Mak 13
13
Jiso kwə́ʼ te məkuu-njaafɛ̀ʼndɛŋNyii ndʉʉ-i buŋ yi kʉ̀ʼnə
(Matia 24:1-44; Luk 21:5-33)
1Ndʉʉ ndə Jiso kə́ fyú hə mu njaafɛ̀ʼndɛŋNyii, mbyu vaafɔ̀ʼ-ɛ gìe tʉ ɔŋ mbɔ, “Chicha, nyíɛ ka mbʉətə ŋgoʼbɛʼhə nyíɛ ghɔŋbə mbʉətə njaabɛʼhə!” 2Bɔŋ Jiso ghɔ̀ŋ tʉ ɔŋ mbɔ, “A nyíɛ bəlɔkɔʼɔ njaahə-ɔ̄ŋ mɛ? Mbyu ŋgoʼ kʉ̂ʉ yi káa liɛŋ liŋ-iŋ chɔ təmə bə kùu mɛ̀ʼ sê fɛ.”
3Ndʉʉ ndə Jiso kə dùʼ ndəŋ Kwɔŋ-bəTyʉ-Oli ndə i bə̀ŋhə njaafɛ̀ʼndɛŋNyii, Bita, Jɛŋ, Jɔŋ leʼnə Andolo gwè tʉ ɔŋ bɔ̌ŋbɔ̌ŋ kə́ bíʼtə mbɔ, 4“Shyíi baʼa, bɛ ndʉʉka ndə nubə-ɔ̄ŋ inchəŋ bu yi fyú chɔ, leʼnə ntɛ kəcheʼ ndə i bu yi dʉ̀ʼ?” 5Jiso chʉ́ʉhə məghɔ̀ŋ tʉ bɔŋ mbɔ, “B̈ii láa mbɔ wo mə yi fə́ʼhə bii fɛ. 6Bʉə buŋmbi bu yi gwè yie-mɔ, kə́ ghɔ̀ŋ mbɔ, ‘Mɔ nɔ bɛ mbəŋ-ɛŋ,’ bɔ̂ŋ bu fə́ʼhə bʉə buŋmbi. 7Ndʉʉ ndə bii yʉ́ chɔ̂tə ghɔŋbə nchyʉhə-chɔ̂-mə, kə i mə chɔ́ŋhə bii fɛ. Nubə-ɔ̄ŋ nɔ kie ndə məfyú sê, təmə bɔŋ nɔʼ bɛ bə mə lìʼ mbi fɛ. 8Bʉʼka lɔʼ-bətə̂ŋ-tə bu lɔ̀ tə́nə ghɔŋbə bəbɛʼbə lɔʼ-bətə̂ŋ-tə, bəfɔŋ bətə̂ŋ bu lɔ̀ tə́nə ghɔŋbə bəbɛʼbə bəfɔŋ bətə̂ŋ. Chisêkə bu ŋʉ̀ʼnə bəyəŋbəyəŋ, chyʉʉ bu gwù mbi. Nubə-ɔ̄ŋ nɔ bɛ haʼ nchʉʉhə-kəyɔʼ-Nyii ndə ĩ byùu woke. 9Bɔŋ b̈ii láa, bʉʼka bə bu yátə bii gɛ̀ nə bii mu bəkaŋsotə, bə bu gwúu bii mu-njaagháaNyii-hə, bə bu lʉ̀ bii gɛ̀ nə bii bəshʉ bəgɔməna ghɔŋbə bəfɔŋ bʉʼka mɔ, ndʉʉmɛ, bəkɔ bii lɔ̀ʼ ntəŋjyujyu tʉ bɔŋ. 10Bə nɔ kie ndə mə-fəŋ-lɔ̀ʼ ntəŋjyujyu tʉ lɔʼ-bətə̂ŋ-tə inchəŋ. 11Ndʉʉ ndə bə lʉ̀ bii mu njaafɛ̀ʼ, ndə məchɔ̀ʼhə bii kɔ́, kə bii mə kə́ kwɔ̀ʼtə te nukə ndə bii bu gìe fɛ, b̈ii gìe bə nukə ndə bə bu kɔ́ tʉ bii ndʉʉmɛ, bʉʼka tʉʼ kwə́ʼ yá mbəŋ fɛ, bɔŋ nɔ tʉʼ kwə́ʼ LyʉʉhəNyiikə. 12Bəliŋ bu chɔ̀ʼhə bəliŋ-bʉə, kɔ́ b̈ə yi, tie-vaa chɔ̀ʼhə vaa-ɛ, kɔ́ b̈ə yí, vâa bu dʉ̀ʼ ghɔbə-ʉə chu bətie-bʉə chɔ̀ʼhə bɔŋ, kɔ́ b̈ə yí. 13Bʉə bənchəŋ bu bàa bii bʉʼka bii mɔ̀ʼfyiihə-ii ndəŋ mɔ. Bɔŋ wo ndə ɔ lyʉ̀ʉtə́nə tə gɛ̀ dàa ndə liʼ-i bu kie ŋkwaaNyii.
