Matia 19
19
Jiso dàhə te məwɔ̀ʼtə lɔŋ
(Mak 10:1-12)
1Nduɔ, ndʉʉ ndə Jiso nɔʼ kə kwə́ʼ nubə-ɔ̄ŋ liʼ, ɔ lɔ̀ hə mu lɔʼɔ Galili, gɛ̀ tə dàa mu bie Judia ndə ibɛʼ-yə via-ŋgwɛŋ-Jodaŋ-kə. 2Nuɔ-bʉə-tə buŋmbi gɛ̀ hə bɔ̌ŋ ɔŋ chɔ, ɔ chʉ́ʼ bɔŋ.
3Bʉə-Falasi kóʼ gwè tʉ ɔŋ kə́ mùutə ɔŋ ndə məbíʼtə mbɔ, “Nuʼ Mushi bɛ́ŋ mbɔ ẅo wɔ̀ʼtə lɔŋ bʉʼka luu təmiyɔŋ mɛ?”
4Ɔ bə̀ŋhə mbɔ, “Bii chʉʼ nə tíi mu ŋwɔʼnə-Nyii mbɔ wo ndə ɔ nə bɔ́ŋ bɔŋ lʉ̀ hə ndəŋ ŋgwunə-mbi nə chìi bɔŋ, bɔ̂ŋ bɛ woləŋ ghɔŋ woke fe? 5Nyii bɔŋleʼ ghɔ̀ŋ mbɔ, ‘Nɔ, bʉʼka luu-ɔ̄, woləŋ nɔ kie ndə məmɛ̀ʼtə tie-e ghɔŋ ŋkwê-i, gɛ̀ tùonə ghɔŋ vi-i, bɔ̂ŋ bəbûu bu bɛ mbyu mbʉə imɔʼ.’ 6Nɔ, bɔ̂ŋ leʼbie bʉə bəbûu fɛ, bɔ̂ŋ nɔ bɛ mbʉə imɔʼ. Nɔ, fɔkə ndə Nyii nɔʼ tùo, kə wo məmùutə mbɔ ɔ wɔ̀ʼhə fɛ.”
7Bɔ̂ŋ bíʼtə tʉ ɔŋ ndʉʉghɔfii mbɔ, “Bɔŋ chìi ka ndʉʉmɛ, Mushi kàhə mbɔ ẅo kə́ kɔ́ ŋwɔʼnə tʉ vi-i ndə mədʉ̀ʼ mbɔ ghɔŋ ɔŋ nɔʼ wɔ̀ʼtə lɔŋ, ndə məjə̀ŋ ɔŋ ɔ̈ gɛ̀ nə wi?”
8Ɔ ghɔ̀ŋ tʉ bɔŋ mbɔ, “Nɔ kə bɛ bʉʼka məshʉ́əhə-fyii ndə bii kə shʉ́əhə fyiihə-ii ndə i kə chìi Mushi mɛ̀ʼtə mbɔ bii kə́ wɔ̀ʼtə lɔŋ biibə bəke-bii. I nə bɛ nɔ lʉ̀ hə ndəŋ nchʉʉhə fɛ. 9M̈ɔ bɔŋ gìe tʉ bii mbɔ wotəmiyɔŋ ndə ɔ wɔ̀ʼtə lɔŋ ghɔŋ vi-i yaʼkɛŋ bʉʼka bəsəŋ, lʉ̀ yi-kədɔŋ-yə, nɔʼ gháa bəsəŋ.” #19:9 Bəbɛʼbəŋwɔʼnə kəŋgie-Gili nɔ bìʼ Woləŋ ndə ɔ lʉ̀ woke ndə ɔ nɔʼ fyú hə njaa ləŋ-ɛŋ nɔ gháa bəsəŋ.
10Mbʉ vâafɔʼɔ ghɔ̀ŋ tʉ ɔŋ mbɔ, “Kaʼ bɛ nɔ ndə i bɛ tʉ wo ghɔŋ vi-i, nɔ bʉ̀ʉ təmə bɔ̂ŋ chìi lɔŋ fɛ.”
