Luŋ 6
6
Bʉə ndə bɔ̂ŋ nɔʼ bɛ́ŋ Nyii nɔʼ kwú ndəŋ ghʉəʼ-bʉ̂ʼʉ-kə, kə́ bɛ ŋɛnə mu Nyii
1Bʉʼʉ bu ghɔ̀ŋ mbuka ndʉʉmɛ? Bʉʼʉ bu kə́ chìi bʉ̂ʼʉ gɛ̀gɛ̀ mbɔ N̈yii kə́ bìʼ dʉ̀ʼ buuŋjyu yɔ́ŋyɔ́ŋ mɛ? 2I mə nə bɛ nɔ fɛ! Bəkɔ mbəŋ-yʉʼʉ ndə bʉʼʉ nɔʼ kwú ndə bʉ̂ʼʉ bʉ̀nə kə́ chí mu bʉ̂ʼʉ təka? 3Bii bɔŋ kínə mbɔ ndʉʉ ndə bʉʼʉ bənchəŋ kə fí muu, bʉʼʉ nɔ kə tùo bʉʼʉbə Klai Jiso ndə məbɛ fɔkə imɔʼ, məfì muu bɔŋleʼ chìi bʉʼʉ bɔŋ tùo ndəŋ kwu-i fe? 4Nɔ, ndʉʉ ndə bʉʼʉ kə fí muu, bʉʼʉ nɔ kə kwú, bə tyuu bʉʼʉbə Klai mɔʼɔ. Mbɔ haʼ ndə bə kə bʉ̀nə kóʼhə Klai ndəŋ kwú tíŋ hə bɔ̌ŋ fɔŋ kəghʉəʼ Nyii mbʉ Tie, bəkɔ mbəŋ-yʉʼʉ ghɔ kie məchímbi fefe.
5Bʉʼka mbɔ kaʼ bʉʼʉ nɔʼ tùo bʉʼʉ bɔŋ ndə ntɛ kwu-i, i nɔ dʉ̀ʼ mbɔ bʉʼʉ bu tùo ndə ntɛ məkoʼ-e ghɔ. 6Bʉʼʉ nɔ kínə mbɔ bə nɔʼ kə yí nduɔŋ wo ndə bʉʼʉ kə bɛ yɔŋ bʉʼʉbə Klai mɔʼɔ ndəŋ kətyʉntɔɔnə, mbɔ ghʉəʼkə ndə bʉ̂ʼʉ kə kie ndə məchimbi-yʉʼʉ chʉʼ bɛ njʉnjʉ, mbɔ bʉʼʉ mə leʼ bɛ fʉəhə tʉ bʉ̂ʼʉ fɛ. 7Bʉʼka ndʉʉ ndə wo kwú ghɔŋ Klai mɔʼɔ, təmə bə nɔʼ fyúhə tʉkə-i hə ndəŋ ghʉəʼ-bʉ̂ʼʉ-kə. 8Kaʼ bʉʼʉbə Klai nɔʼ kwú mɔʼɔ, təmə bʉʼʉ nɔ bɛ́ŋ mu fyii-bʉʼʉ mbɔ bʉʼʉ bɔŋ bu kie məchímbi mɔʼɔ. 9Bʉʼʉ nɔ kínə mbɔ Klai ndə ɔ nɔʼ kə kwú bʉ̀nə kóʼ, bieleʼ nə bìʼ kwú fɛ, təmə kwú bɔŋleʼ kie ghʉəʼkə ndə məgìe hə kətʉ-ɔ fɛ. 10Bʉʼka kwú ndə ɔ kə kwú, ɔ nɔ kə kwú hə ndə bʉ̂ʼʉ vɛʼ mɔʼ təmə bíe leʼnə kwú fɛ, ɔ nɔ tʉʼ chí mbi nduɔ ndə məyúnə ghɔŋ Nyii. 11Nɔ, mbəŋ-yii ghɔ nɔ lʉ̀ ŋwɔŋ-yii mbɔ bii nɔʼ kwú hə ndə ghʉəʼ-bʉ̂ʼʉ-kə, bɔŋ kə́ chí mbi ndə məyúnə biibə Nyii tíŋ hə bɔ̌ŋ Klai Jiso.
12Nɔ, bii kie ndə mə-leʼ-mɛ̀ʼtə bʉ̂ʼʉ kə́ sɔ́ʼ ŋkwê-mbʉə-yii ndə bəkɔ i kwú fɛ, ndə məchìi bii kə́ fɔ̀ʼ nubə ndə mbʉə-yii kʉ̀ʉ fɛ. 13Kə a mə mɛ̀ʼtə yəŋ-mbʉə-kə-a imɔʼ, i kə́ fɔ̀ʼ tʉ bʉ̂ʼʉ fɛ. Bii nɔ kie bə ndə məkɔ́ ŋwɔŋ-yii tʉ Nyii, ndə bʉə ndə bɔ̂ŋ nɔʼ kə kwú, bə bʉ̀nə kóʼhə bɔŋ, ndə məkie məchímbi, ké ŋwɔŋ-yii tʉ ɔŋ inchəŋ ndə mə-kə́-fɔ̀ʼ nubə ndə i bɛ ndyʉndyʉ. 14Bʉ̂ʼʉ bieleʼ kie ghʉəʼkə ndə məgìe hə kətʉ-bii fɛ, bʉʼka nuʼ-Nyii bieleʼ gìe hə kətʉ-bii fɛ, nɔ tʉʼ gìe bə buuŋjyu-Nyii nduɔ kətʉ-bii.
