Yohanès 7
7
Mèn pek Yèsus tok umpechaye ma Rik Nak
1Nòm kerek nak, Yèsus nachèb-chib ma lok-lok tèk èn Galiliya. Nanak najèk namwèk ma negerik Yudéya, sebab mèn pemimpin sènꞌòy Yahudi èn anak umchèn mukèrbes Eh.
2 #
Im 23:34; Ter 16:13. Bil nak hòj tèꞌlok namlèy-lòy ma arik raye Yahudi rik umdéh Raye Dékh Nèmdep.#7:2 Raye Dékh Nèmdep Néy raye rik paléng penting èn budaye sènꞌòy Yahudi nak. Umnak umsambud raye nak bil musim nègtòg, dak umbeꞌadés untok 7 arik. Mase umsambud nak, jajéh sènꞌòy Yahudi umkod tabak-tabak nòm jehuk bok umteꞌèl dékh nèmdep nòm tabak nak. Dak untok 7 arik nak umgel èn kelòj dékh nèmdep nak, bok umbelekh ma jènman anin tòp bil yak dòt bej kaum Israꞌèl umgel èn kémah èn pantil gurun. Bache wèl tentang raye doh èn bukuk Terènlos 16:13–15. 3Dak mèn pek Yèsus umchal ma Rik Nak, “Perak lah nòm doh dak wèk ma Yudéya, supaye mèn hèhoh Hãh nak dapad munéh ma tènꞌèl kuwase rik hateꞌèl nak. 4Kalòw Hãk hachèn hamjadik terkenal, tok boléh lah hakerèꞌdëk ilok rik hateꞌèl nak. Jadik kalòw Hãk boléh hamteꞌèl tènꞌèl kuwase gerèk nak, pèrnéh lah rik Hãh nak ma kenèmbek duniak!” 5Mèn pek Yèsus umchal gerèk nak sebab umnak irik um pon tok umpechaye ma Rik Nak.
6Yèsus nasaꞌod ma umnak, “Mase Yék tèk-tik tok nalèy-lòy. Tapik kalòw nyob nak, bil-bil pon boléh. 7Sènꞌòy èn duniak doh tok mèk-mok mucheꞌẽs ma nyob. Tapik umcheꞌẽs ma Yék, sebab Yék ichal tèꞌlalah ma umnak ilok rik umteꞌèl nak jehad. 8Jadik wèk lah nyob ma raye nak. Yék tok ihèh-hoh, sebab mase Yék tèk-tik tok nalèy-lòy.” 9Nòm kerek Yèsus nachal gerèk nak, Nanak pon nagel èn tèk Galiliya nak.
Yèsus nabetènglèkh èn Dékh Tuhan
10Tapik nòm kerek mèn pek Eh nak hòj umwèk ma raye nak, Yèsus pon nawèk ma nak. Tapik Nanak nawèk julak-julak, bok sènꞌòy mòy tok umlèng-lèkh. 11Èn raye nak mèn pemimpin sènꞌòy Yahudi umkèk-kèk ma Yèsus bok umtanyak, “Ma lok eh Sènꞌòy nak?”
12Dak sènꞌòy jajéh èn anak umchahor kaban rik um tentang Yèsus. Mok rik chèl-chal, “Rik Nak Sènꞌòy rik méj.” Dak mok sènꞌòy gèhnih rik chèl-chal, “Hõy! Nanak nak nasèꞌlok ma sènꞌòy jajéh.” 13Tapik tok mèk-mok néy sènꞌòy pon namlamid namchal tèꞌlalah tentang Yèsus nak, sebab umtukh ma mèn pemimpin sènꞌòy Yahudi nak.
14Bil hòj èn gagid minggu raye nak, Yèsus nawèk ma Dékh Tuhan dak natekèd nabetènglèkh èn anak. 15Pemimpin sènꞌòy Yahudi umbèlꞌih dak umtanyak, “Nanak nak tok pernah nabelajar nòm guruk agama èk. Bok rèk lok iNanak boléh nalèkh jajéh hal gerèk doh?”
