Mak 12
12
Chəŋkə te bʉə-bʉ̂ʼʉ ndə bɔ̂ŋ tʉʼ fɔ̀ʼ mutɔ
(Matia 21:33-46; Luk 20:9-19)
1Ndʉʉmɛ, ɔ chʉ́ʉhə ndə məkwə́ʼ tʉ bɔŋ nə chəŋbə mbɔ, “Wobɛʼ nɔ nə bè tɔ-təlyʉʼ-kə-i ndə i kʉ́ʉnə ntɔŋmə bə kə́ tíi nə geleb, kɔ́ʼ lɔ̂ŋ chɔ yə̀ŋhə fúu, tyúu byʉʉ chɔ, bɔ́ŋ ŋkyʉʉkə ndə mə-kə́-lyúʼ mbʉ məntɔŋ muŋgɔ, bɔ́ŋ yəŋkə ndə nchyii bu kə́ kóʼ tə́nə chɔ lɛ́nə mutɔ. Ndʉʉmɛ, chɔ̀ʼhə kɔ́ tʉ bəbɛʼbʉə mutɔ ndə bɔ̂ŋ bu kə́ yú bɔŋleʼ shyíi, lɔ̀ gɛ̀ lɔʼɔ kətə̂ŋ kədɔŋ. 2Ndʉʉ kwɛ̀tə məntɔŋ kʉ̂ʉ kʉ̀ʼnə, ɔ tə́ŋ vaafɔ̀ʼ-ɛ mbɔ ɔ̈ gɛ̀ fí shyîikə-i hə kəghɔ mbʉ bʉə-mutɔhə. 3Bɔ̂ŋ lʉ̀ ɔ gwúu ɔ, jə̀ŋ ɔŋ, ɔ gɛ̀ ghɔghɔ. 4Ɔ bìʼ tə́ŋ ibɛʼ-yə vaafɔ̀ʼ, bɔ̂ŋ gwúu ɔ kətʉ-ɔ, mɔ̀ʼ tʉvyiikə mbʉə-bɔŋ. 5Ɔ bìʼ tə́ŋ ibɛʼ-yə, bɔ̂ŋ yí ɔ. Bɔ̂ŋ chìi haʼ nɔ tʉ bəbɛʼbʉə buŋmbi. Bɔ̂ŋ gwúu bəbɛʼbə bɔŋleʼ yítə bəbɛʼbə. 6Ɔ bìʼ kie ibɛʼ-yə mbyu wo ndə mətə́ŋ, kə́ bɛ vaa-ɛ ndə ɔ kʉ̀ʉ ɔ daa. Kəliʼ ɔ tə́ŋ ɔŋ tʉ bɔŋ, ghɔ̀ŋ mbɔ, ‘Bɔ̂ŋ bu fàa ɔ.’ 7Bɔŋ mbʉ bʉə-mutɔhə gìe tʉ ŋwɔŋtə-ʉə mbɔ, ‘Nɔ bɛ mbʉ nju-i nɔ, b̈ii gwè b̈ʉʼʉ yí ɔ mbʉ bəfɔ chʉʼ bɛ yʉʼʉ-yə.’ 8Ndʉʉmɛ, bɔ̂ŋ yá ɔ, yí ɔ, fyúhə ɔŋ hə mbʉ mutɔ, mɛ̀ʼ ɔŋ mbi. 9Mbʉ ŋwɔ̌ŋ-mutɔ bu bɛ təka? Ɔ bu gwè yítə mbʉ bʉə-fɔʼɔ-mutɔ, fí mbʉ mutɔ kɔ́ tʉ bʉə-kədɔŋ. 10Bii chʉʼ nə tíi ŋwɔʼnə-Nyii ndə i ghɔ̀ŋ mbɔ:
‘Mbʉ ŋgoʼ ndə bʉə bɔ́ŋ njaa kə bìe mɛ̀ʼ, nɔ bɛ ŋgoʼ-fûu-njaa nduɔ,
11 kə́ bɛ fɔʼɔ-Tiekətʉ, i bɔŋleʼ bʉ̀ʉ shʉ-baʼa daa’ fe?” # 12:11 Ŋwɔʼnə-təLyuu 118:22-23.
12Bəntəŋbəshʉ* bʉə-Juu kə́ kʉ́ʉ fia ndə məyá Jiso, bʉʼka bɔ̂ŋ nɔ kə́ nyíɛ mbɔ ɔ nɔ nə mɔ̀ʼ mbʉ kəchəŋ te bɔŋ, bɔ̂ŋ bɔŋ fàa mbʉ bʉə. Ndʉʉmɛ, bɔ̂ŋ mɛ̀ʼtə ɔŋ gɛ̀ nə wʉə.
