Luk 5
5
Fəŋ vâafɔʼɔ
(Matia 4:18-22; Mak 1:16-20)
1Yɔŋbɛʼ, Jiso kə́ tə́nə mbʉə Taanə-kəghəŋ-kə Gɛnɛsɛlɛ#5:1 Taanə-kəghəŋ-kə Gɛnɛsɛlɛ nɔ bɛ ibɛʼ yie taanə-kəghəŋ-Galili-kə., bʉə buŋmbi kə́ yíʼtə ɔŋ, ndə məyʉ́ ŋgieNyiikə. 2Ɔ nyíɛ buubə ibûu ndə i tə́nə ŋgwuu mbʉ kəghəŋ, tʉ́ʼ bənjuŋgwɔŋ shíʼ kə́ sʉ̀ bəkasinɛ-bʉə. 3Ɔ kóʼ dùʼ mu imɔʼ kə́ bɛ yi-Samu-yə, téʼ tʉ ɔŋ, ɔ tʉ́ʉhə kɔ́ mu mbʉ kəghəŋ məniʼ. Ndʉʉmɛ, ɔ shíʼ dùʼ ndəŋ ghɔ, kə́ dàhə mbʉ bʉə ndəŋ kəbuu.
4Ɔ kʉ̂ʉ kwə́ʼ lìʼ ghɔ̀ŋ tʉ Samu mbɔ, “Tʉ́ʉhə buukə-a gɛ̀ nə yɔŋ kəyəŋ dɔ̀ŋnə mɔ̀ʼ kasinɛ-a muu ndə məyá mbɔʼ.”
5Samu bə̀ŋhə mbɔ, “Tie-ɔ, baʼa nɔʼ fɔ̀ʼ shʉ́əshʉ́ə lʉ̀ hə ndʉʉbuumbi tə mbi fíi, baʼa kə́ mɔ̀ʼ təmə kə yá fɔkə fɛ. Bɔŋ bʉʼka gìe a, mɔ bu mɔ̀ʼ mbʉ kasinɛ.” 6Bɔ̂ŋ kʉ̂ʉ mɔ̀ʼ mbʉ kasinɛ, yá mbɔʼ yɔ́ŋyɔ́ŋ tə kasinɛ-yʉə kə́ sáanə. 7Bɔ̂ŋ tíi bətieŋkɔŋ-bʉə mu ibɛʼ-yə buukə mbɔ bɔ̂ŋ gwè kwáa bɔŋ. Bɔ̂ŋ gwè lə́ŋhə mbʉ bəbuu ibûu tə i kə́ bɛ́ muu.
8Samu Bita kʉ̂ʉ nyíɛ yɔ̄ŋ-yə, bʉ́ʉnə bəshʉ Jiso ghɔ̀ŋ mbɔ, “Kə a mə kə́ŋhə mbʉə mɔ fɛ, tie-ɔ, mɔ nɔ bɛ wo-bʉ̂ʼʉ.” 9Bʉʼka mbɔ i chíe chu-i ghɔŋbə bətieŋkɔŋ-bi nə ntɛ mbɔʼ ndə bɔ̂ŋ yá. 10Bɔŋleʼ chíe chu bʉə-nuɔ-bi, Jɛŋ ghɔŋ Jɔŋ, vâa-Sabɛdi, ndə kə bɛ bətieŋkɔŋ-Samu.
Ndʉʉmɛ, Jiso ghɔ̀ŋ tʉ Samu mbɔ, “Kə a mə leʼ fàa fɛ, lʉ̀ hə nduɔ a bu kə́ yá bə bʉəməsʉʉ.” 11Ndʉʉmɛ, bɔ̂ŋ dùu buubə-ʉə kóʼ nə yɔŋ ŋgwuu-kətaanə-kəghəŋ, mɛ̀ʼtə fɔbə-ʉə chɔ inchəŋ, gɛ̀ hə bɔ̌ŋ ɔŋ.
Jiso chʉ́ʼ wo-kəlɔ
(Matia 8:1-4; Mak 1:40-45)
12Ndə Jiso bɛ mu kəyəŋkwɛʼtəŋbɛʼ, wobɛʼ gwè nə lɔkə mbʉə-ɔ. Ndʉʉ ndə ɔ nyíɛ Jiso, ɔ bʉ́ʉnə bəshʉ ɔ, fʉ̀ʉtə ɔŋ kə́ ghɔ̀ŋ mbɔ, “Tiekətʉ, kaʼ a kʉ̀ʉ, bəkɔ a chìi mɔ tʉ́ʉnə.”
13Jiso dùhə ghɔkə-i kə̀ŋ wo-ghɔ̄ ghɔ̀ŋ tʉ ɔŋ mbɔ, “Mɔ nɔ kʉ̀ʉ, tʉ́ʉnə!” Haʼ ndʉʉmɛ, mbʉ kəlɔ fyú hə mbʉə-ɔ. 14Ndʉʉmɛ, Jiso kàhə ɔŋ mbɔ, “Kə a mə shyíi wo fɛ, fəŋ gɛ̀ dʉ̀ʼ ŋwɔŋ-aŋ tʉ wofɛ̀ʼndɛŋNyii bɔŋleʼ fɛ̀ʼndɛŋ ndə Mushi kə kàhə, bʉə chʉʼ kínə mbɔ a bɛ tʉ́ʉnə.”
