Jenadik 30
30
Rahèl ròb Léya wèbekeradakh untok wèmdapad kuwòt nòm kuli wèh
1Bil Rahèl nabelekh rik eh nak tok boléh namkayod, rik nak natehak geb ma kelok eh. Rik nak nachal ma Yakob, “Og lah che yék imkènwòt. Kalòw hõy, lebéh méj ikebes hék!”
2Dak Yakob narok dak natèdchod ma Rahèl, “Yék doh kedak Allah! Nanak lah irik tok èg-og ma hãk hamdapad kuwòt.”
3Dak Rahèl nachal, “Nak, kod lah kuli yéh Bilhah dak selòg lah ma rik nak, supaye rik nak namyos kuwòt untok yék. Dak nòm rik nak lah akal idapad waris yéh.” 4Jadik Rahèl naꞌog kuli eh Bilhah nak ma Yakob namjadik léh eh, dak Yakob pon naselòg ma kuli eh nak. 5Dak Bilhah nakayod, dak nayos néy kuwòt babeh untok Yakob. 6Dak anak Rahèl nachal, “Allah hòj nateꞌèl adil ma yék, hòj nakeyòkh ma sènmany yéh bok naꞌog ma yék néy kuwòt babeh.” Unak lah isebab eh natèrjal kenëh kuwòt eh nak Dan.#30:6 Dan nak chëh eh gerèk nèlchal Ibrani rik bemaksod “Rik Nak nateꞌèl adil.” 7Pas nak Bilhah nakayod dak nayos wèl néy kuwòt babeh untok Yakob. 8Rahèl nachal, “Yék hòj ikèrdakh kuwad imtèrꞌap rik ma rik yéh nòm kelok inak, dak hòj imenang.” Sebab nak natèrjal kenëh kuwòt eh nak Naptali.#30:8 Naptali nak chëh eh gerèk nèlchal Ibrani rik bemaksod “Kerèndakh yék.”
9Bil nak Léya nabelekh rik eh nak hòj tok dapad namkayod wèl. Jadik rik nak naꞌéd kuli eh Silpah ma Yakob, dak naꞌog untok namjadik léh eh. 10Dak Silpah pon nakayod dak nayos néy kuwòt babeh untok Yakob. 11Dak Léya nachal, “Hal rik méj geb nabelakuk ma yék!” Sebab nak Léya natèrjal kenëh kuwòt eh nak Gad.#30:11 Gad Èn kuy sènꞌòy Ibrani, kenëh nak maksod eh “Hal rik méj geb.” 12Hòj nòm kerek nak, Silpah nayos wèl kuwòt babeh untok Yakob. 13Dak Léya nachal, “Yék iꞌadés geb! Puꞌdoh kenèmbek bèꞌbok akal umdéh yék iꞌadés.” Sebab nak natèrjal kenëh kuwòt eh nak Aser.#30:13 Aser Èn kuy sènꞌòy Ibrani, kenëh nak maksod eh “Adés.”
Léya nayos kuwòt eh rik mòy wèl
14Bil musim nègtòg gandum, Rubèn nawèk ma selay dak natèrbuk èn anak lènlut rik umdéh dudayim, rik bèꞌbok umgéy untok mukayod. Rik nak naꞌèn lènlut nak ma amèk eh Léya. Dak Rahèl nasemany ma Léya, “Og lah che yék amès lènlut rik kuwòt hãh natèrbuk nak.”
15Tapik Léya nasaꞌod, “Tok sèy-sey ke hakod tòw yéh nak? Dak ma lènlut kuwòt yéh pon hachèn hamkod keꞌjèk!”
Rahèl nachal, “Kalòw hãk haꞌog ma yék lènlut rik kuwòt hãh natèrbuk nak, hãk boléh haselòg samak Yakob layèg doh.”
16Bil lèngꞌakh nak, Yakob namak nòm selay ma dékh eh. Dak anak Léya nasambud ma rik nak bok nachal, “Hãk mestik haselòg samak yék layèg doh. Yék hòj ibayar untok hãk nòm lènlut dudayim rik kuwòt yék natèrbuk.” Jadik layèg nak Yakob naselòg samak Léya.