Məlɔ̀ʼ tashi tʉ Fɔŋ-Luŋ
(Matia 22:15-22; Luk 20:20-26)
13Bəntəŋbəshʉ-bʉə-Juu nɔ nə tə́ŋ bʉə-Falasibɛʼbə ghɔŋbə bəbɛʼbʉə-nuɔ-Hɛlo ndə məgɛ̀ mɔ̀ʼ sɔʼnduɔŋ tʉ Jiso ndə ntɛ kwəʼ-ɛ.
14Bɔ̂ŋ gwè ghɔ̀ŋ tʉ ɔŋ mbɔ, “Chicha, baʼa nɔ kínə mbɔ a nɔ bɛ wo-kəŋgie-shʉəŋ, təmə kə́ fàa shʉ-wo fɛ, bʉʼka a kyi kə́ lɛ́nə ntɛ-wo-hə fɛ, bɔŋ kə́ dàhə fia-Nyii nə shʉəŋ. Nuʼ bɛ́ŋ mbɔ b̈ə lɔ̀ʼ tashi tʉ Fɔŋ-Luŋ mɛ, kə mbee? B̈aʼa lɔ̀ʼ mɛ, kə baʼa mə lɔ̀ʼ fɛ?” 15Bɔŋ ɔ kʉ̂ʉ nyíɛ mənaa ndə i bɛ mu fyii-bɔŋ, ghɔ̀ŋ tʉ bɔŋ mbɔ, “Bii tʉʼ mùutə mɔ mbuka? B̈ii gwè nə mbyu kyʉə-kətəŋ, m̈ɔ lɛ́nə nyíɛ.” 16Bɔ̂ŋ gwè nə mbyu imɔʼ. Ɔ ghɔ̀ŋ tʉ bɔŋ mbɔ, “Bɛ ŋkwutə-kətʉ-nda-kə leʼnə yie nda ndəŋ ghɔ?” Bɔ̂ŋ bə̀ŋhə mbɔ, “Yi-Fɔŋ-Luŋ-yə.” 17Jiso ghɔ̀ŋ tʉ bɔŋ mbɔ, “B̈ii kɔ́ fɔ-Fɔŋ-Luŋ-bə tʉ Fɔŋ-Luŋ, kɔ́ yi-Nyii-yə tʉ Nyii.” Ntɛ ndə ɔ bə̀ŋhə, i chíe chu-yʉə.
Kwəʼ te məbʉ̀nə kóʼ
(Matia 22:23-33; Luk 20:27-40)
18Bʉə-Sadusi-bɛʼbə ndə bɔ̂ŋ tɛ́ŋ mbɔ məbʉ̀nə kóʼ bɛ ghɔ fɛ, gwè tʉ Jiso nə mbyu mbiʼtə kə́ ghɔ̀ŋ mbɔ, 19“Chicha, Mushi nɔ nə nyɔ̀ʼ tʉ baʼa mbɔ kaʼ liŋ-wo kwú mɛ̀ʼtə vi-i təmə bí vaa chɔ fɛ, mbʉ liŋ-iŋ yaʼ lʉ̀ mbʉ woke, bí vaa chɔ ndə mətʉ́ʼ yie-mbʉ-ŋkwu-liŋ-iŋ. 20Vâabələŋbɛʼbə nɔ nə bɛ chu ŋkwê-bɔŋ təkwiitia, fəŋ lʉ̀ woke, kwú təmə kie vâa fɛ. 21Ntyunəkə lʉ̀ mbʉ woke, kwú təmə bí fɛ, ntyunə-kəntyunə-kə bìʼ lʉ̀. 22Bɔ̂ŋ təkwiitia bənchəŋ lɔŋ ɔŋ təmə bí fɛ. Kəliʼ, ndə nchəŋnchəŋ-ɛŋ mbʉ woke kwú ghɔ. 23Bu yi bɛ chîkə ndə bʉə ndə bɔ̂ŋ nɔʼ kwútə bu bʉ̀nə kóʼ nɔ, ɔ bɛ vi nda mu bɔŋ? Bʉʼka bɔ̂ŋ təkwiitia bənchəŋ, nɔ nə lʉ̀ ɔ ndə vi-yʉə.”