15Bɔŋ kəliʼ, bə buŋ bìʼ tíi yie-e yɔ́ŋyɔ́ŋ, bʉə buŋmbi gwè ndə məyʉ́ kwəʼ-ɛ bɔŋleʼ kie nchʉʼ kəghɔ-ɔ ndəŋ yɔʼbə-ʉə. 16Jiso bɔŋ nɔ nə kə́ fyúhə ŋwɔŋ-ɛŋ vɛʼbɛʼ gɛ̀ kəyəŋ-bəliinə ndə məgháaNyii.
Jiso chʉ́ʼ wo ndə ɔ kwú kəviakəmɔʼ
(Matia 9:1-8; Mak 2:1-12)
17Yɔŋbɛʼ ndə Jiso kə́ dàhə, bʉə-Falasi ghɔŋ bʉə dàhə nuʼ-Mushi ndə bɔ̂ŋ gwè hə mu lɔʼ-bətə̂ŋ-tə inchəŋ mu Galili ghɔŋbə Judia leʼnə Jɛlosalɛŋ, kə́ dùʼtə chɔ. Ghʉəʼ-Tiekətʉ-kə kə́ bɛ mbʉə-ɔ ndə məchʉ́ʼ bʉə-bəyɔʼ.
18Kə nyíɛ, bʉəbɛʼbə kə́ gwè bɛ̀ʼ wo ndə ɔ nɔʼ kwú kəviakəmɔʼ ndəŋ mbyuukə, kɔ̀ɔtə ndə məsʉ́ʉ, mɔ̀ʼ ɔŋ bəshʉ Jiso. 19Bɔ̂ŋ kʉ̂ʉ kɔ̀ɔtə ndə məsʉ́ʉ kəŋkaa, bʉʼka bʉə buŋmbi, bɔ̂ŋ kóʼ kətʉ njaa#5:19 Bʉə-Juu nɔ nə kə́ bɔŋ njaahə-ʉə nɔ bɔ̂ŋ mɔ̀ʼ ghɔ̂ʼ chɔ, lyʉ́ʉ tʉkə-i nə chiabə təmə kwɛ̀ŋkwɛ̀ŋ fɛ. Chìi yuhəbə mbi ndə məkóʼ gɛ̀ kətʉ ghɔ., shùʼ mbyuu chɔ, shúʼhə ɔŋ ndəŋ mbyuukə-i, mɔ̀ʼ bəshʉ Jiso ntəŋntəŋ bʉə. 20Jiso kʉ̂ʉ nyíɛ ntɛ ndə bɔ̂ŋ mɔ̀ʼfyiihə-ʉə ndəŋ ɔŋ, ɔ ghɔ̀ŋ mbɔ, “Tieŋkɔŋ-ɔŋ, bə nɔʼ sʉ̀fyii hə ndəŋ bʉ̂ʼʉ-a.”
21Bʉə-Falasi ghɔŋbə bʉə dàhə nuʼ-Mushi chʉ́ʉhə kə́ kwɔ̀ʼtə tʉbə-ʉə mbɔ, “Wo-ɔ̄ bɛ nda kə́ kwə́ʼ chʉ̀əʼhə Nyii? Bɛ nda ndə bəkɔ ɔ sʉ̀fyii-i hə ndəŋ bʉ̂ʼʉ-wo, yaʼkɛŋ Nyii tətɛʼ ɔ?”
22Jiso kə́ kínə nukə ndə bɔ̂ŋ kə́ kwɔ̀ʼtə, bíʼtə tʉ bɔŋ mbɔ, “Chìi ka bii kə́ bíʼtə nubə-ɔ̄ŋ mu fyii-bii? 23Yùhə yɔ̂ŋ-yə, ndə məghɔ̀ŋ mbɔ, ‘Bə nɔʼ sʉ̀fyii hə ndəŋ bʉ̂ʼʉ-a’ mɛ, kə məghɔ̀ŋ mbɔ, ‘Lɔ̀ hə sê tòʼ ’? 24Bɔŋ mɔ bu chìi bii kínə mbɔ mbʉ Vaa-Woməsʉʉ nɔ kie ghʉəʼkə kəchisê ndə məsʉ̀fyii-i hə ndəŋ bʉ̂ʼʉ.” Ndʉʉmɛ, ɔ ghɔ̀ŋ tʉ wo-ghɔ̄ ndə ɔ nɔʼ kə kwú kəviakəmɔʼ le mbɔ, “Mɔ nɔ tʉʼ ghɔ̀ŋ tʉ a mbɔ, lɔ̀ hə sê, lʉ̀ mbyuukə-a, gɛ̀ chunjaa.”