11Ɔ bɔŋ ghɔ̀ŋ tʉ bɔŋ mbɔ, “Kaa bʉə bənchəŋ ndə bəkɔ bɔ̂ŋ bɛ́ŋ ŋgiekə-ɔ̄ŋ fɛ, i nɔ bɛ haʼ tʉ bʉə ndə bə nɔʼ kə kɔ́ tʉ bɔŋ. 12Luutə nɔ bɛ ghɔ ŋkʉʉŋkʉʉ ndə bəbɛʼbələŋ gòʼ təmə kie lɔŋ fɛ, bəbɛʼbə nɔ bɛ bʉʼka bə bí bɔŋ təmə bɔ̂ŋ kə́ bɛ bələŋ fɛ, bəbɛʼbə bə yɔ́ʼhə bɔŋ yɔ́ʼhə, bəbɛʼbə kʉ̀ʉ bɔŋ ndə məchìi ŋwɔŋ-yʉə nɔ bʉʼka Sɔ́ʼ Fɔŋ Yuo. Wo ndə bəkɔ ɔ bɛ́ŋ yɔ̄ŋ-yə, ɔ̈ bɛ́ŋ.”
Jiso túu bʉ̀ʉ kɔ́ kətʉ vâaŋgeŋge
(Mak 10:13-16; Luk 18:15-17)
13Bə gwè nə vâabɛʼbə tʉ Jiso mbɔ ɔ̈ mɔ̀ʼ ghɔkə-i ndəŋ bɔŋ gháaNyii tʉ bɔŋ. Vâafɔʼɔ-bi sɔ́ʼ mbʉ bʉə, 14bɔŋ Jiso ghɔ̀ŋ mbɔ, “B̈ii mɛ̀ʼtə v̈âambuɔ gwè tʉ mɔ, kə bii mə chíe bɔŋ fɛ, bʉʼka nɔ bɛ ntɛ bʉə nɔ ndə Sɔ́ʼ Fɔŋ Yuo bɛ tʉ bɔŋ.” 15Ɔ mɔ̀ʼ ghɔkə-i ndəŋ bɔŋ, gɛ̀ nə wi.
Vaakəyɔwo ndə ɔ bɛ wo-kəfʉʼ
(Mak 10:17-31; Luk 18:18-30)
16Kə nyíɛ, wobɛʼ gwè tʉ Jiso ghɔ̀ŋ mbɔ, “Chicha, bɛ ka jyujyukə ndə mɔ kie ndə məchìi ndə məkie məchímbi təmə liʼ-i ghɔ fɛ?”
17Ɔ ghɔ̀ŋ tʉ ɔŋ mbɔ, “Chìi ka a kə́ bíʼtə nukə bə tʉ mɔ ndə i bɛ jyujyu? Nɔ haʼ mbyu wo imɔʼ ndə ɔ bɛ jyujyu. Kaʼ a kə́ kʉ́ʉ kie məchímbi təmə liʼ-i ghɔ fɛ, a tʉ́ʼ bə ŋkahə Nyii.”
18Ɔ bíʼtə tʉ ɔŋ mbɔ, “Yɔ̂ŋ-yə?” Jiso ghɔ̀ŋ tʉ ɔŋ mbɔ, “Kə a mə yí wo fɛ, kə a mə gháa bəsəŋ fɛ, kə a mə lʉ́ʼ fɛ, kə a mə tɔ́ŋ bɔ̌ŋ wo ndəŋ lɛɛŋkə fɛ, 19kɔ́ kuŋhə tʉ naa-aŋ ghɔŋ tie-a bɔŋleʼ kʉ̀ʉ wo-kətoʼ-a ndə a kʉ̀ʉ ŋwɔŋ-aŋ.”
20Mbʉ vaakəyɔwo-ghɔ̄ ghɔ̀ŋ mbɔ, “Mɔ nɔʼ kɛŋ fɔ̀ʼ nubə-ɔ̄ŋ inchəŋ. Gòʼ ka nduɔ?”
