitab mèn nabi. Umnak patod muhoh ilok rik hòj natulis èn kelòj Kitab nak.’ 30Tapik sènꞌòy kaye nak nasaꞌod, ‘Hõy, Apak Abraham! Tok chukob lah kalòw had mok dèꞌrik Kitab nak hék! Tapik kalòw sènꞌòy kèsbes nalos nagos wèl dak nawèk ma umnak, pastik umnak akal umlos ma Allah dak tok umtèlꞌèl dose wèl.’ 31Tapik Abraham nachal ma rik nak, ‘Kalòw umnak tok umbegorgèr ma tenènglèkh Musa ròb mèn nabi Allah, pastik lah umnak akal tok umpechaye keꞌjèk, yab sènꞌòy kèsbes nalos nagos wèl.’”
ទើបបានជ្រើសរើសហើយ៖
Lukas 16: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
