Matia 18
18
Bɛ nda bɛ fɔŋ wokwɛʼtəŋ mu Sɔ́ʼ Fɔŋ Yuo
(Mak 9:33-37; Luk 9:46-48; Mak 9:42-48; Luk 17:1-2)
1Nɔ kə bɛ ndʉʉ-ghɔ̄, vâafɔʼɔ Jiso gwè tʉ ɔŋ kə́ bíʼtə mbɔ, “Bɛ nda bɛ fɔŋ wokwɛʼtəŋ mu Sɔ́ʼ Fɔŋ Yuo?”
2Ndʉʉmɛ, ɔ tíi vaambuɔ tîetîe mbʉə ɔ, tʉ́ʼ ɔ ntəŋntəŋ bɔŋ, 3ghɔ̀ŋ mbɔ, “Nɔʼ m̈ɔ shyíi bii nə shʉəŋ mbɔ kaʼ bii gòʼ təmə kíahə bɛ nə vâambuɔ fɛ, bii mə nə ŋíi mu Sɔ́ʼ Fɔŋ Yuo fɛ. 4Wo ndə ɔ lʉ̀ ŋwɔŋ-ɛŋ sê nə vaa-ɔ̄ŋ, ɔ bu bɛ fɔŋ wokwɛʼtəŋ mu Sɔ́ʼ Fɔŋ Yuo.
5 “Wotəmiyɔŋ ndə ɔ lʉ̀ vaambuɔ nə yɔ̄ŋ-yə kɔ́ mbʉə ɔ yie-mɔ nɔ lʉ̀ mɔ kɔ́ mbʉə-ɔ. 6Bɔŋ wotəmiyɔŋ ndə ɔ chìi mbyu vaambuɔ tîetîe mu vâa-bɔ̄ŋ ndə bɔ̂ŋ bɛ́ŋ mɔ, gwù mu nubə ndə i chìi wo chìi bʉ̂ʼʉ, nɔ bʉ̀ʉ mbɔ b̈ə chyúu lɔkɔʼ tê mii-ɔ, mɛ̀ʼ ɔŋ mu chəŋ muukwɛʼtəŋ, ɔ̈ bɛ́.
7 “Ŋgʉəʼ bu bɛ ndəŋ wʉʉnəmbikə ntyʉʉ təka bʉʼka bɔ̂ŋ tʉʼ bʉ́ʉhə bʉə bɔ̂ŋ kə́ gwù mu nubə ndə ĩ chìi wo chìi bʉ̂ʼʉ. Nubə ndə ĩ bʉʉhə wo ɔ gwù mu bʉ̂ʼʉ nɔ kie ndə məgwè, bɔŋ ŋgʉəʼ bu bɛ kətʉ wo ndə nubə-ɔ̄ŋ bu gwè hə kəghɔ-ɔ! 8Bɔŋ kaʼ kʉʼ mbɔ ghɔkə-a byuunɔ kwii kəwu-a chìi a chìi bʉ̂ʼʉ, ä chʉ̀ə fyúhə mɛ̀ʼ. Bʉʼka i nɔ bʉ̀ʉ tʉ a ndə məbɛ lɛŋ, kie məchímbi təmə liʼ-i ghɔ fɛ, tə chàa mbɔ ä kie ghɔbə-a ibûu byuunɔ wubə-a ibûu, bə mɛ̀ʼ aŋ mu viʼi ndə i mə nə lʉ́əŋnə fɛ. 9Bɔŋ kaʼ kʉ̀ʼ mbɔ shʉ-a chìi a chìi bʉ̂ʼʉ, ä chʉ́ʼ fyúhə mɛ̀ʼ. I nɔ bʉ̀ʉ tʉ a ndə məkie məchímbi nə vaashʉ-a imɔʼ, tə chàa mbɔ ä kie vâabəshʉ ibûu, bə mɛ̀ʼ aŋ mu viʼi.
Mbyu binjyʉʉ bɛ́nə
(Luk 15:3-7)
10 “B̈ii láa lɛ mbɔ bii mə yi dʉ̀ʉhə mbyu vaatîetîe mu vâa-bɔ̄ŋ fɛ. M̈ɔ shyíi bii mbɔ bʉəntəŋNyii-bʉə yuo nɔ tʉʼ nyíɛ shʉ Tie-ɔ ndə ɔ bɛ chɔ. 11[Vaa-Woməsʉʉ nɔ gwè ndə məkwáa tʉ-bʉə-kə ndə bɔ̂ŋ nɔʼ bɛ́ mu bʉ̂ʼtə-ʉə.]
