Yohanès 19
19
Umhukom Yèsus namkebes
1Bil nak Pilatus naꞌor ma mèn askah eh muꞌéd Yèsus bok muhemẽd. 2Mèn askah nak umchèrwèl tèmpok nòm jalak dak umtèrpok èn kuy Yèsus. Umnak umtèrlòg ma Rik Nak bajuk ungu gerèk nèglòg rajak, 3dak mayek-mayek umwèk ma Yèsus bok umgeleh, “Hormad lah ma rajak sènꞌòy Yahudi!” Dak umnak umlepag mad Eh.
4Pas nak Pilatus nahuwòl wèl dak nachal ma sènꞌòy Yahudi nak, “Néh lah! Yék akal iꞌéd Yèsus nahuwòl wèl ma nyob. Dak yék ichèn nyob nyomlèkh, yék tok iterèꞌbuk ilok-ilok salah pon nòm Rik Nak untok imhukom.” 5Dak bil Yèsus nahuwòl, tik benèglòg tèmpok bejalak ròb bajuk ungu, Pilatus nachal ma umnak, “Néh lah, udoh lah iRik Eh Nak!”
6Bil mèn ketuwe imam ròb polis Dékh Tuhan nak umnéh ma Yèsus, umnak umꞌèh-éh, “Kèrbes lah Rik Nak èn palok salib! Kèrbes lah Rik Nak èn palok salib!”
Tapik Pilatus nachal, “Éd lah rik nyob bok kèrbes Eh èn palok salib. Yék tok iterèꞌbuk ilok-ilok salah pon nòm Rik Nak!”
7Sènꞌòy Yahudi nak umsered, “Èn hukom agama kandék, Rik Nak haros namkebes! Rik Nak hòj nakòw rik ma rik Eh Kuwòt Allah!”
8Bil Pilatus nakeyòkh ma nèlchal umnak, rik nak lebéh natukh geb. 9Dak rik nak namòj ma kelòj istane wèl dak natanyak ma Yèsus, “Hãk nak habeꞌasal nòm lok?” Tapik Yèsus tok nabesaꞌod.
10Pilatus nachal, “Ke hajèk hamcharak ma yék? Belekh lah, yék mok kuwase untok imbébas ma Hãk atòw pon imkèrbes ma Hãk èn palok salib!”
11Yèsus nasaꞌod, “Hãk nak had mok kuwase hãh sebab Allah hòj naꞌog kuwase nak ma hãk. Kalòw hõy, hãk tok mèk-mok kuwase untok hamteꞌèl ilok-ilok pon ma Yék. Sebab nak, sènꞌòy rik èg-og Yék ma hãk dose eh lebéh rayak nòm dose hãk.”
12Nòm kerek nak, Pilatus nakèrdakh wèl nambébas ma Yèsus. Tapik kenèmbek sènꞌòy Yahudi èn anak umꞌèh-éh, “Chok rik kèw-kòw rik ma rik eh rajak, bemaksod nabelawan ma Rajak Rayak èn Roma. Kalòw hãk hambébas ma Rik Nak, hãk nak kedak habarkéy ma Rajak Rayak nak!”
13Bil Pilatus nakeyòkh ma nèlchal umnak, rik nak naꞌéd Yèsus ma béng, ma tempad rik bekenëh “Lantay Bebatuk.” Èn kelòj kuy sènꞌòy Yahudi nak kenëh eh “Gabata.” Èn anak, Pilatus nagel èn kerusi henakim eh.
14Bil nak tik umbesambud raye Paskah, dak is nak Arik Senèbyab, bil sènꞌòy Yahudi umbesèbyab untok Is Tenarak. Bil nak kirak-kirak ès-is. Pilatus nachal ma kenèmbek sènꞌòy Yahudi naꞌtèk, “Nak, udoh lah Rajak nyob!”
15Umnak umꞌèh-éh, “Cheleg lah Rik Nak! Cheleg lah Rik Nak! Kèrbes lah Rik Nak èn palok salib!”
Pilatus natanyak, “Nyob chèn ke yék imkèrbes ma Rajak nyob?”
Mèn ketuwe imam umsaꞌod, “Rajak kandék had Rajak Rayak èn Roma nak hék, tok mèk-mok rajak rik mòy!”