14 “Bɔŋ ndʉʉ ndə bii bu nyíɛ nu-ŋkwɔŋŋkwɔŋ-kə ndə i bʉ́əhə njaa-Nyii kə́ tə́nə kəyəŋ ndə i gòʼ təmə kie ndə məbɛ chɔ fɛ nɔ, (ẅo ndə ɔ tʉʼ tíi ŋwɔʼnə-ɔ̄ŋ kínə), ndʉʉ ndə yɔ̄ŋ-yə fyú sê ndʉʉmɛ, b̈ʉə ndə bɔ̂ŋ bɛ mu Judia nyʉ́ʉ kóʼ ndəŋ kwɔŋhə. 15Wo ndə ɔ bɛ kətʉ njaa#13:15 Bʉə-Juu nɔ nə kə́ bɔŋ njaahə-ʉə nɔ bɔ̂ŋ mɔ̀ʼ ghɔ̂ʼ chɔ, lyʉ́ʉ tʉkə-i nə chiabə təmə kwɛ̀ŋkwɛ̀ŋ fɛ. Chìi yuhəbə mbi ndə məkóʼ gɛ̀ kətʉ ghɔ. kə ɔ mə shíʼ sê fɛ, kə ɔ mə sʉ́ʉ mu njaa-ɔ ndə məlʉ̀ fɔkə təmiyɔŋ fɛ, 16kə wo ndə ɔ bɛ mutɔ mə leʼ bʉ̀nə chunjaa ndə məlʉ̀ ndyihə-i fɛ. 17I bu nə tɛ̀nə tʉ bəke gʉʼnə ghɔŋbə bəke ndə bɔ̂ŋ tʉʼ nyùuhə vâa ndəŋ chî-ghɔ̄-bə. 18B̈ii gháaNyii mbɔ i mə yi bɛ ndəŋ shyʉʉ-fəʼə fɛ. 19Bʉʼka bu yi bɛ chî-ghɔ̄-bə nɔ, bʉə nyíɛ ŋgʉəʼ təmə ntɛ-ɛ nɔʼ nə bɛ ghɔ fɛ, lʉ̀ hə ndəŋ ŋgwunə-mbi ndə Nyii nə chìi wʉʉnəkə tə gwè dàa laa təmə bɔŋ-bu-leʼnə bɛ ghɔ fɛ. 20Kaʼ Tiekətʉ kʉ̌ʉ kə gòʼ təmə nɔʼ shùʼtə chî-ghɔ̄-bə fɛ, təmə mbyu woməsʉʉ imɔʼ nə bìi fɛ. Bɔŋ bʉʼka bʉə ndə ɔ nɔʼ kə séʼ bɔŋ, ɔ nɔʼ shùʼtə mbʉ bəchî.
21 “Bɔŋ kaʼ wo gìe tʉ bii ndʉʉghɔfii mbɔ, ‘B̈ii nyíɛ! Mbʉ Wo ndə Nyii Kùŋ Tə́ŋ nɔ fɛ̄ŋ’ byuunɔ, ‘B̈ii nyíɛ! Ɔ le fīi,’ kə bii mə bɛ́ŋ fɛ. 22Bʉə-mbii ndə bɔ̂ŋ tʉʼ lʉ̀ ŋwɔŋ-yʉə ndə məbɛ bʉə ndə Nyii Kùŋ Tə́ŋ ghɔŋbə bʉəyʉkəŋgieNyii nə mbii bu kóʼ kə́ chìi nubəcheʼbə leʼnə nuchíechubə ndə məfə́ʼhə bʉə, kaʼ i kʉ̌ʉ yùhə təmə bɔ̂ŋ nɔ buŋ fə́ʼhə bʉə ndə bə nɔʼ kə séʼ bɔŋ. 23Bɔŋ b̈ii láa, mɔ nɔʼ shyíi bii nə nubə-bɔ̄ŋ inchəŋ, i buŋ yi fyú sê.
