Luk 3
3
Jɔŋ ndə ɔ̃ kɔ́ muu shʉ̀tə fia
(Matia 3:1-12; Mak 1:1-8; Jɔŋ 1:19-28)
1Ndʉʉ ndə Tibelu kə́ sɔ́ʼ fɔŋ ndəŋ ŋgʉʼhə njuɔ taa nə wuŋ, vɛʼ-ghɔ̄ Bɔŋtio Bale kə́ bɛ gɔməna Judia, Hɛlo kə́ sɔ́ʼ Galili, liŋ-iŋ Fili kə́ sɔ́ʼ Itolia ghɔŋ Talakoniti, Lisania kə́ sɔ́ʼ Abilɛŋ. 2Vɛʼ-ghɔ̄, Anashi ghɔŋ Kaifa kə́ bɛ bətiefɛ̀ʼndɛŋkwɛʼtəŋNyii, Nyii kwə́ʼ tʉ Jɔŋ vaa-Sakalia mu kwɔŋkəyəŋnə. 3Jɔŋ gɛ̀ mu lɔʼ-bətə̂ŋ-tə buŋmbi mbʉə Jodaŋ, kə́ tòʼ kwə́ʼ ŋgieNyiikə mbɔ b̈ʉə la fí muu ndə mədʉ̀ʼ mbɔ bɔ̂ŋ nɔʼ shìe liɛŋtə-ʉə ndəŋ bʉ̂ʼtə-ʉə, gwè tʉ Nyii, ɔ bɔŋleʼ sʉ̀fyii hə ndəŋ mbʉ təbʉ̂ʼ. 4Haʼ ndə bə nyɔ̀ʼ mu ŋwɔʼnə-Nyii nə ŋgie-Adaya-kə, yʉkəŋgieNyii mbɔ,
“Gyʉʉ-wobɛʼ nɔ tʉʼ tíi mu kwɔŋkəyəŋnə kə́ ghɔ̀ŋ mbɔ,
‘B̈ii shʉ̀tə fia Tiekətʉ,
b̈ii shʉ̀tə fiatə-i, ï tə́nə ndyʉndyʉ.
5Bə bu lə́ŋhə lʉʉnəbə inchəŋ,
bə bu sə̀ʼ kwɔŋhə ghɔŋbə ŋkoʼhə.
Fia-bəŋgəŋ-tə bu tə́nə ndyʉndyʉ,
fia-chə́ŋtə-tə lʉ̀ʉhə.
6Bʉə bənchəŋ bu nyíɛ ndə
Nyii bu kwáa bɔŋ.’ ”#3:6 Adaya 40:3-5.
7Jɔŋ gìe tʉ bʉə ndə bɔ̂ŋ tʉʼ gwè fí muu mbɔ, “Mbəŋ-yii ŋgwie kəfɛfɛ! Shyùu nda shyùu tyunəkə-ii mbɔ bii líi tʉʉbʉə Nyii-ɔ̄ŋ ndə i tʉʼ gwè nɔ? 8B̈ii kʉ́ʉnə ntɔŋmə ndə mədʉ̀ʼ mbɔ bii nɔʼ shìe liɛŋtə-ii hə ndəŋ bʉ̂ʼtə-ii. Kə bii mə buŋ kə́ kwɔ̀ʼtə ndə məghɔ̀ŋ tʉ ŋwɔŋ-yii mbɔ, ‘Ablahaŋ nɔ bɛ tie-yaʼ ’ fɛ. Mɔ nɔ tʉʼ shyíi bii, bəkɔ Nyii chìi vâa tʉ Ablahaŋ ndəŋ ŋgoʼhə-ɔ̄ŋ. 9Bə nɔʼ shʉ̀tə njɔŋ tʉ́ʼ ndəŋ ghûu-bətyʉ-tə, tyʉkə təmiyɔŋ ndə i bu gòʼ təmə kʉ́ʉnə ntɔŋ-jyujyu-mə fɛ, bə bu gwìa mɔ̀ʼ sê tɔ̀ŋ mu viʼi.”
10Mbʉ bʉə bíʼtə mbɔ, “Baʼa bɛ təka nduɔ le?”
11Jɔŋ bə̀ŋhə mbɔ, “Ẅo ndə ɔ kie ndyihə ibûu, kɔ́ imɔʼ tʉ wo ndə ɔ gòʼ təmə kie fɛ. Wo ndə ɔ kie fɔyubə, ɔ̈ chìi haʼ nɔ.”
12Bʉə fí tashi gwè haʼ ghɔ ndə məfì muu, bíʼtə tʉ ɔŋ mbɔ, “Chicha, baʼa bɛ təka?”
13Jɔŋ ghɔ̀ŋ tʉ bɔŋ mbɔ, “Kə bii mə kə́ fí kyʉə i tíŋ ntyʉʉ ndə bii kie ndə məfì fɛ.”
14Bəsɔgebɛʼbə gwè, bíʼtə tʉ ɔŋ mbɔ, “Baʼa bɛ təka?”
Ɔ bə̀ŋhə mbɔ, “Kə bii mə kə́ kwɛ̀ŋhə bʉə mbɔ bɔ̂ŋ kɔ́ kyʉə-yʉə tʉ bii fɛ, byuunɔ mɔʼɔ lɛɛŋkə kətʉ-bɔŋ fɛ. T̈ʉʉ-yii bʉ̀ʉ ndə lɔʼɔbə-ii.”
