Luŋ 4
4
Məmɔ̀ʼfyii ndə Ablahaŋ kə mɔ̀ʼ ndəŋ Nyii
1Bʉʼʉ bu ghɔ̀ŋ mbuka ndʉʉmɛ te Ablahaŋ tieŋgwie-yʉʼʉ, bɛ ka ndə ɔ kə nyíɛ te məmɔʼfyii-ɔ̄ ndəŋ Nyii? 2Bʉʼka mbɔ kaʼ Ablahaŋ kʉ̌ʉ kə bɛ ndyʉndyʉ tʉ Nyii bʉʼka fɔʼɔ, təmə ɔ nɔ kə kie nukə ndə məkwɛ̀ŋ fyii-i chɔ. Təmə ɔ bɔŋ kə kie nubɛʼkə ndə məkwɛ̀ŋ fyii chɔ shʉ-Nyii fɛ. 3Ŋwɔʼnə Nyii ghɔ̀ŋ mbuka? “Ablahaŋ nɔ kə mɔ̀ʼfyii-i ndəŋ Nyii, bə súu yie ɔ mbɔ ɔ la tə́nə ndyʉndyʉ tʉ ɔŋ.”
4Nduɔ, w̃o nɔ fɔ̀ʼ fɔʼɔ nɔ, fɔkə ndə bə kɔ́ tʉ ɔŋ, bə mə tíi nə kɔkə fɛ, bə tíi nə lɔʼɔbə. 5Bɔŋ b̃ə nɔ bɛ́ŋ bʉə ndə məbɛ ndyʉndyʉ tʉ Nyii, bə bʉʼka fɔʼɔ-yʉə fɛ, ĩ bɔŋ nɔ bɛ bʉʼka məmɔ̀ʼfyii ndə bɔ̂ŋ mɔ̀ʼfyiihə-ʉə ndəŋ Nyii ndə ɔ̃ sʉ̀fyii hə ndəŋ bʉ̂ʼ-bʉə-tə.
6Dɛbi ghɔ nɔ kə buŋ kwə́ʼ te haʼ nukə-ɔ̄ŋ, ndʉʉ ndə ɔ kwə́ʼ te tʉʉjyu ndə w̃o kie bʉʼka mbɔ Nyii bɛ́ŋ ɔŋ mbɔ ɔ bɛ ndyʉndyʉ tʉ ɔŋ, kə́ bɛ bʉʼka fɔʼɔ-ɛ fɛ.
7“Tʉʉjyu nɔ bɛ yi-bʉə-yə ndə bə nɔʼ sʉ̀fyii hə ndəŋ nu-bʉəbʉə-bə-ʉə,
ndə bə nɔʼ kíahə shʉ hə ndəŋ bʉ̂ʼtə-ʉə.
8Tʉʉjyu nɔ bɛ yi-wo-yə ndə Tiekətʉ gòʼ təmə kə́ súu bʉ̂ʼʉ-e kətʉ-ɔ fɛ.”#4:8 Ŋwɔʼnə təLyuu 32:1-2.
9Nduɔ, tʉʉjyu-ɔ̄ bɛ haʼ tʉ bʉə-Juu mɛ? Byuunɔ, kə i bɛ tʉ bʉə ndə bɔ̂ŋ gòʼ təmə bɛ bʉə-Juu ghɔ fɛ? Bʉʼʉ nɔ tʉʼ ghɔ̀ŋ mbɔ Nyii nɔ kə bɛ́ŋ Ablahaŋ ndə məbɛ ndyʉndyʉ tʉ ɔŋ bʉʼka ɔ kə mɔ̀ʼfyii-i ndəŋ ɔŋ. 10Nyii kə bɛ́ŋ ɔŋ ndʉʉka? I kə bɛ, bə buŋ fɔ̀ʼ ɔ mɛ, mɛ kə, kə bɛ tʉ bə nɔʼ fɔ̀ʼ ɔ tə i tíŋ? I nɔ kə bɛ bə buŋ fɔ̀ʼ ɔ. Kaa vɛʼ ndə bə nɔʼ fɔ̀ʼ ɔ tə i tíŋ fɛ.
