Yohanès 6
6
Yèsus nakalõn ma limak ribuk sènꞌòy dak naꞌog nèygéy
(Mat 14:13-21; Mrk 6:30-44; Luk 9:10-17)
1-4Hòj nòm kerek nak, bil hòj tèꞌlok namlèy-lòy ma Arik Paskah, arik raye sènꞌòy Yahudi nak, Yèsus nawèk ma lantiw Òng Pang Galiliya. (Mok keꞌjèk sènꞌòy umdéh òng pang nak Òng Pang Tibèriyas). Ma lok pon Yèsus nawèk, jajéh sènꞌòy umhoh ma Rik Nak, sebab umnak umnéh Yèsus nateꞌèl tande kuwase bok natèrhakh ma sènꞌòy rik umjèk-jik. Pas nak Yèsus natagoh ma tangkòl dak nagel èn anak samak mèn hèhoh Eh. 5Dak anak Yèsus nanéh jajéh geb sènꞌòy umla-lãj ma Rik Nak. Dak Yèsus nachal ma Pilipus, “Èn lok èk èmbelik nèygéy untok kenèmbek sènꞌòy doh mugéy?” 6Yèsus hòj nalèkh ilok rik Nanak akal nateꞌèl; had nachal gerèk nak untok namnéh ma pechaye Pilipus.
7Dak Pilipus nasaꞌod, “Kalòw kikèrjak lapan gechèk pon, tik tok tèdhad keꞌjèk untok kimbelik ruti ma kenèmbek sènꞌòy doh, yab tiyab sènꞌòy nak nadapad amès hék!”
8Dak mok néy hèhoh Yèsus rik mòy, kenëh eh nak Andréas, mèrpek Simon Pètrus. Andréas nak nachal, 9“Èn anuh mok néy sayẽd babeh; èn nanak mok limak panggel ruti#6:9 ruti Tèks asli Kitab: “ruti barli / jelay.” Barli nak menéh rik umteꞌèl tepong. ròb nar ikor kak. Tapik mar namtehad untok kenèmbek sènꞌòy doh?”
10Yèsus nachal, “Or lah umnak kenèmbek mugel.” Dak sènꞌòy jajéh nak pon umgel èn tèk. Èn anak mok ibuk rambang. Lènbéh umnak kirak-kirak limak ribuk bèhbeh.#6:10 limak ribuk bèhbeh. Had umkirak bèhbeh hék, tapik mok jajéh bèꞌbok ròb sèdyẽd èn anak keꞌjèk. 11Dak Yèsus nakod ruti nak dak nabeterime kaséh ma Allah. Pas nak nasér ma sènꞌòy jajéh rik umgèl-gel èn anak. Dak gerèk nak keꞌjèk Nanak nasér nar kak naꞌtèk, dak umnak kenèmbek umgéy sampéy sey. 12Bil kenèmbek sènꞌòy nak hòj umbehik, Yèsus nachal ma hèhoh-hèhoh Eh, “Chatuk lah ènsekh umgéy nak bok agok lah idéh.” 13Jadik umnak umchatuk ènsekh nòm limak panggel ruti rik umgéy naꞌtèk. Dak tik mok ibuk, sampéy umtèrbikh nar belas ragok!
14Bil sènꞌòy jajéh nak umnéh tande kuwase rik Yèsus hòj nateꞌèl nak, umnak umcha-chal kaban rik um, “Pastik Rik doh lah rik bargah èn Hukom Tuhan: Nabi Rayak rik akal namlãj bok namtulong ma èk!” 15Yèsus nalèkh sènꞌòy jajéh nak umchèn mulãj bok mutèrꞌòj Eh namjadik rajak ma umnak, yab Rik Nak najèk. Jadik Yèsus nawèk dèꞌrik Eh ma pok-pok.
Yèsus nachèb-chib èn riyap òng
(Mat 14:22-33; Mrk 6:45-52)
16Bil is eh hòj tèꞌlok nambelayèg, hèhoh-hèhoh Yèsus nak umwèk ma béng òng pang. 17Is eh hòj rengah, tapik Yèsus tèk-tik tok nalès-los ma umnak. Jadik mèn hèhoh Eh nak umꞌòj ma perahuk dak umbewa-wèk ma lantiw, ma kote Kapernaum. 18Bil nak natehòr kelibuy bok naꞌumbak kèlkeꞌũl. 19Mèn hèhoh Yèsus nak hòj umbekawéy kirak-kirak limak atòw enam kilomiter. Dak tok-tok umnak umnéh Yèsus nachèb-chib èn riyap òng nak bok nalãj tilok ma perahuk um. Umnak umtukh geb. 20Tapik Nanak nachal, “Agok tukh! Yék lah Yék.” 21Dak bil nak nòm enadés umnak umchèn Yèsus namꞌòj ma perahuk. Dak bil nak keꞌjèk tok-tok hòj umbeleh ma tempad rik umꞌampèk muwèk nak!