12 “Bii kwɔ̀ʼtə mbuka? Kaʼ wo kie binjyʉʉhə ghyʉʉ, mbyu imɔʼ fɔ̀ʼ ŋwɔŋ-ɛŋ bɛ́, ɔ mɛ̀ʼtə bəʼ-njuɔ-bɔmɔʼ-nə-wuŋ-bɔmɔʼ-kə ndəŋ kwɔŋhə, gɛ̀ hə bɔ̌ŋ mbyu imɔʼ-ɛ ndə ɔ bɛ́ le fe? 13M̈ɔ shyíi bii nə shʉəŋ, ndʉʉ ndə ɔ nyíɛ ɔŋ, tʉʉ-i bu bʉ̀ʉ daa te mbʉ mbyu imɔʼ-ɛŋ ndə ɔ nyíɛ le, tə chàa njuɔ bɔmɔʼ nə wuŋ bɔmɔʼ ndə bɔ̂ŋ gòʼ təmə bɛ́ fɛ.” 14Nɔ, kaa ŋkʉʉnə tʉʉ Tie-ɔ ndə ɔ bɛ yuo mbɔ mbyu vaa mu vâaŋgeŋge-bɔ̄ŋ yi kwú bɛ́ fɛ.
Ndʉʉ ndə liŋ-aŋ chìi bʉ̂ʼʉ tʉ a
15 “Kaʼ liŋ-aŋ chìi bʉ̂ʼʉ tʉ a, gɛ̀ shyíi ɔ nə bʉ̂ʼʉ-e haʼ bii ɔ bəbûu. Kaʼ ɔ yʉ́ chu-a, təmə a nɔʼ bʉ̀nə kie liŋ-aŋ. 16Bɔŋ kaʼ ɔ gòʼ təmə yʉ́ fɛ, lʉ̀ ibɛʼ-yə mbyu wo byuunɔ bʉə bəbûu b̈ii bɔŋ gɛ̀ mɔʼɔ, kə mbɔ ŋgiekə təmiyɔŋ ndə a gìe, bʉə bu bɛ ghɔ bəbûu byuunɔ, bʉə bətia ndə bəkɔ bɔ̂ŋ nú gwù mbɔ i nɔ kʉ̀ʼnə. 17Kaʼ ɔ tɛ́ŋ ndə məyʉ́ chu-yʉə, a fʉ̀ʼtə tʉ chɔshi. Bɔŋ kaʼ ɔ tɛ́ŋ ndə mə-buŋ-yʉ́ chu chɔshi, a lʉ̀ ɔ ndə wo ndə ɔ gòʼ təmə bɛ wo-Juu fɛ leʼnə wo fí tashi. 18Nɔʼ m̈ɔ shyíi bii nə shʉəŋ mbɔ nukə təmiyɔŋ ndə bii chíe kəchisê, bə bu fəŋ chíe yuo, nukə təmiyɔŋ ndə bii chóʼ kəchisê, bə bu fəŋ chóʼ yuo.
19 “Nɔʼ m̈ɔ bìʼ shyíi bii nə shʉəŋ mbɔ kaʼ bii bəbûu kie ŋgiekə imɔʼ kəchisê ndəŋ fɔkə ndə bii bíʼtə nə yie-ɔ, Tie-ɔ ndə ɔ bɛ yuo bu fɔ̀ʼ tʉ bii. 20Bʉʼka yəŋkə ndə bʉə bəbûu byuunɔ bʉə bətia chə̀ŋtə chɔ yie-mɔ, mɔ nɔ bɛ mu bɔŋ.”
Chəŋkə te vaafɔ̀ʼ ndə ɔ tɛ́ŋ ndə məsʉ̀fyii-i hə ndəŋ bʉ̂ʼʉ ibɛʼ-yə wo
21Ndʉʉmɛ, Bita kóʼ gwè tʉ Jiso bíʼtə tʉ ɔŋ mbɔ, “Tiekətʉ, bɛ vɛʼsɛʼɛ ndə bəkɔ liŋ-ɔŋ chìi bʉ̂ʼʉ tʉ mɔ, mɔ kə́ sʉ̀fyii-ɔ ndəŋ ɔŋ? I kie ndə məyɔ́ŋ tə dàa vɛʼ təkwiitia mɛ?”
22Jiso bə̀ŋhə tʉ ɔŋ mbɔ, “Mɔ chʉʼ gìe tʉ a mbɔ vɛʼ təkwiitia fɛ, bɔŋ nɔ bɛ vɛʼ wuŋ təkwiitia ndə yəŋbə təkwiitia. #18:22 Bəkɔ bə kíahə yəŋkə-ɔ̄ŋ ghɔ mbɔ vɛʼ njuɔ təkwiitia nə wuŋ təkwiitia.