16Yèsus nasaꞌod ma umnak, “Ilok rik itènglèkh ma nyob doh kedak nòm rik Yéh, tapik nòm Nanak rik terèn-èn ma Yék. 17Sènꞌòy rik kemën-kemën umchèn muteꞌèl nènchèn Allah, umnak akal umlèkh kalòw tenènglèkh idoh nalãj nòm Allah atòw had nòm rik Yéh. 18Sènꞌòy rik betènglèkh tenènglèkh nòm rik um had umkèrdakh supaye sènꞌòy muhormad ma rik umnak. Tapik Yék doh had ikèrdakh supaye sènꞌòy muhormad ma Allah rik terèn-èn ma Yék. Nak lah tande eh nèlchal idoh kemën bok tok ibesèꞌlok. 19Jadik nahey inyob bok nyomkèrbes ma Yék? Manah tòp Musa hòj naꞌog ma nyob Hukom Tuhan, tapik èn nyob doh tok mok chok-chok pon namhoh ma Hukom Tuhan nak!”
20Sènꞌòy jajéh nak umsaꞌod, “Hãk hòj hasid yel bok haꞌahyèny! Tok mok chok pon namkèrbes ma Hãk!”
21Yèsus nachal ma umnak, “Yék hòj ikèrjak bok iteꞌèl néy tènꞌèl kuwase èn Is Tenarak, dak nyob kenèmbek nyob bèlꞌih. 22#Im 12:3; Jen 17:10. Tapik nyob keꞌjèk nyob kèrjak èn Is Tenarak! Èn Hukom Tuhan, Musa naꞌor ma nyob nyomsunat ma kuwòt bèhbeh nyob bil umor um nalòy lapan arik. Yab èn Is Tenarak pon, nyob tik nyob sunat keꞌjèk. Che kènmën eh nak, adad sunat nak kedak nòm Musa, tapik nòm yak dòt bej èk rik mulak.#7:22 yak dòt bej èk rik mulak Manah tòp Allah nateꞌèl perènhod Eh samak Abraham bok napili waris Abraham nak untok mujadik kaum penili Allah (kaum Israꞌèl). Dak bil nak Allah naꞌor ma Abraham, Isak, Yakob, ròb kenèmbek waris um supaye musunat ma kenèmbek kuwòt bèhbeh umnak, gerèk tande umnak milik Allah. Unak lah adad agama Yahudi nak, tapik sènꞌòy nòm kaum mòy rik pechaye ma Yèsus tok perlu musunat. (Néh ma Kisah Tènꞌèl Mèn Rasul, bab 15). 23#Yoh 5:9. Jadik kalòw nyob nak boléh nyomsunat ma kuwòt bèhbeh nyob èn Is Tenarak untok nyomhoh ma Hukom Tuhan, nahey bok nyob õl ma Yék bil itèrhakh ma kenèmbek esik sènꞌòy rik jèk-jik èn Is Tenarak? 24Bok agok behakim ma Yék nòm ilok rik nyob néh nak hék, tapik bèdlod lah nèng-nèng bok hakim nòm ilok rik kènmën.”
Sènꞌòy umtanyak kalòw Yèsus nak Mèsias rik Allah napèrhod
25Nòm kerek nak maròp-maròp sènꞌòy rik umgèl-gel èn Yèrusalèm umcha-chal, “Doh udoh lah Sènꞌòy pemimpin èk umkèk untok mukèrbes Eh? 26Néh lah, Nanak hòj nachèl-chal èn mad sènꞌòy jajéh, tapik pemimpin èk tok umchèl-chal ilok-ilok pon ma Rik Nak. Ke umnak hòj umbèdlod Nanak nak kemën-kemën Mèsias rik Allah napèrhod nak? 27Tapik èk kenèmbek hòj èlèkh nòm lok Yèsus nak nalãj. Bok pastik lah Nanak kedak Mèsias, sebab bil Mèsias nak nalãj tok mok néy sènꞌòy pon namlèkh nòm lok nalãj!”
28Agat nak Yèsus tik nabetènglèkh èn Dékh Tuhan, dak Nanak naꞌèh-éh nòm kuy kènwad Eh, “Kemën nyob chal nak, hòj nyob kenal ma Yék, bok nyob lèkh nòm lok Yék ilãj. Tapik Yék tok ilèj-lãj dèꞌrik Yéh! Bok Nanak rik terèn-èn ma Yék nak kemën. Tapik nyob tok nyob kèlnal ma Rik Nak. 29Tapik Yék doh ikenal ma Rik Nak, sebab Yék ilãj nòm Rik Nak dak Rik Nak lah irik terèn-èn ma Yék.”
