Lukas 14
14
Yèsus natèrhakh sènꞌòy jèk-jik wèl bil Is Tenarak
1Bil néy Is Tenarak, Yèsus nawèk ma dékh néy sènꞌòy pemimpin guruk agama nòm pitak Parisi, dak nagèy-géy èn anak. Kenèmbek sènꞌòy èn anak umtemèl jèngling ma Yèsus, sebab umchèn mukèk kesalahan supaye mutanas Eh. 2Dak anak keꞌjèk nalãj néy babeh èn sòy Yèsus. Babeh nak najik, tikh ròb jukh eh nahìs terènglòng. 3Dak Yèsus natanyak ma mèn sènꞌòy Parisi ròb guruk agama gèhnih, “Kalòw èhoh ma Hukom Tuhan, boléh ke èmtèrhakh sènꞌòy jèk-jik bil Is Tenarak, atòw hõy?”
4Tapik umnak sengẽk hék, tok umbesaꞌod. Jadik Yèsus napèk-pek dak natèrhakh sènꞌòy jèk-jik nak, dak naꞌor rik nak namwèk. 5Hòj nòm kerek nak Yèsus nachal ma mèn guruk agama naꞌtèk, “Nyob pon nyob kèrjak bil Is Tenarak! Kalòw kuwòt atòw lembu nyob nakelek ma kelòj jehòl bil Is Tenarak, ilok nyomteꞌèl? Pastik nyob sejèkh nyob tayod eh nòm jehòl nak, hek?!” #Mat 12:11.
6Dak umnak tok dapad mulawan ma nèlchal Yèsus nak.
Agok bèdlod rik hãk lebéh penting nòm sènꞌòy mòy, dak teꞌèl méj ma kenèmbek sènꞌòy
7Pas nak Yèsus nanéh mèn tamu èn dékh nak umkèrdakh mugel èn tempad paléng hormad. Jadik Yèsus naꞌoglèkh tenènglèkh doh ma umnak: 8“Kalòw néy sènꞌòy nasèryéh hãk ma kenurik benabéy, agok lah gel èn tempad hormad. Sebab mungkin tuwan dékh nasèryéh keꞌjèk sènꞌòy rik lebéh penting nòm hãk. #Ten 25:6,7. 9Kalòw gerèk nak, tuwan dékh nak akal nalãj dak nachal ma hãk, ‘Og tempad hãh doh ma rik nak.’ Dak hãk akal hagahmak sengẽny, sebab hãk kenak wèk dak gel èn tempad rik paléng jerok nòm tempad méj. 10Jadik, kalòw sènꞌòy nasèryéh hãk ma kenurik gerèk nak, wèk lah dak gel èn tempad rik jerok nòm tempad méj. Dak bil sènꞌòy rik nakòw hãk nanéh, mungkin akal nalãj dak nachal ma hãk, ‘Kéy, jok lah hagel èn tempad rik lebéh méj!’ Dak gerèk nak nanak nahormad ma hãk èn mad kenèmbek tamu gèhnih. 11Sebab chok rik bechubak namjadik lebéh rayak nòm sènꞌòy mòy, akal Allah najadik sènꞌòy nak tok bepenting. Dak chok rik bebèdlod sènꞌòy mòy lebéh penting nòm rik eh, akal Allah najadik sènꞌòy nak paléng rayak.” #Mat 23:12; Luk 18:14.
12Pas nak Yèsus nachal wèl ma sènꞌòy Parisi rik nasèryéh ma umnak naꞌtèk, “Bil hãk hasèryéh sènꞌòy ma jamuwan, agok lah had hasèryéh kéy-kéy, kewarge, sakèy, atòw sènꞌòy ènsekh dékh hãk rik bekaye hék. Sebab umnak akal umsèryéh ma hãk wèl ma jamuwan umnak keꞌjèk, dak gerèk nak umtèrlos umꞌog ma tènꞌèl hãk. 13-14Tapik, bil hãk hateꞌèl jamuwan, sèryéh lah sènꞌòy hèl-hal, sènꞌòy chachad, sènꞌòy kantem, ròb sènꞌòy bebèybëy, dak Allah akal nateꞌèl méj ma hãk. Sènꞌòy nak tok umbemampu mutèrlos muꞌog tènꞌèl hãh nak. Tapik bil ma sèj-sòj jakal, bil Allah natèrwòg sènꞌòy kènmën nòm kènbes, Allah akal natèrlos naꞌog tènꞌèl hãh nak.”
Chenal tentang jamuwan rayak
(Mat 22:1-10)
15Mok néy sènꞌòy rik gèl-gel samak Yèsus nakeyòkh ma nèlchal Eh. Jadik rik nak nachal ma Yèsus, “Beꞌadés lah umnak rik akal umgéy jamuwan èn Kerajaꞌan Allah!”