11Bə nɔ kə fɔ̀ʼ ɔ ndə cheʼkə ndə mədʉ̀ʼ mbɔ bʉʼka məmɔʼfyii-i, Nyii nɔʼ bɛ́ŋ ɔŋ mbɔ ɔ nɔ bɛ ndyʉndyʉ. Luu-i nɔ kə bɛ mbɔ ɔ̈ chʉʼ bɛ tie-bʉə-bənchəŋ ndə bɔ̂ŋ mɔ̀ʼfyiihə-ʉə ndəŋ Nyii təmə bə fɔ̀ʼ bɔŋ fɔ̀ʼ fɛ, mbɔ bə chʉʼ súu bɔŋ ghɔ ndə məbɛ ndyʉndyʉ tʉ Nyii. 12Ɔ nɔ bɛ tie-bʉə ndə bə nɔʼ fɔ̀ʼ bɔŋ ghɔ, təmə bɛ haʼ mbɔ b̈ə fɔ̀ʼ bɔŋ fɔ̀ʼ fɛ, bɔŋ bə ndə bɔ̂ŋ tə́nə ndəŋ wukə ndə Ablahaŋ nə tə́nə chɔ, kə́ mɔ̀ʼfyii-i ndəŋ Nyii bə buŋ nə fɔ̀ʼ ɔ.
13Bʉʼka ŋkɔʼnə-Nyii tʉ Ablahaŋ ghɔŋbə ŋgwie-wo-e mbɔ ɔ bu yi yú wʉʉnəmbikə inchəŋ, kə gwè bʉʼka ɔ kə tʉ́ʼ bə nuʼ-Nyii fɛ, i nɔ kə gwè bʉʼka məmɔʼfyii-i ndəŋ Nyii ndə i chìi ɔ bɛ ndyʉndyʉ shʉ-ɔ. 14Bʉʼka, kaʼ ŋkɔʼnə-Nyii kə gwè tʉ bʉə ndə bɔ̂ŋ tʉ́ʼ nuʼ-Nyii ndə bɔ̂ŋ kie ndə məbɛ njuhə, i nɔ dʉ̀ʼ mbɔ məmɔ̀ʼfyii ndəŋ Nyii kie nukə ndə məchìi fɛ, təmə mbʉ ŋkɔʼnə bɔŋleʼ kie nukə ndə məfɔ̀ʼ fɛ. 15Bʉʼka ñuʼ Nyii nɔ gwè nə tʉʉbʉə-Nyii ndəŋ bʉə ndə bɔ̂ŋ tʉʼ kɔ̀ɔtə ndə mətʉ́ʼ mbʉ nuʼ, bɔŋ yəŋkə ndə nuʼ gòʼ təmə bɛ chɔ fɛ, mə bə́ʼ nuʼ mə bɛ chɔ fɛ.
16Nɔ, mbʉ ŋkɔʼnə nɔ kə gwè tíŋ hə bɔ̌ŋ məmɔ̀ʼfyii ndəŋ Nyii, mbʉ ŋkɔʼnə chʉʼ bɛ kɔ-Nyii-kə ndə i gwè hə ndəŋ buuŋjyu-i tʉ vâa-Ablahaŋ bənchəŋ ndə kɛŋ bɛ yʉə-yə shʉəŋ. I kaa bə haʼ tʉ bʉə ndə nuʼ-bʉə-Juu kə bɛ tʉ bɔŋ fɛ, bɔŋ tʉ bʉə ndə bɔ̂ŋ kə mɔ̀ʼfyiihə-ʉə ndəŋ Nyii ghɔ haʼ ndə Ablahaŋ kə chìi. Bʉʼka Ablahaŋ nɔ bɛ tie-bʉə-bənchəŋ ndə bɔ̂ŋ mɔ̀ʼfyii-ʉə ndəŋ Nyii, 17mbɔ haʼ ndə ŋwɔʼnə-Nyii ghɔ̀ŋ mbɔ, “Mɔ nɔʼ chìi a ndə məbɛ tie lɔʼ-bətə̂ŋ-tə buŋmbi.” Ɔ nɔ bɛ tie-yʉʼʉ hə bəshʉ, bʉʼka ɔ nɔ nə mɔ̀ʼfyii-i ndəŋ ɔŋ Nyii, ndə ɔ̃ bʉ̀nə kóʼhə bʉə ndə bɔ̂ŋ nɔʼ kwútə, Ñyii ndə ɔ kàhə nə ŋgie-chu-kə-i, fɔbə ndə i gòʼ təmə bɛ ghɔ fɛ, bɛ ghɔ.