30Bil Yèsus nachal hal nak, mok ènsekh sènꞌòy èn anak rik umkerèngdakh muròt Eh. Tapik tok mok néy sènꞌòy pon dapad nampèk-pek ma Rik Nak, sebab tik tok nalèy-lòy mase eh untok muròt ma Rik Nak. 31Tapik mok keꞌjèk èn umnak jajéh sènꞌòy rik umpechaye ma Rik Nak. Dak umnak umchal, “Rik Nak pastik lah Mèsias! Mémang tok mèk-mok sènꞌòy mòy rik dapad namteꞌèl lebéh ibuk tande kuwase nòm Sènꞌòy doh!”
32Sènꞌòy Parisi umkeyòkh ilok rik sènꞌòy jajéh nak umchahor tentang Yèsus nak. Jadik mèn ketuwe imam Yahudi ròb sènꞌòy Parisi nak umꞌor ma polis rik umbejagak èn Dékh Tuhan supaye muròt ma Yèsus. 33Tapik Yèsus tik nachèl-chal wèl ma sènꞌòy jajéh nak, “Yék had agat hék igel samak nyob. Pas nak Yék akal ilos ma Nanak rik terèn-èn ma Yék. 34Nyob akal nyob kèk ma Yék, tapik tok nyob terèꞌbuk ma Yék, sebab nyob tok dapad nyomwèk ma tempad rik Yék igel nak.”
35Pemimpin sènꞌòy Yahudi umcha-chal kaban rik um, “Ma lok Sènꞌòy doh namwèk sampéy èk tok dapad èmtèrbuk ma Rik Nak? Ke namwèk ma sènꞌòy Yahudi rik umgèl-gel èn negara mòy? Mok ke namwèk bok nambetènglèkh ma sènꞌòy kaum kedak Yahudi? 36Ilok maksod eh nachal èk akal èmkèk ma Rik Nak, tapik tok èterèꞌbuk? Bok nahey Nanak nachal èk tok dapad èmwèk ma tempad rik Nanak nagel?”
Sènꞌòy rik umpechaye ma Yèsus akal umterime Ruway Kudus
37 #
Im 23:36. Hòj nalòy ma arik sèj-sòj Raye Dékh Nèmdep nak; unak lah arik rik paléng penting èn raye nak. Dak bil nak Yèsus nated dak naꞌèh-éh nòm kuy kènwad Eh ma sènꞌòy jajéh nak, “Chok rik besagòl, lãj lah ma Yék bok òng! 38#Yeh 47:1; Sak 14:8. Gerèk hòj natulis èn kelòj Kitab, ‘Chok rik pechaye ma Yék, nòm kelòj hup eh akal nahèg-hòg òng rik èg-og nèsgos.’” 39Bil Yèsus nachal tentang òng nak, maksod eh sènꞌòy rik umpechaye ma Rik Nak akal umterime Ruway Kudus. (Tapik bil nak Allah tèk-tik tok naꞌèg-og Ruway Kudus ma sènꞌòy, sebab Allah tèk-tik tok naperèhnéh kenèmbek kuwase ròb renayak Yèsus.)
Sènꞌòy jajéh umbera-rok tentang Yèsus
40Sènꞌòy jajéh umkeyòkh ma nèlchal Yèsus naꞌtèk. Dak mok èn umnak rik umcha-chal, “Kemën lah Sènꞌòy doh Nabi Rayak rik Musa nachal akal namlãj!”
41Mok sènꞌòy gèhnih rik chèl-chal, “Nanak nak Mèsias rik Allah napèrhod nak!” Tapik mok sènꞌòy mòy wèl rik umchèl-chal, “Hõy! Mèsias nak tok mungkin namlãj nòm tèk Galiliya nak! 42#2 Sam 7:12; Mi 5:1. Bok èn kelòj Kitab pon hòj mok natulis, Mèsias nak nalãj nòm waris Rajak Daud bok nòm Bètlehèm èn tèk Yudéya, tempad asal Rajak Daud nak.” 43Dak sèj-sòj eh sènꞌòy jajéh nak umbera-rok tentang Yèsus. 44Dak mok èn umnak rik umchèn muròt ma Yèsus, tapik tok mok chok-chok pon rik belamid nampèk-pek ma Rik Nak.