Sènꞌòy jajéh umkèk ma Yèsus
22-23Is jakal eh nak, sènꞌòy jajéh naꞌtèk tik umgèl-gel èn lantiw pang nak, èn tempad Tuhan Yèsus nabeterime kaséh ma Allah bok naꞌog ma umnak mugéy ruti is hatòp. Dak umnak umbelekh naꞌtèk nak perahuk rik èn anak had néy hék. Umnak umlèkh mèn hèhoh Yèsus nak hòj umkod perahuk nak, bok Yèsus tok nahèh-hoh samak umnak.
Nòm kerek nak, mok maròp-maròp perahuk mòy rik umlãj nòm kote Tibèriyas, dak umdol tilok ma tempad sènꞌòy jajéh nak. 24Jadik bil umnak umnéh Yèsus ròb hèhoh-hèhoh Eh hòj hõy tok mèk-mok èn anak, dak umnak pon umꞌòj ma perahuk nak dak umwèk ma kote Kapernaum untok mukèk ma Yèsus.
Yèsus lah ruti rik èg-og nèsgos
25Bil umlòy ma lantiw, sènꞌòy jajéh naꞌtèk umtèrbuk ma Yèsus. Dak umtanyak, “Guruk, bil Hãk habeleh ma doh?”
26Yèsus nasaꞌod ma umnak, “Kemën Yék ichal, nyob hòj nyob néh ma tande kuwase rik Yék iteꞌèl is hatòp nak, tapik nyob tok nyob kèk-kèk ma Yék sebab nyob lèkh ma maksod tande nak. Hõy, nyob doh had nyomkèk ma Yék sebab hòj itèrgéy ma nyob nyombehik! 27Tapik nèygéy èn duniak doh akal naseꞌung. Jadik agok lah kèrdakh had untok nyomdapad nèygéy gerèk nak. Kèrdakh lah nyomdapad nèygéy rik méj sampéy bilok-bilok bok naꞌog ma nyob nèsgos rik jalꞌéng. Yék, Sènꞌòy Nòm Sorga, boléh iꞌog ma nyob nèygéy rik kènmën nak, sebab Allah Apak hòj naꞌog hak nak ma Yék.”
28Dak umnak umtanyak ma Rik Nak, “Dak ilok Allah nachèn kandék kimteꞌèl?”
29Yèsus nasaꞌod, “Doh lah rik Allah nachèn nyob nyomteꞌèl: pechaye lah ma Sènꞌòy rik Allah hòj natèrꞌèn.”
30Dak umnak umchal wèl, “Pèrnéh lah tande supaye kandék kimnéh bok kimpechaye ma Hãk. Tènꞌèl kuwase ilok Hãk hamteꞌèl? 31#Her 16:4,15; En 78:24. Manah tòp, bil Musa napimpin ma yak dòt bej èk èn pantil gurun, umnak umgéy nèygéy rik umdéh ‘manna’#6:31 manna Nèygéy rik Allah nabèrtaw nòm sorga ma sènꞌòy Israꞌèl mase umnak umgel èn pantil gurun bok tok benèygéy um. Bil sènꞌòy Israꞌèl nak umnéh ma nèygéy nòm sorga nak, dak èn kuy Ibrani umnak umtanyak, “Manna?” rik bemaksod “Ilok che naꞌdoh?” Dak nòm kerek nak umdéh kenëh nèygéy nak “manna.” Cherite eh nak mok èn bukuk Herènwòl, bab 16. nak, gerèk hòj natulis èn kelòj Kitab: ‘Nanak naꞌog ma umnak ruti nòm sorga untok mugéy.’”
32Dak Yèsus nachal, “Kemën Yék ichal ma nyob, kedak Musa rik èg-og ruti nòm sorga nak ma nyob. Apak Yék lah irik èg-og ruti rik kènmën nòm sorga ma nyob. 33Ruti nòm Allah nak hòj nataw nòm sorga, bok Rik Nak lah irik èg-og nèsgos rik kènmën ma sènꞌòy èn duniak doh.”