23 “Bʉʼka yɔ̄ŋ-yə, Sɔ́ʼ Fɔŋ Yuo nɔ bɛ nə Fɔŋ ndə ɔ tʉʼ kʉ́ʉ mbɔ ɔ̈ dùʼ sê, v̈âafɔʼɔ-bi gwè byìhə tʉ ɔŋ ndə kyʉə-ɛ tʉʼ tòʼ. 24Ndə bɔ̂ŋ tʉʼ byìhə, bə gwè nə ibɛʼ-yə wo tʉ ɔŋ ndə ɔ kie ŋkwo bətɔ-ɔ ndə bəmɛlɛyɔŋbəmɛlɛyɔŋ. 25Bʉʼka ɔ kə mə lɔ̀ʼ fɛ, tiefɔʼ-ɛ kàhə mbɔ b̈ə fɛ̀ŋ ɔŋ ghɔŋ vi-i, vâa-bi leʼnə fɔbə inchəŋ ndə ɔ kie, lɔ̀ʼ mbʉ ŋkwo nə yɔŋ. 26Ndʉʉmɛ, mbʉ vaafɔ̀ʼ bè kweʼtəbə-i sê bəshʉ ɔ fʉ̀ʉtə ɔŋ mbɔ, ‘Səsənəkə a Tie-ɔ, yá fyii-a, mɔ bu lɔ̀ʼ kyʉə-a inchəŋ.’ 27Bʉʼka tʉvyiikə, mbʉ tiefɔʼ-ɛ yɔ̀ʼ ghɔkə-i ndəŋ ɔŋ, chɔʼ mbʉ ŋkwo mɛ̀ʼ.
28 “Bɔŋ ndʉʉ ndə mbʉ vaafɔ̀ʼ-ghɔ̄ kə fyú mbi, nyíɛ ibɛʼ-yə vaafɔ̀ʼ ndə ghɔŋ bɔŋ kə́ fɔ̀ʼ mɔʼɔ ndə ghɔŋ ɔŋ kie vaadyʉʼʉ kyʉə, # 18:28 Vaadyʉʼʉ kyʉə-ɔ̄ nɔ bɛ kyʉə ndə bəkɔ bə lɔ̀ʼ wo-fɔ̀ʼ chɔ ndə chîmbi-fɔʼɔ-bə ghyʉʉ. ɔ kʉ̂ʉ gwù ndəŋ ɔŋ yá mii-i chʉ́ʉhə ndə mə kə́ nyuɔtə, ghɔ̀ŋ mbɔ, ‘Lɔ̀ʼ kyʉə-ɔ ndə i bɛ bətɔ-a.’ 29Ndʉʉmɛ, mbʉ vaafɔ̀ʼ bè kweʼtəbə-i sê bəshʉ ɔ, fʉ̀ʉtə ɔŋ ghɔ̀ŋ mbɔ, ‘Səsənəkə a, yá fyii-a, mɔ bu lɔ̀ʼ a.’ 30Ɔ tɛ́ŋ, lʉ̀ ɔ gɛ̀ fʉ̀əŋ chaŋ mbɔ ɔ̈ bɛ chɔ tə yi lɔ̀ʼ mbʉ ŋkwo.
31 “Ndʉʉ ndə bəbɛʼvâafɔʼɔ nyíɛ nukə ndə i fyú, i chɔ́ŋhə bɔŋ daa, bɔ̂ŋ gɛ̀ fʉ̀ʼtə nubə inchəŋ tʉ tiefɔʼ-yʉə ndə i nɔʼ fyú. 32Ndʉʉmɛ, mbʉ tiefɔʼ-ɛ tíi ɔ ghɔ̀ŋ tʉ ɔŋ mbɔ, ‘A nɔ bɛ vaafɔ̀ʼ buuŋbʉə! Mɔ nɔ nə chɔʼ ŋkwo-a inchəŋ mɛ̀ʼtə tʉ a bʉʼka a nɔ kə fʉ̀ʉtə mɔ. 33Tʉkə-a kə kie ndə məvyíi ghɔ, ndəŋ vaafɔ̀ʼ bəʼkə a, haʼ ndə tʉkə-ɔŋ kə vyíi ndəŋ aŋ fe?’ 34Mbʉ tiefɔʼ-ɛ chɔ̀ʼhə ɔŋ nə tʉʉbʉə kɔ́ tʉ bənchyii njaa-chaŋ mbɔ b̈ə chɔ́ŋhə ɔŋ tə ɔ yi lɔ̀ʼ mbʉ kyʉə inchəŋ.
35 “Nɔ bɛ haʼ nɔ, ndə Tie-ɔ ndə ɔ bɛ yuo bu chìi tʉ wotəmiyɔŋ mu bii, kaʼ ɔ gòʼ təmə sʉ̀fyii-i hə ndəŋ bʉ̂ʼʉ liŋ-iŋ mu fyii-ɔ fɛ.”
ទើបបានជ្រើសរើសហើយ៖
Matia 18: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