Pemimpin Yahudi umjèk tok umpechaye ma Yèsus
45Dak mèn polis nòm Dékh Tuhan naꞌtèk umlos ma mèn ketuwe imam ròb sènꞌòy Parisi. Dak mèn pemimpin Yahudi nak umtanyak, “Nahey nyob tok nyob èn-èn Yèsus nak ma doh?”
46Dak mèn polis nak umsaꞌod, “Tok mèk-mok chok-chok pon rik pernah nambecharak gerèk Rik Eh Nak!”
47Jadik sènꞌòy Parisi umgeleh ma umnak, “Ke Rik Nak hòj nasèꞌlok ma nyob keꞌjèk? 48Nòm kenèmbek pemimpin agama èk ròb kandék sènꞌòy Parisi, tok mèk-mok chok-chok pon rik nampechaye ma Rik Nak! 49Dak sènꞌòy jajéh rik umhèh-hoh ma Rik Nak tok umlèng-lèkh ilok-ilok tentang Hukom Tuhan nak. Pastik lah Allah namhukom ma umnak!”
50 #
Yoh 3:1,2. Dak anak Nikodimus, sènꞌòy Parisi rik nèng-nèng tòp nalãj bok natèrbuk ma Yèsus, nachal ma umnak kenèmbek, 51“Èn Hukom Tuhan, èk tok boléh èmtanas salah ma sènꞌòy kalòw tik tok èkèngyòkh nèng-nèng ma sènꞌòy nak supaye èmlèkh ma tènꞌèl sènꞌòy nak kemën atòw sèk.”
52Tapik umnak had umgeleh ma Nikodimus nak bok umsaꞌod, “Ke hãk nak sènꞌòy Galiliya keꞌjèk? Kèk lah èn kelòj Kitab bok akal hanéh: tok mèk-mok lah nabi rik namlãj nòm tèk Galiliya nak!”
ទើបបានជ្រើសរើសហើយ៖
Yohanès 7: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
Yohanès 7
7
Mèn pek Yèsus tok umpechaye ma Rik Nak
1Nòm kerek nak, Yèsus nachèb-chib ma lok-lok tèk èn Galiliya. Nanak najèk namwèk ma negerik Yudéya, sebab mèn pemimpin sènꞌòy Yahudi èn anak umchèn mukèrbes Eh.
2 #
Im 23:34; Ter 16:13. Bil nak hòj tèꞌlok namlèy-lòy ma arik raye Yahudi rik umdéh Raye Dékh Nèmdep.#7:2 Raye Dékh Nèmdep Néy raye rik paléng penting èn budaye sènꞌòy Yahudi nak. Umnak umsambud raye nak bil musim nègtòg, dak umbeꞌadés untok 7 arik. Mase umsambud nak, jajéh sènꞌòy Yahudi umkod tabak-tabak nòm jehuk bok umteꞌèl dékh nèmdep nòm tabak nak. Dak untok 7 arik nak umgel èn kelòj dékh nèmdep nak, bok umbelekh ma jènman anin tòp bil yak dòt bej kaum Israꞌèl umgel èn kémah èn pantil gurun. Bache wèl tentang raye doh èn bukuk Terènlos 16:13–15. 3Dak mèn pek Yèsus umchal ma Rik Nak, “Perak lah nòm doh dak wèk ma Yudéya, supaye mèn hèhoh Hãh nak dapad munéh ma tènꞌèl kuwase rik hateꞌèl nak. 4Kalòw Hãk hachèn hamjadik terkenal, tok boléh lah hakerèꞌdëk ilok rik hateꞌèl nak. Jadik kalòw Hãk boléh hamteꞌèl tènꞌèl kuwase gerèk nak, pèrnéh lah rik Hãh nak ma kenèmbek duniak!” 5Mèn pek Yèsus umchal gerèk nak sebab umnak irik um pon tok umpechaye ma Rik Nak.