16Dak sèj-sòj eh Pilatus naꞌog Yèsus ma mèn askah eh untok mukèrbes èn palok salib.
Umkèrbes ma Yèsus èn palok salib
(Mat 27:32-44; Mrk 15:21-32; Luk 23:26-43)
Jadik mèn askah umkod Yèsus dak umꞌéd Eh nawèk. 17Yèsus nagulap palok salib rik Eh nahuwòl nòm kote nak. Umnak umwèk ma tempad rik bekenëh “Tempad Chawòng.” (Èn kuy sènꞌòy Yahudi nak umdéh tempad nak “Golgòta.”) 18Èn anak umnak umpehad pakuk ma Yèsus èn palok salib. Bok umpehad pakuk keꞌjèk ma nar sènꞌòy mòy èn palok salib rik wèh: néy sènꞌòy ènlẽng yèl, néy sènꞌòy ènlẽng tep, dak Yèsus èn gagid. 19Pilatus naꞌor sènꞌòy untok mupehad papan èn palok salib Yèsus nak rik hòj betènꞌèl: “Yèsus Sènꞌòy Nasarèt, Rajak sènꞌòy Yahudi.” 20Papan nak umteꞌèl èn kuy sènꞌòy Yahudi, kuy sènꞌòy Roma, ròb kuy sènꞌòy Yunani. Jajéh sènꞌòy Yahudi umbache papan nak sebab tempad umkèrbes ma Yèsus nak tok jèꞌrok nòm kote. 21Jadik mèn ketuwe imam Yahudi umꞌabad ma Pilatus, “Agok lah teꞌèl èn papan nak, ‘Rajak sènꞌòy Yahudi.’ Tulong lah tukar bok teꞌèl, ‘Sènꞌòy doh nachal rik ma rik Eh Rajak sènꞌòy Yahudi.’”
22Pilatus nasaꞌod, “Ilok rik hòj betènꞌèl nak yék tok ibetukar.”
23Hòj sòj mèn askah umpehad ma Yèsus èn palok salib, empad askah nak umkod kenèmbek nèglòg Eh dak umsa-sér kaban rik um. Umnak umkod keꞌjèk bajuk jèꞌrok Eh. Bajuk jèꞌrok Eh nak jenis rik tok benèrchòr, had nateꞌèl nòm néy léy abat hék. 24Askah-askah umcha-chal kaban rik um, “Agok lah tèrchèg bajuk doh. Jok lah èk èbes undi untok èmnéh chok rik bedapad eh.” Gerèk nak lah nabelakuk ilok rik natulis èn kelòj Kitab:#En 22:19.
“Umnak umsa-sér nèglòg Yék,
dak umba-bes undi untok bajuk Yék.”
Gerèk nak lah mèn askah umteꞌèl.
25Amèk Yèsus nated tilok ma palok salib Eh nak samak sakèy babok eh, Maria léh Klopas, ròb Maria Magdaléna. 26Bil Yèsus nanéh ma amèk Eh, bok nanéh keꞌjèk ma hèhoh Eh rik nasayèkh natèd-ted èn anak, Yèsus nachal ma amèk Eh, “Amèk, udoh lah kuwòt hãh!”
27Dak Yèsus nachal ma hèhoh Eh, “Udoh lah amèk hãh!” Jadik nòm kerek nak hèhoh nak naꞌéd ma amèk Yèsus namgel èn dékh rik nak.
Kènbes Yèsus
(Mat 27:45-56; Mrk 15:33-41; Luk 23:44-49)
28 #
En 69:22; 22:16. Nòm kerek nak, Yèsus nalèkh Rik Nak hòj natèrsòj kenèmbek kèrjak Eh. Jadik, supaye nambelakuk ilok rik natulis èn kelòj Kitab, Yèsus nachal, “Yék isagòl!”
29Èn anak mok néy tabol rik tebikh òng anggor bènychuny. Jadik néy sènꞌòy èn anak nachelok span ma kelòj òng anggor nak bok nachõk èn sòy ad,#19:29 ad Tèks asli: “ad hìsòp,” néy jenis rik lèn-lut nòm bèrher èn tèk Israꞌèl nak. dak najulok ma nyag Yèsus. 30Bil Yèsus hòj najõd òng nak, Rik Nak nachal, “Hòj sòj!”