16Tapik Yèsus naꞌoglèkh chenal ma sènꞌòy nak, nachal:
“Mok néy sènꞌòy rik natabéh jamuwan rayak. Rik nak nasèryéh jajéh sènꞌòy. 17Bil hòj nalòy mase jamuwan nak, rik nak naꞌor ma kuli eh namwèk bok namꞌoglèkh ma kenèmbek tamu eh, ‘Jok lah, kenèmbek hòj siyab!’ 18Tapik kenèmbek tamu nak mok alasan pinéy-pinéy, sebab umnak umjèk tok mulèj-lãj. Sènꞌòy rik mulak nachal, ‘Yék pay ibelik selay, dak imwèk imnéh selay yéh nak. Tulong oglèkh ma tuwan hãk yék tok dapad imhoh. Tulong maꞌap lah ma yék.’ 19Mok sènꞌòy mòy nachal, ‘Yék pay doh ibelik sepuloh lembu beh. Puꞌdoh yék ichèn wèk untok imchubak lembu yéh nak kalòw boléh umhér. Tulong maꞌap lah ma yék.’ 20Dak rik mòy wèl nachal, ‘Yék pay hék ibabéy. Sebab nak yék tok boléh ilãj.’ 21Kuli nak nalos dak naripod kenèmbek nak ma tuwan eh. Tuwan nak pon naꞌõl geb, dak naꞌor ma kuli eh, ‘Wèk lah géj ma kenèmbek nòng èn kote doh. Sèryéh lah ma doh sènꞌòy hèl-hal, sènꞌòy chachad, sènꞌòy kantem, ròb sènꞌòy bebèybëy.’ 22Tok lamad nòm kerek nak, kuli nak nalos dak nachal, ‘Yãng, yék hòj iꞌéd kenèmbek sènꞌòy nak gerèk haꞌor atèk. Tapik tik mok tempad rik kosong wèl.’ 23Jadik tuwan nak nachal ma rik nak, ‘Wèk lah ma kenèmbek nòng rayak ròb nòng ajok èn béng kote, dak or kenèmbek sènꞌòy hatèrbuk untok mulãj ma doh supaye dékh yék namtebikh. 24Dak keyòkh lah: sènꞌòy rik hòj umjèk mulãj atèk pastik tok dapad mugéy amès pon nòm nèygéy jamuwan yék doh!’”
Bèdlod lah méj-méj kalòw nyob sanggob derite sebab nyob hoh ma Yèsus
(Mat 10:37-38)
25Bil néy arik Yèsus nachèb-chib, dak mok jajéh sènꞌòy rik umhoh umchib samak Rik Nak. Yèsus nawãr nanéh ma umnak dak nachal, 26“Kalòw nyob chèn nyomjadik hèhoh Yék, haros nyob sayèkh ma Yék lebéh nòm amèk apak nyob, léh nyob, kuwòt nyob, ròb mèrpek nyob. Hek, nyob mestik nyob sayèkh ma Yék lebéh nòm nèsgos rik nyob pon. Kalòw hõy, nyob tok dapad nyomjadik hèhoh Yék. #Mat 10:37. 27Dak nyob mestik nyob sanggob derite gerèk Yék, yab sampéy ma kènbes pon.#14:27 derite gerèk Yék, yab sampéy ma kènbes pon. Tèks asli Kitab: gulap palok salib. Kalòw hõy, nyob tok dapad nyomjadik hèhoh Yék. #Mat 10:38; 16:24; Mrk 8:34; Luk 9:23. 28Jadik, nyob haros bebèdlod méj-méj.
Gerèk chòntoh doh: bèdlod lah kalòw néy sènꞌòy nòm nyob nachèn namteꞌèl néy bangunan rayak. Rik nak akal nagel nèng-nèng dak nabekirak belanje eh, supaye nalèkh kalòw duid eh tehad untok namtèrsòj kèrjak nak. 29Kalòw hõy, bil namulak nateꞌèl bangunan nak, mungkin duid eh tok tèdhad, dak tok naterèjsòj bangunan nak. Kalòw gerèk nak, sènꞌòy mòy rik nèh-néh akal umbaléj ma rik nak. 30Bok umchal, ‘Sènꞌòy doh mulak natèrwòg bangunan, tapik tok boléh namtèrsòj!’
31Atòw bèdlod chòntoh mòy doh: kalòw mok néy rajak rik nachèn nambeperang ma rajak mòy. Rajak rik mulak nak mok sepuloh ribuk sènꞌòy askah, tapik rajak rik naꞌnéy mok nar puloh ribuk. Pastik rajak nak akal nagel nèng-nèng bok nabebèdlod kalòw tentere eh nak chukob kuwad untok namlawan mèsmus eh. 32Dak rajak nak nalèkh rik nak tok boléh menang. Jadik, bil mèsmus eh tik jerok, rajak nak akal natèrꞌèn sènꞌòy ma rajak rik lebéh kèdwad nak. Dak rik nak nasemany supaye wèmbema-méj, tok wèbelawan.”
33Yèsus nachal wèl, “Gerèk nak keꞌjèk ma nyob! Kalòw nyob chèn nyomjadik hèhoh Yék, nyob haros sanggob nyomperak kenèmbek milik nyob.”
Hèhoh Yèsus gerèk garam
(Mat 5:13; Mrk 9:50)
34Dak Yèsus nachal wèl naꞌog néy chòntoh: “Nyob rik hèh-hoh ma Yék gerèk garam. Garam rik méj mok ibuk gunak eh, tapik kalòw garam nak hòj nabelap, pastik tok boléh nambechuny wèl. 35Garam rik bèmlap nak hòj tok begunak wèl — tok boléh gunak untok namjadik baje#14:35 baje mok jenis baje rik umchèhruh garam, sebab garam dapad natulong ma nèmtap (chòntoh eh, untok jehuk kelape). atòw namcheròy ma tèk. Had nabes hék. Jadik agok gos gerèk garam rik tok begunak nak. Chok rik mok begèntòkh, keyòkh lah méj-méj!”
ទើបបានជ្រើសរើសហើយ៖
Lukas 14: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