6Yèsus nasaꞌod ma umnak, “Mase Yék tèk-tik tok nalèy-lòy. Tapik kalòw nyob nak, bil-bil pon boléh. 7Sènꞌòy èn duniak doh tok mèk-mok mucheꞌẽs ma nyob. Tapik umcheꞌẽs ma Yék, sebab Yék ichal tèꞌlalah ma umnak ilok rik umteꞌèl nak jehad. 8Jadik wèk lah nyob ma raye nak. Yék tok ihèh-hoh, sebab mase Yék tèk-tik tok nalèy-lòy.” 9Nòm kerek Yèsus nachal gerèk nak, Nanak pon nagel èn tèk Galiliya nak.
Yèsus nabetènglèkh èn Dékh Tuhan
10Tapik nòm kerek mèn pek Eh nak hòj umwèk ma raye nak, Yèsus pon nawèk ma nak. Tapik Nanak nawèk julak-julak, bok sènꞌòy mòy tok umlèng-lèkh. 11Èn raye nak mèn pemimpin sènꞌòy Yahudi umkèk-kèk ma Yèsus bok umtanyak, “Ma lok eh Sènꞌòy nak?”
12Dak sènꞌòy jajéh èn anak umchahor kaban rik um tentang Yèsus. Mok rik chèl-chal, “Rik Nak Sènꞌòy rik méj.” Dak mok sènꞌòy gèhnih rik chèl-chal, “Hõy! Nanak nak nasèꞌlok ma sènꞌòy jajéh.” 13Tapik tok mèk-mok néy sènꞌòy pon namlamid namchal tèꞌlalah tentang Yèsus nak, sebab umtukh ma mèn pemimpin sènꞌòy Yahudi nak.
14Bil hòj èn gagid minggu raye nak, Yèsus nawèk ma Dékh Tuhan dak natekèd nabetènglèkh èn anak. 15Pemimpin sènꞌòy Yahudi umbèlꞌih dak umtanyak, “Nanak nak tok pernah nabelajar nòm guruk agama èk. Bok rèk lok iNanak boléh nalèkh jajéh hal gerèk doh?”
16Yèsus nasaꞌod ma umnak, “Ilok rik itènglèkh ma nyob doh kedak nòm rik Yéh, tapik nòm Nanak rik terèn-èn ma Yék. 17Sènꞌòy rik kemën-kemën umchèn muteꞌèl nènchèn Allah, umnak akal umlèkh kalòw tenènglèkh idoh nalãj nòm Allah atòw had nòm rik Yéh. 18Sènꞌòy rik betènglèkh tenènglèkh nòm rik um had umkèrdakh supaye sènꞌòy muhormad ma rik umnak. Tapik Yék doh had ikèrdakh supaye sènꞌòy muhormad ma Allah rik terèn-èn ma Yék. Nak lah tande eh nèlchal idoh kemën bok tok ibesèꞌlok. 19Jadik nahey inyob bok nyomkèrbes ma Yék? Manah tòp Musa hòj naꞌog ma nyob Hukom Tuhan, tapik èn nyob doh tok mok chok-chok pon namhoh ma Hukom Tuhan nak!”
20Sènꞌòy jajéh nak umsaꞌod, “Hãk hòj hasid yel bok haꞌahyèny! Tok mok chok pon namkèrbes ma Hãk!”
21Yèsus nachal ma umnak, “Yék hòj ikèrjak bok iteꞌèl néy tènꞌèl kuwase èn Is Tenarak, dak nyob kenèmbek nyob bèlꞌih. 22#Im 12:3; Jen 17:10. Tapik nyob keꞌjèk nyob kèrjak èn Is Tenarak! Èn Hukom Tuhan, Musa naꞌor ma nyob nyomsunat ma kuwòt bèhbeh nyob bil umor um nalòy lapan arik. Yab èn Is Tenarak pon, nyob tik nyob sunat keꞌjèk. Che kènmën eh nak, adad sunat nak kedak nòm Musa, tapik nòm yak dòt bej èk rik mulak.#7:22 yak dòt bej èk rik mulak Manah tòp Allah nateꞌèl perènhod Eh samak Abraham bok napili waris Abraham nak untok mujadik kaum penili Allah (kaum Israꞌèl). Dak bil nak Allah naꞌor ma Abraham, Isak, Yakob, ròb kenèmbek waris um supaye musunat ma kenèmbek kuwòt bèhbeh umnak, gerèk tande umnak milik Allah. Unak lah adad agama Yahudi nak, tapik sènꞌòy nòm kaum mòy rik pechaye ma Yèsus tok perlu musunat. (Néh ma Kisah Tènꞌèl Mèn Rasul, bab 15). 23#Yoh 5:9. Jadik kalòw nyob nak boléh nyomsunat ma kuwòt bèhbeh nyob èn Is Tenarak untok nyomhoh ma Hukom Tuhan, nahey bok nyob õl ma Yék bil itèrhakh ma kenèmbek esik sènꞌòy rik jèk-jik èn Is Tenarak? 24Bok agok behakim ma Yék nòm ilok rik nyob néh nak hék, tapik bèdlod lah nèng-nèng bok hakim nòm ilok rik kènmën.”