Bii nɔ bɛ fʉəhə ndə məfɔ̀ʼ nubə ndə i bɛ ndyʉndyʉ
15Bɛ ka ndʉʉmɛ? B̈ʉʼʉ kə́ chìi bʉ̂ʼʉ gɛ̀ nə shʉbə bʉʼka mbɔ nuʼ-Nyii bieleʼ gìe hə kətʉ-bʉʼʉ fɛ mɛ, bʉʼʉ kə́ bɛ bə tɔʼɔ buuŋjyu-Nyii mɛ? I mə nə bɛ nɔ fɛ. 16Bii kínə mbɔ kaʼ bii kɔ́ ŋwɔŋ-yii tʉ wo ndə məyʉ́ chu-i, təmə bii bɛ fʉəhə-i ndə məyʉ́ chu-i fe? Bəkɔ bii bɛ fʉə tʉ bʉ̂ʼʉ ndə i bu gwè nə kwu byuunɔ bii séʼ ndə məyʉ́ chu-Nyii ndə i bu chìi bii tə́nə ndyʉndyʉ. 17Bɔŋ ndɔ tʉ Nyii! Bʉʼka bii nɔ kə fəŋ bɛ fʉəhə tʉ bʉ̂ʼʉ, bii bɔŋ nɔʼ yʉ́ shʉəŋ nə fyiihə-ii inchəŋ te nubə inchəŋ ndə bə kə dàhə bii nə yɔŋ bɔŋleʼ kɔ́ tʉ bii. 18Bə nɔʼ kə chʉ̀ʼ tʉkə-ii hə ndəŋ bʉ̂ʼʉ, b̈ii bɛ fʉəhə nduɔ ndə məbɛ ndyʉndyʉ tʉ Nyii.
19Mɔ nɔ tʉʼ kwə́ʼ ndə yɔ̄ŋ-yə ntɛ kwə́ʼ njʉnjʉ-ɔ̄ bʉʼka məlʉʉtə-mbʉə-woməsʉʉ-yii, kə́ lʉ̀ fʉʼkənu ndə fʉəhə ghɔŋbə bətiefɔʼɔ bʉʼka i nɔ bu yùhə tʉ bii ndə məkínə. Bii nɔ kə́ fəŋ ké ŋwɔŋ-yii ndə məbɛ fʉəhə ndə nu-nyàatəŋwɔŋ-bə leʼnə nu-bʉəbʉə-bə ndə i nə kə́ dùu bii gɛ̀ nə yɔŋ mu bʉ̂ʼ-yɔ́ŋyɔ́ŋ-tə. Nɔ bɛ haʼ nɔ ndə bii kie ndə məké ŋwɔŋ-yii nduɔ ndə məbɛ fʉəhə ndə nubə ndə i bɛ ndyʉndyʉ tʉ Nyii ndə i bu dùu bii ndə məbɛ ŋkʉʉ yɔ́ŋyɔ́ŋ.
20Ndʉʉ ndə bii kə bɛ fʉəhə ndəŋ bʉ̂ʼʉ, təmə bii leʼ kie ndə məbɛ ndyʉndyʉ fɛ. 21Bɔŋ sii-yii kə bɛ ka ndə mə-kə́-fɔ̀ʼ mbʉ bənu ndə i bɛ tʉvyiikə nduɔ tʉ bii? Lɔʼɔ-mbʉ-bənu-maa-bə-ɔ̄ŋ nɔ bɛ kwu. 22Bɔŋ nduɔ ndə bə nɔʼ chʉ̀ʼ tʉkə-ii ndəŋ bʉ̂ʼʉ, bii bɛ fʉə-Nyii-hə, sii-yii nduɔ nɔ bɛ mbɔ bii bu bɛ ŋkʉʉ shʉ-ɔ ndə i bu kɔ́ məchímbi tʉ bii təmə liʼ-i ghɔ fɛ. 23Lɔʼɔ-bʉ̂ʼʉ-bə nɔ bɛ kwu, bɔŋ kɔ-Nyii-kə kə́ bɛ məchímbi təmə liʼ-i ghɔ fɛ ndə ĩ gwè tíŋ hə bɔ̌ŋ Klai Jiso Tiekətʉ-yʉʼʉ.
ទើបបានជ្រើសរើសហើយ៖
Luŋ 6: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