17Allah nasaꞌod ma pèntak Léya, dak rik nak nakayod dak nayos kuwòt babeh eh. Unak kuwòt rik kelimak Léya nayos untok Yakob. 18Dak Léya nachal, “Nèng-nèng tòp yék iꞌog kuli yéh Silpah ma tòw yéh namselòg. Dak puꞌdoh Allah hòj natèrlos naꞌog upah ma yék.” Sebab nak rik nak natèrjal kenëh kuwòt eh nak Isakar.#30:18 Isakar kenëh nak chëh eh gerèk nèlchal Ibrani rik bemaksod “Upah.” 19Dak Léya nakayod wèl dak nayos kuwòt babeh eh. Unak kuwòt rik keꞌenam Léya nayos untok Yakob. 20Léya nachal, “Allah hòj naꞌog ma yék hadiah rik méj geb. Puꞌdoh tòw yék akal nahormad yék, sebab yék hòj iyos enam kuwòt bèhbeh untok rik nak.” Sebab nak rik nak natèrjal kenëh kuwòt eh nak Sèbulòn.#30:20 Sèbulòn kenëh nak chëh eh gerèk nèlchal Ibrani rik bemaksod “Hormad.” 21Hòj nòm kerek nak, Léya nayos néy kuwòt babok rik natèrjal kenëh eh Dinah.
Rahèl nadapad kuwòt rik eh
22Allah tok nawèl-wel ma Rahèl. Rik Nak nakeyòkh bok nasaꞌod ma sènmany eh, bok naꞌog ma rik nak namkayod. 23Rahèl nakayod dak nayos néy kuwòt babeh eh. Dak Rahèl nachal, “Allah hòj natèrhõy penègyog yéh. 24Yék ipèꞌtak TUHAN namꞌog néy kuwòt babeh wèl ma yék.” Sebab nak rik nak natèrjal kenëh kuwòt eh nak Yusop.#30:24 Yusop kenëh nak chëh eh gerèk nèlchal Ibrani rik bemaksod “Naꞌog wèl.”
Yakob najadik kaye
25Nòm kerek Rahèl nayos ma Yusop, Yakob nachal ma Laban, “Or lah yék immak ma tempad jenòm yék bok ma tèk rik yéh. 26Bok og lah imꞌéd mèn léh yéh ròb mèn kuwòt yéh, rik hòj idapad sebab ikerèꞌjak untok hãk. Hãk halèkh hòj lamad yék ikerèꞌjak untok hãk, jadik puꞌdoh or lah yék immak.”
27Tapik Laban nasaꞌod ma rik nak, “Yék iseꞌëd ma hãk, tulong lah keyòkh ma yék nèng-nèng. Nòm halak yéh, yék ilèkh TUHAN hòj nateꞌèl méj ma yék sebab hãk mok èn anuh. Jadik tulong gel lah èn anuh samak yék. 28Chal hék maròp rik hãk hachèn, bok yék akal ibayar.”
29Yakob nasaꞌod, “Hãk irik halèkh gerèk lok yék hòj ikèrjak kuwad untok hãk, bok chok bènleh hãh hòj umbetabeh ibuk èn jenagak yék. 30Èn tèk-tik yék tok ilèj-lãj, harte milik hãh nak tok beꞌibuk, tapik puꞌdoh kenaye hãh hòj nabetabeh beduyon-duyon. TUHAN hòj nateꞌèl méj ma hãk nòm kenèmbek kèrjak yék. Tapik puꞌdoh hòj mase eh yék imkèrjak untok kewarge rik yéh.”
31Laban nachal, “Kalòw rèk nak, ilok rik haros yék imꞌog ma hãk?”