24Jiso bə̀ŋhə tʉ bɔŋ mbɔ, “Nɔ luu nɔ ndə bii nɔʼ fyùu chɔ, bʉʼka bii kínə nukə ndə ŋwɔʼnə-Nyii ghɔŋ fɛ, təmə bɔŋleʼ kínə ghʉəʼ-Nyii-kə fɛ. 25Bʉʼka ndʉʉ ndə bʉə bu yi bʉ̀nə kóʼ ndəŋ kwú nɔ, bə kʉʉ yi kə́ gɛ̀ lɔŋ fɛ, təmə bɔŋ kʉʉ yi leʼ kə́ kɔ́ vâa lɔŋ fɛ, bə bɔŋ bu yi bɛ nə bʉəntəŋNyii ndə bɔ̂ŋ bɛ yuo. 26Bɔŋ te nə məbʉ̀nə kóʼ ndəŋ kwú, bii chʉʼ kə tíi mu ŋwɔʼnə-Mushi, te nə vaa-yuu ndə i tʉʼ kyʉ́ʉ, ndə Nyii kə kwə́ʼ tʉ ɔŋ chɔ fe, kə́ ghɔ̀ŋ mbɔ, ‘Mɔ nɔ bɛ Nyii-Ablahaŋ, kə́ bɛ Nyii-Aisi, bɔŋ-kə́-leʼ bɛ Nyii-Jakɔ’ fe? 27Ɔ kaa Nyii-bəŋkwusê fɛ, ɔ nɔ bɛ Nyii-bʉə ndə bɔ̂ŋ bíe ŋɛnə. Bii nɔʼ kɛŋ fyùu.”
Fɔŋ ŋkahəkwɛʼtəŋ
(Matia 22:34-40; Luk 10:25-28)
28Mbyu wobɛʼ mu bʉə dàhə nuʼ-Mushi kóʼ gwè yʉ́ ndə bɔ̂ŋ tʉʼ túŋ bəŋʉʉ mu bɔŋ, kʉ̂ʉ nyíɛ mbɔ Jiso nɔ nə bə̀ŋhə tʉ bɔŋ jyujyu, ɔ bíʼtə mbɔ, “Bɛ yɔ̂ŋ-yə ŋkahə bɛ fɔŋ ɛŋ mu bɔŋ bənchəŋ?” 29Jiso bə̀ŋhə mbɔ, “Fɔŋ ɛŋ nɔ bɛ mbɔ, ‘B̈ii yʉ́, Oo bʉə-Isilɛ. Mbʉ Nyii Tiekətʉ-yʉʼʉ, Tiekətʉ nɔ bɛ mbyu Tiekətʉ imɔʼ. 30A bɔŋ kie ndə məkʉ̀ʉ Nyii Tiekətʉ-a nə fyii-a inchəŋ nə lyʉʉhəkə-a inchəŋ, nə ndaahə-a inchəŋ leʼnə ghʉəʼkə-a inchəŋ.’ 31Biitəkə nɔ bɛ mbɔ, ‘Kʉ̀ʉ wo-kətoʼ-a ndə a kʉ̀ʉ ŋwɔŋ-aŋ.’ Ŋkahəbɛʼ bɛ ghɔ ndə i chàa bɔ̄ŋbə fɛ.” 32Mbʉ wo dàhə nuʼ-Mushi ghɔ̀ŋ tʉ ɔŋ mbɔ, “Chicha, a nɔ gìe i kʉ̀ʼnə. A nɔ gìe shʉəŋ mbɔ ɔ la bɛ haʼ mbyu Nyii imɔʼ təmə ibɛʼ-yə bɛ ghɔ fɛ. 33Ndə məkʉ̀ʉ ɔ nə fyii-a inchəŋ, nə ndaahə-a inchəŋ, leʼnə ghʉəʼkə-a inchəŋ, leʼnə məkʉ̀ʉ wo-kətoʼ-a ndə a kʉ̀ʉ ŋwɔŋ-aŋ nɔ gʉ́ə daa tə chàa kɔ-tɔ̀ŋ-kə* inchəŋ leʼnə məfɛ̀ʼndɛŋ.” 34Ndʉʉ ndə Jiso nyíɛ mbɔ ɔ bə̀ŋhə nə ndaa, ɔ ghɔ̀ŋ tʉ ɔŋ mbɔ, “A dɔ̀ŋnə mbʉə Sɔ́ʼ-Nyii fɛ.” Maa-yɔ̄ŋ kʉ̂ʉ tíŋ təmə wo leʼ mùutə ndə mə-leʼ-bíʼtə nukə tʉ ɔŋ fɛ.
Wo ndə Nyii Kùŋ Tə́ŋ bɛ vaa nda?