24 Bɔŋ kʉ̂ʉ nə bɛ mu bəchî-ghɔ̄ ndə ŋgʉəʼ shʉ́əshʉ́ə nɔʼ tíŋ nɔ,
njəŋkə gwù ndəŋ chichi, təmə chisuu leʼ báa fɛ,
25 bəlɔʼɔ kə́ gwùtə hə yuo,
bə bɔŋleʼ ŋɛ̀hə nu-shʉ́əshʉ́ə-bə ndə bɔ̂ŋ bɛ yuo. # 13:25 Adaya 13:10, 34:4; Joɛ 2:10.
26 “Ndʉʉmɛ, bɔ̂ŋ bu nyíɛ Vaa-Woməsʉʉ, ɔ kə́ shíʼ gwè hə mu kəmbɔʼ nə fɔŋ ghʉəʼ-shʉ́əshʉ́ə-kə leʼnə məŋwɔʼ. 27Ndʉʉmɛ, ɔ bu tə́ŋ bʉəntəŋ-bi kɔ́ mbi chə̀ŋtə bʉə-bi ndə ɔ nɔʼ kə séʼ bɔŋ ndə byûu-mbi-tə kwi, lʉ̀ hə ndəŋ byûu-mbi-tə, tə gɛ̀ dàa ndəŋ byûu-yuo-tə.
28 “B̈ii lʉ̀ ndaa ndəŋ tyʉ-fik-kə nduɔ. Ndʉʉ ndə ntɔŋtə-i wùʼtə chʉ́ʉhə məkɔ́ fyuŋ-fefe-bə, bii kínə mbɔ ndʉʉkəbyʉʉ nɔʼ kə́ŋhə. 29Nɔ bɛ haʼ nɔ ghɔ, ndʉʉ ndə bii nyíɛ nubə-ɔ̄ŋ kə́ fyú sê, b̈ii kínə mbɔ ɔ nɔʼ kə́ŋhə, mbʉə mbʉ təchulɔŋ. 30Nɔʼ m̈ɔ shyíi bii nə shʉəŋ mbɔ, ŋgwie-wo-ɔ̄ kʉʉ mì təmə nubə-ɔ̄ŋ inchəŋ nɔʼ fyú sê fɛ. 31Yuo ghɔŋbə chisêkə bu mì təmə ŋgiekə-ɔŋ bɔŋ bu nə mì fɛ.
32 “Bɔŋ ndə chî-ghɔ̄-kə byuunɔ mbʉ ndʉʉ ndə ɔ bu gwè chɔ, wotəmiyɔŋ kínə fɛ, tə buŋ kɔmə bʉəntəŋNyii ndə bɔ̂ŋ bɛ yuo, byuunɔ mbʉ Vaa, nɔ bɔŋ kínə haʼ mbʉ Tie tətɛʼ ɔ. 33B̈ii láa, gòʼ nə tʉbə-ii ghɔʼ, #13:33 Bəbɛʼbəŋwɔʼnə kəŋgie-Gili nɔ bìʼ kə́ gháaNyii. bʉʼka bii kínə ndʉʉ ndə mbʉ ŋgwɔʼmbi bu gwè chɔ fɛ.
34 “Məgwè wo ndə Nyii Séʼ bəkɔ bə fʉ̀ʼ mbʉə wo ndə ɔ tʉʼ gɛ̀ mətòʼ, ndʉʉ ndə ɔ kə lɔ̀ hə fu-ɔ, ɔ kɔ́ fɔʼtə mu kəghɔ-vâafɔʼɔ-bi, kàhə vaafɔ̀ʼ ndə ɔ tʉʼ chyìi chulɔŋ mbɔ ɔ̈ gòʼ nə tʉkə-i ghɔʼ. 35Nɔ, b̈ii káa nə tʉbə-i ghɔʼ bʉʼka bii kínə ndʉʉ ndə mbʉ ŋwɔ̌ŋ-njaa bu gwè chɔ fɛ, kə bu bɛ ndʉʉbuumbi, kə bu bɛ ndʉʉkwɔnəmbi, kə bu bɛ ndʉʉfiimbi ndə ŋkʉəʼə bu tʉʉ, byuunɔ ndʉʉsɛŋkə 36kə ɔ mə nə kə kwɔnə gwè nyíɛ bii, bii kə́ bɛ́ŋbɛ́ŋ fɛ. 37Nukə ndə mɔ tʉʼ gìe tʉ bii, mɔ nɔ tʉʼ gìe tʉ bʉə bənchəŋ. B̈ii gòʼ nə tʉbə-i ghɔʼ.”
ទើបបានជ្រើសរើសហើយ៖
Mak 13: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.