18Ablahaŋ nɔ kə bɛ́ŋ Nyii bɔŋleʼ yʉ́əʼnə ndəŋ nukə ndə ɔ kə gìe, buŋ ndʉʉ ndə luu kə gòʼ təmə bɛ ghɔ tʉ ɔŋ ndə məyʉ́əʼnə chɔ fɛ, nɔ, ɔ kia bɛ tie-lɔʼ-bətə̂ŋ-tə buŋmbi. Haʼ ndə ŋwɔʼnə-Nyii kə ghɔ̀ŋ mbɔ, “Ŋgwie-wo-a bu yi yɔ́ŋ tə bɛ nə bəlɔʼɔ-yuo.” 19I kə chìi məmɔʼfyii-i ndəŋ Nyii buŋ ghʉ́ə fɛ, ndʉʉ ndə ɔ kə lɛ́nə ŋwɔŋ-ɛŋ mbɔ ɔ nɔʼ dùɔŋ tə bɛ ndə məkwú bʉʼka ɔ nɔʼ kə dàa ŋgʉʼhə ghyʉʉ byuunɔ lɛ́nə Sala vi-i ndə ɔ bɛ kə dəŋ fɛ.
20Ɔ kə kie tʉ-kwú-kə te mbʉ ŋkɔʼnə ndə Nyii kə kɔ́ tʉ ɔŋ fɛ, bɔŋ məmɔʼfyii-i ndəŋ Nyii bìʼ shʉ́əshʉ́ə ndə ɔ kɔ́ kuŋhə tʉ Nyii. 21Ɔ nɔ kɛŋ kə kínə mu fyii-ɔ jyujyu mbɔ Nyii nɔ kie ghʉəʼkə ndə məfɔ̀ʼ nukə ndə ɔ nɔʼ kɔ̀ʼnə tʉ ɔŋ. 22Nɔ bɛ luu-i nɔ ndə Nyii kə bɛ́ŋ məmɔ̀ʼfyii Ablahaŋ mbɔ ɔ bɛ ndyʉndyʉ tʉ ɔŋ. 23Bɔŋ ndə məghɔ̀ŋ mbɔ, “Bə nɔ kə bɛ́ŋ ɔŋ ndə məbɛ ndyʉndyʉ tʉ Nyii,” bə kə nyɔ̀ʼ haʼ tʉ mbəŋ-ɛŋ tətɛʼ ɔ fɛ, 24bə nɔ kə nyɔ̀ʼ ghɔ tʉ bʉʼʉ. Bə bu súu bʉʼʉ ghɔ ndə məbɛ ndyʉndyʉ ndə bʉʼʉ mɔ̀ʼfyiihə-ʉʼʉ ndəŋ ɔŋ ndə ɔ kə bʉ̀nə kóʼhə Jiso Tiekətʉ-yʉʼʉ ndʉʉ ndə ɔ kə kwú. 25Bʉʼka bʉ̂ʼtə-ʉʼʉ, bə nɔ kə kɔ́ ɔ ndə məkwú, bə bʉ̀nə kóʼhə ɔŋ mbɔ ɔ chʉʼ chìi bʉʼʉ bɛ ndyʉndyʉ tʉ Nyii.
ទើបបានជ្រើសរើសហើយ៖
Luŋ 4: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