(Matia 22:41-46; 23:1-36; Luk 20:41-47)
35Ndʉʉ ndə Jiso kə́ dàhə mu chunjaafɛ̀ʼndɛŋNyii, ɔ bíʼtə mbɔ, “Bəkɔ bʉə dàhə nuʼ-Mushi ghɔ̀ŋ mbɔ mbʉ Wo ndə Nyii Kùŋ Tə́ŋ bɛ vaa-Dɛbi təka? 36Dɛbi nə mbəŋ-ɛŋ nə ghʉəʼ-kəLyʉʉhəNyii-kə mbʉə-ɔ nɔ kə ghɔ̀ŋ mbɔ,
‘Mbʉ Tiekətʉ nɔ nə ghɔ̀ŋ tʉ Tiekətʉ-ɔ mbɔ,
Dùʼ kwiiləŋ-mɔ tə mɔ yi mɔ̀ʼ bʉə-bàa-ba sê bəshʉ a.’ # 12:36 Ŋwɔʼnə-təLyuu 110:1.
37 Dɛbi nə mbəŋ-ɛŋ tíi ɔ nə Tiekətʉ. Nɔ, bəkɔ ɔ bʉ̀nə bɛ vaa-ɛ təka?” Mbʉ nuɔ-bʉə-buŋmbi yʉ́ ɔ nə fyii jyujyu.
38Ndə ɔ kə́ dàhə bɔŋ, ɔ gìe tʉ bɔŋ mbɔ, “B̈ii láa bʉə dàhə nuʼ-Mushi, bɔ̂ŋ nɔ kʉ̀ʉ məmɔ̀ʼ bəgaŋ kyʉə mbʉə-bɔŋ kə́ tòʼ ghʉ́ʉ nə yɔŋ, kʉ̀ʉ mbɔ b̈ə kə́ bʉ́ʉnə tʉ bɔŋ ndəŋ yəŋ-vyii-bə, 39kʉ̀ʉ ndə mədùʼ ndəŋ fɔŋkwɛʼtəŋbə mu njaagháaNyii ghɔŋbə yəŋkwɛʼtəŋbə ndəŋ yəŋ-nchəŋtə-bə. 40Bɔ̂ŋ nɔ tʉʼ kwò fɔ-bəkwuʼ-bəke-bə. Bɔ̂ŋ nɔ tʉʼ gháaNyii duhəduhə kə́ làhə shʉ mbɔ bɔ̂ŋ bɛ ndyʉndyʉ. Bʉʼka yɔ̄ŋ-yə, fɛʼɛ-yʉə bu yi shʉ́ə daa.”
Kɔ-kwuʼ-woke-kə
(Luk 21:1-4)
41Ndʉʉ ndə Jiso kə bɛ mu njaafɛ̀ʼndɛŋNyii, ɔ dùʼ bə̀ŋhə yəŋ-mɔ̀ʼ-kyʉə-kə, kə́ nyíɛ ndə bʉə tʉʼ mɔ̀ʼ kyʉə mu tɔŋ-mɔ̀ʼ-kyʉə-kə. Bʉə-kəfʉʼ buŋmbi kə́ mɔ̀ʼ kyʉə yɔ́ŋyɔ́ŋ. 42Kwuʼ wokebɛʼ ndə ɔ kə byúu daa gwè mɔ̀ʼ vâabədyʉʼ-kyʉə-bi ibûu ndə kaʼ bə chə̀ŋtə i kɔ́ haʼ vaadyʉʼʉ kyʉə. 43Ɔ tíi vâafɔʼɔ-bi mbʉə ɔ, ghɔ̀ŋ tʉ bɔŋ mbɔ, “M̈ɔ shyíi bii nə shʉəŋ, kwuʼ woke kəbyuu-ɔ̄ nɔʼ kɔ́ kɔkə chàa bʉə bənchəŋ ndə bɔ̂ŋ tʉʼ mɔ̀ʼ mu tɔŋ-mɔ̀ʼ-kyʉə-kə-ɔ̄ŋ. 44Bʉʼka bɔ̂ŋ bənchəŋ nɔ tʉʼ kɔ́ hə mu buŋmbi ndə bɔ̂ŋ kie, bɔŋ kwuʼ-woke-ɔ̄ ndə ɔ gòʼ təmə kie fɛ, mu byuukə-i nɔʼ kɔ́ fɔkə təmiyɔŋ ndə ɔ kie, nchəŋnchəŋ bəfɔ ndə ɔ kie.”
ទើបបានជ្រើសរើសហើយ៖
Mak 12: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.