34Dak umnak umsemany ma Yèsus, “Yãng, og lah lèjgéj ma kandék ruti nak!”
35Yèsus nasaꞌod, “Yék lah ruti rik èg-og nèsgos nak. Chok rik lèj-lãj ma Yék akal tok umchèꞌrok wèl, bok chok rik bepechaye ma Yék akal tok umbesagòl wèl sampéy bilok-bilok. 36Tapik gerèk Yék hòj ichal ma nyob: yab nyob hòj nyob néh ma Yék, tapik nyob tik tok nyob pechaye ma Yék!
37Kenèmbek sènꞌòy rik Apak naꞌog ma Yék pastik akal umlãj ma Yék, bok Yék tok ijèk-jèk ma chok-chok pon rik lèj-lãj ma Yék. 38Dak Yék itaw nòm sorga kedak imteꞌèl nènchèn rik Yéh, tapik Yék imteꞌèl nènchèn Apak rik natèrꞌèn ma Yék. 39Doh lah nènchèn Nanak rik terèn-èn ma Yék: nòm kenèmbek sènꞌòy rik hòj naꞌog ma Yék, tok mok néy sènꞌòy pon namruj. Bok Nanak nachèn Yék imtèrwòg wèl ma umnak bil sèj-sòj jakal. 40Dak Apak Yéh nachèn keꞌjèk kenèmbek sènꞌòy rik nèh-néh ma Kuwòt Eh bok umpechaye ma Yék akal umgos jalꞌéng. Dak bil nalòy ma arik rik sèj-sòj nak, Yék akal itèrwòg ma umnak.”
41Bil nak mok ènsekh sènꞌòy Yahudi èn anak umtekèd umꞌabad tentang Yèsus sebab Nanak hòj nachal, “Yék lah ruti rik nataw nòm sorga.” 42Dak umnak umcha-chal kaban rik um, “Yèsus doh had kuwòt Yusop nak! Èk hòj èkenal amèk ròb apak Eh. Bok rèk lok Nanak boléh namchal hòj nataw nòm sorga?”
43Yèsus nachal ma umnak, “Agok lah nyob abad gerèk nak. 44Apak Yék lah irik terèn-èn ma Yék. Tok mèk-mok chok-chok pon dapad namlãj ma Yék nòm nènchèn rik eh. Had kalòw Apak hòj nakèrjak èn kelòj hup sènꞌòy nak bok boléh nalãj ma Yék, dak bil ma arik sèj-sòj jakal Yék itèrwòg wèl ma sènꞌòy nak. 45#Yès 54:13. Gerèk hòj mok natulis èn kelòj kitab nabi nak: ‘Allah akal natènglèkh ma kenèmbek sènꞌòy.’ Kenèmbek sènꞌòy rik kèngyòkh ma Apak bok umbelajar nòm Rik Nak pastik akal umlãj ma Yék. 46Tapik tok mèk-mok néy sènꞌòy pon rik pernah nanéh ma Apak. Had Yék hék rik lèj-lãj nòm Allah, bok had Yék rik hòj nèh-néh ma Apak.
47Kemën Yék ichal ma nyob, kenèmbek sènꞌòy rik umpechaye ma Yék hòj mok nèsgos rik jalꞌéng. 48Yék lah ruti rik èg-og nèsgos nak. 49Yak dòt bej nyob umgéy manna rik Allah naꞌog ma umnak èn pantil gurun. Tapik sèj-sòj eh nak, umnak tik umkebes keꞌjèk, samak ma kenèmbek sènꞌòy. 50Tapik puꞌdoh ruti rik kènmën hòj nataw nòm sorga, supaye sènꞌòy rik gèy-géy akal tok umkèsbes. 51Yék lah ruti rik èg-og nèsgos nak: hòj itaw nòm sorga. Chok rik gèy-géy ruti doh bok naterime ma Yék akal nagos jalꞌéng sampéy bilok-bilok. Ruti nak esik Yéh doh, rik Yék akal iꞌog supaye sènꞌòy èn duniak doh boléh muterime nèsgos rik kènmën.”
52Nòm kerek nak sènꞌòy Yahudi naꞌtèk umbera-rok kaban rik um dak umchal, “Gerèk lok iSènꞌòy doh boléh namꞌog esik Eh untok èk èmgéy?”