15Mbʉ bʉə nɔ nə gòʼ nə shʉtə-ʉə sêfia, bɔ̂ŋ kə́ kwɔ̀ʼtə mu fyii-bɔŋ mbɔ bəkɔ Jɔŋ bɛ Wo ndʉʉbɛʼ ndə Nyii Kùŋ Tə́ŋ. 16Jɔŋ bə̀ŋhə tʉ bɔŋ mbɔ, “Mɔ nɔ tʉʼ kɔ́ muu tʉ bii, bɔŋ wo tʉʼ gwè ndə ɔ bu shʉ́ə chàa mɔ, mɔ kʉ̀ʼnə ndə məyɔ̀ʼ ghyʉʉ-bətakwu-i fɛ. Ɔ bu kɔ́ LyʉʉhəNyiikə#3:16 Məkɔ́ LyʉʉhəNyiikə, nɔ bɛ məbáa wo mu LyʉʉhəNyiikə haʼ ndə b̃ə báa wo muu ndə məfì muu nɔ. ghɔŋbə viʼi tʉ bii. 17Baŋ fʉ́əʼ lɛshi nɔ kəghɔ-ɔ, ndə məyʉ̀əʼ yəŋ-bʉ́ʼ-lɛshi-kə-i, ndə məbyíi yʉʼ-i kə́ŋhə mu kwo, chə̀ŋtə fʉlʉlʉbə ghɔŋbə vɛtə tɔ̀ŋ mu viʼi təmə i mə nə lʉ́əŋnə fɛ.” 18Jɔŋ shyùu tyunəkə-ʉə ntɛntɛhə ndə ɔ kə́ lɔ̀ʼ mbʉ ntəŋjyujyu.
19Bɔŋ Jɔŋ kʉ̂ʉ sɔ́ʼ Gɔməna Hɛlo bʉʼka ɔ lʉ̀ Hɛlodia ndə ɔ kə bɛ vi-liŋ-iŋ ghɔŋbə nu-bʉəbʉəbɛʼ-bə ndə ɔ nɔʼ chìi, 20Hɛlo bìʼ chìi ibɛʼ-yə fɔŋ bʉ̂ʼʉ ndə məfʉ̀əŋ Jɔŋ chaŋ.
Ntɛ ndə Jiso kə fí muu
(Matia 3:13-17; Mak 1:9-11)
21Bə kɔ́ muu tʉ Jiso ghɔ mu vɛʼ ndə bə kə kə́ kɔ́ tʉ bʉə bənchəŋ. Ndʉʉ ndə ɔ nə kə́ gháaNyii, yúotə ŋɔ́ʼnə, 22LyʉʉhəNyiikə shíʼ gwè ndəŋ ɔŋ, kie mbʉə bɛ nə tambʉətə, gyʉʉ gwè hə yuo kə́ ghɔ̀ŋ mbɔ, “A nɔ bɛ vaa-ɔŋ ndə mɔ kʉ̀ʉ daa, tʉʉ-ɔ nɔ bʉ̀ʉ ndəŋ aŋ jyujyu.”
Gyʉʉ-wobɛʼ Jiso
(Matia 1:1-17)
23Jiso nɔ nə kə chʉ́ʉhə fɔʼɔ-ɛ kə́ bɛ ŋgʉʼhə wuŋ tia.
Jiso nɔ nə bɛ vaabələŋ, bə kwɔ̀ʼtə mbɔ nɔ bɛ vaa-Jɔsɛ, vaa-Hili, 24vaa-Matat, vaa-Lɛvi, vaa-Mɛki, vaa-Jana, vaa-Jɔsɛ, 25vaa-Matatia, vaa-Ɛmɔ, vaa-Nahuŋ, vaa-Esli, vaa-Nagai, 26vaa-Mat, vaa-Matatia, vaa-Sɛmin, vaa-Jɔsɛkə, vaa-Joda, 27vaa-Juanaŋ, vaa-Lɛsa, vaa-Sɛlubabɛ, vaa-Shɛtiɛl, vaa-Nɛli, 28vaa-Mɛki, vaa-Adi, vaa-Kosam, vaa-Ɛmadam, vaa-Ɛlɛ, 29vaa-Joshua, vaa-Eliɛsa, vaa-Jolim, vaa-Matat, vaa-Lɛvi, 30vaa-Simiɔŋ, vaa-Juda, vaa-Jɔsɛ, vaa-Jonam, vaa-Ɛliakiŋ, 31vaa-Mɛlia, vaa-Mɛna, vaa-Matada, vaa-Nataŋ, vaa-Dɛbi, 32vaa-Jesi, vaa-Obɛ, vaa-Boa, vaa-Salmɔŋ, vaa-Nashɔŋ, 33vaa-Aminada, vaa-Lam, vaa-Hɛslɔŋ, vaa-Bɛlɛsh, vaa-Juda, 34vaa-Jakɔ, vaa-Aisi, vaa-Ablahaŋ, vaa-Tela, vaa-Naho, 35vaa-Sɛlu, vaa-Lɛo, vaa-Bɛlɛ, vaa-Ɛbɛ, vaa-Shɛla, 36vaa-Kana, vaa-Afasa, vaa-Shɛŋ, vaa-Nua, vaa-Lamɛ, 37vaa-Mɛtusɛla, vaa-Ɛnɔ, vaa-Jali, vaa-Mahalali, vaa-Kana, 38vaa-Ɛnɔsh, vaa-Sɛ, vaa-Adaŋ, vaa-Nyii.
ទើបបានជ្រើសរើសហើយ៖
Luk 3: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