Sènꞌòy umtanyak kalòw Yèsus nak Mèsias rik Allah napèrhod
25Nòm kerek nak maròp-maròp sènꞌòy rik umgèl-gel èn Yèrusalèm umcha-chal, “Doh udoh lah Sènꞌòy pemimpin èk umkèk untok mukèrbes Eh? 26Néh lah, Nanak hòj nachèl-chal èn mad sènꞌòy jajéh, tapik pemimpin èk tok umchèl-chal ilok-ilok pon ma Rik Nak. Ke umnak hòj umbèdlod Nanak nak kemën-kemën Mèsias rik Allah napèrhod nak? 27Tapik èk kenèmbek hòj èlèkh nòm lok Yèsus nak nalãj. Bok pastik lah Nanak kedak Mèsias, sebab bil Mèsias nak nalãj tok mok néy sènꞌòy pon namlèkh nòm lok nalãj!”
28Agat nak Yèsus tik nabetènglèkh èn Dékh Tuhan, dak Nanak naꞌèh-éh nòm kuy kènwad Eh, “Kemën nyob chal nak, hòj nyob kenal ma Yék, bok nyob lèkh nòm lok Yék ilãj. Tapik Yék tok ilèj-lãj dèꞌrik Yéh! Bok Nanak rik terèn-èn ma Yék nak kemën. Tapik nyob tok nyob kèlnal ma Rik Nak. 29Tapik Yék doh ikenal ma Rik Nak, sebab Yék ilãj nòm Rik Nak dak Rik Nak lah irik terèn-èn ma Yék.”
30Bil Yèsus nachal hal nak, mok ènsekh sènꞌòy èn anak rik umkerèngdakh muròt Eh. Tapik tok mok néy sènꞌòy pon dapad nampèk-pek ma Rik Nak, sebab tik tok nalèy-lòy mase eh untok muròt ma Rik Nak. 31Tapik mok keꞌjèk èn umnak jajéh sènꞌòy rik umpechaye ma Rik Nak. Dak umnak umchal, “Rik Nak pastik lah Mèsias! Mémang tok mèk-mok sènꞌòy mòy rik dapad namteꞌèl lebéh ibuk tande kuwase nòm Sènꞌòy doh!”
32Sènꞌòy Parisi umkeyòkh ilok rik sènꞌòy jajéh nak umchahor tentang Yèsus nak. Jadik mèn ketuwe imam Yahudi ròb sènꞌòy Parisi nak umꞌor ma polis rik umbejagak èn Dékh Tuhan supaye muròt ma Yèsus. 33Tapik Yèsus tik nachèl-chal wèl ma sènꞌòy jajéh nak, “Yék had agat hék igel samak nyob. Pas nak Yék akal ilos ma Nanak rik terèn-èn ma Yék. 34Nyob akal nyob kèk ma Yék, tapik tok nyob terèꞌbuk ma Yék, sebab nyob tok dapad nyomwèk ma tempad rik Yék igel nak.”
35Pemimpin sènꞌòy Yahudi umcha-chal kaban rik um, “Ma lok Sènꞌòy doh namwèk sampéy èk tok dapad èmtèrbuk ma Rik Nak? Ke namwèk ma sènꞌòy Yahudi rik umgèl-gel èn negara mòy? Mok ke namwèk bok nambetènglèkh ma sènꞌòy kaum kedak Yahudi? 36Ilok maksod eh nachal èk akal èmkèk ma Rik Nak, tapik tok èterèꞌbuk? Bok nahey Nanak nachal èk tok dapad èmwèk ma tempad rik Nanak nagel?”