25Haʼ ndʉʉmɛ, ɔ lɔ̀ hə sê bəshʉ bɔŋ, lʉ̀ fɔbə ndə ɔ nʉ̀ʉ ndəŋ ghɔ, kə́ tòʼ lə̀ʼtə Nyii gɛ̀ chunjaa. 26I chàa bɔŋ bənchəŋ, faa-kwu-kə yá bɔŋ, bɔ̂ŋ kə́ lə̀ʼtə Nyii, ghɔ̀ŋ mbɔ, “Baʼa nyíɛ nufinəbə laa.”
Jiso tíi Lɛvi
(Matia 9:9-13; Mak 2:13-17)
27Yɔ̄ŋ-yə kʉ̂ʉ tíŋ, Jiso fyú mbi nyíɛ wo fí tashibɛʼ yie-e kə́ bɛ Lɛvi, ɔ kə́ dùʼ mu vaa-njaa fí tashi. Jiso ghɔ̀ŋ tʉ ɔŋ mbɔ, “Gwè hə bɔ̌ŋ mɔ.” 28Lɛvi lɔ̀ hə sê, mɛ̀ʼtə fɔbə inchəŋ, gɛ̀ hə bɔ̌ŋ ɔŋ.
29Ndʉʉmɛ, Lɛvi shʉ̀tə nchəŋtəkwɛʼtəŋ mu njaa-ɔ bʉʼka Jiso. Buŋmbi bʉə fí tashi gwètə chɔ ghɔŋbə bəbɛʼbʉə kə́ yú. 30Bʉə-Falasi ghɔŋbə bʉə dàhə nuʼ-Mushi ndə bɛ bʉə nuɔ-bʉə kə́ luŋtə gìe tʉ vâafɔʼɔ-Jiso mbɔ, “Chìi ka bii kə́ yú fɔbə bɔŋleʼ nú ndʉʼmə biibə bʉə fí tashi ghɔŋbə bʉə-bʉ̂ʼʉ?”
31Jiso bə̀ŋhə mbɔ, “Kaa w̃o shʉ́əshʉ́ə ndə ɔ gɛ̀ tʉ dota fɛ, nɔ gɛ̀ wokəyɔʼ. 32Mɔ gwè ndə mətíi bʉə ndə bɔ̂ŋ kwɔ̀ʼtə mbɔ bɔ̂ŋ bɛ ndyʉndyʉ fɛ, mɔ nɔ gwè tʉ bʉə-bʉ̂ʼʉ mbɔ bɔ̂ŋ chʉʼ shìe liɛŋtə-ʉə ndəŋ bʉ̂ʼtə-ʉə.”
Bə bíʼtə nubə tʉ Jiso te muujimə
(Matia 9:14-17; Mak 2:18-22)
33Bɔ̂ŋ gìe tʉ Jiso mbɔ, “Vâafɔʼɔ-Jɔŋ nɔ kə́ chʉʼ jì muu bɔŋleʼ gháaNyii, vâafɔʼɔ-bʉə-Falasi kə́ chìi haʼ nɔ. Bɔŋ babə gòʼ nə məyú ghɔŋ mənú muu.”
34Jiso bə̀ŋhə tʉ bɔŋ mbɔ, “Bəkɔ a chìi bʉə-ŋkɔʼnə woləŋ ndə ɔ tʉʼ chìi lɔŋ, jì muu ghɔŋ bɔŋ kə́ bɛ mɔʼɔ mɛ? 35Bɔŋ chîbə tʉʼ gwè ndə bə bu lʉ̀ mbʉ woləŋ ndə ɔ tʉʼ chìi lɔŋ kəghɔ-bɔŋ, ndʉʉmɛ bɔ̂ŋ bu kə́ jì muu.”
36Jiso mɔ̀ʼ chəŋkə-ɔ̄ŋ tʉ bɔŋ, “Wo mə jɔ̀ʼ via-ndyi-fefe-kə gɛ̀ tɛ́nɛ ndyi kənduɔŋ nə yɔŋ fɛ. Kaʼ ɔ chìi nɔ, təmə ɔ nɔʼ jɔ̀ʼ ndyi-fefe-e təmə mbʉ kəvia ndyi fefe mətòʼ ghɔŋbə ndyi kənduɔŋ fɛ. 37Təmə wo bɔŋ-mə-leʼ lʉ̀ ndʉʼ-sʉ́ʼnə-mə gɛ̀ véʼ mu nduɔŋ-kəbɔʼ-kə ndə bə chìi nə gwo-nyaa fɛ. Kaʼ ɔ chìi nɔ, mbʉ məndʉʼ fyùʼ, mbʉ gwo sáanə, mbʉ məndʉʼ tyùnə sê, mbʉ kəbɔʼ byʉ́ʼ. 38Mbee, bə nɔ kie ndə məvéʼ ndʉʼ-sʉ́ʼnə-mə mu bɔʼ-fefe-kə. 39Wo bɔŋleʼ kaa ghɔ ndə bəkɔ ɔ nú ndʉʼ-tə̀ŋ-mə, bʉ̀nə kə́ bíʼtə ndʉʼ-sʉ́ʼnə-mə fɛ, bʉʼka ɔ bu ghɔ̀ŋ mbɔ nɔ bʉ̀ʉ yi-yə ndə i tə̀ŋ.”
ទើបបានជ្រើសរើសហើយ៖
Luk 5: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