21Jiso ghɔ̀ŋ tʉ ɔŋ mbɔ, “Kaʼ a kə́ kʉ́ʉ mbɔ a kɛŋ bɛ ŋkɛŋ wo, gɛ̀ fɛ̀ŋ fɔbə inchəŋ ndə a kie, kɔ́ tʉ bʉə-mbʉʼ. Kaʼ a chìi nɔ, a kie lə̂ŋ-aŋ yuo, ndʉʉmɛ, gwè, kə́ gwè hə bɔ̌ŋ mɔ.” 22Ndʉʉ ndə mbʉ vaakəyɔwo yʉ́ yɔ̄ŋ-yə, i chìi mbʉə-e dìe, ɔ lɔ̀ kə́ gɛ̀ vínəvínə, bʉʼka ɔ nɔ nə kie fɔbə yɔ́ŋyɔ́ŋ.
23Jiso ghɔ̀ŋ tʉ vâafɔʼɔ-bi mbɔ, “Nɔʼ m̈ɔ shyíi bii nə shʉəŋ mbɔ i bu yi shʉ́ə daa tʉ wo-kəfʉʼ ndə məmɛ̀ʼtə ŋwɔŋ-ɛŋ Fɔŋ Yuo sɔ́ʼ ɔ.” 24Nɔʼ m̈ɔ bìʼ shyíi bii mbɔ i nɔ yùhə tʉ nyaa-bəkatə ndə məsʉ́ʉ ndəŋ gyii-sɔʼ-kə tə chàa ndə i bɛ tʉ wo-kəfʉʼ ndə məŋíi mu Sɔ́ʼ-Nyii.
25Ndʉʉ ndə mbʉ vâafɔʼɔ yʉ́ yɔ̄ŋ-yə, i chíe chu-yʉə daa, bɔ̂ŋ kə́ ghɔ̀ŋ mbɔ, “Bɛ nda ndʉʉghɔfii ndə bəkɔ ɔ kie ŋkwaaNyii?”
26Bɔŋ Jiso lɛ́nə bɔŋ ghɔ̀ŋ mbɔ, “Yɔ̄ŋ-yə nɔ chàa ghʉəʼ-woməsʉʉ-kə, bɔŋ nubə inchəŋ yùhə tʉ Nyii.”
27Ndʉʉmɛ, Bita bə̀ŋhə mbɔ, “Nyíɛ! Baʼa nɔʼ mɛ̀ʼtə fɔbə inchəŋ ndə məgwè hə bɔ̌ŋ aŋ, sii-yaʼ bu bɛ ka?”
28Jiso ghɔ̀ŋ tʉ bɔŋ mbɔ, “Nɔʼ m̈ɔ shyíi bii nə shʉəŋ mbɔ, mu wʉʉnəmbi-fefe-kə ndʉʉ ndə Vaa-Woməsʉʉ bu dùʼ ndəŋ yetə-məgʉ́ə-kə-i, bii ndə bii nɔʼ kə gwè hə bɔ̌ŋ mɔ, bu dùʼtə ghɔ ndəŋ yetəbə njuɔ bûu nə wuŋ, kə́ sɔ́ʼ lɔŋ-Isilɛ-bə njuɔ bûu nə wuŋ. 29Wotəmiyɔŋ ndə ɔ nɔʼ mɛ̀ʼtə fɔbə nə njaahə-i byuunɔ bəliŋ-bi bələŋ leʼnə bəke byuunɔ tie-e byuunɔ ŋkwê-i byuunɔ vâa-bi byuunɔ tɔ̂bə-i, bʉʼka mɔ, bu bʉ̀nə kie tə chàa vɛʼ ghyʉʉ bɔŋleʼ kie məchímbi təmə liʼ-i ghɔ fɛ. 30Bɔŋ bʉə buŋmbi ndə bɔ̂ŋ bɛ fəŋtə bu yi bɛ ndyiʼtəbə, ndyiʼtəbə bɛ fəŋtə.”
ទើបបានជ្រើសរើសហើយ៖
Matia 19: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