Sènꞌòy rik umpechaye ma Yèsus akal umterime Ruway Kudus
37 #
Im 23:36. Hòj nalòy ma arik sèj-sòj Raye Dékh Nèmdep nak; unak lah arik rik paléng penting èn raye nak. Dak bil nak Yèsus nated dak naꞌèh-éh nòm kuy kènwad Eh ma sènꞌòy jajéh nak, “Chok rik besagòl, lãj lah ma Yék bok òng! 38#Yeh 47:1; Sak 14:8. Gerèk hòj natulis èn kelòj Kitab, ‘Chok rik pechaye ma Yék, nòm kelòj hup eh akal nahèg-hòg òng rik èg-og nèsgos.’” 39Bil Yèsus nachal tentang òng nak, maksod eh sènꞌòy rik umpechaye ma Rik Nak akal umterime Ruway Kudus. (Tapik bil nak Allah tèk-tik tok naꞌèg-og Ruway Kudus ma sènꞌòy, sebab Allah tèk-tik tok naperèhnéh kenèmbek kuwase ròb renayak Yèsus.)
Sènꞌòy jajéh umbera-rok tentang Yèsus
40Sènꞌòy jajéh umkeyòkh ma nèlchal Yèsus naꞌtèk. Dak mok èn umnak rik umcha-chal, “Kemën lah Sènꞌòy doh Nabi Rayak rik Musa nachal akal namlãj!”
41Mok sènꞌòy gèhnih rik chèl-chal, “Nanak nak Mèsias rik Allah napèrhod nak!” Tapik mok sènꞌòy mòy wèl rik umchèl-chal, “Hõy! Mèsias nak tok mungkin namlãj nòm tèk Galiliya nak! 42#2 Sam 7:12; Mi 5:1. Bok èn kelòj Kitab pon hòj mok natulis, Mèsias nak nalãj nòm waris Rajak Daud bok nòm Bètlehèm èn tèk Yudéya, tempad asal Rajak Daud nak.” 43Dak sèj-sòj eh sènꞌòy jajéh nak umbera-rok tentang Yèsus. 44Dak mok èn umnak rik umchèn muròt ma Yèsus, tapik tok mok chok-chok pon rik belamid nampèk-pek ma Rik Nak.
Pemimpin Yahudi umjèk tok umpechaye ma Yèsus
45Dak mèn polis nòm Dékh Tuhan naꞌtèk umlos ma mèn ketuwe imam ròb sènꞌòy Parisi. Dak mèn pemimpin Yahudi nak umtanyak, “Nahey nyob tok nyob èn-èn Yèsus nak ma doh?”
46Dak mèn polis nak umsaꞌod, “Tok mèk-mok chok-chok pon rik pernah nambecharak gerèk Rik Eh Nak!”
47Jadik sènꞌòy Parisi umgeleh ma umnak, “Ke Rik Nak hòj nasèꞌlok ma nyob keꞌjèk? 48Nòm kenèmbek pemimpin agama èk ròb kandék sènꞌòy Parisi, tok mèk-mok chok-chok pon rik nampechaye ma Rik Nak! 49Dak sènꞌòy jajéh rik umhèh-hoh ma Rik Nak tok umlèng-lèkh ilok-ilok tentang Hukom Tuhan nak. Pastik lah Allah namhukom ma umnak!”
50 #
Yoh 3:1,2. Dak anak Nikodimus, sènꞌòy Parisi rik nèng-nèng tòp nalãj bok natèrbuk ma Yèsus, nachal ma umnak kenèmbek, 51“Èn Hukom Tuhan, èk tok boléh èmtanas salah ma sènꞌòy kalòw tik tok èkèngyòkh nèng-nèng ma sènꞌòy nak supaye èmlèkh ma tènꞌèl sènꞌòy nak kemën atòw sèk.”
52Tapik umnak had umgeleh ma Nikodimus nak bok umsaꞌod, “Ke hãk nak sènꞌòy Galiliya keꞌjèk? Kèk lah èn kelòj Kitab bok akal hanéh: tok mèk-mok lah nabi rik namlãj nòm tèk Galiliya nak!”
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.