Nòm kerek nak, Rik Nak nakel kuy Eh dak natèrsèk henèmhum Eh rik sèj-sòj.
Askah naketel ma Yèsus
31Is nak tik Arik Senèbyab, bok is jakal eh nak Is Tenarak rik penting geb sebab tik umbesambud Paskah. Dak mèn pemimpin Yahudi tok umchèn mok mayad èn palok salib bil Is Tenarak nak. Sebab nak, umnak umsemany ma Pilatus namꞌor ma askah mupèrleg jukh#19:31 mupèrleg jukh Sènꞌòy rik umpehad èn palok salib nak tik boléh umchët bok umhèm-hum, sebab mok pakuk rayak èn jukh um. Tapik kalòw umpèrleg jukh umnak, umnak tok boléh muchët bok muhèm-hum wèl. sènꞌòy rik umsalib naꞌtèk, supaye umnak mukebes géj bok boléh mubèrtaw mayad nak. 32Jadik mèn askah pon umwèk bok umpèrleg jukh wènar sènꞌòy rik umsalib samak Yèsus naꞌtèk. 33Tapik bil umnak umbeleh ma Yèsus, umnak umnéh Rik Nak hòj nakebes. Jadik, umnak tok umperègleg jukh Eh. 34Tapik mok néy askah naketel bulus ma cheres Yèsus, dak sejèkh lènlòt ròb òng nahuwòl dak nahor.
35-37Kenèmbek hal doh nabelakuk tehad gerèk ilok rik natulis èn kelòj Kitab: “Tok benéy pon nòm jeꞌang Eh mupèrleg.” #Her 12:46; Ken 9:12; En 34:21. Dak èn kelòj Kitab mok natulis keꞌjèk: “Umnak akal umnéh ma Rik Nak rik hòj umketel nak.” #Sak 12:10; Per 1:7. (Yék rik èg-oglèkh cherite doh hòj inéh ma hal nak nòm mad rik yéh. Jadik, yék ilèkh ilok rik ichal nak kemën. Dak yék iꞌèg-oglèkh gah doh supaye nyob keꞌjèk nyompechaye.)
Umkep mayad Yèsus
(Mat 27:57-61; Mrk 15:42-47; Luk 23:50-56)
38Dak mok néy hèhoh Yèsus rik bekenëh Yusop nòm Arimatéa. Yusop nak tok nabelamid namꞌoglèkh ma sènꞌòy mòy rik nak hèhoh Yèsus, sebab natukh ma mèn pemimpin Yahudi. Nòm kerek Yèsus hòj nakebes, Yusop nawèk ma Pilatus nasemany mayad Yèsus nak supaye namkep. Dak Pilatus nachal Yusop boléh nakod mayad Yèsus, jadik rik nak nawèk bok nakod mayad Eh nak. 39Nikodimus nawèk keꞌjèk samak Yusop. Nikodimus nak rik nèng-nèng tòp nalãj ma Yèsus dak nabecharak ma Rik Nak bil layèg. Rik nak naꞌèn chenèhruh rik chèsngẽs#19:39 chenèhruh rik chèsngẽs Tèks asli: “chenèhruh mur ròb gahruk.” untok namtèrlãm ma mayad nak, kirak-kirak tigak puloh kiloh.#Yoh 3:1,2. 40Wènar nak wèkod mayad Yèsus, dak wètèrlãm chenèhruh nak bok wèlat nòm abat méj-méj. Gerèk nak lah chare adad sènꞌòy Yahudi umkep sènꞌòy kèsbes. 41Tilok ma tempad umkèrbes ma Yèsus èn palok salib naꞌtèk, mok néy selay. Dak èn selay nak mok néy guwok kubor pay, rik tèk-tik tok umdèl-dol mayad sènꞌòy. 42Jadik, sebab kubor nak tilok, bok hòj namtèdkèd Is Tenarak#19:42 hòj namtèdkèd Is Tenarak Èn adad sènꞌòy Yahudi nak, Is Tenarak nak natekèd èn arik Jumaꞌat bil mad is hòj najelũd. Jadik umnak haros géj umkep mayad Yèsus, èn mad is tèk-tik tok najèdlũd. umnak, umnak pon umdol mayad Yèsus èn anak.
ទើបបានជ្រើសរើសហើយ៖
Yohanès 19: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