53Dak Yèsus nachal wèl ma umnak, “Kemën lah Yék ichal ma nyob doh: Yék lah Sènꞌòy nòm Sorga, dak haros lah nyob géy esik Yék bok nyob òng lènlòt Yék. Kalòw hõy, nyob tok mèk-mok nèsgos rik kènmën. 54Chok rik gèy-géy esik Yék bok naꞌòng lènlòt Yék hòj mok nèsgos rik jalꞌéng, dak Yék akal itèrwòg wèl ma umnak ma arik sèj-sòj jakal. 55Sebab esik Yék nak nèygéy rik kènmën. Lènlòt Yék nak nèngꞌòng rik kènmën. 56Chok rik gèy-géy esik Yék bok èng-òng lènlòt Yék, umnak umgos èn Yék bok Yék pon mok èn umnak. 57Apak rik gès-gos hòj natèrꞌèn ma Yék, dak Yék pon igos nòm rik Apak. Gerèk nak keꞌjèk, chok rik gèy-géy esik Yék, akal umgos nòm Yék. 58Yék tok samak ma ruti rik yak dòt bej nyob umgéy nèng-nèng tòp nak. Umnak umgéy ruti nak, tapik umnak tik umkebes. Tapik Yék lah ruti rik tèw-taw nòm sorga, dak chok rik gèy-géy ruti doh akal umgos sampéy bilok-bilok.”
59Yèsus nachal kenèmbek hal naꞌtèk èn kote Kapernaum, mase Nanak nabetènglèkh èn dékh senindol sènꞌòy Yahudi.
Gah Tuhan rik èg-og nèsgos rik kènmën bok jalꞌéng
60Dak bil umkeyòkh ma tenènglèkh Yèsus naꞌtèk, jajéh hèhoh Eh umchal, “Susah geb ilok rik natènglèkh nak! Dak rèk lok boléh èmterime?”
61Yèsus nalèkh ilok mèn hèhoh Eh umꞌabad nak, dak Nanak nachal ma umnak, “Ke nyob kod hup ma tenènglèkh Yék naꞌtèk? 62Bok gerèk lok nyob nyomgahmak kalòw nyob néh ma Yék, Sènꞌòy Nòm Sorga, ilos iꞌòj wèl ma tempad asal Yék? 63Sènꞌòy tok dapad mugos nòm kènwad rik um. Had Ruway Kudus irik èg-og ma sènꞌòy nèsgos rik kènmën. Gah rik itènglèkh ma nyob atèk nalãj nòm Ruway Kudus bok naꞌog nèsgos. 64Tapik èn nyob mok rik tok pechaye ma Yék.” (Yèsus hòj nalèkh nòm mulak eh chok rik akal tok bepechaye, bok nalèkh chok rik akal nabetulong ma mèsmus Eh muròt ma Rik Nak.) 65Dak Rik Nak nachal wèl, “Unak lah sebab eh Yék ichal ma nyob, tok mok chok-chok pon dapad namlãj ma Yék nòm nènchèn rik eh. Had kalòw Apak hòj naꞌuy ma hup sènꞌòy nak bok boléh namlãj ma Yék.”
66Nòm kerek Yèsus nachal gerèk nak, jajéh hèhoh Eh umjèk tok umhèh-hoh wèl dak umperak Rik Nak. 67Dak Yèsus natanyak ma nar belas hèhoh Eh, “Ke nyob keꞌjèk nyob chèn nyomperak ma Yék?”
68 #
Mat 16:16; Mrk 8:29; Luk 9:20. Simon Pètrus nasaꞌod, “Hõy, Tuhan, ma chok wèl kandék kimwèk? Hãk lah irik betènglèkh gah rik èg-og nèsgos jalꞌéng! 69Dak kandék kipechaye bok kilèkh Hãk lah Rik Kudus nòm Allah!”
70Yèsus nasaꞌod, “Yék hòj ipili ma nyob nar belas hèhoh Yék. Tapik èn nyob doh mok néy kuli iblis.” 71Yèsus nachal nak tentang Yudas, kuwòt Simon Iskariot. Yab Yudas nak nòm nar belas hèhoh Yèsus, tapik nanak jakal natulong ma mèsmus muròt ma Yèsus.
ទើបបានជ្រើសរើសហើយ៖
Yohanès 6: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