Yakob nasaꞌod, “Tok payah hamꞌog ilok-ilok. Had teꞌèl lah néy hal hék untok yék, bok akal yék igel anuh bok ijagak ma chok hãk. 32Néh lah, jenajéh lawok nak berègyug hék. Jadik arik doh or lah yék imchib imyèd-yad ma mèn kambikh ròb kambikh biri hãh nak, dak akal yék had ipèrmòy mèn lawok rik bechuchõg bok rik serawèjwãj. Bok ikod keꞌjèk mèn kuwòt kambikh biri rik barsog rèhngah. Had unak hék lah upah yék; kenèmbek lawok gèhnih tik iperak ma hãk. 33Dak ma sòy eh jakal hãk boléh halãj bok chèkh rik hãh ma lawok rik ikod untok upah inak, dak akal bok halèkh kalòw yék iteꞌèl kemën atòw hõy. Kalòw lah hanéh mok kambikh rik tok bechuchõg atòw tok beserawèjwãj, atòw kambikh biri rik tok rèhngah, hãk akal halèkh yék hòj iseyèj lawok nak.”
34Laban nasaꞌod, “Nak lah, yék isetujuk! Jok lah amteꞌèl ilok rik haꞌampèk nak.” 35Tapik bil arik nak keꞌjèk Laban napèrmòy kenèmbek kambikh beh rik umbechuchõg atòw serawèjwãj, ròb kenèmbek kambikh bok rik serawèjwãj, rik bechuchõg, bok rik berèlkèl. Rik nak keꞌjèk napèrmòy kenèmbek kuwòt kambikh biri rik barsog rèhngah. Dak rik nak naꞌor ma mèn kuwòt bèhbeh eh mujagak chok nak. 36Dak umwèk lah umnak samak lawok nak jerok nòm Yakob, nèbchib umnak tigak arik. Dak Yakob tik nabejagak ènsekh chok bènleh rik Laban naperak nak.
37Nòm kerek nak Yakob nakod tabak belaꞌer nòm tigak jehuk,#30:37 tigak jehuk, Tèks asli Kitab: jehuk hawar, jehuk badam, ròb jehuk berangan. Jenis jehuk nak tok mèk-mok èn anuh. dak nakèrbal chakob eh sampéy ma kelòj ad bègyug eh, najadik serawèjwãj. 38Rik nak nadol mèn tabak nak èn sòy mèn kambikh ròb kambikh biri nak, èn tempad nèngꞌòng um. Dak bil mèn kambikh nak umlãj untok muꞌòng, umnak umbemégség èn anak. 39Dak bil mèn kambikh nak umbemégség èn sòy mèn tabak nak, dak umnak umyos kuwòt um rik serawèjwãj, bechuchõg, bok berèlkèl. 40Dak Yakob napèrmòy kenèmbek kuwòt umnak nòm chok bènleh Laban nak.
Bil musim menégség um, Yakob keꞌjèk natèrwãr mèn kambikh nak munéh ma mèn kambikh rik serawèjwãj bok rik barsog rèhngah, dak umnak pon umyos kuwòt um gerèk nak. Dak gerèk nak lah Yakob natekèd natabeh ma chok bènleh rik eh, bok napèrmòy um nòm chok bènleh Laban nak.
41Bil mèn kambikh bok rik kèdwad umbemégség, Yakob nadol mèn tabak rik nakèrbal naꞌtèk èn sòy umnak, èn tempad nèngꞌòng um nak, supaye umnak umbemégség tilok ma tabak nak. 42Tapik bil lawok rik tok kèdwad umbemégség, Yakob tok nadèl-dol mèn tabak èn anak. Jadik kenèmbek lawok rik tok kèdwad nak umjadik anok Laban, dak kenèmbek lawok rik kèdwad umjadik anok Yakob. 43Sèj-sòj eh, Yakob najadik kaye geb bok mok ibuk chok bènleh eh: kambikh, kambikh biri, unta, ròb kelday. Dak mok keꞌjèk jajéh kuli eh, bèhbeh ròb bèꞌbok.
ទើបបានជ្រើសរើសហើយ៖
Jenadik 30: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.